ESTEBAN ya kxlakatinkan lakchixkuwin tiku nitlan likatsikgo, 71 jueces nema xmakgtapakgsikgo kSanedrín, mapakgsinanin xalak Israel. Umakgolh lakchixkuwin kgalhikgo lhuwa limapakgsin kʼIsrael. Katasaninit xapuxku sacerdote Caifás, tiku pulalilh tamakxtumit niku wanka pi xmakgnika Jesús (Mat. 26:57, 59; Hech. 6:8-12). Kʼuma tamakxtumit lakchixkuwin tiku anta wilakgo wankgo taʼakgsanin. Akxni akxilhkgolh Esteban, tiku xmakgtapakgsikgo kSanedrín, kaks lilakawankgolh pi xlakan xtasiya la xlakan chatum ángel (Hech. 6:13-15).

¿La tlawalh Esteban xlakata ni napekuan akxni chuna xtitaxtuma? Akxni nina xafuerza xlinkan kxlakatin Sanedrín, kajwatiya xlilakgaputsa taskujut nema xlakgaya kcongregación xlakata xʼespíritu Dios xmakgtayama (Hech. 6:3-7). Akxni xlakputsananimaka, uma espíritu makgtayalh xlakata wi tuku nalakapastaka chu ni napekuan (Juan 14:16, nota). Akxni xkakgalhtima umakgolh mapakgsinanin, nema talichuwinan kcapítulo 7 xla Hechos, xʼespíritu Dios makgtayalh nalakapastaka liwaka akgpuxam textos xla Tatsokgni xaHebreo (Juan 14:26). Pero xtakanajla Esteban tatliwakglhli akxni maʼakxilhnika pi Jesús xya kxpaxtun Dios (Hech. 7:54-56, 59, 60).

Max namin kilhtamaku akinin nachuna natitaxtuyaw chu nakinkaputsastalanikanan (Juan 15:20). Komo kgalhiyaw talismanin nalikgalhtawakgayaw xTachuwin Dios chu wa nalilakgaputsayaw nalichuwinanaw Dios, namastayaw talakaskin pi xʼespíritu Jehová nakinkapulalinan. Nachuna nakgalhiyaw litliwakga xlakata natayaniyaw taputsastalanit chu chuntiya nakgalhiyaw takaksni (1 Ped. 4:12-14).