1, 2. 1) ¿Tuku takaksni tlan nalipaxuwayaw kʼuma kakilhtamaku? 2) ¿Tuku xlakata nila kgalhiyaw xaʼakchan takaksni? (Kaʼakxilhti xapulana dibujo).

KIMPUTUMKAN lakaskinaw takaksni chu nitu nalilakgaputsayaw. Xlikana, lu paxtikatsiniyaw pi Jehová kinkamaxkiyan «xtakaksni Dios». Uma nakinkamakgtayayan xlakata tuku lilakgaputsayaw kkintalakapastaknikan chu tuku makgkatsiyaw (Filip. 4:6, 7). Nachuna, komo makamaxkinitaw kilatamatkan Jehová nalipaxuwayaw xlakata «kgalhiniyaw [xtakaksni] Dios» (Rom. 5:1).

² Xlikana, nina min kilhtamaku xlakata Dios nalimin xaʼakchan takaksni. La uku lamaw kxaʼawatiya kilhtamaku, wa xlakata lhuwa anan taʼakglhuwit chu tiku latalatlawakgo (2 Tim. 3:1-4). Nachuna, akinin kstalaninanin Cristo talakaskin natalatlawayaw Satanás chu nixaxlikana xtamasiy (2 Cor. 10:4, 5). Pero tuku max nakinkamakglhtiyan takaksni wa kifamiliajkan tiku ni xtatayananin Jehová. Max makgapitsi nakinkalikgalhkgamanankgoyan xlakata tuku kanajlayaw o max nakinkaliyawakanan pi mapitsimaw kifamiliajkan. Asta max nakinkalakgmakgankgoyan kifamiliajkan. ¿Tuku kilikatsitkan xlakata taputsastalanit kfamilia? ¿Tuku natlawayaw komo chuna tatakgsaw?

3, 4. 1) ¿Tuku xʼama la xlakata xtamasiy Jesús? 2) ¿Tuku tlakg tuwa xmakgkatsikgolh kstalaninanin Jesús?

³ Jesús xkatsi pi xtamasiy xʼama kamapitsi latamanin chu xtamakgalhtawakgen xtalakaskilh pi ni xpekuankgolh xlakata tuku xpatikgolh. Uma max xʼama laktlawa xtakaksni familia. Jesús lichuwinalh: «Ni tipuwanatit mpala [takaksni] kliminit yunu katiyatni, ni wa [takaksni] kliminit, wampi wa [tapapitsit]. Sampi wa kminit tlawani tapapisit nchixku, xpalakata xtlat, chu ntsumat xpalakata xtse, chu wa mpuwiti wa xpalakata xputiatsi. Chi nchu wa xtalatlawana nchixku, watiya nawan wanti xala kxchik» (Mat. 10:34-36).

⁴ ¿Tuku xlakata Jesús wa: «Ni tipuwanatit mpala [takaksni] kliminit»? Xlakata xlakaskin pi latamanin xkatsikgolh tuku xkitaxtulh komo nastalanikgo. Xlikana, tuku xlakpuwan Jesús wa “xlakata nalichuwinan xaxlikana” ni wa nakamapapitsi latamanin (Juan 18:37). Pero wa uma tuku max xʼama la. Wa xlakata Cristo xkamasiyaniputun kstalaninanin pi xmilh kilhtamaku tuwa xmakgkatsikgolh, tlakg tuwa xmakgkatsikgolh akxni xʼamigos o xfamilia xlakgmakgankgolh tuku xaxlikana.

5. ¿Tuku tayanikgonit kstalaninanin Jesús?

⁵ Jesús lichuwinalh pi kstalaninanin xlitayanitkan tapatin nema xkatakgalhilh xfamiliajkan tiku xlakatakikgolh xtakanajlakan (Mat. 10:38). Xlakata kgalhiputunkgo xtalakakin Cristo, lhuwa kstalaninanin tayanikgonit xlakata xfamiliajkan kalakgmakgankgo chu kalikgalhkgamanankan. Pero lhuwa tuku makglhtinankgonit nixawa tuku makgatsankgakgonit (kalikgalhtawakga Marcos 10:29, 30).

6. ¿Tuku kililakapastakatkan komo kifamiliajkan lakatakikgo la skujnaniyaw Jehová?

⁶ Komo kifamiliajkan lakatakikgo la skujnaniyaw Jehová, uma ni natlawa pi nialh nakapaxkiyaw. Pero kililakapastakatkan pi tiku tlakg nakakgalhiniyaw tapaxkit wa Dios chu Cristo (Mat. 10:37). Nachuna nalakapastakaw pi Satanás nalimaklakaskin tapaxkit nema kgalhiniyaw kifamiliajkan xlakata namakgxtakgaw Jehová. Kalichuwinaw makgapitsi tuku max natitaxtuyaw chu la natayaniyaw.

7. ¿Tuku natlawakgo tiku tatamakgaxtokgkgonit tiku ni xtatayana Jehová?

⁷ Biblia lichuwinan pi tiku tamakgaxtokgkgo «ntapatin nakgalhikgoy», kilhchanima taʼakglhuwit (1 Cor. 7:28). Komo tiku tatamakgaxtokgnitaw ni xtatayana Jehová, max tlakg nakgalhiyaw taʼakglhuwit. Maski chuna titaxtumaw, kaʼakxilhwi la akxilha Dios. Ni talakaskin nalamakgxtakgaw o nalakxtlawayaw kintamakgaxtokgatkan kaj xlakata ni skujnani Jehová tiku tamakgaxtokgaw (1 Cor. 7:12-16). Puskat tiku kstalanina Cristo xlimaxkit kakni xchixku, xlakata wa pulalin familia maski xla ni kuentajtlawa xtakanajla xfamilia. Nachuna xachixku tiku kstalanina Cristo xlipaxkit xpuskat chu xlikuentajtlawat maski xla ni skujnani Jehová (Efes. 5:22, 23, 28, 29).

8. ¿Tuku nakinkakgalhskinkanan komo tiku tamakgaxtokgaw max ni lu nakinkalakaskiniyan naskujnaniyaw Jehová?

⁸ ¿Tuku natlawayaw komo tiku tamakgaxtokgaw max ni lu nakinkalakaskiniyan naskujnaniyaw Jehová? Akgtum liʼakxilhtit, xchixku chatum tala puskat wanilh pi kaj makgapitsi kilhtamaku tlan xlichuwinalh Dios akgatunu semana. Komo akinin chuna xtitaxtuw, kakinkakgalhskinkan: «¿Kiwani tiku ktamakgaxtokga pi nialh nakskujnani Jehová? Komo nichuna, ¿tlan nakkgalhakgaxmata chu naktlawa tuku kiwani?». Komo liwana nalilakpuwanaw natlawa pi ni lhuwa nakgalhiyaw taʼakglhuwit (Filip. 4:5).

9. ¿La tlan kstalaninanin Cristo nakamasiyani xkamanan pi namaxkikgo kakni tiku tamakgaxtokgkgo?

⁹ Komo tiku tamakgaxtokgaw ni skujnani  Jehová, max tuwa nakastakyawayaw kinkamanankan. Akgtum liʼakxilhtit, nakamasiyaniyaw nakgalhakgaxmatkgo tastakyaw xalak Biblia xlakata namaxkikgo kakni xtlat chu xtse (Efes. 6:1-3). Pero, ¿komo tiku tamakgaxtokgaw ni tlawa tastakyaw xalak Biblia? Tlan kalikatsiniw chu kamaxkiw kakni. Wa kuenta katlawaw lakwan xtayat chu kapaxtikatsiniw tuku tlan tlawa. Ni kamamaxaniw kxlakatinkan kinkamanankan. Wata kakalitachuwinaw pi kinchatunukan nalaksakaw komo naskujnaniyaw Dios o ni. Xatlan xtayatkan kamanan natlawa pi tiku tamakgaxtokgaw nakatsiniputun xlakata Dios.

10. ¿La natlawa kstalanina Cristo xlakata nakamasiyani xla Jehová xkamanan komo tiku tatamakgaxtokgkgonit ni xtatayana Jehová?

¹⁰ Max lakgachunin tiku tamakgaxtokgaw nalakaskin pi xkamanan namakgtlawakgo pascua chu kakatsikgolh xtalismanin nixaxlikana takanajla. Makgapitsi lakchixkuwin tiku ni xtatayananin Jehová max ni kamaxkikgo talakaskin xpuskatkan nakamasiyanikgo xalak Biblia xkamanankan. Pero maski chuna, xla lu liskuja xlakata nakamasiyani xkaman tuku xalak Biblia (Hech. 16:1; 2 Tim. 3:14, 15). Akgtum liʼakxilhtit, max ni kamaxki talakaskin nakalimakgalhtawakge Biblia xkamanan tiku laktsujku o nakalin ktamakxtumit. Maski xla maxki kakni tuku wan xchixku, tlan nakalitachuwinan xlakata xtakanajla akxni nakgalhi talakaskin. Chuna nakamasiyani xlakata Jehová chu xtastakyaw (Hech. 4:19, 20). Xlikana, chuna la natitaxtu kilhtamaku wa kamanan nalaksakkgo komo naskujnanikgo Jehová o ni (Deut. 30:19, 20). *

11. ¿Tuku natlawa pi nakatakgalhiyaw taʼakglhuwit kifamiliajkan tiku ni xtatayananin Jehová?

¹¹ Akxni tsukuw kalitakgalhtawakgayaw Biblia xtatayananin Jehová, max nitu kawaniw kifamiliajkan. Pero akxni tlakg tsukulh tatliwakglha kintakanajlakan katsiw pi ni napekuanaw chu nakalitachuwinanaw xlakata kintakanajlakan (Mar. 8:38). Komo katakgalhiyaw taʼakglhuwit kifamiliajkan xlakata ni makgxtakgaw Jehová, ¿tuku natlawayaw xlakata chuntiya nakatakgalhiyaw takaksni chu ni namakgxtakgaw Jehová? Kalichuwinaw makgapitsi.

12. ¿Tuku xlakata makgapitsi kifamiliajkan max ni nalakaskinkgo pi xtatayananin Jehová nalitaxtuyaw chu tuku natlawayaw?

¹² Talakaskin naʼakgatekgsniyaw tuku lakpuwankgo kifamiliajkan tiku ni xtatayananin Jehová. Xlikana pi lipaxuwayaw xlakata katsiniw xaxlikana xalak Biblia. Pero max makgapitsi nalakpuwankgo pi kaj kinkaʼakgskgawikanitan o makgtapakgsiyaw kʼakgtum secta. Max nalakpuwankgo pi nialh kapaxkiyaw xlakata nialh makgtlawayaw makgapitsi paskua. Asta max pekuankgo pi Dios nakinkamalakgaxokgeyan akxni naniyaw. Talakaskin pi nakaʼakgatekgsniyaw tuku lakpuwankgo chu liwana nakakgaxmatniyaw xlakata nakatsiyaw tuku lilakgaputsakgo (Prov. 20:5). Tlan nastalaniyaw xliʼakxilhtit apóstol Pablo, tiku xliskuja xlakata nakaʼakgatekgsni putum latamanin, xlakata uma xmakgtaya nakalitachuwinan xtamakatsinin Dios. Komo nachuna natlawayaw nakinkamakgtayayan tlan nakalitachuwinanaw kifamiliajkan tuku kanajlayaw (1 Cor. 9:19-23).

13. ¿La nakaxakgatliyaw kifamiliajkan?

¹³ Kalimasiyaw tasmalhwan akxni chuwinanaw. Biblia lichuwinan: «Mintachuwinkan putum kilhtamaku tlan katakgaxmatli» (Col. 4:6). Tlan naskiniyaw Jehová kakinkamaxkin xʼespíritu santo xlakata xasmalhwa chu liwana nakatachuwinanaw kifamiliajkan. Ni nakalitalatlawayaw tuku kanajlakgo. Komo nawankgo o natlawakgo tuku nitlan nakinkamamakgkatsiniyan tlan nakamakglhkatiyaw xliʼakxilhtitkan apóstoles. Pablo tsokgli: «Kinkamaxkajualikgoyan, wampi kmatsankgananikgoyaw. Kkgalhiyaw ntasokgalin, wampi kpaxuwanapatiyaw; akxni nkinkaʼakgsankgoyan, kaj lakatsuku [kkakgalhtiyaw]» (1 Cor. 4:12, 13).

14. ¿La nakinkamakgtayayan nakgalhiyaw xatlan tayat?

¹⁴ Kakgalhiw tlan tayat. Xasmalhwa nachuwinanaw makgtayanan naʼanan takaksni kkifamiliajkan, pero nakgalhiyaw tlan tayat tlakg makgtayanan (kalikgalhtawakga 1 Pedro 3:1, 2, 16). Komo tlan liʼakxilhtit nawiliyaw uma nalitasiya pi xtatayananin Jehová paxuwakgo kxtamakgaxtokgatkan, kuenta tlawakgo xkamanan chu xaskulunku linkgo xlatamatkan. Maski kifamiliajkan ni xtatayananin Jehová nawankgo, tlan nalipaxuwayaw pi makgapaxuwayaw Jehová xlakata ni makgxtakgaw.

15. ¿Tuku tlan natlawayaw xlakata ni naʼanan taʼakglhuwit kkifamiliajkan?

¹⁵ Kalilakpuwaw la natlawayaw xlakata ni nakgalhiyaw taʼakglhuwit. Kalakapastakwi nema max natlawa pi naʼanan taʼakglhuwit kifamiliajkan chu nalaksakaw la natlawayaw (Prov. 12:16, 23). Chatum tala puskat xalak Australia lichuwinan: «Kimputiatlat o kimpuwiti lu ni xlakgati tuku xaxlikana. Akxni nina xakxakgatliyaw kteléfono, pulana xakskiniya Jehová pi xkinkamakgtayan akit chu kinchixku xlakata ni xatasitsi nakkgalhtiyaw. Xaklakkaxwiliyaw tuku naklichuwinanaw xlakata xatapaxuwan nakkgalhchuwinanaw. Nachuna, ni lhuwa kilhtamaku xakkgalhchuwinanaw chu chuna ni xaklalimakgasitsiw xlakata takanajla».

16. ¿Tuku nakinkamakgtayayan ni namakgkatsiyaw pi linaw kuenta akxni takgalhiyaw taʼakglhuwit chatum kifamiliajkan?

¹⁶ Xlikana nila ni nakatalamakgasitsiyaw  kifamiliajkan tiku ni xtatayananin Jehová. Max namakgkatsiyaw pi akinin linaw kuenta, xlakata lu kapaxkiyaw chu ankgalhin kamakgapaxuwaputunaw. Komo chuna makgkatsiyaw, kalakapastakwi pi tiku tlakg kilikgalhinitkan tapaxkit wa Dios chu Cristo nixawa kifamiliajkan. Komo chuna natlawayaw max nakamakgtayayaw kifamiliajkan nakatsikgo pi komo natlawayaw o ni natlawayaw tuku wan Biblia kitaxtu latamat o linin. Xlikana, kalakapastakwi pi niti la kamafuerzajniyaw naskujnani Jehová. Tuku tlan natlawayaw wa nakalimasiyaniyaw pi tlan kinkakitaxtuniyan nakgalhakgaxmataw. Xlakata Dios kapaxki, kamaxki talakaskin chuna la akinin: nalaksakkgo naskujnanikgo o ni (Is. 48:17, 18).

17, 18. ¿Tuku natlawayaw komo chatum xalak kifamiliajkan namakgxtakga Jehová?

¹⁷ Komo chatum xalak kkifamiliajkan tamakxtukan kcongregación o nialh lakaskin xtatayana Jehová nalitaxtu, lu nitlan makgkatsiyaw, xtachuna la akgtum espada nema lakglhtuku kinakujkan. ¿Tuku natlawayaw komo chuna natitaxtuyaw?

¹⁸ Chuntiya kamatliwakglhwi kintakanajlakan. Xlakata chuntiya namatliwakglhaw kintakanajlakan, talakaskin ankgalhin nalikgalhtawakgayaw Biblia, naʼanaw chu nalakkaxwiliyaw tuku nataʼakxilha ktamakxtumit, naʼanaw lichuwinanaw Dios chu naskiniyaw xlitliwakga xlakata natayaniyaw (Jud. 20, 21). Pero ¿tuku natlawayaw komo ankgalhin natsukuyaw taxlajwaniyaw? Ni kataxlajwaniw. Kaj watiya kalilakpuwaw la naskujnaniyaw Jehová, uma namakgtaya kintalakapastaknikan chu tuku makgkatsiyaw. Kalilakpuwaw tuku titaxtulh tiku tsokgli Salmo 73. Tanu la tsukulh liʼakxilha xtaʼakglhuwit chu uma tlawalh pi lhuwa nalilakgaputsa. Pero xlakata lu tsukulh skujnani Jehová chu ni makgxtakgli, makgtayalh nalakgpali la xlakpuwan (Sal. 73:16, 17). Komo nachuna natlawayaw uma nakinkamakgtayayan.

19. ¿La nalimasiyayaw pi maxkiyaw kakni xtastakyaw Jehová?

¹⁹ Kamaxkiw kakni xtastakyaw Jehová. Maski akxni kinkastakyawakanan nitlan tamakgkatsi, pero alistalh lu tlan tuku kitaxtu, nachuna xlakata tiku tlawa talakgalhin (kalikgalhtawakga Hebreos 12:11). Akgtum liʼakxilhtit, Jehová kinkawaniyan ni nakatalalinaw tiku tlawakgo talakgalhin chu ni makgxtakgkgo tuku tlawakgo (1 Cor. 5:11-13). Maski nitlan nalimakgkatsiyaw, ni natachuwinanaw tiku tamakxtukan kcongregación maski xalak kifamiliajkan, ni natachuwinanaw kteléfono, ni namakaniyaw mensaje, correo electrónico o amakgapitsi redes sociales.

20. ¿Tuku chuntiya nakgalhkgalhiyaw?

²⁰ Ni kamakgatsankgaw takgalhkgalhin. Tapaxkit putum kgalhkgalhi chu wa xlakata chuntiya kgalhkgalhiyaw kataspitkgolh tiku makgxtakgkgonit Jehová (1 Cor. 13:7). Komo akxilhaw pi chatum tiku xalak kifamiliajkan lakgpalima xtayat, naskiniyaw Jehová pi xTachuwin kamaxkilh litliwakga xlakata nakgaxmata uma invitación: «Kakilakgtaspitti» (Is. 44:22).

21. ¿Tuku kilitlawatkan komo anta kkifamiliajkan anan «tapapitsit» xlakata stalaniyaw Jesús?

²¹ Jesús lichuwinalh pi wa tlakg napaxkiyaw nixawa kaj chatum lataman. Pero xla xkatsi pi kstalaninanin ni xmakgxtakgkgolh maski lhuwa tapatin xʼamakgolh kgalhikgo xlakata xfamiliajkan. Komo kkifamiliajkan anan «tapapitsit» xlakata stalaniyaw Jesús, kaputsaw xtamakgtay Jehová xlakata natayaniyaw taʼakglhuwit (Is. 41:10, 13). Kalakapastakwi pi Jehová chu Jesús lipaxuwakgo tuku tlawamaw chu xla nakinkasikulunatlawayan xlakata ni makgxtakgnanaw. ¿Nixlikana pi uma lu kinkamakgapaxuwayan?