1. ¿Tuku ama tlakg xlakaskinka tapaxkit chu tuku xlakata? (Kaʼakxilhti xapulana dibujo).

JEHOVÁ wa tiku masta uma tlakg xlakaskinka tapaxkit (1 Juan 4:7). Uma xaxlikana tapaxkit takilhti kxaʼakgstitum xtastakyaw chu Biblia maklakaskin tachuwin griego agápe nema kilhchanima Jehová. Uma tapaxkit ni kaj watiya namakgkatsiya pi paxkinana, wata nalimasiyaya pi xlikana kamakgtayaputunaw amakgapitsin. Maktum diccionario lichuwinan pi tachuwin agápe «kaj watiya limasiya tuku matlawinan». Kinkamakgapaxuwayan chu tlakg tlan nalimakgkatsiyaw kkilatamatkan.

2, 3. ¿La limasiyanit Jehová pi xlikana kapaxki latamanin?

² Jehová kalimasiyanilh tapaxkit latamanin maski nina xkamalakatsuki Adán chu Eva. Akgtum liʼakxilhtit, tlawalh Katiyatni xlakata anta putum kilhtamaku xlatamaw chu xkgalhilh putum tuku xmaklakaskiw chu xlipaxuwaw kilatamatkan. Uma tlawalh xlakata akinin nalipaxuwayaw. Nachuna kamaxkilh talakaskin latamanin pi tlan putum kilhtamaku xlatamakgolh anta kParaíso.

³ Akxni nialh kgalhakgaxmatnankgolh Adán chu Eva, Jehová tlakg limasiyalh xaxlikana tapaxkit. Liwana xkatsi pi makgapitsi  xlakkamanan Adán xʼamakgolh paxkikgo, chu wi tuku tlawalh xlakata nakalakgmaxtu (Gén. 3:15; 1 Juan 4:10). Lata akxni Jehová malaknulh chatum Lakgmaxtuna, xtachuna xakxilha la komo xmakamastanita xKgawasa. Akgtati mil kata alistalh Jehová makamastalh xachastum xKgawasa xpalakata latamanin maski lu nitlan makgkatsilh (Juan 3:16). ¡Lu paxtikatsiniyaw xlakata uma!

4. ¿La likatsiyaw pi maski makglakgalhinanin akinin tlan nalimasiyayaw xaxlikana tapaxkit?

⁴ Xlakata kinkatlawakan chuna la Dios, tlan nalimasiyayaw xaxlikana tapaxkit. Xlikana, lakgachunin tuwa namakgkatsiyaw xlakata kgalhiyaw talakgalhin, pero tlan chuna natlawayaw. Akgtum liʼakxilhtit, Abel limasiyalh tapaxkit nema xkgalhini Dios akxni xmaxki tuku tlakg xatlan nema xkgalhi (Gén. 4:3, 4). Noé kalimasiyanilh tapaxkit latamanin akxni akglhuwa kata lichuwinalh Dios maski latamanin ni kgaxmatkgolh (2 Ped. 2:5). Abrahán limasiyalh pi tapaxkit nema xkgalhini Dios tlakg tliwakga xwanit nixawa tuku atanu, wa xlakata xʼama makamasta xkgawasa Isaac (Sant. 2:21). Chuna la uma lakchixkuwin tiku ni makgxtakgkgolh Dios, nachuna akinin limasiyaputunaw tapaxkit maski tuwa namakgkatsiyaw.

5. ¿La tlan nalimasiyayaw xaxlikana tapaxkit?

⁵ Biblia lichuwinan pi ni kaj watiya «ntachuwin nkalalipaxkiw, chu nkaj kintawankan, wampi wa nkamakgantaxtiw [...] chu wa ntu ntalulokgtat» (1 Juan 3:18). Xlikana uma ni kilhchanima pi nila nalimasiyayaw tapaxkit akxni chuwinanaw (1 Tes. 4:18). Wata kilhchanima pi ni kaj watiya nawanaw pi paxkinanaw. Lakgachunin natalakaskin nalimasiyayaw. Akgtum liʼakxilhtit, komo chatum tala ni lhuwa kgalhi klhakgat o tuku nawa, ni kaj watiya talakaskin lakwan tachuwin nawaniyaw (Sant. 2:15, 16). Nachuna xlakata paxkiyaw Dios chu latamanin, ni kaj watiya skiniyaw namalakgacha kskujnin, wata makgtayananaw natalichuwinan Dios (Mat. 9:38).

6, 7. 1) ¿Tuku kilhchanima pi ni kaj nawanaw pi paxkinanaw? 2) ¿Tiku limasiyakgolh nixaxlikana tapaxkit?

⁶ Apóstol Juan lichuwinalh pi kalalimasiyaniw xaxlikana tapaxkit chu ni kaj nawanaw pi paxkinanaw (Rom. 12:9; 2 Cor. 6:6). Uma kilhchanima pi nitlan nalimasiyayaw tapaxkit komo nixlikana makgkatsiyaw pi paxkinanaw, xtachuna xkitaxtulh la komo xkgalhiw máscara. Komo nalimasiyayaw pi paxkinanaw pero nixlikana makgkatsiyaw, kaj nitu katilitaxtulh kintapaxkitkan.

⁷ Kaʼakxilhwi makgapitsi liʼakxilhtit tiku limasiyakgolh nixaxlikana tapaxkit. Akxni Satanás tachuwinalh Eva anta kjardín xaʼEdén, limasiyalh pi xkalilakgaputsa. Pero nixlikana tuku xkawanima kaj xkaʼakgskgawima (Gén. 3:4, 5). Atanu wa xlakata Ahitofel, tiku xlimasiya pi xʼamigo xwanit mapakgsina David pero akgskgawilh akxni akxilhli pi tlan chuna xtlawalh, kaj xlakata tlan xlitamakgtayalh (2 Sam. 15:31). La uku, apóstatas chu amakgapitsi latamanin tiku mapapitsiputunkgo congregaciones maklakaskinkgo «lakwan tachuwin» chu malakpuwanikgo amakgapitsi kstalaninanin Cristo pi xlikana kapaxkikgo. Pero nixlikana tuku wankgo (Rom. 16:17, 18).

8. ¿Tuku nakinkakgalhskinkanan?

⁸ Nalimasiyaya tapaxkit kaj xlakata nakaliʼakgskgawiya amakgapitsin, uma lu nitlan. Tlan nakaʼakgskgawiyaw amakgapitsi latamanin, pero Jehová nila katiʼakgskgawiw. Jesús lichuwinalh pi nakamalakgaxokgekan tiku kaj limasiyakgo pi paxkinankgo (Mat. 24:51). Xlikana akinin xtatayananin Jehová ni kaj limasiyaputunaw pi paxkinanaw. Wa xlakata akstu nakinkakgalhskinkanan: «¿Tapaxkit nema  klimasiya xaxlikana o nixaxlikana?». La uku naʼakxilhaw pulaknajatsa la nalimasiyayaw xaxlikana tapaxkit.

9. Komo xlikana kapaxkiyaw natalan, ¿tuku natlawayaw?

⁹ Xatapaxuwan kaskujwi maski makgapitsi ni akxilhkgo tuku tlawayaw. Lu xlikana nakamakgtayaputunaw amakgapitsin kinatalankan «maski niti kinkaʼakxilhman» (kalikgalhtawakga Mateo 6:1-4). Ananías chu Safira nichuna tlawakgolh. Xlakan xlakpuwankgo pi amakgapitsin xkatsikgolh pi xmastakgonit tumin. Nachuna akgsaninankgolh akxni wankgolh la xlilhuwa xmastakgonit tumin. Wa xlakata Dios kamalakgaxokgelh (Hech. 5:1-10). Komo xlikana kapaxkiyaw natalan, xatapaxuwan tuku nakalimakgtayayaw maski amakgapitsin ni nakatsikgo tuku natlawayaw. Wi tuku tlan nakatsiniyaw xlakata tiku kamakgtayakgo Lakgkgolotsin tiku Pulalinankgo xtatayananin Jehová akxni makgtayanankgo la tatlawa taway xla takanajla. Xlakan ni lichuwinankgo chu ni litlankajlakgo tuku liskujkgonit.

10. ¿La tlan nakamaxkiyaw kakni amakgapitsin?

¹⁰ Kakamaxkiw kakni amakgapitsin (kalikgalhtawakga Romanos 12:10). Jesús wililh xatlan liʼakxilhtit akxni kachakgenilh xtantunkan xʼapóstoles (Juan 13:3-5, 12-15). Xlakan kaj watiya akgatekgskgolh tuku xlakata Jesús chuna tlawalh akxni makglhtinankgolh espíritu santo (Juan 13:7). Akinin talakaskin naliskujaw xlakata nataktujuyaw la Jesús chu nakamaxkiyaw kakni amakgapitsin. ¿La natlawayaw? Ni tlakg xlakaskinka nakinkamakgkatsikanan kaj xlakata la xlilhuwa kgalhtawakganitaw, xlakata tuku kgalhiyaw o tuku taskujut lakgayaw kxkachikin Jehová (Rom. 12:3). Chu ni nakasitsiniyaw tiku kawanikan lakwan tachuwin, wata lipaxuwayaw maski lakpuwanaw pi na kinkalakgchanan tuku kamaxkimaka.

11. ¿Tuku xlakata nakawaniyaw lakwan tachuwin amakgapitsin?

¹¹ Xliputum kinakujkan kakawaniw lakwan tachuwin natalan. Kalimaxtuw putum kilhtamaku xlakata nakawaniyaw lakwan tachuwin amakgapitsin, xlakata uma «nalistakkgoy ktakanajla» (Efes. 4:29). Akxni chuna natlawayaw xlikana chuna namakgkatsiyaw chu ni kaj naʼakgskgawinanaw. Nachuna ni nawanaw tuku nixlikana makgkatsiyaw, pero kakamaxkiw tastakyaw tiku maklakaskinkgo (Prov. 29:5). Lakgaputiyunanin nalitaxtuyaw komo nawaniyaw lakwan tachuwin a chatum chu alistalh nitlan nalichuwinanaw kxlakatinkan amakgapitsin. Apóstol Pablo kinkawilinin xatlan liʼakxilhtit xlakata nalimasiyayaw xaxlikana tapaxkit. Akgtum kilhtamaku, kawanilh lakwan tachuwin kstalaninanin Cristo xalak Corinto xlakata tlan tuku xtlawamakgolh (1 Cor. 11:2). Pero nachuna kamaxkilh tastakyaw chu liwana kawanilh tuku nitlan xtlawamakgolh (1 Cor. 11:20-22).

12. ¿La tlan nalimasiyayaw xaxlikana tapaxkit akxni kamakgamakglhtinanaw amakgapitsin?

¹² Tlan kakamakgamakglhtinaw amakgapitsin. Jehová kinkawaniyan pi tlan kakalikatsiniw kinatalankan (kalikgalhtawakga 1 Juan 3:17). Pero natlawayaw chuna la xlilat. Kakinkakgalhskinkan: «¿Kaj watiya tlan kkamakgamakglhtinan kiʼamigos chu tiku xlakaskinka kkaʼakxilha tiku xalak congregación? ¿Kaj watiya kkawani tiku max alistalh wi tuku natlawakgo kimpalakata? O ¿kputsa la tlan nakalikatsini amakgapitsi natalan tiku ni kkalakgapasa o tiku nialh la wi tuku natlawakgo alistalh kkimpalakata?» (Luc. 14:12-14). Kalilakpuwaw pi chatum tala lakaskin tamakgtay xlakata max nitlan tuku tlawanit o tiku kawaniyaw pi namin kkinchikkan pero max ni kinkapaxtikatsiniyan. Komo chuna titaxtumaw, katlawaw uma tastakyaw: «Lakatitum [kalamakgamakglhtinantit] nchatunu amakgapitsin, ni kiklh tilakatsaniyatit»  (1 Ped. 4:9). Komo natlawayaw uma tastakyaw nakinkamakgapaxuwayan, xlakata natlawayaw chuna la xlilat (Hech. 20:35).

13. 1) ¿Niku tlakg talakaskin pi xakgalhkgalhinanin nawanaw? 2) ¿La tlan nakamakgtayayaw tiku taxlajwanikgonit?

¹³ Kakamakgtayaw tiku taxlajwanikgonit. Tlan nalimasiyayaw pi xaxlikana tapaxkit nema kgalhiyaw akxni kgalhakgaxmataw uma limapakgsin: «Kamakgtayakgotit wanti xaxlajwananin, paks kapaxuwanalipinikgotit amakgapitsin» (1 Tes. 5:14). Lhuwa natalan tiku taxlajwanikgonit, alistalh tliwakga tawila xtakanajlakan. Pero amakgapitsin chuntiya lakaskinkgo xatapaxuwan nakamakgtayayaw. ¿La natlawayaw? Tlan nalimaklakaskinaw Biblia akxni kamakgpuwantinikgoyaw, nakawaniyaw pi naʼanaw kalitachuwinanaw Dios o nakakgaxmatniyaw akxni wi tuku nakinkawanikgoyan. Nachuna, ni nakalimaxtuyaw kinatalankan pi tliwakga xtakanajlakan o max taxlajwaninit, kalakapastakwi pi kimputumkan wi tuku tayaniyaw chu wi tuku litaxlajwaniyaw. Asta apóstol Pablo xkatsi pi na xtaxlajwani (2 Cor. 12:9, 10). Kimputumkan lakaskinaw pi kinatalankan nakinkamaxkikgoyan tamakgtay chu takgpuwantin.

14. ¿Tuku natlawayaw xlakata nakatakgalhiyaw takaksni kinatalankan?

¹⁴ Kakgalhiw takaksni. Talakaskin pi lu naliskujaw xlakata nakatakgalhiyaw takaksni kinatalankan maski min kilhtamaku akxni nitlan akgateskgsnikgo tuku wanaw o nitlan kinkalikatsinikan (kalikgalhtawakga Romanos 12:17, 18). Komo wi tiku nitlan namamakgkatsiniya, tlan naskiniya pi katapatin, pero xliputum minaku chuna natlawaya. Akgtum liʼakxilhtit, ni nawanaw uma tachuwin: «Lu nitlan komo lisitsi», wata nalilakpuwanaw pi na linaw kuenta chu nawanaw: «Lu nitlan klimakgkatsi xlakata kmakgalipuwan». Takaksni lu xlakaskinka pero tlakg xlakaskinka anta ktamakgaxtokgat. Lu nitlan nawan komo xchatiykan nalimasiyakgo pi lapaxkikgo anta niku lhuwa wilakgoka, pero akxni xakstukan wilakgolh max nila xakgatlikgo, lawanikgo ni lakwan tachuwin o asta max nalawilinikgo.

15. ¿La tlan nalimasiyayaw pi xlikana tapatinanaw?

¹⁵ Xatapaxuwan katapatinaw. Komo wi tiku nitlan nakinkamamakgkatsiniyan, maski kaj ni kuenta tlawalh, natapatiyaw chu nialh nalakapastakaw tuku tlawalh. Kstalaninanin Cristo wa uma tuku tlawakgo «chu ntapaxuwanaliyan ntu nalakgalhiniyatit nchatunu amakgapitsin» chu «kuintaj kakatlawakantit mpi ni tu nakalaktlawaniyan wan ntu makxtum kalitlawanitan spiritu, xaliankgalhin katapinitit ni namakgaxtakgatit ntatanksni wa ntu makxtum kinkatlawanitan» (Efes. 4:2, 3). Xlakata xatapaxuwan nalatapatiyaw, nakuentajtlawayaw kintalakapastaknikan chu ni kuenta natlawayaw tuku kinkatlawanikan (1 Cor. 13:4, 5). Komo chuntiya nalakapastakaw, nitlan katitalaliw kintalakan chu nachuna Jehová (Mat. 6:14, 15). Atanu la tlan nalimasiyayaw pi xlikana  tapatinanaw, wa natlawayaw oración xpalakatakan tiku kinkatlawanikgoyan tuku nitlan (Luc. 6:27, 28).

16. ¿La naʼakxilhaw taskujut nema makgklhtinanaw kxkachikin Jehová?

¹⁶ Wi tuku katlawaw xpalakatakan amakgapitsin. Komo wi tiku makgamakglhtinan akgtum taskujut anta kxkachikin Jehová, wa uma pulaktum nema tlan nalimasiya pi tapaxkit nema kgalhi xaxlikana. ¿La natlawa? «Kaputsalh ni kaj wa lantla xakstu nalakgtaxtuy, wampi na kaputsalh lantla ntlan nalakgtaxtuy achatum» (1 Cor. 10:24). Akgtum liʼakxilhtit, kaxwilinanin wa tiku pulana chankgo klaklanka tamakxtumit, max tlan xlaksakkgolh tlakg xalakwan putawilh. Pero ni chuna tlawakgo, wata laksakkgo laktawilh nema ni lu xalakwan anta niku naskujkgo. Chuna limasiyakgo pi ni kaj xakstukan kapaxkikan. ¿La tlan nakamakglhkatiyaw?

17. Komo wi tiku tlawanit akgtum lanka talakgalhin, ¿tuku namatlawi xaxlikana tapaxkit?

¹⁷ Kalitayaw talakgalhin chu nialh katlawaw. Makgapitsi kstalaninanin Cristo tiku tlawakgonit laklanka talakgalhin makgtsekgwilikgo xlakata ni natamamaxanikgo chu ni nakamakgalipuwankgo amakgapitsin (Prov. 28:13). Pero uma limasiyakgo pi ni kgalhikgo xaxlikana tapaxkit, xlakata xakstukan katlawanikan tuku nitlan chu amakgapitsin latamanin. Espíritu santo nialh kamakgtaya chu xtakaksni putum congregación katuwa natawila (Efes. 4:30). Xaxlikana tapaxkit namakgpuwantini tiku tlawanit lanka talakgalhin xlakata nakatachuwinan lakgkgolotsin chu namaxkikan tamakgtay nema lakaskin (Sant. 5:14, 15).

18. ¿La xlilakaskinka xaxlikana tapaxkit?

¹⁸ Tuku tlakg xlakaskinka tayat nema xlikgalhit kstalanina Cristo wa tapaxkit (1 Cor. 13:13). Wa uma litalakgapasaw pi xlikana kstalaninanin Jesús akinin, tiku makglhkatiyaw wa Jehová, tiku Masta uma tapaxkit (Efes. 5:1, 2). Pablo lichuwinalh komo ni xkgalhi tapaxkit kaj nitu xlitaxtu (1 Cor. 13:2). Wa xlakata chuntiya kalimasiyaw tapaxkit ni kaj xman wa «[tuku nawanaw]» wata «nkamakgantaxtiw [...] chu wa ntu ntalulokgtat».