JOSÉ XALAK ARIMATEA ni katsi niku tiyalh litliwakga xlakata natachuwinan Poncio Pilato, xlakata uma mapakgsina xalak Roma lu xatsakat xwanit. Xtalakaskin pi wi tiku kskinilh xtiyatliwa Jesús xlakata liwana xmaknuka. Alistalh, akxni tachuwinalh tlan kitaxtulh nixawa la xlakpuwanit. Akxni chatum soldado wa pi Jesús xninita, Pilato maxkilh talakaskin pi xmaknulh Jesús. Wa xlakata, maski lu xlipuwan, José lakapala alh niku makgnika Jesús (Mar. 15:42-45).

• ¿Tiku xwanit José xalak Arimatea?

• ¿La xtalalin Jesús?

• ¿Tuku xlakata talakaskin nakatsiyaw xlakata xlatamat?

Evangelio xla Marcos lichuwinan pi José xalak Arimatea xlitaxtu «chatum nti xkgalhiy xkakni». Kʼuma tachuwin niku xmaxkikan kakni kaj watiya xkilhchanima anta kSanedrín, niku xwilakgolh tiku tlakg xkgalhikgo limapakgsin chu niku xkapulalinkan judíos (Mar. 15:1, 43). Uma chixku wa tiku xmakgpulalinan kkachikin, wa xlakata uma tlawalh pi tlan xtachuwinalh mapakgsina xalak Roma. Ni kaks kinkamalakawaniyan xlakata max xkgalhi lhuwa tumin (Mat. 27:57).

Ama tiku xtapakgsikgo kSanedrín ni xakxilhputunkgo Jesús; asta umakgolh tiku anta xtapakgsikgo lakkaxwilikgolh la namakgnikgo. Pero José «luwa tlan chixku xwanit, chu na luwa akgstitum» (Luc. 23:50). Ni xtachuna xwanit la amakgapitsin, xla tlan xlikatsi chu xliskuja xlakata nakgalhakgaxmata xlimapakgsin Dios. Nachuna na «xkgalhkgalhima xtapakgsin Dios», uma kinkamasiyaniyan tuku xlakata kstalanina Jesús litaxtulh (Mar. 15:43; Mat. 27:57). Max xpaxki tuku xaxlikana chu tuku xaʼakgstitum, wa xlakata kgaxmatli xtamakatsinin Jesús.

Juan 19:38 kinkawaniyan pi José «[kstalanina] Jesús, wampi kaj xatsekg, sampi xpikuanikgoy judíos». ¿Tuku xlakata xkapekuani? Xlakata xlakgmakgankgo Jesús, tlan lakapala xʼamakgolh tamakxtukgo ksinagoga tiku xkanajlanilh Jesús (Juan 7:45-49; 9:22). Tiku xtamakxtukan ksinagoga xkilhchani pi putum judíos xʼamakgolh lakgmakgankgo. José xpekuan nalichuwinan pi xkanajlani Jesús, xlakata xʼama makgatsankga taskujut nema xlakgaya.

José ni kaj xman wa chuna xtitaxtuma. Chuna la wan Juan 12:42, «asta maski wa xanapuxkun, lhuwa ti kanajlanikgolh; wampi wa xpalakata fariseos, ni xlikgalhapalakgoy, lakimpi ni natamakaxtukgokan kxpukgalhtawakgakan». Tiku na xmakgtapakgsi kSanedrín wa Nicodemo (Juan 3:1-10; 7:50-52).

José kstalanina Jesús xwanit, pero xpekuan nakalixakgatli amakgapitsin. Uma lu tuwa xwanit, xlakata uma tuku xwanit Jesús: «Kaxatikawa ti nalitayay kxlakgstipankan amakgapitsin pi xlikana kilipawan pus na chuna chu nkit na nakkgalhmakgtayay kxalakatin Kintlat ti wilacha kʼakgapun. Wampi kaxatikawa ti ni nalitayay kxlakatinkan amakgapitsin pi xlikana kilipawan pus na chuna chu nkit na ni ktikgalhmakgtayalh kxalakatin Kinlat ti wi kʼakgapun» (Mat. 10:32, 33). Ni xwamputun pi José xlakgmakgan Jesús, wata  kaj xpekuan nawan pi kstalanina xlitaxtu. Chu ¿nachuna tatakgsaw akinin?

José xalak Arimatea tlawalh tuku tlan chu tlan nawanaw pi xla ni makgtanulh akxni Sanedrín xtalatlawamakgo Jesús (Luc. 23:51). Wankan pi ni anta xwi akxni xlakputsananimaka Jesús. Maski chuna, nitlan xlimakgkatsilh ama tuku ni xaʼakgstitum xlama, pero nila xmalakgachokgo tuku xlama.

Akxni Jesús nilh, José xmakgatlajanita tapekua chu xlaksaknita nakatataya kstalaninanin Jesús. Katsiyaw pi chuna xlakata tuku wan Marcos 15:43: «Ni anan ta[m]akpuwan ntilakgtanulh mPilato, tiskilh xtiyatliwa Jesús namaknuy».

José akxilhli la makgnika Jesús, xlakata xla pulana katsilh la nilh chu Pilato alistalh katsilh. Uma lichuwinan xlakata akxni skilh xtiyatliwa Jesús, mapakgsina xkatsiputun komo xninita Jesús (Mar. 15:44). Komo José akxilhli la xpatinama Jesús anta kkiwi, ¿wa tlawalh uma tuku nitlan akxilhli la xpatinama Jesús, xlakata nialh napekuan chu nawan pi kstalanina Jesús xlitaxtu? Max chuna. Uma tlawalh pi nalimasiya tuku xkanajla. Nialh kaj xatsekg kstalanina xlitaxtulh.

Xlimapakgsin judíos xwan pi tiku xkamakgnika xmaknuka akxni la nina xtsankga chichini (Deut. 21:22, 23).  Pero romanos nichuna xtlawakgo, xlakan ni xmaktikgo asta akxni xlakmastawakay o xkamujukgoy klhuku. Pero José nichuna xlakaskin xlakata Jesús. Anta lakatsu niku makgnika, José xkgalhi akgtum lhuku xla chiwix. Uma lhuku nina xmaklakaskinkan, kinkamasiyaniyan pi José xalak Arimatea * nina makgas xʼanit latama kJerusalén chu max xlakpuwan pi anta xkamaknuka tiku xalak xfamilia (Luc. 23:53; Juan 19:41). Xlakata Jesús maknuka niku xʼamaka maknukan José xla limasiyalh pi xalakgalhamana chu kgantaxtulh tuku xwankanit xpalakata Mesías pi xʼamaka maknukan niku kamaknukan tiku kgalhikgo tumin (Is. 53:5, 8, 9).

Evangelios lichuwinankgolh pi akxni Jesús maktikgolh xmakni kkiwi, José limakgswitli lino fino chu maknulh (Mat. 27:59-61; Mar. 15:46, 47; Luc. 23:53, 55; Juan 19:38-40). Kaj watiya tiku talichuwinan pi makgtayalh José wa Nicodemo, tiku limilh tuku nalitlawakan xtiyatliwa Jesús. Xlakata tuku xlitaxtukgo uma chatiy lakchixkuwin, max lakaskinkgolh tamakgtay. Max skinikgolh tamakgtay kskujnin xlakata nalinkgo chu namaknukgo. Xlikana lu xlakaskinka taskujut nema tlawakgolh. Tiku kxama chatum nin, kxkajwala chu nialh xtlawa xtaskujut akgtujun kilhtamaku xlakata putum tuku kxama xmaxkajwi (Núm. 19:11; Ageo 2:13). Chu uma tlawalh pi nila xmakgtlawakgolh Pascua ama semana chu xmakgatsankgakgolh putum tuku xtatlawalh (Núm. 9:6). Xlakata José maknulh Jesús, uma max tlawalh pi amakgapitsin xlakgmakgankgolh. Liwana xkatsi pi xʼama lipatinan xlakata maknulh Jesús chu xlakata xtakatsilh pi kstalanina xlitaxtu.

Biblia nialh lichuwinan xlakata José tuku alistalh akgspulalh akxni maknulh Jesús, uma tlawa pi natawila takgalhskinin: «¿Tuku akgspulalh alistalh?». Ni takatsi tuku akgspulalh. Pero chuna la akxilhwi kʼuma artículo max lichuwinalh pi kstalanina Cristo xlitaxtu. Xlakata akxni tuwa tuku titaxtulh, xtakanajla chu xlakata ni pekualh tlakg xtatliwakglhtilha. Uma lu tlan xwanit.

Uma tuku titaxtulh max tlan nalilakpuwanaw komo taputsan, taskujut, tuku tlan kgalhiyaw, familia, asta la natlawayaw tuku lakaskinaw, nalilakpuwanaw komo wa tlakg xlakaskinka akxilhaw nixawa la talalinaw Jehová.