XFAMILIA John xwilakgolh k’aktsu kachikin xla Gujarat (India). Akxni ksputma kata 1950, xtlat tamunulh chu xtatayana Jehová wa. Pero John, xtse chu kgalhkitsis xnatalan lu católicos xwankgonit chu lu xlakatakikgo xtakanajla xtlat.

Akgtum kilhtamaku, xtlat John skinilh pi xlinilh akgtum sobre x’amigo xalak congregación. Watiya ama tsisa, John litamakachukulh akgtum likan. Maski chuna, John xkgalhakgaxmatputun xtlat wa xlakata limakgaswitka lhakgat chu alh niku wanika.

Akxni chalh anta, xpuskat tiku na xtatayana Jehová xwanit, makglhtinalh sobre. Akxni akxilhli tuku xlaninit John, tala wanilh pi namakgtaya. Maxtulh xbotiquín xla primeros auxilios, chekgenilh niku xtachukunit chu liwana makgswitnilh. Alistalh tlawanilh té chu tsukulh litachuwinan xlakata Biblia.

John tsukulh lakgpali la xkalakpuwani xtatayananin Jehová. Wa xlakata tsukulh tlawa takgalhskinin. Xla xlakpuwan pi Jesús wa Dios xwanit chu pi kilitlawanitkan oración María, pero xtlat ni chuna xlakpuwan. Tala, tiku xkatsininit gujarati, maxtulh xBiblia chu masiyanilh John kxtachuwin tuku masiya Biblia xlakata uma. Alistalh maxkilh folleto «Estas buenas nuevas del reino».

Akxni John likgalhtawakgalh folleto, katsilh pi wa uma xaxlikana. Lakgalh cura xalak sikulan chu watiya takgalhskinin tlawanilh nema xtlawaninit tala. Pero cura lu sitsilh, asta liʼaktalalh maktum Biblia chu wanilh: «¿¡Satanás litaxtupat!? ¿Niku wan kBiblia pi Jesús ni wa Dios? ¿Niku wan pi ni natlawaniyaw oración María? ¿¡Niku!?». John nila xkanajla pi ama cura chuna kgalhtilh chu wanilh: «Nialh makgtum kaktimilh ksikulan». Chu chuna lalh.

John tsukulh katakgalhtawakga xtatayananin Jehová, makglhtinalh tuku xaxlikana chu tsukulh skujni Jehová. Chu amakgapitsi xalak xfamilia nachuna tsukukgolh tlawakgo. John chuntiya tasiyani niku xchukunit xmakan chu akxni akxilha lakapastaka la ama tala tlan likatsinilh maski liwakaya 60 kata, xlakata akxni katsilh tuku xaxlikana (2 Cor. 6:4, 6).