1, 2. 1) ¿Tuku namakgkatsi chatum kstalanina Cristo akxni wi tuku lakapala natalakgpali kxlatamat? (Kaʼakxilhti xapulana dibujo). 2) Chuna la wan Salmo 131, ¿tuku nakinkamakgtayayan chuntiya nakgalhiyaw takaksni?

LLOYD CHU ALEXANDRA liwaka puxamakitsis kata la skujkgolh kBetel. Wa xlakata, akxni taxtukgolh kBetel chu kamalakgachaka alakatanu, lu lilipuwankgolh. Lloyd wan: «Lu xaklismaninita kintaskujut chu la xaklama kBetel. Xakʼakgatekgsa tuku xlakata xkinkalakgpalikanitan, pero chuna la titaxtutilhalh kilhtamaku xakmakgkatsi pi xkilakgmakgankanit. Nitlan xakmakgkatsi. Xmin kilhtamaku wi tuku xaklipaxuwa pero kaj lakapala xtalakgpali tuku xakmakgkatsi».

² Akxni wi tuku lakapala talakgpali kkilatamatkan, max lu nalilakgaputsayaw chu namakgkatsiyaw pi tlakgwanaw (Prov. 12:25). Chu asta max tuwa namakgkatsiyaw nalismaniyaw tuku talakgpalilh. ¿Tuku nakinkamakgtayayan tlan namakgkatsiyaw akxni chuna natitaxtuyaw? (kalikgalhtawakga Salmo 131:1-3). Kaʼakxilhwi tuku tlawakgolh makgapitsin xlakskujnin Dios xala makgasa chu xala kkinkilhtamakujkan xlakata ni namakgatsankgakgo takaksni  maski kaj lakapala tuku talakgpalilh kxlatamatkan.

3. ¿Tuku akgspulalh José?

³ José xkgawasa Jacob xwanit tiku tlakg xpaxki. Wa xlakata, xnatalan lu sitsinikgolh chu asta stakgolh la chatum skujni akxni xkgalhi akgkutujun kata (Gén. 37:2-4, 23-28). Lu patinalh liwaka akgkututu kata la skujni xlitaxtu chu la xtanuma kpulachin anta kʼEgipto, chu ni anta xtawi xtlat tiku lu xpaxki. ¿Tuku makgtayalh ni natlakgwan chu ni namakgatsankga tapaxuwan?

4. 1) ¿Tuku xlilakpuwan José akxni xtanuma kpulachin? 2) ¿La kgalhtilh Jehová xʼoración?

⁴ Akxni xtanuma kpulachin, max José xlilakpuwan tuku xtitaxtunit kxlatamat nema xlimasiyani pi Jehová xkuentajtlawama (Gén. 39:21; Sal. 105:17-19). Nachuna, tamanixnat nema masiyanika akxni tlakg kgawasaku xwanit matliwakglhli xtakanajla (Gén. 37:5-11). Chu xlikana pi ni kaj makgtum wanilh Jehová tuku xmakgkatsi (Sal. 145:18). Jehová makgtayalh liwana naʼakgatekgsa pi xla ni xʼama makgxtakga chu chuna kgalhtilh xʼoración (Hech. 7:9, 10). *

5. ¿La nakinkamakgtayayan «xtakaksni Dios» xlakata tlakg naskujnaniputunaw?

⁵ La uku, max wi tuku tuwa natitaxtuyaw kkilatamatkan. Komo chuna, tlan namakgkatsiyaw la «xtakaksni Dios» kuentajtlawa kintalakapastaknikan (kalikgalhtawakga Filipenses 4:6, 7). Wa xlakata kaputsaw xtamakgtay Jehová akxni wi tuku nitlan limakgkatsiyaw. Chuna xtakaksni nakinkamakgtayayan ni nataxlajwaniyaw chu chuna tlakg naskujnaniyaw Jehová. Kaʼakxilhwi makgapitsi liʼakxilhtit xala uku nema chuna limasiya.

6, 7. ¿La kinkamakgtayayan nakgalhiyaw takaksni liwana nawanaw tuku makgkatsiyaw akxni tlawayaw oración? Kawili akgtum liʼakxilhtit.

⁶ Akxni Ryan chu Juliette katsikgolh pi ksputnita xtaskujutkan la precursores especiales lu nitlan makgkatsikgolh. Ryan wan pi lakapala tlawakgolh oración. Lichuwinan: «Xakkatsiyaw pi xakkgalhiyaw talakaskin naklimasiyayaw pi xaklipawanaw Dios. Lhuwa natalan xalak congregación xalaksasti xwankgonit, wa xlakata kskiniw Jehová pi xkinkamakgtayan nakawiliniyaw lu xatlan liʼakxilhtit xla takanajla».

⁷ ¿La kakgalhtika? Ryan lakapastaka: «Akxni kmasputuw oración, tuku xaklilakgaputsamaw chu tuku xakmakgkatsiyaw xlakgsputkgonit. Xtakaksni Dios xkinkamakgtayaman nakuentajtlawayaw kintalakapastaknikan chu kinakujkan. Liwana kkatsiw pi chuntiya tlan nakskujnaniyaw Jehová komo tlan tuku xaklakapastakwi».

8-10. 1) ¿La tlan nakinkamakgtayayan xʼespíritu Dios xlakata tlan natayaniyaw? 2) ¿La nakinkasikulunatlawayan Jehová xlakata liskujaw na’akxilhaw tuku nitlan titaxtuyaw chuna la xla akxilha?

⁸ Espíritu santo ni kajwatiya tlan kinkamamakgkatsiniyan, nachuna tlawa pi natekgsaw textos xalak Biblia nema nakinkamakgtayayan pulana nawiliyaw tuku xla kintakanajlakan (kalikgalhtawakga Juan 14:26, 27). Kaʼakxilhwi xliʼakxilhtit Philip chu Mary, akgtum tamakgaxtokgat tiku liwaka puxamakitsis kata skujkgolh kBetel. Lata akgtati papaʼ, nikgolh xtsekan chu chatum xtalilakgapasni Philip. Nachuna tsukukgolh kuentajtlawakgo xtlat Mary, xlakata xkgalhi akgtum tajatat nema xtlawa pi nialh xlakapastaknalh.

⁹ Philip lakapastaka: «Xaklakpuwan pi nitu xaklilakgaputsa, maski wi tuku nitlan xkitaxtu. Akgtum kilhtamaku, akxni xaklikgalhtawakgama akgtum artículo xla Makatsinina, klilakpuwa tuku wan Colosenses 1:11. Kakxilhli pi xlikana,  xaktayanima, pero nichuna la xlilat xwanit. Texto kimakgtayalh liwana nakakxilha pi xtalakaskin nakkgalhi tapaxuwan chu takgalhkgalhin xlakata tlan naktayani. Chu kimalakapastakalh pi tapaxuwan nema kkgalhi ni wa xlakata tuku ktitaxtu, wata wa xlakata xtamakgtay espíritu nema Dios masta».

¹⁰ Philip chu Mary liskujkgolh naʼakxilhkgo tuku nitlan xtitaxtumakgo chuna la akxilha Jehová chu xla kasikulunatlawalh. Akgtum liʼakxilhtit, ni makgas lata xtaxtukgonit kBetel, xchatiykan katekgskgolh latamanin tiku tlakg xkatsiniputunkgo Biblia chu akglhuwa kilhtamaku xkgalhtawakgaputunkgo chu tatliwakglhli xtakanajlakan. Mary lakapastaka tuku titaxtulh chu wan: «Lu klipaxuwaw chu Jehová chuna kinkalimasiyanin pi putum tlan xʼama kitaxtu».

11, 12. 1) ¿Tuku tlawalh José xlakata Jehová wi tuku tlan ksikulunatlawalh kxlatamat? 2) ¿La sikulunatlawaka José xlakata lhuwa tuku tayanilh?

¹¹ Tuku kaj lakapala la kkilatamatkan max natlawa pi napekuanaw chu namakgkatsiyaw pi nila tuku tlawayaw. Max José tlan chuna xti’akgspulalh. Pero tuku lalh limasiya pi xla liskujli natlawa putum tuku xmatlani xlakata Jehová wi tuku ksikulunatlawalh kxlatamat. Wa xlakata maski xtanuma kpulachin, liskujli xlakata namakgantaxti tuku xwani tiku xkuentajtlawa pulachin, chuna la xtlawa akxni kskujma kxchik Potifar (Gén. 39:21-23).

¹² Akgtum kilhtamaku, tiku xkuentajtlawa pulachin wanilh pi xkakuentajtlawalh chatiy lakchixkuwin tiku xkgalhikgo lu xlakaskinka taskujut kxlakatin faraón. Xlakata José lu tlan kalikatsinilh, akgtum kilhtamaku xlakan wanikgolh tuku xlilakgaputsakgo chu wanikgolh tuku xmanixnankgonit uma tsisni (Gén. 40:5-8). José ni xkatsi, pero tuku lalh lakapala xʼama lakgpali xlatamat. Titaxtulh akgtiy kata chu watiya kilhtamaku akxni tamakxtuka kpulachin, na chuna lakgayawaka lanka taskujut xlakata xlichatiy tiku tlakg xkgalhi limapakgsin litaxtulh chuna la faraón (Gén. 41:1, 14-16, 39-41).

13. Maski lata tuku titaxtumaw, ¿tuku tlan naliskujaw xlakata Jehová wi tuku tlan nasikulunatlawa kkilatamatkan?

¹³ Chuna la José, max namin kilhtamaku wi tuku nala kkilatamatkan nema ni katsiyaw la nalakkaxtlawayaw. Pero, komo xakgalhkgalhinanin nawanaw chu naliskujaw putum tuku matlaniyaw, Jehová wi tuku tlan nasikulunatlawa kkilatamatkan (Sal. 37:5). Xlikana, max namin kilhtamaku ni katikatsiw tuku natlawayaw pero kalakapastakwi pi uma «ni wamputun pi nila tuku natlawayaw» chuna la wa apóstol Pablo (2 Cor. 4:8). Chu chuna nala komo naliskujaw pulana nawiliyaw kkilatamatkan tuku xla Dios.

14-16. ¿Tuku tlawalh Felipe akxni wi tuku lakapala talakgpalilh kxlatamat?

¹⁴ Kaʼakxilhwi xliʼakxilhtit Felipe, tiku kinkawilinin lu xatlan liʼakxilhtit xlakata tuku kilhchanima wa naliskujaw nalichuwinanaw Dios maski wi tuku lakapala talakgpali kkilatamatkan. Felipe lakgayawaka xasasti taskujut anta kcongregación xalak Jerusalén (Hech. 6:1-6). Wa xlakata, akxni makgnika Esteban, tsukuka kaputsastalanikan. * Akxni Felipe akxilhli pi makgapitsin kstalaninanin Jesús taxtukgolh kJerusalén xlakata xtsalamakgo, wi tuku tlawalh. Alh lichuwinan Dios kSamaria, akgtum kachikin niku nina makgas la xlichuwinankanit Dios (Mat. 10:5; Hech. 8:1, 5).

¹⁵ Felipe liwana xlakpuwanit naʼan niku xʼespíritu Dios xmalakgachalh. Wa xlakata, Jehová maklakaskilh Felipe namalakki tiji xlakata alistalh tlan xlichuwinanka Dios alakatanu. Uma kilhtamaku, Judíos ni xkaʼakxilhputunkgo samaritanos. Pero xlakata Felipe kalimasiyanilh talakgalhaman, xlakan max lu tlan makgkatsikgolh. Wa xlakata latamanin kgaxmatnikgolh (Hech. 8:6-8).

¹⁶ Alistalh, espíritu santo malakgachalh kʼAsdod chu kCesarea, akgtiy kachikinin niku xlamakgolh lhuwa tiku ni Judíos xwankgonit (Hech. 8:39, 40). Akgpuxam kata alistalh lata tsukulh lichuwinan Dios kSamaria, wi tuku talakgpalipa kxlatamat Felipe. La uku xkgalhi xfamilia chu anta xlama kkachikin niku xlichuwinan Dios. Maski lhuwa tuku talakgpalilh kxlatamat, kajwatiya liskujli nalichuwinan xtachuwin Dios, chu xlakata chuna tlawalh, xla chu xfamilia makglhtinankgolh lhuwa tasikulunalin (Hech. 21:8, 9).

17, 18. ¿La kinkamakgtayayan kajwatiya nalichuwinanaw Dios akxni wi tuku lakapala talakgpali?

¹⁷ Lhuwa natalan tiku putum kilhtamaku skujnanimakgo Jehová, kanajlakgo pi xlakata kaj wa liskujkgolh nalichuwinankgo Dios kamakgtayalh nakatsikgo tuku natlawakgo maski wi tuku lakapala talakgpalilh kxlatamatkan. Kaʼakxilhwi tuku titaxtukgolh Osborne chu Polite, akgtum tamakgaxtokgat xalak Sudáfrica. Akxni taxtukgolh kBetel, lakpuwankgolh pi ni makgas xʼamakgo tekgskgo akgtum taskujut chu niku tlan xtawilakgolh. Pero, ¿tuku lalh? Xla wan: «Lu nitlan, pero ni tunkun ktekgswi taskujut chuna la xaklakpuwanaw». Chu Polite lakapastaka: «Liwaka akgtutu papaʼ ni xakkgalhiyaw taskujut, chu nitu xakmakinitaw tumin. Lu tuwa tuku ktitaxtuw».

¹⁸ ¿Tuku kamakgtayalh akxni chuna xtitaxtumakgo?  Osborne lichuwinan: «Xlakata xakkataʼanaw natalan akxni xlichuwinankgo Dios, lu kinkamakgtayan nitu naklilakgaputsayaw. Klakkaxwiliw pi kajwatiya naklichuwinanaw Dios chu ni kaj wa naklilakgaputsayaw tuku xaktitaxtumaw. Uma lu kinkamakgapaxuwan. Lakalhuwa niku kputsaw taskujut, asta akxni ktekgswi».

19-21. 1) ¿Tuku nakinkamakgtayayan chuntiya nakgalhiyaw takaksni? 2) ¿Tuku nakitaxtu komo nalismaniyaw tuku talakgpali?

¹⁹ Chuna la limasiyakgo umakgolh liʼakxilhtit, komo natlawayaw putum tuku matlaniyaw chu nalipawanaw Jehová, chuntiya nakgalhiyaw takaksni (kalikgalhtawakga Miqueas 7:7). Asta max naʼakxilhaw pi akxni lismaniyaw tuku talakgpali, lu kinkamakgtayayan kkintakanajlakan. Polite lichuwinan tuku katsininit xlakata tuku titaxtulh: «Makglhtinankan xasasti taskujut kxkachikin Jehová, kimasiyaninit tuku xlikana kilhchanima lipawankan Jehová, maski tasiya pi niti kimakgtaya. Chuna la ktalalin Jehová tlakg tatliwakglhnit».

²⁰ Mary, tiku lichuwinaw kpárrafo 8, chuntiyaku kuentajtlawama xtlat chu precursora litaxtu. Xla wan: «Kkatsinit pi akxni nitlan kmakgkatsi, talakaskin nakkgalhkgalhi, naktlawa oración chu ni lu naklilakgaputsa. Klakpuwan pi tuku lu tlan kkatsininit xlakata tuku ktitaxtuma, wa pi tuku klilakgaputsa tlan nakmakgxtakga kxmakan Jehová. Chu uma lu natalakaskin kkilhtamaku nema aku namin».

²¹ Lloyd chu Alexandra, tiku kalichuwinaw kxapulana párrafo, lichuwinankgo pi ni xlakpuwankgo la xʼamaka kaliputsananikan kxtakanajlakan tuku titaxtukgolh. Wankgo: «Tuku titaxtuyaw limasiya la wi kintakanajlakan chu komo nakinkamakgtayayan akxni natitaxtuyaw tuku tuwa. Lu tlan tuku kinkakitaxtunin».

22. ¿Tuku liwana katsiyaw komo natlawayaw putum tuku matlaniyaw la uku?

²² Komo wi tuku natalakgpali kkilatamatkan, max xasasti taskujut kxkachikin Jehová, tajatat o xlakata kifamiliajkan, liwana kakatsiw pi Jehová lu kinkalilakgaputsayan chu nakinkamakgtayayan akxni namaklakaskinaw (Heb. 4:16; 1 Ped. 5:6, 7). Pero la uku, katlawaw putum tuku matlaniyaw. Tlakg katalakatsuwiniw kinTlatikan xalak akgapun, katlawaniw oración chu kamastaw talakaskin pi xla nakinkakuentajtlawayan. Komo chuna natlawayaw chuntiya nakgalhiyaw takaksni maski wi tuku lakapala natalakgpali.