1, 2. ¿Tuku tlakg nitlan katlawaninit latamanin chu tiku xkuenta?

TELÉFONO, foco, putlaw chu refrigerador wa tuku tlawakanit nema maklakaskinaw xlakata ni tuwa tuku natlawayaw. Pero wi atanu tuku tlawakanit nema katuwa wili kilatamatkan chuna la pólvora, bomba, cigarro chu atanu. Pero tuku tlakg nitlan katlawaninit latamanin wa tuku makgasata anan asta akxni nina x’anankgo umakgolh. ¿Tuku uma? Wa taʼakgsanin, tuku katsikan pi nixaxlikana pero wankan xlakata nali’akgskgawinankan. Tiku pulana akgskgawinalh wa Satanás, tiku Jesucristo limapakuwilh «xmakilhtsukina taʼakgsanin» (kalikgalhtawakga Juan 8:44). ¿Tukuya kilhtamaku wa xapulana taʼakgsanin?

² Titaxtunita lhuwa mil kata, anta kjardín xa’Edén. Adán chu Eva lu xlipaxuwakgo latamat anta kparaíso niku Dios xkamaxkinit. Pero xla xkalimapakgsinit pi ni xwakgolh «xtawakat kiwi nema lilakgapaskan tuku xatlan chu nixatlan». Komo ni xkgalhakgaxmatnankgolh, xnikgolh. Maski Satanás xkatsi uma, limaklakaskilh tantum luwa xlakata nawani Eva xapulana taʼakgsanin: «Ni katinitit». Chu alistalh wampa: «Xlakata Dios katsi pi kilhtamaku akxni nawayatit natalakki milakgastapukan chu la Dios nawanatit, nalakgapasatit tuku tlan chu tuku nixatlan» (Gén. 2:15-17; 3:1-5).

3. 1) ¿Tuku xlakata wanaw pi xtaʼakgsanin Satanás lu nitlan? 2) ¿Tuku kitaxtulh alistalh?

 ³ Xtaʼakgsanin Satanás lu nitlan xwanit, xlakata xla xkatsi pi Eva xʼama niy komo xkanajlanilh chu xwalh xtawakat kiwi. Xla chu xchixku ni kgalhakgaxmatkgolh Jehová chu alistalh nikgolh (Gén. 3:6; 5:5). Tuku tlakg nitlan kitaxtulh, wa pi «linin kgalhikgolh putum latamanin» xlakata putum makglakgalhinanin litaxtukgolh chu «malanalh linin [...] asta wa nti ni lakgalhinankgolh lantla Adán ntilakgachixkuwimakgalh limapakgsin» (Rom. 5:12, 14). Latamanin nila akgstitum latamakgo putum kilhtamaku, chuna la Dios xapulana xlakaskin, wata kajwatiya makgatsikgo 70 kata o tiku tlakg lakgtliwakgan makgatsikgo 80 kata. Chu maski chuna, latamat «litatsamanit talipuwan chu takatsan» (Sal. 90:10, SXP). ¡Lu nitlan! Chu putum chuna lalh kaj xlakata xtaʼakgsanin Satanás.

4. 1) ¿Tukuya takgalhskinin lu xlakaskinka nakgalhtiyaw? 2) Chuna la wan Salmo 15:1, 2, ¿tiku tlan xʼamigo Jehová nalitaxtu?

⁴ Akxni lichuwinalh tuku tlawalh Satanás, Jesús wa: «Ni tamakgxtakgli kxaxlikana, xlakata ni xkgalhi tuku xaxlikana». Chu uma chuntiya xlikana asta la uku. Satanás chuntiya kaʼakgskgawi «putum latamanin» (Rev. 12:9). Pero akinin ni lakaskinaw pi nakinkaʼakgskgawiyan. Wa xlakata, nakgalhtiyaw umakgolh akgtutu takgalhskinin: ¿La kaʼakgskgawi Satanás latamanin? ¿Tuku xlakata akgskgawinankgo latamanin? Chu, xlakata ni chuna litaxtuputunaw la Adán chu Eva chu ni makgatsankgaputunaw la talalinaw Jehová, ¿la limasiyayaw pi ni akgskgawinanaw? (kalikgalhtawakga Salmo 15:1, 2).

5. ¿La kaʼakgskgawi la uku Satanás latamanin?

⁵ Apóstol Pablo xkatsi pi wi tuku tlan natlawayaw xlakata Satanás ni nakinkaʼakgskgawiyan, xlakata «katsiyaw xtakgskgawimin» (2 Cor. 2:11). Katsiyaw pi Satanás xmalana kakilhtamaku, nixaxlikana takanajla, mapakgsinanin chu tuku atanu anan kkakilhtamaku (1 Juan 5:19). Ni kaks lilakawanaw pi Satanás chu xdemonios wi tuku nitlan kamalakpuwanikgo tiku kgalhikgo limapakgsin xlakata naʼakgskgawinankgo (1 Tim. 4:1, 2). Akgtum liʼakxilhtit, makgapitsin lakchixkuwin tiku tlawakgo negocios akgskgawinankgo akxni malaknukgo tuku stamakgo nema katuwa wili kilatamatkan o kaʼakgskgawikgo latamanin xlakata nakamakglhtikgo xtuminkan.

6, 7. 1) ¿Tuku xlakata xpulalinanin takanajla wa tiku tlakg linkgo kuenta? 2) ¿Tukuya taʼakgsanin kgaxpatnita pi wankgo xpulalinanin takanajla?

⁶ Tiku pulalinkgo nixaxlikana takanajla wa tiku tlakg linkgo kuenta. ¿Tuku xlakata? Xlakata putum tiku kanajlakgo xtaʼakgsaninkan chu tlawakgo tuku Dios xkajni, tlan namakgatsankgakgo latamat nema nikxni sputa (Os. 4:9). Jesús xkatsi pi tiku xpulalinkgo takanajla kxkilhtamaku, xkaʼakgskgawikgo latamanin. Kawanilh: «Kgoxutanin wixin lakgtsokgkinanin, chu wixin fariseos, lakgaputiyunanin. Sampi litamakgstiliyatit ntakgayawana, chu ntiyat mpi judío natlawayatit akgmakgat chixku. Na akxni judío xwaj, akgtum liwaka xkaman nti xala kpupatin tlawakgoyatit, nixawa wixin» (Mat. 23:15). Jesús kawanilh tuku nitlan xʼama kakitaxtuni chu lu xlikana tuku kawanilh: «Wixin mintlatkan akgskgawini», tiku «makgnina» litaxtu (Juan 8:44).

⁷ Xpulaninanin takanajla, cura, pastores, rabinos chu tiku makgalhtawakganankgo kʼakgtum takanajla. O lata tuku kalilakgapaskan, la uku kakilhtamaku litatsamanit nixaxlikana xpulalinanin takanajla. Xtachuna la fariseos, makgtsekgwilikgo tuku xaxlikana xlakata xTachuwin Dios chu lilakgpalikgonit taʼakgsanin tuku xaxlikana xlakata Dios (Rom. 1:18, 25). Nixaxlikana tuku masiyakgo, wankgo pi «akxni  nalakgtaxtuya makgtum nalakgtaxtuya», pi wi tuku ni niy akxni nikan, nachuna wankgo pi akxni wi tiku niy lakachimpara alakatanu chu masiyakgo nixatlan tapuwan pi Dios kamakgamakglhtinan tiku lakgati xtachixku o xtapuskat chu tlan natamakgaxtokgkgo.

8. 1) ¿Tukuya taʼakgsanin nawankgo políticos? 2) ¿Tuku natlawayaw?

⁸ Políticos limaklakaskinkgonit taʼakgsanin xlakata nakaʼakgskgawikgo latamanin. Pulaktum lanka taʼakgsanin nema nawankgo wa pi «anan ntakaksni, chu nitu ntamakpuwan». Pero «akxni lakapala nalakgchinkgoy ntalakgsputni». Ni kamastaw talakaskin pi nakinkaliʼakgskgawikgoyan tuku wankgo xlakata makgtsekgputunkgo pi uma kakilhtamaku lu nitlan wi. Akinin liwana katsiyaw pi «xkilhtamaku [Jehová] xtachuna nchatum nkgalhana namin katsisni» (1 Tes. 5:1-4).

9, 10. 1) ¿Tuku xlakata akgskgawinankgo latamanin chu tuku nitlan kitaxtu? 2) ¿Tuku kililakapastakatkan xlakata Jehová?

⁹ Latamanin xalak uma kakilhtamaku, lu lismanikgonit wankgo taʼakgsanin. Chu ni kaj xman wa tiku kgalhikgo limapakgsin. Kʼakgtum artículo nema litapakuwi «Tuku xlakata akgskgawinanaw», maktum revista lichuwinan: «La uku latamanin lu lismanikgonit akgskgawinankgo, xtachuna la tuku nila makgxtakgkgo». Latamanin akgskgawinankgo xlakata nitu nakatlawanikan, namatsekgkgo tuku nitlan tlawakgonit, nakgalhikgo tuku tlakg xatlan chu xlakata tlakg nalitlajakgo tumin. Artículo na lichuwinan pi latamanin «ni tuwa makgkatsikgo nakawanikgo taʼakgsanin, maski laktsu o laklanka, tiku ni kalakgapaskgo, tiku kataskujkgo, xʼamigos chu tiku xalak xfamilia».

¹⁰ ¿Tuku nitlan kitaxtu xlakata akgskgawinankan? Nialhti katilipawan chu laktlawa la katalalinaw amakgapitsin. Akgtum liʼakxilhtit, kalilakpuwaw la makgkatsi chatum chixku akxni xpuskat akgskgawi chu wan taʼakgsanin xlakata namatsekga tuku tlawanit. Chu lu nitlan akxni chatum chixku limasiya pi tlan likatsi chu tlan tlat litaxtu, pero anta kxchik nitlan kalikatsini xpuskat chu xkamanan. Pero kalakapastakwi pi umakgolh latamanin nila tuku makgtsekgnikgo Jehová, xlakata «mpaks stalanka ukxilha xlipaks nkatuwaj» (Heb. 4:13).

11. ¿Tuku kinkamasiyaniyan nixatlan xliʼakxilhtitkan Ananías chu Safira? (Kaʼakxilhti xapulana dibujo).

¹¹ Anta kBiblia tekgsaw akgtum liʼakxilhtit xlakata akgtum tamakgaxtokgat xalak pulana siglo, Ananías chu Safira, anta niku Satanás tlawalh pi xwankgolh taʼakgsanin. Stakgolh akgtum pukuxtu chu kawanikgolh apóstoles pi xmastamakgolh putum tumin nema xkamaxkikanit, maski kaj ni lhuwa xmastamakgolh. Xlakaskinkgo pi tlan xkaʼakxilhkgolh amakgapitsin natalan xlakata xlakpuwankgolh pi tlakg xalakgalhamananin xwankgonit. Pero Jehová akxilhli tuku nitlan xtlawamakgolh chu kamalakgaxokgelh (Hech. 5:1-10).

12. ¿Tuku nakaʼakgspula tiku akgskgawinankgo chu tuku xlakata?

¹² ¿Tuku wan Jehová xlakata taʼakgsanin? Satanás chu putum tiku akgskgawinankgo chu ni makgxtakgkgo uma nitlan talismanin, nakalimalakgsputukan «lhkuyat». Uma kilhchanima pi nakamalakgsputukan (Rev. 20:10; 21:8; Sal. 5:6). ¿Tuku xlakata? Xlakata Jehová kaliʼakxilha uma akgsaninanin la tantum «chichi», kilhchanima tiku lismanikgo tlawakgo tuku Jehová xkajni (Rev. 22:15).

13. ¿Tuku katsiyaw xlakata Jehová chu tuku kinkamakgpuwantiniyan natlawayaw?

¹³ Katsiyaw pi Jehová «ni chatum chixku xlakata nawan taʼakgsanin». Nachuna «ni lay naʼakgsaninan Dios» (Núm. 23:19; Heb. 6:18). Biblia wan pi xla xkajni «simakgat nema akgsaninan» (Prov. 6:16, 17). Xlakata Jehová tlan  nakinkaʼakxilhan, kilitlawatkan tuku wan xlimapakgsin chu ankgalhin nawanaw tuku xaxlikana. Talakaskin nakgalhakgaxmataw uma limapakgsin: «Nialh tilaʼakgskgawiyatit nchatunu amakgapitsin» (Col. 3:9).

14. 1) ¿Tuku litalakgpaliyaw akinin kstalaninanin Cristo chu tiku tapakgsikgo knixaxlikana takanajla? 2) Kalichuwinanti tastakyaw nema lichuwinan Lucas 6:45.

¹⁴ ¿Tuku litalakgpalikgo kstalaninanin Cristo chu tiku tapakgsikgo knixaxlikana takanajla? Pi akinin wanaw tuku xaxlikana (kalikgalhtawakga Zacarías 8:16, 17). Pablo lichuwinalh pi chuna litaxtuyaw «lantla minini kskujni Dios» (2 Cor. 6:4, 7). Jesús lichuwinalh pi tuku mastokgwilinit kxnaku chatum chixku wa tuku taxtu kxkilhni (Luc. 6:45). Wa xlakata, akxni kkinakujkan wi tuku xaxlikana, wa lichuwinanaw tuku xaxlikana. Ni wanaw laklanka o laktsu taʼakgsanin, wata ankgalhin kawaniyaw tuku xaxlikana tiku ni kalakgapasaw, tiku kataskujaw, kiʼamigoskan chu tiku xalak kifamiliajkan. Kaʼakxilhwi makgapitsi niku talakaskin nalimasiyayaw pi wanaw tuku xaxlikana.

15. 1) ¿Tuku xlakata nitlan pulaktiy nalipina milatamat? 2) ¿Tuku namakgtayayan ni natlawaya tuku amakgapitsin matlawiputunkgoyan? (Kaʼakxilhti nota).

¹⁵ Komo wix kajku kgawasa o tsumat, xlikana pi max lakaskina tlan namakgamakglhtinankgoyan mincompañeros, pero nikxni pulaktiy kalipi milatamat, chuna la tlawakgo makgapitsin. Limasiyakgo pi tlan likatsikgo kxlakatinkan xfamiliajkan o kcongregación, pero lu tanu la likatsikgo akxni katawilakgo kamanan xalak kakilhtamaku o akxni maklakaskinkgo redes sociales. Wankgo nixatlan tachuwin, nitlan la lhakganankgo, kgaxmatkgo xalixkajni tatlakgni, wakgo lhuwa kuchu, maklakaskinkgo drogas, xatsekg kgalhikgo xlitatawilatkan o atanu tuku tlakg nitlan tlawakgo. Kaj taʼakgsanin lilamakgolh: kaʼakgskgawikgo xnatlatnikan, natalan chu Dios (Sal. 26:4, 5). Jehová liwana katsi komo kajwatiya kinkilhnikan limaxkimaw kakni, pero kkinakujkan lu tamakgatlininitaw (Mar. 7:6). Tlakg tlan nakitaxtuniyan komo natlawaya tuku lichuwinan uma proverbio: «Ni kalakgkatsalakalh minaku tiku tlawakgo talakgalhin, wata putum kilhtamaku kakgalhinilh tapekua Jehová» (Prov. 23:17). *

16. ¿La namalakgatsamayaw solicitud xlakata tlan naskujnaniyaw Jehová putum kilhtamaku?

¹⁶ Max precursor regular litaxtuputuna o putum kilhtamaku skujnaniputuna Jehová, la  komo kBetel. Akxni namalakgatsamaya solicitud, lu xlakaskinka pi wa natsokgwiliya tuku xaxlikana, komo ni tatatlaya, tuku lilakgastanana chu xlakata talakgxtumit (Heb. 13:18). ¿Chu komo tlawanita tuku xalixkajni chu nina kawaniya lakgkgolotsin? Komo chuna, kakaskini tamakgtay xlakata nitu nasakgali mintalakapastakni chuna la skujnanipat Jehová (Rom. 9:1; Gál. 6:1).

17. ¿Tuku natlawayaw komo nakinkakgalhskinkanan xlakata kinatalankan?

¹⁷ Kalilakpuwaw atanu, max mapakgsinanin ni kintikamaxkikgon talakaskin nalichuwinanaw xTamapakgsin Dios chu nakinkakgalhskinkanan xlakata kinatalankan. ¿Tlan nawanaw putum tuku katsiyaw? Kalilakpuwaw tuku tlawalh Jesús akxni mapakgsina xalak Roma tlawanilh takgalhskinin. Stalanilh tastakyaw nema wan pi anan «kilhtamaku akxni ni nachuwinankan chu kilhtamaku akxni tlan nachuwinankan», chu lakgachunin ni kgalhtinalh (Ecl. 3:1, 7; Mat. 27:11-14). Akxni chuna natitaxtuyaw, kuenta natlawayaw tuku nawanaw xlakata ni katuwa nawiliyaw xlatamatkan kinatalankan (Prov. 10:19; 11:12).

18. ¿Tuku kilitlawatkan akxni lakgkgolotsin nakinkakgalhskinkgoyan xlakata chatum tala?

¹⁸ Kalilakpuwaw apulaktu. Max wi tiku tlawanit akgtum lanka talakgalhin chu katsiyaw tuku lalh. Xlakata lakgkgolotsin kgalhikgo limapakgsin xlakata skulunku natawila congregación, max nakinkakgalhskinkgoyan tuku katsiyaw xlakata uma. ¿Tuku nakgalhtinanaw komo kiʼamigojkan o chatum xalak kifamiliajkan chuna tlawama? Biblia lichuwinan pi tiku ni makgxtakga Jehová «lichuwinan tuku xaʼakgstitum» o wan tuku xaxlikana (Prov. 12:17; 21:28). Wa xlakata, talakaskin nakawaniyaw lakgkgolotsin putum tuku lanit chu nitu namatsekgaw. Xlakan xlikatsitkan tuku xaxlikana xlakata chuna tlan nakatsikgo la namakgtayakgo tiku tlawanit talakgalhin chu chuna tlan natalalimpara Jehová (Sant. 5:14, 15).

19. ¿Tuku nalichuwinanaw kʼatanu artículo?

¹⁹ David wanilh Jehová kʼakgtum oración: «Wix lakaskina nakwan tu xaxlikana» (Sal. 51:6, SXP). Xlikana, xla liwana xkatsi pi tuku tlakg xlakaskinka wa nalinaw tuku xaxlikana anta kkinakujkan. Putum kilhtamaku, xaxlikana kstalaninanin Cristo wanaw tuku xaxlikana, chuna la lichuwinan texto xla uma artículo. Atanu la limasiyayaw pi akinin xlakskujnin Dios ni kintalakxtumkan amakgapitsin, wa nakamasiyaniya latamanin tuku xaxlikana. Kʼatanu artículo nalichuwinanaw la natlawayaw.