¿TUWA makgkatsiya miʼakstu nakgalhtawakgaya akgatunu semana? ¿Lakgachipiniya? Min kilhtamaku, lhuwa tiku chuna kinka’akgspulayan. Anan lhuwa tuku ankgalhin tlawayaw maski talakaskin nalimaxtuyaw kilhtamaku chu lu naliskujaw, chuna la akxni paxaw. Pero lu tlan makgkatsiyaw akxni chuna tlawayaw. Na tlan chuna namakgkatsiyaw akxni nalikgalhtawakgayaw Biblia, tlan nakinkamaskulunkiyan xTachuwin Dios xtachuna akxni lipaxaw chuchut (Efes. 5:26). Kalichuwinaw makgapitsi tuku tlan namakgtayayan:

• Katlawa akgtum programa. Pulaktum tuku tlakg xlakaskinka nema kuenta xlitlawatkan kstalaninanin Cristo wa pi x’akstukan nakgalhtawakgakgo (Filip. 1:10). Xlakata ni napatsankgaya tuku tsokgwilinita kmimprograma, kamawaka kxmalakcha mirefri o niku tlan na’akxilha. Na max namakgtayayan komo nawiliya alarma kminteléfono xlakata namakasanan akxni atsinu tsankga nalakgchan akxni nakgalhtawakgaya.

• Kalaksakti tuku tlakg namakgtayayan nakgalhtawakgaya. Makgapitsi ni tuwa makgkatsikgo lhuwa kilhtamaku nakgalhtawakgakgo, pero amakgapitsin tuwa makgkatsikgo, chu wa xlakata lakkaxwilikgo pi ni lhuwa kilhtamaku katikgalhtawakgakgolh. Chu wix, ¿tuku tlakg ni tuwa makgkatsiya? Kalilakpuwanti uma akxni natlawaya mimprograma xlakata nakgalhtawakgaya. ¿Tuku tlan natlawaya komo akxni nalakgchan hora nema laklhkawilinita ni kgalhtawakgaputuna? Kalitsakgsa maski kaj akgkaw minuto. Max nalakpuwana pi uma ni lhuwa kilhtamaku, pero tlakg tlan maski kaj tsinu nixawa nitu nakgalhtawakgaya. Max akxni tsukunitata, natikgalhtawakgaputuna atsinu (Filip. 2:13).

• Alisokg kalaksakti tuku nalikgalhtawakgaya. Komo akxni lakgchanita kilhtamaku nakgalhtawakgaya aku nalilakpuwana tuku nalikgalhtawakgaya, ni “liwana katimaklakaskinti minkilhtamaku” (Efes. 5:16). Katsokgwili k’akgtum lista artículos chu temas nema likgalhtawakgaputuna. Akxni nakgalhiya akgtum takgalhskinin katsokgwili k’uma lista, chu komo akxni kgalhtawakgapat nakgalhiparaya atanu takgalhskinin na kawili klista.

• Kalakgpali tuku natalakaskin. Xlakaskinka pi ankgalhin nalikgalhtawakgaya Biblia. Wa xlakata komo natalakaskin, kalakgpali kilhtamaku, hora, la xlilhuwa namakgapala mintakgalhtawakga chu la xlilhuwa temas nalakputsananiya.

Komo ankgalhin mi’akstu nakgalhtawakgaya lu tlan nakitaxtuniyan: tlakg tlan natalalipina Jehová, nalaksaka tuku tlan chu tlan namakgkatsiya (Jos. 1:8).