1, 2. 1) ¿Tuku tuwa titaxtukgo tiku xalak atanu país? (Kaʼakxilhti xapulana dibujo). 2) ¿Tuku kinkamalakapastakayan Biblia? 3) ¿Tuku takgalhskinin nakgalhtiyaw kʼuma artículo?

TITAXTUNITA liwaka 30 kata, chatum chixku xalak Ghana tiku wanikan Osei makgxtakgli xpaís kʼÁfrica chu alh kʼEuropa ^[1] (kaʼakxilhti nota niku kgalhsputa artículo). Ama kilhtamaku nina xtatayana Jehová xwanit. Xla lakapastaka pi lhuwa taʼakglhuwit kgalhilh. Wan: «Lakapala kakxilhli pi atsinu ni putum latamanin ni xlilakgaputsakgo tuku akit xaktitaxtuma. Anta lu xlonkgnan. Akxni ktaxtulh kʼaeropuerto chu xlimakgtumku kmakgkatsilh lonkgni, ktsukulh tasa». Komo lu tuwa xmakgkatsi nakatsini tachuwin xalak uma país, titaxtulh liwaka akgtum kata xlakata xtekgsli akgtum tlan taskujut. Chu xlakata makgat xlama, lu xkalakapastaka xfamilia chu xmakgkatsi pi xakstu xwi.

² Komo akinin Osei xlitaxtuw, ¿la lakaskinaw xkinkalikatsinikan? Xlakaskiw pi natalan xalak Pukgalhtawakga tlan xkinkamakgamakglhtinankgon chu xkinkalimasiyanikgon tapaxkit maski tanu kinkilhtsukutkan chu kimpaiskan. Biblia kinkamalakapastakayan kstalaninanin Cristo pi tlan kakalikatsiniw «tiku ni kalakgapasaw», uma wamputun tiku atanu xpaís (Heb. 13:2,  nota) (kaʼakxilhti recuadro «¿Tuku kilhchanima?»). Wa xlakata kʼuma artículo nakgalhtiyaw umakgolh takgalhskinin: ¿La kaʼakxilha Jehová tiku xalak atanu país? ¿Kililakgpalitkan la kaʼakxilhaw tiku tanu xpaiskan? ¿La nakamakgtayayaw tiku tanu xpaiskan tlan namakgkatsikgo kcongregación?

3, 4. Chuna la wan Éxodo 23:9, ¿la xlakaskin Jehová pi israelitas xkalikatsinikgolh tiku tanu xpaiskan xwanit chu tuku xlakata?

³ Akxni Jehová kalakgmaxtulh israelitas kʼEgipto, kalimapakgsilh nakalakgalhamankgo tiku xalak alakatanu xwankgonit chu katataxtukgocha (Éx. 12:38, 49; 22:21). Jehová xkatsi pi xlatamatkan tiku tanu xpaiskan tuwa. Wa xlakata, xkalimasiyani tapaxkit akxni xkakuentajtlawa. Akgtum liʼakxilhtit, xkamaxki talakaskin naʼankgo kkapukuxtun akxni xmakikanita tachanan xlakata xmakikgolh tuku xmakgxtakgkgonit skujnin (Lev. 19:9, 10).

⁴ Jehová ni kajwatiya kalimapakgsilh israelitas xkamaxkikgolh kakni tiku tanu xpaiskan. Jehová xlakaskin pi xlakapastakkgolh la makgkatsi tiku tanu xpaís (kalikgalhtawakga Éxodo 23:9). Asta akxni israelitas nina skujni xlitaxtukgo kʼEgipto, egipcios xkalakgmakgankgo xlakata tanu xwankgonit (Gén. 43:32; 46:34; Éx. 1:11-14). Israelitas lu tuwa tuku titaxtukgolh akxni xlamakgo niku ni xpaiskan. Wa xlakata Jehová xlakaskin xlakapastakkgolh chu tlan xkalikatsinikgolh tiku tanu xpaiskan xwanit nema akxtum xkatawilakgo (Lev. 19:33, 34).

5. ¿Tuku nakinkamakgtayayan natlawayaw chuna la Jehová chu nakalakgalhamanaw tiku tanu xpaiskan?

⁵ Jehová nitu talakgpalima. Wa xlakata akxni naminkgo tiku atanu xpaiskan kkincongregacionkan, kililakapastakatkan pi Jehová chuntiya kalilakgaputsa (Deut. 10:17-19; Mal. 3:5, 6). Kililakapastakatkan taʼakglhuwit nema max kgalhikgo. Akgtum liʼakxilhtit, max ni akgatekgskgo tachuwin chu makgapitsi latamanin nitlan kalikatsinikgo. Akxni lilakpuwanaw uma nakinkamakgpuwantiniyan nakamakgtayayaw chu nakalakgalhamanaw (1 Ped. 3:8).

6, 7. ¿Tuku limasiya pi kstalaninanin Cristo tiku judíos xwankgonit katsinikgolh ni nalakgmakganankgo?

⁶ Kstalaninanin Cristo tiku judíos xwankgonit katsinikgolh ni nalakgmakganankgo chuna la xkatlawakgo judíos tiku tanu xpaiskan xwanit (kaʼakxilhti recuadro «¿Tuku kilhchanima?»). Akxni tlawaka Pascua xla Pentecostés kata 33, kstalaninanin Cristo xalak Jerusalén tlan kamakgamakglhtinankgolh chu kalimasiyanikgolh tapaxkit tiku alakatanu xminkgonitancha chu aku kstalaninanin Cristo xwankgonit (Hech. 2:5, 44-47). Uma masiya pi xʼakgatekgskgo tuku wamputun «tlan lamakgamakglhtinankan», o, tlan nakalikatsinikan «tiku ni kalakgapasaw».

⁷ Ama kilhtamaku, makgapitsi natalan tiku xchuwinankgo griego tsukukgolh litaʼakglhuwikgo pi lakpuskatin tiku xninita xchixkukan chu griego xchuwinankgo, nitlan xkalikatsinimaka  (Hech. 6:1). Xlakata nalakkaxtlawakgo taʼakglhuwit, apóstoles kamalakgachakgolh kgalhtujun lakchixkuwin tiku xkgalhikgo tukuwani xagriego. ¿Tuku xlakata kalaksakka lakchixkuwin tiku xkgalhikgo tukuwani xagriego? Max xlakata lakpuskatin tiku nialhti xwanit xchixkukan chu griego xchuwinankgo tlan xmakgkatsikgolh (Hech. 6:2-6).

8, 9. 1) ¿Tuku takgalhskinin nakinkamakgtayayan nakatsiyaw komo lakgmakgananaw? 2) ¿Tuku nialh kililakpuwanatkan? (1 Pedro 1:22).

⁸ Maski ni akxilhaw, chuna la kinkamakgastakkanitan tlawa pi natalakgpali la kaʼakxilhaw amakgapitsin (Rom. 12:2). Nachuna, max kintalakatsukan chu tiku kataskujaw o katanaw kʼescuela max wankgo tuku nitlan xpalakata tiku tanu xkachikinkan, tanu la kamakgastakkanit o tanu xcolorkan. ¿Nachuna tsukunitaw lakpuwanaw? ¿Tuku natlawayaw akxni wi tiku nalikgalhkgamanan kimpaiskan o chuna la kinkamakgastakkanitan?

⁹ Milh kilhtamaku apóstol Pedro limasiyalh pi xkalakgmakgan tiku ni judíos xwankgonit. Pero chuna la titaxtulh kilhtamaku makgatlajalh uma nitlan talakpuwan (Hech. 10:28, 34, 35; Gál. 2:11-14). ¿Chu akinin? ¿Tuku kilitlawatkan komo naʼakxilhaw pi tlakg lanka kinkamakgkatsikanan o lakgmakgananaw? Lu kiliskujatkan ni chuna nalakpuwanaw (kalikgalhtawakga 1 Pedro 1:22). ¿Tuku nakinkamakgtayayan? Nalakapastakaw pi putum makglakgalhinanin akinin chu ni kinkalakgchanan lakgtaxtut, maski tanu tanu país xkgalhiw (Rom. 3:9, 10, 21-24). Wa xlakata ni xlilat nalakpuwanaw pi tlakg xlakaskinka akinin nixawa amakgapitsin (1 Cor. 4:7). Kililakpuwanatkan la apóstol Pablo. Xla kawanilh kstalaninanin Cristo pi nialh xalak alakatanu xwankgonit, wata «[x]tapakgsikgoy kxchik Dios» (Efes. 2:19). Putum kiliskujatkan ni nalakgmakgananaw. Chuna tlan nalilhakgananaw xasasti tayat (Col. 3:10, 11).

10, 11. ¿La limasiyalh Boaz pi xkaʼakxilha tiku tanu xpaiskan xwanit chuna la Jehová kaʼakxilha?

¹⁰ Biblia lichuwinan chatum chixku tiku xwanikan Boaz. Xla limasiyalh pi xkaʼakxilha tiku tanu xpaiskan chuna la kaʼakxilha Jehová. ¿La tlawalh? Akgtum kilhtamaku alh akxilha xkapukuxtun akxni xmakimaka tachanan. Anta akxilhli chatum puskat xalak Moab tiku xwanikan Rut. Xla lhuwa kskujma, ksakma tachanan. Maski xlimapakgsin Moisés xmaxki talakaskin naʼan maki tuku xmakgxtakgkanit, Rut kgalhskininalh komo tlan chuna xtlawalh (kaʼakxilhti recuadro «¿Tuku kilhchanima?»). Akxni Boaz katsilh uma, lu kaks malakawanilh chu asta maxkilh talakaskin nasaka nema kskujnin xkakgonit (kalikgalhtawakga Rut 2:5-7, 15, 16).

¹¹ Alistalh, Boaz tlawalh tuku liwana limasiyalh pi xlilakgaputsa Rut chu tuku tuwa xtitaxtuma xlakata atanu xpaís xwanit. Wanilh pi xkatatamakgxtakgli lakpuskatin xlakata lakchixkuwin tiku kskujmakgo ni xmakglhuwikgolh. Na lakkaxwililh pi xkgalhilh xliwat chu chuchut nema xmaklakaskin, chuna la amakgapitsi kskujnin. Boaz maxkilh kakni uma puskat tiku tanu xpaís xwanit chu matliwakglhli (Rut 2:8-10, 13, 14).

12. ¿Tuku max nala komo nakalimasiyaniyaw talakgalhaman tiku tanu xpaiskan?

¹² Boaz limasiyanilh talakgalhaman Rut, xlakata limasiyanilh tapaxkit nema ni makgxtakgnan Noemí. Pero na limasiyanilh talakgalhaman xlakata Rut xtsukunit skujni Jehová chu xputsanit xtamakgtay. Akxni Boaz  limasiyanilh Rut talakgalhaman, xtlawama la Jehová tlawa akxni limasiya tapaxkit nema ni makgxtakgnan (Rut 2:12, 20; Prov. 19:17). La uku nachuna la. Komo kalimasiyaniyaw talakgalhaman putum latamanin, tlan nakamakgtayayaw nakatsinikgo xaxlikana chu naʼakxilhkgo pi Jehová lu kapaxki (1 Tim. 2:3, 4).

13, 14. 1) ¿Tuku xlakata nakamakgamakglhtinanaw tiku tanu xpaiskan akxni minkgo kPukgalhtawakga? 2) ¿Tuku nakinkamakgtayayan tlan namakgkatsiyaw akxni tachuwinanaw tiku tanu xpaís?

¹³ Pulaktum la tlan nakalimasiyaniyaw talakgalhaman tiku tanu xpaiskan, wa pi xatapaxuwan nakamakgamakglhtinanaw kPukgalhtawakga. Lakgachunin, tiku aku chankgonit kʼakgtum país maxanankgo chu ni katalakatsuwinikgo amakgapitsin. Max na makgkatsikgo pi ni xlakaskinka litaxtukgo xlakata la kamakgastakkanit, ni lhuwa tuku kgalhikgo, la tasiyakgo o xpaiskan. Wa xlakata akinin nakatalakatsuwiniyaw chu tlan nakalikatsiniyaw. Komo kgalhiyaw aplicación JW Language, tlan namaklakaskinaw xlakata nakatsiniyaw nakamakgamakglhtinanaw kxtachuwinkan (kalikgalhtawakga Filipenses 2:3, 4).

¹⁴ Max lakgachunin ni lu tlan katimakgkatsiw natachuwinanaw tiku tanu xpaís. ¿Tuku nakinkamakgtayayan ni chuna namakgkatsiyaw? Tlan nakalitachuwinanaw tsinu kimpalakatakan. Max naʼakxilhaw pi wi tuku lakxtum kinkatlawayan nixawa tuku xlakpuwanaw. Kalakapastakwi pi akgatunu kachikinin wi tuku tlan kgalhikgo chu wi tuku ni.

15. ¿Tuku nakinkamakgtayayan nakaʼakgatekgsniyaw tiku aku smanimakgo kxasasti país?

¹⁵ ¿La nakamakgtayayaw amakgapitsin tlan namakgkatsikgo kcongregación? Talakaskin nakinkakgalhskinkanan: «Komo akit alakatanu país xaktawi, ¿la xaklakaskilh pi xkimakgamakglhtinanka?»  (Mat. 7:12). Ni lakapala kakatasitsiw tiku aku smanimakgo kxasasti país. Xlikana pi max xapulana ni katiʼakgatekgswi tuku xlakata wi tuku chuna lakpuwankgo o wi tuku tlawakgo. Pero ni kakgalhkgalhiw pi kalakpuwankgolh chu kalikatsikgolh la akinin. Tlakg tlan nawan nakaʼakgatekgsniyaw chu nakamakgamakglhtinanaw chuna la likatsikgo (kalikgalhtawakga Romanos 15:7).

16, 17. 1) ¿La tlan tlakg nakalakgapasaw tiku tanu xpaiskan? 2) ¿Tuku tlan nakalimakgtayayaw tiku tanu xpaiskan nema wilakgo kkincongregacionkan?

¹⁶ ¿La tlakg tlan nakalakgapasaw tiku tanu xpaiskan chu lakatsu kinkatawilakgon? Tlakg nalakgapasaw xlakata xpaiskan chu xtalismaninkan. Akxni kakninaniyaw Dios kfamilia tlan naputsananaw xlakata xtalismaninkan tiku wilakgolh kkincongregacionkan o niku lamaw. Atanu la tlakg tlan nakalakgapasaw wa pi nakatawayanaw kkinchikkan. Jehová kamaxkinit talakaskin «xakgmakgat chixkuwin, mpi na nakgalhikgoy ntakanajla» (Hech. 14:27). Kastalaniw xliʼakxilhtit chu kakamakgamakglhtinaw kkinchikkan tiku tanu xpaiskan chu kintakanajlaninkan (Gál. 6:10; Job 31:32).

¹⁷ Akxni akxtum katatawilayaw akgtum familia tiku tanu xpaiskan nakinkamakgtayayan naʼakgatekgsaw chu lanka xtapalh naʼakxilhaw tuku tlawakgo xlakata nasmanikgo niku lamaw. Max naʼakxilhaw pi maklakaskinkgo  tamakgtay xlakata nakatsinikgo tachuwin. O max tlan nakamakgtayayaw natekgskgo tuku mapakgsinanin lakkaxwilikgonit xlakata nakamakgtayakgo natekgskgo taskujut chu niku natawilakgo. Putum uma lu nakamakgtaya kinatalankan (Prov. 3:27).

18. ¿Tuku tlan liʼakxilhtit nastalanikgo tiku tanu xpaiskan?

¹⁸ Xlikana, tiku tanu xpaiskan xliskujatkan xlakata nasmanikgo kxasasti país. Tlan nastalanikgo xatlan xliʼakxilhtit Rut. Pulana, xla maxkilh kakni talismanin nema xʼanan kxasasti xpaís. ¿La tlawalh? Skilh pi xmaxkika talakaskin nasaka tuku xmakgxtakgkanit kkapukuxtun (Rut 2:7). Ni lakpuwa pi xlakgchan chuna natlawa, na ni lakpuwa pi amakgapitsin xkalakgchan namakgtayakgo. Chu xlipulaktiy, paxtikatsinilh talakgalhaman nema limasiyanika (Rut 2:13). Komo tiku tanu xpaiskan nastalanikgo xatlan xliʼakxilhtit Rut, max natalan tiku xala anta chu amakgapitsi nakamaxkikgo kakni.

19. ¿Tuku xlakata kilimakgtayatkan tiku tanu xpaiskan tlan namakgkatsikgo?

¹⁹ Lu lipaxuwayaw pi Jehová kalimasiyani talakgalhaman nema ni kinkalakgchanan putum latamanin chu kamaxki talakaskin nakgaxmatkgo xatlan tamakatsin xalak Biblia. Lhuwa tiku tanu xpaiskan nila xlikgalhtawakgakgo Biblia chu nila xʼankgo ktamakxtumit kxpaiskan. Pero la uku xlakata tlan kinkatatamakxtumikgoyan, talakaskin nakamakgtayayaw ni namakgkatsikgo pi niti kalakgapasa. Max ni kgalhiyaw lhuwa tumin o nila lhuwa kamakgtayayaw. Pero komo nakalimasiyaniyaw talakgalhaman, limasiyamaw nawan tapaxkit nema Jehová kakgalhini. Wa xlakata, katlawaw la Jehová chu xatapaxuwan kakamakgamakglhtinaw tiku tanu xpaiskan (Efes. 5:1, 2).