1, 2. 1) ¿Tuku taskujut tlakg lilakgaputsalh Jesús chu tuku xlakata? 2) ¿Tuku talakaskin natlawayaw xlakata tlan «xtaskujnin Dios» nawanaw?

JESUCRISTO xwakna xlitaxtu chu xlichuwinan xalakwan tamakatsinin xla Tamapakgsin (Mar. 6:3; Rom. 15:8). Lu tlan makgantaxtilh xtaskujut. Liwana katsinilh la nalimaklakaskin tuku xlixwaknankan xlakata tlan xtlawalh xtaskujut. Chu nachuna liwana maklakaskilh tuku xkatsini xalak Biblia xlakata tlan nakamakgtaya latamanin liwana naʼakgatekgskgo tuku xaxlikana masiya Biblia (Mat. 7:28; Luc. 24:32, 45). Akxni xkgalhi 30 kata, makgxtakgli xtaskujut xlakata kajwatiya nalichuwinan tamakatsinin xla Tamapakgsin. Xkatsi pi wa uma taskujut tlakg xlakaskinka xwanit, xlakata lichuwinalh pi wa uma tuku xlimakaminkanit kKatiyatni (Mat. 20:28; Luc. 3:23; 4:43). Kajwatiya lilakgaputsalh nalichuwinan Dios chu xlakaskin pi nachuna xtlawakgolh amakgapitsin (Mat. 9:35-38).

² Lhuwa akinin ni xwaknanin litaxtuyaw, pero putum limakgalhtawakgananaw xalakwan tamakatsinin. Uma taskujut lu xlakaskinka xlakata asta Dios nachuna makgtayanama. Biblia lichuwinan pi akinin «xtaskujnin Dios» (1 Cor. 3:9; 2 Cor. 6:4). Katsiyaw pi tuku xaxlikana wa tuku tlakg xlakaskinka lichuwinan xtachuwin Dios (Sal. 119:159, 160). Wa xlakata, lu kuentajtlawayaw la maklakaskinaw «ntachuwin xla talulokgtat» akxni lichuwinanaw Dios (kalikgalhtawakga 2 Timoteo 2:15). Wa xlakata, talakaskin pi ankgalhin naliskujaw  liwana namaklakaskinaw Biblia, uma tuku tlakg xlakaskinka liskujni nema kgalhiyaw xlakata namasiyayaw tuku xaxlikana xla Jehová, Jesús chu Tamapakgsin. Xlakata tlan nakinkakitaxtuniyan, xkachikin Jehová kalaksaknit makgapitsi liskujni nema talakaskin liwana nalakgapasaw chu makgtanuma klikgalhtawakga nema kgalhiyaw.

3. 1) ¿Tuku tlakg xlakaskinka naliskujaw kʼuma xaʼawatiya kilhtamaku? 2) Chuna la wan Hechos 13:48 ¿tiku nakaputsayaw?

³ Max nakinkakgalhskinkanan tuku xlakata wanikan likgalhtawakga nema kgalhiyaw chu ni likgalhtawakga nema maklakaskinaw akxni lichuwinanaw Dios. Xlakata akxni wanaw pi lichuwinankan Dios, kilhchanima namastaya tamakatsinin. Pero akxni lichuwinanaw tamasiy, kilhchanima liwana nalichuwinanaw tuku kilhchani tamakatsinin xalak Biblia, xlakata chatum lataman liwana na’akgatekgsa chu uma natlawa pi naliskujputun tuku katsinima. Xlakata lamaw kxaʼawatiya kakilhtamaku, tuku tlakg xlakaskina natlawayaw wa naputsayaw tiku tlan nakamakgalhtawakgayaw chu nakamasiyaniyaw tuku xaxlikana. Uma kilhchanima nakaputsayaw tiku xlikana katsiputunkgo xlakata tlan nakgalhikgo latamat nema nikxni sputa chu nakamakgtayayaw xlakskujnin Dios nalitaxtukgo (kalikgalhtawakga Hechos 13:44-48).

4. ¿La tlan nakatekgsaw «putum tiku makglhtinamputunkgo latamat nema ni kgalhi xlisputni»?

⁴ ¿La tlan nakatekgsaw «putum tiku makglhtinamputunkgo latamat nema ni kgalhi xlisputni»? Xtachuna la kxapulana siglo, naʼanaw lichuwinanaw xtachuwin Dios. Wa xlakata talakaskin nastalaniyaw xtastakyaw Jesús: «Wampi kaxani kawaj [kkachikin], su aktsu [kkachikin] ntani natanuyatit, kakgalhskininantit nti kxchik mininiy nachipinatit» (Mat. 10:11). Katsiyaw pi ni katimakgamakglhtinankgolh tamakatsinin tiku nitlan xtapuwankan, tiku laktlankajwa o ni katsiputunkgo xlakata takanajla. Kaputsayaw latamanin tiku tlan xtapuwankan, tiku taktujukgo chu xlikana katsiputunkgo tuku xaxlikana. Kawiliw akgtum liʼakxilhtit. Akxni Jesús xwakna xwanit, max wa xputsa lu xatlan kiwi xlakata natlawa tuku tamaklakaskin, la malakcha chu yugos. Akxni xtekgsa, liwana xlimaklakaskin xliskujni xlakata tlan natlawa. Wa xlakata, akinin xtachuna kilitlawatkan: pulana talakaskin nakaputsayaw latamanin tiku kgalhikgo xatlan xnakujkan chu alistalh tlan nalimaklakaskinaw liskujni nema kgalhiyaw xlakata tlan kstalaninanin Cristo nalitaxtukgo (Mat. 28:19, 20).

5. Kalichuwinanti akgtum liʼakxilhtit xlakata la tlan nakalimaklakaskinaw liskujni nema kgalhiyaw (kaʼakxilhti xapulana dibujo).

⁵ Akgatunu liskujni tanu tanu la limaklakaskinkan. Akgtum liʼakxilhtit, kalilakpuwaw liskujni nema xlimaklakaskin Jesús xlakata tlan kxwaknan. * Makgapitsi xlimaklakaskinkan xlakata nalilhkakan kiwi; amakgapitsi xlakata nalichukukan, nalilakglhukikan o nalikaxtlawakan chu makgapitsi xlakata nakalimalakgnukan. Xtachuna la uma, pulakatunu liskujni nema kgalhiyaw tanu tanu la limaklakaskinkan. Xlakata putum xlakaskinka, naʼakxilhaw la tlan nakalimaklakaskinaw.

6, 7. 1) ¿La limaklakaskinita wix tarjetas de contacto? 2) ¿Tuku pulaktiy tlan nalimaklakaskinaw invitación?

⁶ Tarjetas de contacto. Uma liskujni lu laktsu pero lu kinkamakgtayayan xlakata latamanin tlan nakinkalakgapaskgoyan chu tlan natanukgo kkisitiojkan xla Internet. Anta tlakg natekgskgo tuku katsiputunkgo kimpalakatakan chu tlan naskinkgo akgtum takgalhtawakga xalak Biblia. Asta la uku, liwaka cuatrocientos mil latamanin skinkgonit akgtum takgalhtawakga xalak Biblia kjw.org. ¡Chu akgatunu kilhtamaku chuntiyaku lhuwa skinkgo takgalhtawakga! ¿Tlan ankgalhin nalinaw maktum tarjeta niku naʼanaw? Chuna tlan nakalitachuwinanaw latamanin lata niku naʼanaw.

⁷ Invitaciones. Invitación nema mastayaw xlakata nakawaniyaw latamanin pi kakinkatakgalhtawakgakgon,  pulaktiy la tlan nalimaklakaskinaw. Anta wan: «Kkawaniyan nakatakgalhtawakgaya Biblia xtatayananin Jehová». Alistalh lichuwinan pi tlan naʼan ktamakxtumit o namakglhtinan akgtum takgalhtawakga xalak Biblia. Wa xlakata uma aktsu liskujni ni kajwatiya tlan nalimaklakaskinaw xlakata tlan nakinkalakgapaskanan, nachuna tlan nalimaklakaskinaw xlakata tlan nakawaniyaw latamanin «tiku katsikgo pi lakaskinkgo tuku xla Dios», pi tlan nakalimakgalhtawakgeyaw Biblia (Mat. 5:3). Xlikana, putum latamanin tlan naʼankgo ktamakxtumit, maski ni makglhtinankgo akgtum takgalhtawakga. Komo naʼan, naʼakxilha pi lhuwa tuku tlan nakatsini xlakata Biblia.

8. ¿Tuku xlakata lu xlakaskinka pi latamanin naʼankgo kkintamakxtumitkan maski kaj makgtum? Kawili akgtum liʼakxilhtit.

⁸ Lu xlakaskinka pi chuntiya nakawaniyaw latamanin pi kaʼankgolh kkintamakxtumitkan maski kaj makgtum. ¿Tuku xlakata? Xlakata chuna naʼakxilhkgo pi xtatayananin Jehová masiyayaw tuku xaxlikana xalak Biblia chu kamakgtayayaw latamanin nalakgapaskgo Dios nixawa nixaxlikana takanajla (Is. 65:13). Wa uma tuku kaʼakgspulalh Ray chu Linda, akgtum tamakgaxtokgat xalak Estados Unidos. Xkanajlanikgo Dios chu xlakpuwankgonit pi naʼankgo kpusikulan xlakata tlakg nalakgapaskgo. Wa xlakata ankgolh akgatunu kpusikulan kxkachikinkan. Xʼanan lhuwa pusikulan chu lhuwa takanajla. Lata xapulana, wankgolh pi xlakata natamakgxtakgkgo kʼakgtum pusikulan, pulaktiy tuku xlimakgantaxtit xwanit uma pusikulan. Pulana, pi wi tuku xkatsinikgolh akxni xkgaxmatkgolh taʼakgchuwin. Chu xlipulaktiy, pi tiku anta ankgo liwana klhakganankgolh xlakata namaxkikgo kakni Dios. Titaxtulh makgapitsi kata, xlakgapaxialhnankgonit putum pusikulan xalak xkachikinkan chu lu nitlan xmakgkatsikgo xlakata nitu katsinikgolh chu tiku anta xʼankgo nitlan la klhakganankgo. Akxni kilakgolh kxaʼawatiya pusikulan, Linda alh skuja chu Ray taspitli kxchik. Akxni xtaspitma kxchik, titaxtulh kʼakgtum Pukgalhtawakga xla xtatayananin Jehová chu lakpuwa: «¿Tlan xakalh tanu chu xakakxilhli tuku tlawakgo?». Lu lakgatilh tuku akxilhli. Putum tiku anta xwilakgolh tlan makgamakglhtinankgolh chu liwana klhakganankgonit. Ray tawi asta kxlakatin chu lipaxuwalh tuku katsinilh. Xtachuna la wa apóstol Pablo pi tiku kajku xlimakgtum an ktamakxtumit wan: «Lu xlikana Dios katalaman» (1 Cor. 14:23-25). Lata ama kilhtamaku Ray ankgalhin tsukulh an ktamakxtumit domingos chu alistalh tsukulh an nema tatlawa kxitat semana. Linda nachuna tsukulh an. Chu maski xkgalhikgo 70 kata, xchatiykan makgamakglhtinankgolh takgalhtawakga xalak Biblia chu tamunukgolh.

9, 10. 1) ¿Tuku xlakata ni tuwa maklakaskinkan tratados? 2) Kalichuwinanti la tlan nalimaklakaskinaw tratado ¿Tuku xTamapakgsin Dios?

⁹ Tratados. Kgalhiyaw maktsayan tratados nema ni laktuwa chu tlan namaklakaskinaw xlakata namatsukiyaw takgalhchuwin. Lata akxni tsukuka tlawakan, kkata 2013, imprimirlikanit liwaka cinco mil millones. Akxni katsiniyaw la namaklakaskinaw maktum, ni tuwa katimakgkatsiw namaklakaskinaw amakgapitsi xlakata putum lakxtum. ¿La namaklakaskinaw xlakata namatsukiyaw takgalhchuwin?

¹⁰ Kalilakpuwaw pi laksakwi nalimaklakaskinaw tratado ¿Tuku xTamapakgsin Dios? Tlan nakamasiyaniyaw latamanin tuku wan kxmakni chu nakgalhskinaw: «¿Minit kilhtamaku kgalhskinkanita tuku xTamapakgsin Dios? Xlakata uma akgtutu takgalhtin ¿tuku xwanti pi wa xaxlikana?». Akxni nina waniyaw komo tlan o nitlan la kgalhtinalh, kamasiyaniw página nema stala ksección «Wantuku wan Biblia» chu kalikgalhtawakgaw Daniel 2:44 chu Isaías 9:6 nema talhkatawilanit. Komo kgalhi kilhtamaku, chuntiya katachuwinaw. Alistalh, kamasiyaniw takgalhskinin nema wi kxaʼawatiya página, niku wan «Kalilakpuwanti uma»: «¿La nawan latamat akxni namapakgsinan  xTamapakgsin Dios?». Chuna akxni nataspitparayaw wi tuku nalitachuwinanaw. Akxni natachuwinamparayaw, kalakapastakwi pi tratado lichuwinan pi kaʼakxilhwi lección 7 xla folleto Lakwan tamakatsinin masta Dios, pulaktum liskujni nema maklakaskinaw xlakata nalimatsukiyaw akgtum takgalhtawakga xalak Biblia.

11. ¿Tuku xlakata tlawakan revistas chu tuku talakaskin nakatsiyaw?

¹¹ Revistas. Makatsinina chu ¡Despertad! wa revistas nema tlakg klhuwa tachuwin tlawamaka chu tlakg makgpitsikan. Xlakata klhuwa kachikinin likgalhtawakgakan, lu liwana laksakkan tema nema limin kxmakni xlakata putum latamanin nalikgalhtawakgaputunkgo. Tlan nalimaklakaskinaw xlakata latamanin tlakg nakatsiputunkgo tuku tlakg xlakaskinka kkilatamatkan. Nachuna, xlakata nakatsiyaw tiku nakamaxkiyaw talakaskin nakatsiyaw tuku xlakata tlawakanit makatunu revistas o tiku kalakgchan nakamaxkiyaw.

12. 1) ¿Tiku katlawanikanit revista ¡Despertad! chu tuku xlakata tlawakanit? 2) ¿Tuku tlan kitaxtuninitan akxni limaklakaskinita uma revista?

¹² Revista ¡Despertad! tlawakanit xlakata latamanin tiku ni lakgapaskgo Biblia. Max ni katsikgo tuku xtamasiykan kstalaninanin Cristo, ni lipawankgo takanajla o ni katsikgo pi Biblia limin lakwan tastakyaw nema tlan kinkamakgtayayan kkilatamatkan. Uma revista tlawakan xlakata nakamasiyanikan latamanin pi Dios xlikana lama (Rom. 1:20; Heb. 11:6). Nachuna kamakgtaya nakanajlakgo pi Biblia wa xTachuwin Dios (1 Tes. 2:13). Pulaktutu tema nema limin uma kata 2018 wa «El camino de la felicidad», «12 claves para una familia feliz» chu «Ayuda para quienes están de duelo».

13. 1) ¿Tiku katlawanikanit revista Makatsinina nema tamakgpitsi? 2) ¿Tuku tlan kitaxtuninitan akxni limaklakaskinita uma revista?

¹³ Revista Makatsinina nema makgpitsikan, kamasiyani tuku lichuwinan Biblia latamanin tiku maxkikgo kakni Dios chu xTachuwin. Max wi tuku katsinikgo xalak Biblia, pero ni liwana akgatekgskgo tuku masiya (Rom. 10:2; 1 Tim. 2:3, 4). Pulaktutu tema nema limin revista uma kata 2018 kgalhti umakgolh takgalhskinin: «¿Makgtayananku xtastakyaw Biblia la uku?» «¿Tuku nala kilhtamaku nema aku mima?» chu «¿Lilakgaputsayan Dios?».

14. 1) ¿La tlan nalimaklakaskinaw pulaktati videos nema makgtanuma klikgalhtawakga nema kgalhiyaw? 2) ¿Tuku tlan kitaxtuninitan akxni limaklakaskinita uma videos?

¹⁴ Videos. Kxkilhtamaku Jesús, xwaknanin xkgalhikgo xliskujnikan nema kaj amakan xlimaklakaskinkgo, pero la uku xwaknanin kgalhikgo liskujni nema maklakaskinkgo luz, chuna la sierra mecánica, taladro, lijadora chu clavadora. Xtachuna la uma, ni kajwatiya kgalhiyaw likgalhtawakga, nachuna kgalhiyaw lhuwa videos. Pulaktati nema limaklakaskinaw, makgtanuma klikgalhtawakga nema kgalhiyaw: ¿Tuku xlakata nalikgalhtawakgaya Biblia?, ¿Tuku tatlawa kʼakgtum takgalhtawakga xalak Biblia?, ¿Tuku tatlawa kPukgalhtawakga? chu ¿Tiku xtatayananin Jehová? Videos nema kaj akgtiy minuto makgapalakgo tlan nalimaklakaskinaw akxni xapulana nakatachuwinanaw latamanin. Chu nema tlakg makgapala tlan nakamasiyaniyaw akxni nakalakgtaspitparayaw chu xlakata tiku tlakg kgalhikgo kilhtamaku. Uma liskujni tlakg nakamakgpuwantini latamanin xlakata namakglhtinankgo akgtum takgalhtawakga xalak Biblia chu naʼankgo ktamakxtumit.

15. Kalichuwinanti akgtum liʼakxilhtit xlakata tuku tlan kitaxtu akxni chatum lataman akxilha video kxtachuwin.

¹⁵ Kaʼakxilhwi la kamakgtaya videos latamanin. Chatum tala tekgsli chatum puskat xalak Micronesia chu masiyanilh video ¿Tuku xlakata nalikgalhtawakgaya Biblia? kxtachuwin yapés. Akxni tsukulh video, puskat wa: «¡Nila kkanajla, uma  kintachuwin! Chixku tiku chuwinan kvideo chuna chuwinan la akit. ¡Chuwinan kintachuwin!». Alistalh wa pi nalikgalhtawakga chu naʼakxilha putum tuku wi kjw.org ktachuwin yapés (katamalakxtupi Hechos 2:8, 11). Nachuna titaxtulh chatum tala xalak Estados Unidos tiku malakgachanilh xpuxnimat, tiku lama kʼatanu país, página xla kisitiojkan xlakata naʼakxilha watiya uma video kxtachuwin. Akxni akxilhkgolh, xla malakgachanilh akgtum correo chu wanilh: «Tuku tlakg kaks kimalakawanilh wa akxni lichuwinan pi chatum tiku lu tliwakga chu lixkajni likatsi akgchipanit kakilhtamaku. Kskilh akgtum takgalhtawakga xalak Biblia». Xla lama kʼakgtum país niku ni mastakan talakaskin nalichuwinankan xTachuwin Dios.

16. Kalichuwinanti la namaklakaskinaw umakgolh folletos: 1) Kakgalhakgaxpatti Dios chu putum kilhtamaku nalatapaya. 2) Lakwan tamakatsinin masta Dios. 3) ¿Tiku tlawakgo xtalakaskin Jehová la uku?

¹⁶ Folletos. Komo chatum lataman nila kgalhtawakga o komo ni anan likgalhtawakga kxtachuwin, ¿la tlan namasiyaniyaw tuku xaxlikana? Kgalhiyaw lu xatlan liskujni: folleto Kakgalhakgaxpatti Dios chu putum kilhtamaku nalatapaya. * Atanu xatlan liskujni nema tlan nalimatsukiyaw akgtum takgalhtawakga xalak Biblia wa folleto Lakwan tamakatsinin masta Dios. Tlan nakamasiyaniyaw latamanin pulakkutati temas nema limin kxaʼawatiya página chu nakgalhskinaw tuku tlakg lakgati chu tlan natsukuyaw limakgalhtawakgeyaw ama lección. ¿Chuna tlawanitaw akxni kalakgtaspitparayaw latamanin? Xlipulaktutu folleto wa ¿Tiku tlawakgo xtalakaskin Jehová la uku? Tlawakanit xlakata tiku kalimakgalhtawakgekan Biblia nalakgapaskgo xkachikin Jehová. Xlakata nakatsiyaw la namaklakaskinaw, tlan naʼakxilhaw Tuku natalikgalhtawakga Xlatamat chu xtaskujut kstalanina Cristo xla marzo kata 2017.

17. 1) ¿La tlan nalimaklakaskinaw pulakatunu libro nema limakgalhtawakgananaw? 2) ¿Tuku xlitlawatkan tiku tamunukgo chu tuku xlakata?

¹⁷ Libros. Komo nalimatsukiyaw akgtum takgalhtawakga xalak Biblia maktum folleto, tlan nalakgpaliyaw uma likgalhtawakga chu nalimaklakaskinaw libro ¿Tuku xlikana masiya Biblia? Uma liskujni namakgtaya tiku limakgalhtawakgemaka tlakg liwana nakatsini tuku masiya Biblia. Komo namasputu uma libro chu matliwakglhma xtakanajla, tlan namatsuki libro «Katamakgxtakgtit kxtapaxkit Dios». * Uma namakgtaya natsuku lilatama tastakyaw xalak Biblia. Kalakapastakwi pi putum tiku kgalhtawakgama, xlimasputut uma maktiy libros maski tamununita nawan. Chuna xtakanajla tliwakga nawan (kalikgalhtawakga Colosenses 2:6, 7).

18. 1) Chuna la wan 1 Timoteo 4:16, ¿tuku kilitlawatkan chu tuku nakitaxtu? 2) ¿La namaklakaskinaw likgalhtawakga nema kgalhiyaw?

¹⁸ Akinin xtatayananin Jehová talakaskin nalichuwinanaw xaxlikana tamakatsinin nema natlawa pi latamanin tlan nalatamakgo putum kilhtamaku (Col. 1:5; kalikgalhtawakga 1 Timoteo 4:16). Xlakata tlan chuna natlawayaw, kinkamaxkikanitan likgalhtawakga nema kgalhiyaw xlakata tlan namaklakaskinaw (kaʼakxilhti recuadro « Likgalhtawakga nema kgalhiyaw»). Liwana kalimaklakaskiw. Chatunu tiku lichuwinan Dios tlan nalaksaka tuku nalimaklakaskin chu tukuya kilhtamaku chuna natlawa. Pero kalakapastakwi pi ni kajwatiya namakgpitsiyaw likgalhtawakga. Nachuna ni nakamakgxtakgniyaw latamanin tiku ni katsiputunkgo xaxlikana tamakatsinin. Tuku tlakg xlakaskinka natlawayaw wa nakaputsayaw «putum tiku makglhtinamputunkgo latamat nema ni kgalhi xlisputni», tiku tlan kgalhikgo xtapuwankan, taktujukgo chu katsiputunkgo tuku xaxlikana, tlan kstalaninanin Cristo nalitaxtukgo (Hech. 13:48; Mat. 28:19, 20).