1, 2. ¿Tuku lu xlakaskinka lakgayawaka Josué akxni Moisés nilh?

JOSUÉ chuntiyaku xkgaxmatma xtachuwin Jehová nema wanilh: «Moisés kiskujni ninita; chu kataki, kapatakutti uma kgalhtuchokgo Jordán, wix chu putum uma kachikin, ktiyat nema nakkamaxki» (Jos. 1:1, 2). ¡Lu lakapala talakgpalilh xlatamat! Xlakskujni Moisés xlitaxtunit liwaka 40 kata, pero la uku xpulalina Israel xlitaxtu.

² Xlakata Moisés xpulalina Israel xlitaxtunit akglhuwa kata, max Josué xkgalhskinkan tuku x’ama wan kachikin xlakata la uku wa nakapulalin (Deut. 34:8, 10-12). Maktum libro lichuwinan xlakata Josué 1:1, 2: «Xtachuna la makgasa asta la uku, akxni talakgpali chatum mapakgsina kachikin lu tuwa kakitaxtuni».

3, 4. ¿Tuku likatsiyaw pi tlan tuku laksakli Josué xlakata lipawa Dios chu tuku takgalhskinin tlan nakinkatlawanikanan?

³ Ni xʼanan tuku xlakata Josué napekuan, wa xlakata lakapala tuku tlawalh chu lipawa Jehová (Jos. 1:9-11). Chu tlan tuku tlawalh. Chuna la wan Biblia, Jehová kalipulalilh chatum ángel Josué chu kachikin Israel. Tlan nalakpuwanaw pi uma ángel wa «Tachuwin», xapulana xKgawasa Dios (Juan 1:1; Éx. 23:20-23).

⁴ Xlakata xtamakgtay Jehová, Israel ni tuwa makgkatsikgolh  pi wa Josué nakapulalin. Akinin nachuna lamaw kkilhtamaku niku anan lhuwa tuku talakgpali. Wa xlakata max nakinkakgalhskinkanan: «Xlakata xkachikin Jehová lakapala tlawama, ¿tlan nalipawanaw kimPulalinakan Jesucristo?» (kalikgalhtawakga Mateo 23:10). Kaʼakxilhwi la pulalilh Jehová xkachikin xalamakgasa akxni lhuwa tuku xtalakgpalima.

5. ¿Tiku tatanokglhli Josué lakatsu kJericó? (Kaʼakxilhti xapulana dibujo).

⁵ Ni makgas kilhtamaku lata israelitas patakutkgolh kgalhtuchokgo Jordán, wi tiku tatanokglhli Josué. Lakatsu kkachikin Jericó, akxilhli chatum chixku tiku xchipanit xʼespada. Xlakata ni xkatsi tiku ama chixku, kgalhskilh: «¿Akinin nakilamakgtayayaw, o wa nakatatayaya kintalamakgasitsinkan?». Lu kaks lilakawa akxni uma chixku wanilh tiku xlitaxtu. «Xpulalina ksoldados Jehová» xwanit, nema xʼama makgtaya xkachikin Jehová (kalikgalhtawakga Josué 5:13-15 chu nota). Maski xlikana pi k’amakgapitsi textos wan pi tiku xtachuwinama Josué wa Jehová, tlan nawanaw pi xlimaklakaskima chatum ángel chuna la ankgalhin xtlawa (Éx. 3:2-4; Jos. 4:1, 15; 5:2, 9; Hech. 7:38; Gál. 3:19).

6-8. 1) ¿Tuku xlakata max wi tiku xlakpuwa pi tuku Jehová xkawanima kaj nitu xlitaxtu? 2) ¿Tuku xlakata lu tlan xwanit tuku Jehová xkawanima israelitas? (Kaʼakxilhti nota).

⁶ Josué xwanikanita tuku xlitlawat xwanit xlakata na’akgchipa Jericó. Max xapulana, Josué ni lu liwana xʼakgatekgsa tuku xwanimaka. Akgtum liʼakxilhtit, Dios kawanilh pi putum lakchixkuwin xtacircuncidarlakgolh. Wa xlakata soldados akglhuwa kilhtamaku nila xʼamakgo makgtlawakgo guerra. ¿Xlikana pi tlan xwanit natacircuncidarlikgo uma kilhtamaku? (Gén. 34:24, 25; Jos. 5:2, 8).

⁷ Max umakgolh soldados xʼakstu xkgalhskinkan la xʼamakgo kakuentajtlawakgo xfamiliajkan komo xtalamakgasitsinkan xkatalatlawakgolh. Pero soldados xalak Jericó ni katalatlawakgolh, wata pekuankgolh chu lakapala tuku tlawakgolh. Biblia wan: «Jericó liwana xtalakchuwanit xpalakatakan xlakkamanan Israel; niti la xtanu chu niti la xtaxtu» (Jos. 6:1). Xlikana pi uma tuku lalh matliwakglhli la xlipawankgo Jehová israelitas.

⁸ Nachuna, Jehová kawanilh pi ni xtalatlawakgolh Jericó. Kajwatiya xtalakaskin natlawankgo kxmakni kachikin makgtum akgtum kilhtamaku lata akgchaxan kilhtamaku chu makgtujun xliʼakgtujun kilhtamaku. Max makgapitsi soldados xlakpuwankgolh pi uma kaj xkamamakgapali chu xkamakgatlakgwan. Pero xPulalina Israel, Jehová, liwana xkatsi tuku xtlawama. Uma tuku tlawakgolh matliwakglhli xtakanajlakan israelitas chu kalakgmaxtulh xlakata ni nakatalatlawakgo lakgtliwakgan soldados xalak Jericó (Jos. 6:2-5; Heb. 11:30). *

9. ¿Tuku xlakata talakaskin nastalaniyaw tuku kinkawaniyan xkachikin Jehová? Kawili akgtum li’akxilhtit.

⁹ ¿Tuku katsiniyaw uma tuku lalh? Max namin kilhtamaku ni lu liwana katiʼakgatekgswi tuku xlakata xkachikin Jehová wi tuku laksaka. Akgtum liʼakxilhtit, makgasata max ni lu tlan x’akxilhaw namaklakaskinaw dispositivos electrónicos akxni xkgalhtawakgayaw, akxni xlichuwinanaw Dios chu ktamakxtumit. Pero max la uku akxilhaw pi lu tlan kitaxtu akxni maklakaskinaw. Wa xlakata, maski ni lu liwana akgatekgsaw tuku kinkawanikanan, talakaskin nastalaniyaw tuku kinkawaniyan xkachikin Jehová. Akxni  akxilhaw tuku tlan kitaxtu xlakata tuku lakgpalikan, kintakanajlakan chu la makxtum wilaw tlakg tatliwakglha.

10. ¿Tiku xpulalima lu xlakaskinka tamakxtumit nema kgalhikgolh lakgkgolotsin anta kJerusalén?

¹⁰ Akgkututu kata alistalh lata kstalanina Cristo litaxtulh Cornelio, tiku ni judío xwanit, makgapitsi judíos chuntiyaku xlakpuwankgo pi xlitacircuncidarlitkan xwanit (Hech. 15:1, 2). Akxni tawi akgtum ta’akglhuwit xlakata uma anta k’Antioquía, wanika Pablo pi x’alh kJerusalén xlakata nakalitachuwinan lakgkgolotsin tiku xpulalinankgo ama kilhtamaku. Pero, ¿tiku chuna xkamatlawima? Pablo wa: «Dios nkintimasiyunilh». Xlikana pi Jesús kapulalilh amakgolh lakgkgolotsin xlakata nalakkaxtlawakgo ama ta’akglhuwit (Gál. 2:1-3).

11. 1) ¿Tuku chuntiyaku xlakpuwankgo lhuwa Judíos xlakata circuncisión? 2) ¿La liputsananika Pablo xlakata kamakgtayalh lakgkgolotsin xalak Jerusalén? (Na kaʼakxilhti nota).

¹¹ Xlakata Cristo xkapulalima, lakgkgolotsin liwana masiyakgolh pi kstalaninanin Cristo tiku ni Judíos xwankgonit ni xtalakaskin natacircuncidarlikgo (Hech. 15:19, 20). Pero chuna la titaxtutilhalh kata, lhuwa Judíos chuntiyaku xkacircuncidarlikgo xlakkamanan. Wa xlakata, akxni lakgkgolotsin kgaxmatkgolh pi Pablo ni xkgalhakgaxmata Limapakgsin nema xmaxkikanit Moisés, wi tuku lakapala matlawika (Hech. 21:20-26). * Xtalakaskin pi nakalin kgalhatati lakchixkuwin xlakata latamanin na’akxilhkgo pi chuntiyaku xtlawama «wantu wan Limapakgsin». Pablo tlan xtiwa pi uma ni lu xlakaskinka chu xwa pi tiku xlinkgo kuenta wa Judíos, xlakata ni liwana xʼakgatekgskgo tuku xwankanit xlakata circuncisión. Pero ni chuna tlawalh, wata taktujulh chu kakgalhakgaxmatli lakgkgolotsin xlakata kstalaninanin Cristo makxtum natawilakgo. Max nakgalhskinkana: «Komo Limapakgsin nialhtu litaxtulh akxni nilh Jesús, ¿tuku xlakata mastalh talakaskin pi uma taʼakglhuwit ni lakapala xlakkaxtlawaka?» (Col. 2:13, 14).

12. ¿Tuku xlakata Jesús mastalh talakaskin pi ni lakapala xlakkaxtlawaka ta’akglhuwit xla circuncisión?

 ¹² Makgapitsin tuwa makgkatsikgo nalismanikgo xasasti ta’akgatekgsni. Kstalaninanin Cristo tiku Judíos xwankgonit maklakaskinkgolh lhuwa kilhtamaku xlakata nalakgpalikgo tuku xlakpuwankgo xlakata circuncisión (Juan 16:12). Makgapitsi lu tuwa makgkatsikgolh na’akgatekgskgo pi uma nialh xlimasiya komo lu tlan xtalalinkgo Dios (Gén. 17:9-12). Makgapitsin xpekuankgo xlakata xlakpuwankgo pi nakaputsastalanikan kxkachikinkan xlakata ni xtalakxtumkan xwankgonit (Gál. 6:12). Pero alistalh Cristo kalipulalilh cartas nema tsokgwililh Pablo (Rom. 2:28, 29; Gál. 3:23-25).

13. ¿Tuku nakinkamakgtayayan nastalaniyaw la uku xtapulalit Cristo?

¹³ Akxni max ni putum akgatekgsaw tuku xlakata xkachikin Jehová tlawa talakgpalit, tlan nalilakpuwanaw la kapulalilh Cristo xlakskujnin Dios xalamakgasa. Chuna la kxkilhtamaku Josué chu kxapulana siglo, ankgalhin liwana kapulalinit xlakata nakakuentajtlawa, namatliwakglha xtakanajlakan chu makxtum natawilakgo (Heb. 13:8).

14-16. ¿La limasiya Cristo pi lilakgaputsa kintakanajlakan chuna la kalimaklakaskima «skujni xalipaw chu xaskgalala»?

¹⁴ «Skujni xalipaw chu xaskgalala» kinkapulalinan akxni chuna xlilat (Mat. 24:45). Uma limasiya xtapaxkit Jesús chu limasiya pi lu lilakgaputsa kintakanajlakan. Marc, tiku kgalhi kgalhtati xlakkamanan, wan: «Xlakata kamaxlajwaniputun congregaciones, Satanás kawilini taputsan familias. Wa xlakata ankgalhin kinkawanikanan pi kakakninaniw Dios kfamilia. Lu liwana kinkawanikanan tuku kilitlawatkan akinin tiku pulalinaw familia: nakuentajtlawayaw kifamiliajkan».

¹⁵ Akxni stalaniyaw xtapulalit Cristo, liwana akxilhaw pi xla kinkamakgtayaputunan tliwakga nakgalhiyaw kintakanajlakan. Chatum kgolotsin wanikan Patrick lichuwinan: «Xapulana, makgapitsi nitlan xlimakgkatsikgo pi ni lu lhuwa natamakxtumikgo akxni xʼankan lichuwinankan Dios sábado chu domingo. Pero uma tuku lakkaxwilika limasiya lu xatlan xtayat Jesús: kalilakgaputsa tiku taktujukgo. Natalan tiku lu xmaxanankgo o ni lu lhuwa kilhtamaku xʼankgo lichuwinankgo Dios, la uku makgkatsikgo pi lhuwa xtapalh kaliʼakxilhkan chu lu tlan makgkatsikgo. Chu lu tlan kitaxtunit xlakata la uku ankgalhin lichuwinankgo Dios».

¹⁶ Cristo ni kajwatiya lilakgaputsa kintakanajlakan. Nachuna kinkamakgtayayan wa nalilakgaputsayaw tuku tlakg xlakaskinka taskujut kʼuma kakilhtamaku (kalikgalhtawakga Marcos 13:10). André chatum kgolotsin tiku nina makgas lakgayawaka uma taskujut, ankgalhin kuentajtlawa xasasti tastakyaw nema masta xkachikin Dios. Xla wan: «Xlakata nialh lu lhuwa tiku skujmakgo kBetel, kinkamalakapastakayan pi lamaw kxaʼawatiya kilhtamaku chu tuku tlakg xlakaskinka kilitlawatkan wa naʼanaw lichuwinanaw xtachuwin Dios».

17, 18. ¿Tuku xlakata talakaskin nalilakpuwanaw tuku tlan nakitaxtu komo nalismaniyaw talakgpalit nema tlawa xkachikin Jehová?

¹⁷ Xtapulalit Cristo, kiMapakgsinakan, nakinkamakgtayayan la uku chu kilhtamaku nema aku mima. Wa xlakata, kalilakpuwaw tuku tlan nakitaxtu komo nalismaniyaw tuku lakgpalikan kxkachikin Jehová. ¿Tlan xʼakxilhwi akxni kakninaniyaw Dios kfamilia talakgpalit nema tlawakanit ktamakxtumit, xlakata la lichuwinanaw Dios chu la kinkamakgtayayan? Xlikana pi max lu nakinkamakgpuwantiniyan.

¹⁸ Komo liwana na’akgatekgsaw tuku tlan nakitaxtu chu liwana nakatsiyaw pi espíritu  santo pulalin tastakyaw nema masta xkachikin Jehová , xatapaxuwan nakgalhakgaxmataw. Xlikana pi max lu lipaxuwayaw pi ni lhuwa tumin laklama xlakata kalimaklakaskinkan xasasti tuku taxtuma chu chuna ni lhuwa likgalhtawakga imprimirlikan. Xlakata uma, xkachikin Jehová tlakg malakgatumima tamakatsinin xla Tamapakgsin. Wa xlakata, ¿tlan xlimaklakaskiw likgalhtawakga xa’electrónico chu videos komo matlaniyaw? Komo chuna natlawayaw, nalimasiyayaw pi stalaniyaw xli’akxilhtit Jesús xlakata liwana nalimaklakaskinaw tuku kinkamaxkiyan xkachikin Jehová.

19. ¿Tuku xlakata talakaskin pi chuntiya nastalaniyaw xtapulalit Cristo?

¹⁹ Komo xliputum kinakujkan nastalaniyaw xtapulalit Cristo, tlakg namatliwakglha kintakanajlakan chu la makxtum katalayaw kinatalankan. André, tiku aku lichuwinaw, lichuwinalh xlakata talakgpalit nema tlawaka xlakata nialh lu lhuwa tiku naskujkgo kBetel xlikalanka Katiyatni: «Akxni kka’akxilha natalan tiku taxtukgolh kBetel pi lismanikgonit uma talakgpalit, tlawa pi nakkalipawan chu nakkamaxki kakni. Lu lipaxuwakgo taskujut nema kamaxkikanit chu chuna limasiyakgo pi stalanimakgo xputlaw Jehová».

20, 21. 1) ¿Tuku xlakata tlan nalipawanaw kimPulalinakan, Cristo? 2) ¿Tuku nalichuwinan artículo nema aku mima?

²⁰ Jesucristo, kimPulalinakan, nialh makgas «natlajanan» chu lu tlan tuku natlawa (Rev. 6:2; Sal. 45:4). Xlakata nina chin uma kilhtamaku, kamasiyanima xlakskujnin Dios la nalatamakgo chu la naskujkgo kilhtamaku nema aku namin, akxni putum akinin nakamasiyaniyaw xtachuwin Dios tiku nalakastakwanankgo chu namakgtayananaw xlakata Katiyatni akgtum paraíso nawan.

²¹ Kimapakgsinakan nakinkamakgtayayan natanuyaw kxasasti kakilhtamaku, komo ankgalhin nalipawanaw maski kalalh tuku nala (kalikgalhtawakga Salmo 46:1-3). Xlikana, max namin kilhtamaku tuwa namakgkatsiyaw nalismaniyaw talakgpalit nema tlawa xkachikin Jehová, liwaka akxni wi tuku talakgpali kkilatamatkan. ¿La tlan nakgalhiyaw takaksni chu nalipawanaw Jehová maski chuna nala? Wa uma tuku nalichuwinanaw kʼartículo nema aku mima.