1. ¿La xkaliʼakxilha apóstol Pablo siervos ministeriales?

 SIERVOS ministeriales tlawakgo akgtum lu xlakaskinka taskujut kcongregaciones. Pablo lu xtapalh xkaliʼakxilha umakgolh lakchixkuwin. Wa xlakata akxni katsokgnanilh kstalaninanin Cristo xalak Filipos, katachuwinalh siervos ministeriales chu lakgkgolotsin xalak congregación (Filip. 1:1).

2. ¿Tuku lakpuwan Luis xlakata siervo ministerial litaxtu?

² Lhuwa natalan lakchixkuwin tiku tamunukgonita siervos ministeriales litaxtukgo chu xatapaxuwan tlawamakgo xtaskujutkan. Makgapitsi umakgolh natalan max lakgkgawasanku chu amakgapitsin linkgoya kata. Akgtum liʼakxilhtit, Devan xkgalhi 18 kata akxni siervo ministerial limaxtuka. Pero Luis xkgalhiya liwaka 50 kata. Tuku wa Luis limasiya tuku lakpuwankgo lhuwa natalan, xla wan: «Akgtum lanka talakgalhaman kliʼakxilha pi siervo ministerial kilimaxtuka, liwaka akxni klilakpuwan la xlilhuwa tapaxkit kilimasiyaninit congregación».

3. ¿Tuku takgalhskinin nalichuwinanaw kʼuma artículo?

³ Komo wix chatum tala chixku chu tamununitata pero nina siervo ministerial litaxtuya, ¿tuku tlan natlawaya xlakata nalakgchipina uma taskujut? ¿Tuku namakgpuwantiniyan chuna natlawaya? ¿Tuku wan Biblia pi milimakgatsit? Kʼuma artículo nakgalhtiyaw umakgolh takgalhskinin. Pero pulana kalichuwinaw tuku taskujut lakgaya chatum siervo ministerial.

¿TUKU TASKUJUT LAKGAYA CHATUM SIERVO MINISTERIAL?

4. ¿Tuku taskujut lakgaya chatum siervo ministerial? (Na kaʼakxilhti dibujo).

⁴ Siervos ministeriales wa lakchixkuwin tiku kalilaksakkanit espíritu santo xlakata nakamakgtayakgo lakgkgolotsin ktipalhuwa taskujut anta kcongregación. Makgapitsi umakgolh lakchixkuwin lakkaxwilikgo niku natalichuwinan Dios chu kuenta tlawakgo pi natalan nakgalhikgo putum likgalhtawakga nema maklakaskinkgo. Amakgapitsin makgtayanankgo akxni wi tuku lakkaxtlawakan  o kaxakakan kpukgalhtawakga. Amakgapitsin kaxwilinanin litaxtukgo o wilikgo audio chu video ktamakxtumit. Maski umakgolh taskujut lu xlakaskinka, tuku tlakg xlakaskinka wa pi siervos ministeriales tliwakga kgalhikgo xtakanajlakan. Paxkikgo Jehová chu lilatamakgo xlimapakgsin. Nachuna lu kapaxkikgo xnatalankan (Mat. 22:​37-39). ¿Tuku xlitlawat chatum tala chixku tiku tamununita xlakata siervo ministerial nalitaxtu?

5. ¿Tuku xlitlawat chatum tala xlakata siervo ministerial nalitaxtu?

⁵ Biblia lichuwinan tuku xlimakgatsit tiku siervo ministerial litaxtuputun (1 Tim. 3:​8-10, 12, 13). ¿La tlan nalakgchipina uma taskujut? Talakaskin pi nalikgalhtawakgaya tuku Biblia skin chu naliskuja xlakata namakgantaxtiya. Pero pulana, xlilat nalilakpuwana tuku xlakata lakgchipimputuna uma taskujut.

¿TUKU MAKGPUWANTINIYAN NALAKGCHIPIMPUTUNA UMA TASKUJUT?

6. ¿Tuku xlilat namakgpuwantini chatum tala xlakata siervo ministerial nalitaxtuputun? (Mateo 20:28; na kaʼakxilhti dibujo).

⁶ Kalilakpuwaw tiku kinkawilinin tlakg xatlan liʼakxilhtit: Jesucristo. Tuku Jesucristo xmakgpuwantini wi tuku natlawa wa tapaxkit: xla xpaxki xTlat chu xkapaxki latamanin. Chu wa uma tapaxkit tuku makgpuwantinilh lu palha kskujli chu xtlawalh tuku xkalimakgtayalh amakgapitsin maski wi tiku xlakpuwan pi uma ni xlakaskinka taskujut xwanit (kalikgalhtawakga Mateo 20:28; Juan 13:​5, 14, 15). Komo wa tapaxkit tuku makgpuwantiniyan siervo ministerial nalitaxtuputuna, Jehová nasikulunatlawayan chu namakgtayayan nalakgchipina uma taskujut (1 Cor. 16:14; 1 Ped. 5:5).

7. ¿Tuku xlakata ni xlilat pi chatum tala, siervo ministerial nalitaxtuputun kaj xlakata amakgapitsin namalankikgo?

⁷ Kkakilhtamaku lu xlakaskinka kaliʼakxilhkan latamanin tiku tlankajwa kamakgkatsikan. Pero nichuna la kxkachikin Jehová. Tala tiku stalani xliʼakxilhtit Jesús chu wi tuku lakgchamputun xlakata paxkinan, ni kaj kgalhiputun limapakgsin xlakata nakamapakgsi amakgapitsin o ni kaj lakaskin pi nalakgayawakan akgtum lu xlakaskinka taskujut. Komo chatum lataman tiku kaj xlakaskinka litaxtuputun wi tuku xlakgayawaka kcongregación, max ni xtlawaputulh makgapitsi taskujut nema ni xlakaskinka pero xlitatlawat xlakata nakakuentajtlawakan kskujnin Jehová. Max xlakpuwa pi umakgolh taskujut maktuju (Juan 10:12). Jehová nikxni katisikulunatlawalh tiku wi tuku lakgchamputun  kaj xlakata tlankajwa o kaj xlakata xlakaskinka litaxtuputun (1 Cor. 10:​24, 33; 13:​4, 5).

8. ¿Tuku kawanilh Jesús xʼapóstoles?

⁸ Milh kilhtamaku, asta xʼamigos Jesús lu liskujkgolh xlakata wi tuku xlakgchamputunkgo pero kaj xlakata tlankajwa xkamakgkatsikan. Wa uma tuku kaʼakgspulalh chatiy xʼapóstoles: Santiago chu Juan. Xlakan skinikgolh Jesús pi xkamaxkilh akgtum lu xlakaskinka taskujut anta kxTamapakgsin. Pero Jesús ni kawanilh pi lu tlan tuku xlakgchamputunkgo wata kawanilh kgalhkutiy apóstoles: «Tiku lanka litaxtuputun kmilakgstipankan, xlilat nakaskujnani amakgapitsin chu putum tiku xapulana litaxtuputun kmilakgstipankan, xliskujnanit amakgapitsin» (Mar. 10:​35-37, 43, 44). Natalan tiku lu liskujkgo xlakata wi tuku nalakgchankgo xlakata kaskujnaniputunkgo amakgapitsin, akgtum tasikulunalin litaxtukgo kcongregación (1 Tes. 2:8).

¿TUKU MILITLAWAT XLAKATA TLAKG NAKASKUJNANIPUTUNA AMAKGAPITSIN?

9. ¿Tuku militlawat xlakata tlakg nakaskujnaniputuna amakgapitsin?

⁹ Xlikana pi lu paxkiya Jehová chu kaskujnaniputuna natalan. Maski chuna, max ni lakaskina pi nalakgayawakana la siervo ministerial. ¿Tuku namakgpuwantiniyan xlakata tlakg wi tuku natlawaya anta kcongregación? Tlan nalilakpuwana tapaxuwan nema kgalhikan akxni kaskujnanikan natalan. Lu xlikana tuku wa Jesús: «Tlakg anan tapaxuwan akxni mastakan nixawa akxni makglhtinankan» (Hech. 20:35). Xla ankgalhin stalanilh uma tastakyaw, chu wa xlakata xatapaxuwan kaskujnanilh amakgapitsin. Chu wix na tlan napaxuwaya chuna la Jesús.

10. ¿La limasiyalh Jesús pi lu xmakgapaxuwa akxni xkaskujnani amakgapitsin? (Marcos 6:​31-34).

¹⁰ Kalichuwinaw akgtum liʼakxilhtit niku limasiya pi Jesús lu xpaxuwa akxni xkaskujnani amakgapitsin (kalikgalhtawakga Marcos 6:​31-34). Akgtum kilhtamaku akxni Jesús chu xʼapóstoles lu xtlakgwankgonit, ankgolh lakgamakgat xlakata tlan xjaxkgolh. Pero lhuwa latamanin pulana chankgolh niku xlakan xʼamakgo xlakata xkgaxmatputunkgo tuku xmasiya Jesús. Xla tlan xtilaksakli ni xkamasiyanilh. Xlakata Jesús chu xʼapóstoles “ni para xkgalhikgo kilhtamaku xlakata tlan xwayankgolh”. Jesús na tlan wi tuku kaj lakapala xtikamasiyanilh chu xkawanilh pi xtaspitkgolh kxchikkan, pero xlakata xla xkapaxki «lhuwa tuku tsukulh kamasiyani» asta akxni kgotanulh (Mar. 6:35). Uma nichuna tlawalh kaj xlakata chuna xlitlawat xwanit, wata xla chuna tlawalh xlakata “lu xkalakgalhaman”. Xkamasiyaniputun xlakata xkapaxki. Jesús lu xmakgapaxuwa akxni xkaskujnani amakgapitsin.

11. ¿Tuku tlawalh Jesús xlakata xkamakgtayalh tiku xkgaxmatnikgo? (Na kaʼakxilhti dibujo).

¹¹ Jesús ni kaj watiya kalitachuwinalh Dios umakgolh latamanin. Na kamaxkilh tuku xmaklakaskinkgo. Tlawalh akgtum milagro akxni malhuwilh lhuwa liwat chu kawanilh xʼapóstoles pi xmakgpitsikgolh (Mar. 6:41). Uma tuku Jesús tlawalh kalimasiyanilh kstalaninanin la nakaskujnanikgo amakgapitsin. Nachuna kamasiyanilh pi umakgolh taskujut chuna la tuku tlawakgo siervos ministeriales na lu xlakaskinka. ¡Kalilakpuwanti la max lu paxuwakgolh xʼapóstoles! Xlakata akxtum xtaskujmakgo Jesús akxni xmakgpitsimakgo liwat nema xla xmalhuwinit asta akxni «xputumkan wayankgolh chu kgalhkgaskgolh» (Mar. 6:42). Pero ni kajwatiya uma kilhtamaku limasiyalh Jesús pi pulana wililh tuku xmaklakaskinkgo amakgapitsin nixawa tu xla xmaklakaskin. Putuminika xlatamat limaklakaskilh xlakata nakaskujnani amakgapitsin (Mat. 4:23; 8:16). Jesús lu xmakgapaxuwa akxni xkamasiyani amakgapitsin chu xkamaxki tuku xmaklakaskinkgo. Wix na tlan napaxuwaya chuna la Jesús: komo naliskuja la siervo ministerial xlakata nakaskujnaniya amakgapitsin.

12. ¿Tuku xlakata ni kililakpuwanatkan pi akinin nila makgtayananaw kcongregación?

 ¹² Komo lakpuwana pi lhuwa tuku ni katsiniya tlawaya, ni kataxlajwani. Wix kgalhiya xatlan tayat nema tlan nakalimakgtayaya natalan xalak congregación. Pulaktum tuku namakgtayayan ni nataxlajwaniya wa pi natlawaya oración chu nalikgalhtawakgaya tuku wan 1 Corintios 12:​12-30. Anta Pablo liwana wa pi wix chuna la putum amakgapitsin kskujnin Jehová, lu xtapalh litaxtuya kcongregación chu tlan namakgtayanana. Wa xlakata ni kataxlajwani maski la uku nina makgatsiya tuku talakaskin xlakata siervo ministerial nalitaxtuya. Katlawa putum tuku matlaniya xlakata naskujnaniya Jehová chu nakaskujnaniya natalan. Lakgkgolotsin kuenta natlawakgo tuku tlan tlawaya akxni nalakgayawakgoyan akgtum taskujut (Rom. 12:​4-8).

13. ¿Tuku kililakapastakatkan xlakata tuku kaskinikan natalan lakchixkuwin tiku lakgatayaputunkgo akgtum taskujut?

¹³ Atanu tuku namakgpuwantiniyan naliskuja xlakata siervo ministerial nalitaxtuya, wa pi nalakapastaka pi putum kstalaninanin Cristo xlimakgatsitkan makgapitsi tuku kaskinikan tiku siervos ministeriales litaxtuputunkgo. Chuna, putum kstalaninanin Cristo talakaskin tlan natalalinkgo Jehová, nakamakgtayakgo amakgapitsin xlakata napaxuwakgo chu nawilikgo tlan liʼakxilhtit. Pero ¿tuku talakaskin naliskuja chixku tiku lakaskin pi kalakgayawaka tlakg lhuwa taskujut kcongregación?

TUKU WAN BIBLIA PI XLITAMAKGATSIT

14. ¿Tuku wamputun pi talakaskin pi siervos ministeriales «liwana nalakapastaknankgo»? (1 Timoteo 3:​8-10, 12).

¹⁴ Kalichuwinaw makgapitsi tuku xlimakgatsitkan natalan lakchixkuwin nema lichuwinan 1 Timoteo 3:​8-10, 12 (kalikgalhtawakga). Talakaskin pi siervos ministeriales «liwana nalakapastaknankgo». Uma tachuwin na tlan wankan «kaks nalakawankgo», «namakgantaxtikgo tuku kalakgayawakan» chu «nakamaxkikan kakni». Uma ni wamputun pi nila nalitsinkgo o pi nipara tsinu nakgalhkgamanankgo (Ecl. 3:​1, 4). Pero talakaskin pi xlakaskinka naliʼakxilhkgo putum tuku nakalakgayawakan chu namakgantaxtikgo. Na naliskujkgo xlakata amakgapitsin nakalipawankgo. Komo chuna natlawakgo, putum congregación nakamaxki kakni o nakalakgachixkuwi.

15. ¿Tuku kilhchanima pi «ni nalakgaputiyunankgo» chu «ni xpaxkinanin tumin xliwanatkan chu ni kajwatiya naputsakgo tuku xʼakstukan tlan nakakitaxtuni»?

¹⁵ «Ni nalakgaputiyunankgo». Uma wamputun pi ni naʼakgskgawinankgo, nawankgo tuku  xaxlikana chu tlan nakalipawankan. Talakaskin namakgantaxtikgo xtachuwinkan chu niti naʼakgskgawikgo (Prov. 3:32). «Ni xpaxkinanin tumin xliwanatkan chu ni kajwatiya naputsakgo tuku xʼakstukan tlan nakakitaxtuni». Uma wamputun pi akxni natlawakgo negocios ni xliʼakgskgawinatkan chu na liwana xlimaklakaskinatkan tumin xalak congregación. Na ni xlilat pi nakamaklakaskinkgo natalan tiku katalalinkgo kaj xlakata natlajakgo tumin.

16. 1) ¿Tuku wamputun pi «ni lhuwa […] vino nawakgo»? 2) ¿La tlan nakgalhikan «skulunku talakapastakni», chu tuku tlan kitaxtu?

¹⁶ «Ni lhuwa vino nawakgo». Uma wamputun pi ni namalakatsalikgo chuna la wakgo kuchu chu ni nakalilakgapaskan pi lhuwa kuchu wakgo. Nachuna talakaskin pi “skulunku nakgalhikgo xtalakapastaknikan” xlakata lilatamakgo xtastakyaw Jehová. Xlikana pi putum akinin makglakgalhinanin, pero tlan nakgalhiyaw takaksni nema kitaxtu xlakata tlan talalinaw Dios.

17. ¿Tuku xlitatlawat xlakata naliʼakxilhkan komo chatum tala tlan makgantaxti akgtum taskujut? (1 Timoteo 3:10; na kaʼakxilhti dibujo).

¹⁷ Atanu tuku na talakaskin wa pi “pulana nakaliʼakxilhkan, xlakata nakatsikan komo tlan namakgantaxtikgo uma taskujut”. Uma wamputun pi akxni chatum tala chixku siervo ministerial nalitaxtu, limasiyanita nawan pi tlan makgantaxti taskujut nema lakgayawakan. Wa xlakata, akxni lakgkgolotsin nakalakgayawakgo akgtum taskujut talakaskin naliskujkgo xlakata natlawakgo chuna la kawanikanit chu natlawakgo chuna la wan xkachikin Jehová. Liwana xliʼakgatekgsatkan la xlitatlawat taskujut chu tuku kilhtamaku talakaskin namasputukgo. Komo naliskujkgo xlakata liwana natlawakgo taskujut nema kalakgayawakan, amakgapitsin natalan xalak congregación naʼakxilhkgo chu nakatsikgo pi umakgolh natalan tlan makgantaxtikgo taskujut nema kalakgayawakan. Lakgkgolotsin, kakalilakpuwantit natalan lakchixkuwin tiku tamunukgonita nema tlan xkamasiyanitit la natlawakgo taskujut (kalikgalhtawakga 1 Timoteo 3:10). Kalilakpuwanti, ¿anan kmincongregación natalan lakgkgawasan tiku tamunukgonita nema kgalhikgo akgkaw asta akgkutati kata o tlakg laktsujku? ¿Lakgatikgo kgalhtawakgakgo? ¿Mastakgo xtakgalhtinkan ktamakxtumit chu ankgalhin lichuwinankgo Dios? Komo chuna, tlan nakalakgayawayatit makgapitsi taskujut nema tlantiya tlawakgo. Uma nakamakgtayayan nakaliʼakxilhatit komo tlan tlawakgo akgtum taskujut. Komo chuna natlawayatit, akxni tlakg laklankata nawankgo umakgolh lakgkgawasan max namakgatsikgo tuku talakaskin xlakata siervos ministeriales nalitaxtukgo.

18. ¿Tuku wamputun pi “ni naʼanan tuku nitlan nakalimawakakan”?

 ¹⁸ Talakaskin pi tiku siervos ministeriales litaxtuputunkgo “ni naʼanan tuku nitlan nakalimawakakan”. Uma wamputun pi ni xliʼanat tuku nalimasiya pi tlawakgonit akgtum talakgalhin. Xlikana pi min kilhtamaku kstalaninanin Cristo kalimawakakan tuku ni xlikana. Jesús chuna akgspulalh chu lichuwinalh pi kstalaninanin nachuna xʼamakgo titaxtukgo (Juan 15:20). Maski chuna, natalan tiku liskujkgo nakgalhakgaxmatkgo xlimapakgsin Jehová chuna la tlawalh Jesús, tlan nakaʼakxilhkan kcongregación (Mat. 11:19).

19. ¿Tuku kilhchanima “kaj chatum puskat kgalhikan”?

¹⁹ Tiku siervos ministeriales litaxtuputunkgo chu tamakgaxtokgkgonita “kaj chatum xpuskatkan xlikgalhitkan”. Xlikgalhakgaxmatatkan xlimapakgsin Jehová nema lata xapulana lakkaxwililh: pi tamakgaxtokgat kajwatiya litakgatsi chatum chixku chu chatum puskat (Mat. 19:​3-9). Xlikana, putum kstalaninanin Cristo nikxni xlitlawatkan talakgxtumit nema ni xlitatlawat (Heb. 13:4). Pero chixku tiku tamakgaxtokgnit wi atanu tuku xlitlawat. Nikxni naʼakgskgawi xpuskat chu ni natlawa tuku nakamalakpuwani amakgapitsi lakpuskatin pi kalakgati (Job 31:1).

20. ¿Tuku tlawa chatum chixku tiku tlan pulalin xfamilia?

²⁰ Na talakaskin pi siervos ministeriales “lu tlan nakapulalinkgo xkamanankan chu xfamiliajkan”. Tiku xʼakgxakga familia litaxtukgo lu xlakaskinka xliʼakxilhatkan tuku kalakgayawakanit, talakaskin napulalinkgo takaknin kfamilia akgatunu semana. Akxtum nakatalichuwinankgo Dios putum tiku xalak xfamilia. Chu nakamakgtayakgo xkamanankan xlakata tlan natalalinkgo Jehová (Efes. 6:4). Chixku tiku liwana kuenta tlawa xfamilia limasiya pi tlan nakuentajtlawa congregación (katamalakxtupi tuku wan 1 Timoteo 3:5).

21. ¿Tuku tlan natlawaya komo nina siervo ministerial litaxtuya?

²¹ Komo wix nina siervo ministerial litaxtuya, kkamakgpuwantiniyan katlawani oración Jehová chu liwana kalakputsanani tuku akxilhwi kʼuma artículo. Kalilakpuwanti tuku xlimakgatsitkan tiku siervos ministeriales litaxtuputunkgo chu kaliskujti namakgantaxtiya. Kalilakpuwanti la xlilhuwa paxkiya Jehová chu kinatalankan. Katlawa tuku namakgpuwantiniyan nakaskujnaniputuna (1 Ped. 4:​8, 10). Komo chuna natlawaya napaxuwaya nakaskujnaniya minatalan xalak congregación ¡Jehová kasikulunatlawalh tuku tlawapat xlakata siervo ministerial litaxtuputuna! (Filip. 2:13).