KLAKACHILH 10 xla diciembre kata 1936, kkachikin Wichita (Kansas, Estados Unidos). Kgalhtati natalan akinin chu akit xapuxku. Kinatlatni kskujnanikgo Jehová chu ni xmakgxtakgkgo. Xkawanikan William chu Jean. Kintlat siervo de compañía xlitaxtu, chuna xkawanikan tiku kamakgtaya nalakkaxwilikgo xtaskujutkan amakgapitsi lakgkgolotsin xalak xcongregación. Kinana o kintsiyuna, Emma Wagner, masiyanilh kintse nalakgapasa xaxlikana xalak Biblia. Kinana lhuwa tiku kamasiyanilh xaxlikana. Chatum tiku masiyanilh wa Gertrude Steele, tiku misionera litaxtulh kPuerto Rico * (kaʼakxilhti nota). Wa xlakata lhuwa tlan liʼakxilhtit xakkgalhi.

Klakapastaka pi akgtum kilhtamaku, sábado xwanit, akit chu kintlat kkilichuwinaw Dios. Akgkitsis kata xakkgalhi. Xakkamaxkimaw tiku xtitaxtumakgo ktiji, revista La Atalaya chu revista Consolación, nema la uku wanikan ¡Despertad! Uma kilhtamaku, kimpaiskan lu xmakgtanunit xliʼAkgtiy Guerra xLikalanka Katiyatni. Pero kintlat ni makgtanulh. Akxni xaklichuwinamaw Dios ama kilhtamaku, talakatsuwilh chatum chixku tiku makuchina xlitaxtu chu xkgachi. Tsukulh limawaka kintlat pi xapekua xwanit chu wi tuku xlikilhanit xlakata ni xʼalh kʼguerra. Uma chixku lu lakatsu lakaʼakxilhli kintlat chu wanilh: «¡Tuku xlakata ni kinkgaxiya xapekua chixku!». Lu kpekualh, pero kintlat chuntiyaku xkamaxkima revista tiku xkinkaʼakxilhmakgon. Uma tlawalh pi lu nakmaxki kakni kintlat. Anta titaxtulh chatum  soldado chu uma chixku pixlanka wanilh: «¡Wi tuku katlawani uma xapekua chixku!». Soldado akxilhli pi kaj xkgachi. Wa xlakata wanilh: «¡Kapit kminchik!». Alistalh xchatiykan ankgolh. Lu kpaxtikatsini Jehová xlakata makgtayalh kintlat ni napekuan. Kintlat xkgalhi lakatiy niku xakgsitnan kWichita, chu ama makuchina na anta xʼan takgsita.

Akxni akgtsayan kata xakkgalhi, kinatlatni stakgolh xchikkan chu lakatiy niku xakgtsitnankgoy, chu tlawakgolh aktsu chiki nema tlan xmalakxijkan. Alistalh kaw niku xtalakaskin tiku xlichuwinankgolh Dios, lakatsu kkachikin Grand Junction (Colorado). Anta kinatlatni xliskujmakgo la precursores chu ni lhuwa kilhtamaku kskujkgo kkapukuxtun chu xmakgtakgalhkgo animales. Xlakata xtasikulunalin Jehová chu xtaskujutkan kinatlatni, analh akgtum congregación kʼuma kachikin. Kintlat kimunulh 20 xla junio kata 1948, kʼakgtum kgalhtuchokgo kkasipijni, chu na tamunukgolh amakgapitsi tiku xkatsinikgonit xaxlikana. Billie Nichols chu xpuskat na tamunukgolh. Chuna la titaxtulh kilhtamaku xlakan lakgapaxialhnankgolh congregaciones, nachuna tlawakgolh xkgawasa chu xpuskat.

Kifamilia chu akit xakkgalhiyaw lu laktlan amigos tiku kskujnanikgo Jehová putuminika kilhtamaku. Akgtum liʼakxilhtit, lu xakkatalalinaw familia Steele: Don chu Earlene, Dave chu Julia, chu Si chu Martha. Lu xaklakgatiyaw xaklalitachuwinanaw tuku wan Biblia. Xatlan xliʼakxilhtitkan kimakgtayalh kkilatamat. Xlakan kimasiyanikgolh pi tlan kitaxtu chu kgalhikan tapaxuwan akxni pulana wiliyaw xTamapakgsin Dios.

Akxni xakkgalhi 19 kata, chatum tala tiku lu xtalalinkgo kifamilia, Bud Hasty, kiwanilh pi xaktaʼalh ksur xla Estados Unidos xlakata xakliskujwi la precursores, chu chuna ktlawalh. Alistalh superintendente de circuito kinkawanin pi xakaw kRuston (Luisiana). Kʼuma kachikin lhuwa xwilakgo xtatayananin Jehová tiku nialh xlichuwinankgo Dios. Superintendente kinkawanin pi xaktlawaw tamakxtumit putum semanas maski niti xʼalh. Wa xlakata kputsaw niku tlan xaktamakxtumiw chu liwana klakkaxwiliw. Xapulana kaj kinchatiykan xaktamakxtumiyaw, wa xlakata xaktalakgpalitilhayaw xlakata nakmastayaw taʼakgchuwin. Akxni chatum xmatitaxtima tuku xlakgchan, achatum xkgalhti putum takgalhskinin. Komo kʼakgtum taʼakgchuwin xtalakaskin liʼakxilhtit, kinchatiykan xaktawakayaw kplataforma, ¡maski niti xkinkaʼakxilhman! Chalh kilhtamaku chatum tala tiku xlina kata tsukulh min ktamakxtumit. Alistalh tsukukgolh minkgo tiku xakkalimakgalhtawakgemaw Biblia chu amakgapitsi xtatayananin Jehová tiku nialh xlichuwinankgo Dios. Ni makgas titaxtulh tawilalh akgtum congregación.

Akgtum kilhtamaku Bud chu akit ktachuwinaw chatum xpulalina Iglesia de Cristo. Xla kinkatlawanin makgapitsi takgalhskinin chu kinkawanin makgapitsi textos xalak Biblia nema ni xaklakgapasa. Uma klisitsilh chu tlawalh pi tlakg xaklilakpuwa tuku xakkanajla. Akgtum semana kkgalhtawakgalh asta katsisni xlakata xaktekgsli xtakgalhtin xtakgalhskinin uma chixku. Uma lu matliwakglhi la xaktalalin Jehová chu xaktatanokglhputumpara atanu xpulalina takanajla.

Akxni nina makgas xlanit uma, superintendente de circuito kiwanilh pi xakkalh kkachikin El Dorado (Arkansas). Anta xʼanan akgtum congregación nema xmaklakaskin tamakgtay. Kilhtamaku nema ktawi kʼuma kachikin, makglhuwa kkilalh kColorado xlakata xakkalh kʼoficina niku kalaksakkan tiku soldados nawankgo. Makgtum kintaʼankgolh makgapitsi precursores, pero wi tuku nitlan kinkaʼakgspulan kTexas. Kimputlaw lakxlakgolh. Ktasaniw chatum tala tiku kinkalin kxchik chu alistalh ktamakxtumit. Ktamakxtumit makatsininanka pi nitlan tuku xkinkaʼakgspulanitan, chu natalan xatapaxuwan kinkalimakgtayakgon tumin. Nachuna, tala tiku kinkalin xchik 25 dólares listalh kimputlaw.

Kputsaw tiku xkinkalin kWichita. Anta xlama  tala McCartney, tiku precursor xlitaxtu chu lu tlan xtalalin kifamilia. Xla xkgalhi chatiy xlakgkgawasan, Frank chu Francis. Asta la uku chuntiyaku lu tlan kkatalalin xchatiykan. Xlakan 25 dólares kilistamaxkikgolh xalakgwan putlaw nema xkgalhikgo, kajwatiya tumin nema xkixokgonikanit kimputlaw nema lakxlalh. Uma xapulana akxni liwana kakxilhli pi Jehová kimaxkilh tuku xakmaklakaskima xlakata pulana xakwilinit xTamapakgsin. Akxni kkalakgapaxialhnalh familia McCartney, kimalakgapasnikgolh chatum lu stlan tala tsumat tiku wanikan Bethel Crane. Xtse Bethel, xwanikan Ruth chu chatum lu xapaxuwana xtatayana Jehová xwanit xalak Wellington (Kansas). Ruth precursora litaxtulh asta akxni xmakgatsinita 90 kata. Bethel chu akit ktamakgaxtokgwi akxni nina xtakgatsi akgtum kata la xaklalakgapasnitaw, kkata 1958. Akxni xaktamakgaxtokgnitawa akxtum kskujwi la precursores kkachikin El Dorado.

Xakstalaniputunaw xatlan xliʼakxilhtitkan xtatayananin Jehová tiku xakkalakgapasnitaw lata laktsujku xakwanitaw. Wa xlakata klakkaxwiliw nakmakglhtinanaw kaxatukawa invitación nema xkinkatlawanin kxkachikin Jehová. Pulana kinkamalakgachakan la precursores especiales kWalnut Ridge (Arkansas). Chu kkata 1962 kmakglhtinaw lu tlan invitación. Kinkawanikan pi xakaw kclase 37 xla Escuela de Galaad. Lu klipaxuwaw akxni kkatsiw pi Don Steele na anta xʼama tawila. Akxni sputli clases Bethel chu akit kinkamalakgachakan kNairobi, xcapital Kenia. Klilipuwaw xlakata xakamaw makgxtakgaw Nueva York, pero lu kpaxuwaw akxni kchaw kʼaeropuerto kNairobi chu kakxilhwi pi natalan xkinkakgalhkgalhimakgon.

Lakapala klakgatiw la xwanit país Kenia chu la xlichuwinankan Dios. Xapulana tiku kkalimakgalhtawakgew Biblia chu makglhtinankgolh xaxlikana wa, Chris chu Mary Kanaiya. Xlakan chuntiyaku skujnimakgo Dios putum kilhtamaku kKenia * (kaʼakxilhti nota). Akgtum kata alistalh kinkamalakgachakan kKampala, xcapital  Uganda. Akinin xapulana misioneros tiku xakchamaw kʼuma país. Umakgolh kilhtamaku lu xatapaxuwan xwanit, xlakata lhuwa latamanin xkatsiputunkgo xaxlikana. Lhuwa tiku xtatayananin Jehová litaxtukgolh. Pero akxni akgtutu kata aitat xakwilaw kʼÁfrica, ktaspitwi kʼEstados Unidos xlakata xakamaw kgalhiyaw skgata. Tlakg klilipuwaw akxni kmakgxtakgwi África nixawa akxni kmakgxtakgwi Nueva York. Lu kkapaxkiw latamanin xalak África chu xaklakpuwanitaw naktaspitaw.

Kaw tawilayaw kxoeste Colorado, niku xwilakgo kinatlatni. Ni makgas titaxtulh lakachilh xapulana kintsumatkan, Kimberly. Chu titaxtulh 17 papaʼ lakachilh Stephany. Lu xlakaskinka kliʼakxilhwi xasasti taskujut nema klakgatayaw pi natlatni klitaxtuw. Wa xlakata kliskujwi nakkamasiyaniyaw tuku xaxlikana. Xakstalaniputunaw xatlan liʼakxilhtit nema xkinkawilinikgonitan amakgapitsin. Xakkatsiyaw pi akgtum tlan liʼakxilhtit lu kamakgtaya kamanan. Pero na xakkatsiyaw pi uma ni tlawa pi xlakan naskujnanikgo Jehová, chuna la kaʼakgspulalh kintala kgawasa chu kintala tsumat. Xlakan makgxtakgkgolh Jehová. Kkgalhkgalhi pi namin kilhtamaku xlakan nalakpuwankgo nastalaniparakgo xatlan liʼakxilhtit nema kkgalhiw.

Lu klipaxuwaw la kkamakgastakwi kilaktsumankan chu putum kilhtamaku wi tuku akxtum kkatatlawaw. Xaklamaw lakatsu kkachikin Aspen (Colorado). Xlakata anta anan niku kgamankan khielo, kimputumkan kkatsiniw uma takgaman. Xmin kilhtamaku xakanaw kgamananaw, chu uma xkinkamaxkiyan kilhtamaku nakkatachuwinanaw kilaktsumankan. Nachuna, xaklakgatiyaw xakanaw lakgtunkuwiyaw kkakiwin chu xakwiliyaw lhkuyat, lakatsu xaktawilayaw chu xakkgalhchuwinanaw. Maski lu laktsujku xwankgonit, xkinkakgalhskinkgoyan: «¿Tuku naktlawayaw akxni nakstakaw?» chu «¿Tiku naktatamakgaxtokgaw?». Kliskujwi xlakata xpaxkikgolh Jehová. Ankgalhin kkamakgpuwantiniw naskujnanikgo Jehová putum kilhtamaku chu natatamakgaxtokgkgo tiku nachuna kskujnaniputun Jehová. Na kkamakgtayaw naʼakgatekgskgo pi tlakg tlan ni laktsujku natamakgaxtokgkgo. Xaklismaninitaw nakkawaniyaw: «Tlakg tlan kaj miʼakstu lapat nawan akxni nina makgatsiya 23 kata».

Bethel chu akit ktlawaw la kinatlatnikan. Kliskujwi pi putum kilhtamaku nakkalinaw kilaktsumankan ktamakxtumit chu nakanaw lichuwinanaw Dios. Xaklakgatiyaw xakkawaniyaw natalan tiku putum kilhtamaku kskujnanimakgo Dios pi xtamakgxtakgkgolh kkinchikkan. Nachuna, lu xaklichuwinanaw pi lu xaklipaxuwayaw akxni misioneros xakkwanitaw. Xakkalimputunaw kilaktsumankan kʼÁfrica, chu xlakan na xʼamputunkgo.

Putum kilhtamaku akxtum xakkgalhtawakgayaw. Xakkatamakgatawakgayaw xlakata nakatsikgo la nakgalhtikgo takgalhskinin nema xkatlawanika kʼescuela. Xlakan xlakgatikgo chuna natlawakgo chu xkamakgtaya ni napekuankgo. Pero chuna la staktilhakgolh, lakgachunin ni xkgalhtawakgaputunkgo. Akgtum kilhtamaku ktlakgwalh  chu kkawanilh pi ni xakamaw kgalhtawakgayaw chu xʼankgolh kxcuartojkan. Lu kaks lilakawankgolh. Tsukukgolh tasakgo chu wankgolh pi xkgalhtawakgaputunkgo. Ama kilhtamaku kakxilhwi pi xakkamakgtayamaw xlakaskinka xʼakxilhkgolh tuku Jehová masiya. Alistalh lu xtapalh akxilhkgolh akxtum nakkgalhtawakgayaw. Akxni xakkgalhtawakgayaw xlakgatikgo xkinkawanikgoyan tuku xlakpuwankgo chu xmakgkatsikgo. Xmin kilhtamaku xkinkawanikgoyan pi ni lu tlan xʼakxilhkgo tuku xmasiya Biblia. Maski ni xaklakgatiyaw tuku xwankgo, pero xakkatsiyaw tuku xlikana xlakpuwankgo. Akxni xakkatachuwinanitawa, xlakan xmakgamakglhtinankgo tuku Jehová wan.

Kilhtamaku nema kkamakgastakwi kilaktsumankan lakapala titaxtulh. Xtamakgtay chu xtapulalit xkachikin Jehová kinkamakgtayan nakkamasiyaniyaw napaxkikgo Jehová. Lu klipaxuwaw pi xchatiykan precursoras litaxtukgolh akxni masputukgolh secundaria chu katsinikgolh tuku xlimakgskujkgolh. Kataʼankgolh chatiy natalan laktsuman kCleveland (Tennessee), xlakata xtalakaskin tiku xlichuwinankgolh Dios. Lu xakkapastakaw pero xaklipaxuwayaw pi kskujnimakgo Dios putum kilhtamaku. Bethel chu akit precursores klitaxtuparaw. Uma kinkamakgtayan pi alistalh xakkgalhiw talakgalhaman sustitutos naklitaxtuyaw chu nakmakgtayananaw klaklanka tamakxtumit.

Akxni nina xʼankgo kTennessee, kilaktsumankan kilakgolh kLondres (Inglaterra) chu kilakgolh kBetel. Anta Stephany lakgapasli Paul Norton, chatum betelita. Uma kilhtamaku Stephany kajku 19 kata xkgalhi. Akxni kilaparakgolh kʼInglaterra, Kimberly lakgapasli Brian Llewellyn, chatum betelita tiku xtaskuja Paul. Akxni Stephany makgatsilh 23 kata, tatamakgaxtokgli Paul. Chu akgtum kata alistalh, Kimberly tatamakgaxtokgli Brian. Kimberly xkgalhi 25 kata. Xchatiykan tamakgaxtokgkgolh akxni xmakgatsikgonita 23 kata. Lu klipaxuwaw pi xchatiykan laksakkgolh tlan xchixkukan.

Kilaktsumankan kinkawanikgonitan pi kiliʼakxilhtitkan chu xla xtata chu xnana kamakgtayalh pulana naputsakgo «xTamapakgsin Dios», asta akxni katsankganinit tumin (Mat. 6:33). Papaʼ abril kata 1998, Paul chu Stephany kawanika pi xʼankgolh kclase 105 xla Escuela de Galaad, chu alistalh kamalakgachaka kMalaui, país xalak África. Watiya ama kilhtamaku Brian chu Kimberly kawanika pi xʼankgolh skujkgo kBetel xalak Londres. Chu alistalh kamalakgachaka kBetel xalak Malaui. Lu klipaxuwaw pi kilaktsumankan liwana maklakaskinkgolh xlatamatkan.

Chuna la kkalitachuwinan xapulana, enero kata 2001 kintachuwinalh tala Marais, tiku pulalin Departamento de Servicios de Traducción. Xla kilitachuwinalh pi natalan tiku skujkgo kʼuma departamento, xlakkaxwilimakgo akgtum curso xlakata xkamakgtayaka traductores xlikalanka katiyatni, tlakg liwana xʼakgatekgskgolh tuku wan xaʼinglés nema matitaxtikgo kxtachuwinkan. Maski xakkgalhi 64 kata, xlakan xkimasiyaniputunkgo xlakata xakmastalh curso. Kimpuskat chu akit ktlawaniw oración Jehová chu kkatachuwinaw kintsekan xlakata xkinkastakyawakgon. Maski xchatiykan xlinkgoya kata chu ni xʼamakgo kgalhikgo kintamakgtaykan, xlakaskinkgo pi xakaw. Wa xlakata kchuwinalh kPatterson xlakata nakkawani pi xatapaxuwan xakamaw tlawayaw uma taskujut.

Pero ama kilhtamaku kintse katsilh pi xkgalhi cáncer. Ktachuwinalh chu kwanilh pi xakamaw tamakgxtakgaw xlakata xakmakgtayalh kintala Linda nakkuentajtlawayaw. Pero ni lakaskilh chu kiwanilh: «Tlakg nitlan ktimakgkatsilh komo ni napina». Linda nachuna kiwanilh. Wa xlakata kaw kCentro Educativo de la Watchtower, kPatterson. Bethel chu akit lu kpaxtikatsiniw pi xlakan xatapaxuwan kinkamakgtayakgon. Na kpaxtikatsiniw pi natalan xala anta kamakgtayakgolh. Akgtum  kilhtamaku xtitaxtunit la xakchanitaw kPatterson, Linda kinkamakatsinin pi kintse xninita. Chuna la kintse xkinkawanin xaktlawaw, kaj wa kuenta ktlawaw kintaskujutkan.

Lu klipaxuwaw akxni kkatsiw pi xapulana niku xakamaw mastayaw curso anta ksucursal xalak Malaui, niku xwilakgo kilaktsumankan chu xchixkukan. Klipaxuwaw pi makxtum xakwilaparaw. Alistalh kmastaw curso kZimbabue chu kZambia. Akxni akgtutu kata aitat xtitaxtunit lata xakmastamaw curso, kinkawanikan pi xaktaspitwi kMalaui. Kmakgtayanaw naktsokgaw tuku xtitaxtukgonit xtatayananin Jehová tiku kaputsastalanika kʼuma país xlakata ni makgtanukgolh kpolítica * (kaʼakxilhti nota).

Akxni kmakgxtakgwi África kata 2005, lu klilipuwamparaw. Ktaspitparaw kkinchikkan, kBasalt (Colorado). Akit chu Bethel chuntiya kliskujwi la precursores. Kata 2006, Brian chu Kimberly minkgolh tawilakgo kxpaxtun kinchikkan xlakata xkakuentajtlawakgolh chatiy xlaktsumankan, Mackenzie chu Elizabeth. Paul chu Stephany chuntiyaku wilakgocha kMalaui, chu Paul makgtapakgsi kComité de Sucursal. Akit kmakgatsimaja 80 kata, chu klipaxuwa kakxilha pi makgapitsi natalan tiku tlakg lakgkgawasanku nema kkataskujnit, lakgayakgo taskujut nema akit xaktlawa. Xlakata klakaskinaw pi tlan kakakitaxtunilh kilaktsumankan chu kinatanatnikan kliskujnitaw nakstalaniyaw xatlan liʼakxilhtit nema kinkawilinikgon amakgapitsin. Wa xlakata lu kkgalhinitaw tapaxuwan.