CHATUM tiku akgchuwinan kradio lichuwinan la wi kilhtamaku xlakata tlakg liwana katsi tuku nala, komo max nasenan o ni. Akxni makatsininankan pi talakatsuwima akgtum lanka unisen kʼakgtum kachikin, xlakata kalilakgaputsa latamanin, lakapala chu makglhuwa kamakatsini akxni nina chin.

Nachuna, Jehová kamakatsinima latamanin pi talakatsuwima akgtum «lanka talakgaputsit» nema tlakg tliwakga nixawa atanu tuku masputunan. ¿La tlawa? ¿Chu tuku likatsiyaw pi kamaxkima kilhtamaku latamanin xlakata nakgaxmatkgo? Xlakata nakatsiyaw xatakgalhtin, kalichuwinaw makgapitsi tamakatsinin nema mastalh Jehová makgasa.

Makgasa kilhtamaku, Jehová makglhuwa makatsininalh pi xʼama kamalakgaxokge tiku ni xkgalhakgaxmatkgo xlimapakgsin (Prov. 10:25; Jer. 30:23). Akxni chuna xtlawa, xkamaxki kilhtamaku xlakata tlan xlakgpalikgolh xtayatkan akxni nina xmin uma «lanka talakgaputsit» (2 Rey. 17:12-15; Neh. 9:29, 30). Xlakata xkamakgpuwantinilh natlawakgo tuku xatlan, ankgalhin xkamaklakaskin xlakskujnin xalak Katiyatni xlakata namakatsininankgo tuku natlawa chu chuna xkawanikgo latamanin pi wi tuku xtlawakgolh (Amós 3:7).

Chatum xlakskujni tiku maklakaskilh wa Noé. Akglhuwa kata kamakatsinilh latamanin tiku nitlan xlikatsikgo, pi xtalakatsuwima akgtum Munkaklat (Gén. 6:9-13, 17). Nachuna kawanilh tuku xlitlawatkan xwanit xlakata tlan xlakgtaxtukgolh. Lu liskujli uma tuku xlakgayawakanit chu asta lilakgapaska la «tiku xlichuwinan tuku xaʼakgstitum» (2 Ped. 2:5).

Maski Noé makglhuwa kamakatsinilh, latamanin ni kanajlakgolh chu ni kgalhakgaxmatkgolh uma xtamakatsinin Dios. Wa xlakata nikgolh akxni «milh Munkaklat chu putum kamalakgsputulh» (Mat. 24:39; Heb. 11:7). Nila wankgolh pi Dios ni kamakatsinilh.

Nachuna, milh kilhtamaku Jehová kamakatsinilh latamanin akxni atsinu xtsankga namin «lanka talakgaputsit». Maski chuna, kamaxkilh kilhtamaku xlakata latamanin wi tuku xtlawakgolh. Chuna tlawalh akxni makamilh pulakkaw plagas anta kʼEgipto. Kaʼakxilhwi akgtum liʼakxilhtit, kalichuwinaw tuku lalh akxni nina xmin xlipulaktujun plaga, chijit nema masputunan. Jehová kamalakgachalh Moisés chu Aarón xlakata namakatsinikgo faraón chu xlakskujnin. Xlakata uma chijit lichali xʼama takta, ¿kamaxkilh kilhtamaku xlakata xtekgskgolh niku natatsekgkgo? Biblia lichuwinan: «Putum tiku pekuanilh xtachuwin Jehová, tiku xlakskujnin Faraón xwankgonit, kamalakgachalh kskujnin chu xʼanimales kxchikkan. Pero tiku ni kanajlakgolh xtachuwin Jehová kamakgxtakgkgolh xʼanimales chu xlakskujninkan anta kkapukuxtun» (Éx. 9:18-21). Xlikana pi Dios pulana makatsininalh, mastalh kilhtamaku xlakata wi tuku xtlawakgolh. Xlakata chuna tlawalh, latamanin tiku kgaxmatkgolh tlan lakgtaxtukgolh.

Dios nachuna kamakatsinilh faraón chu xlakskujnin akxni nina xtsuku xaʼawatiya plaga. Pero xlakan ni kgaxmatkgolh (Éx. 4:22, 23). Wa xlakata, nikgolh xapuxku xkamanankan. ¡Lu nitlan! (Éx. 11:4-10; 12:29). ¿Xwijku kilhtamaku xlakata wi tuku tlan xtlawakgolh? Chuna. ¿Tuku xlakata chuna wanaw? Moisés kamakatsinilh israelitas tuku xlitlawatkan xwanit xlakata nitu xkatlawanilh uma plaga (Éx. 12:21-28). ¿La kgalhlit kgaxmatkgolh? Akgtutu millones latamanin taxtukgocha  kʼEgipto chu «katataxtukgolh lhuwa tiku ni israelitas xwankgonit» chu max makgapitsin tiku egipcios xwankgonit (Éx. 12:38; nota).

Chuna la masiyakgo umakgolh liʼakxilhtit, Jehová ankgalhin kamaxkinit kilhtamaku latamanin xlakata kuenta natlawakgo xtamakatsinin (Deut. 32:4). ¿Tuku xlakata? Apóstol Pedro lichuwinalh pi Jehová «ni lakaskin pi wi tiku namalakgsputukan, wata lakaskin pi putum kamakgxtakgkgolh tuku nitlan tlawamakgolh» (2 Ped. 3:9). Chuna, Dios kalilakgaputsalh latamanin. Xlakaskin pi nialh xtlawakgolh tuku nitlan chu kstalanikgolh xtastakyaw akxni nina xmin akgtum talakgaputsit (Is. 48:17, 18; Rom. 2:4).

La uku kilhtamaku latamanin na xlikgaxmatatkan akgtum lu xlakaskinka tamakatsinin nema mastamaka xlikalanka kakilhtamaku. Akxni Jesús xlama unu kKatiyatni, lichuwinalh pi uma kakilhtamaku xʼamaka malakgsputukan akxni xmilh «lhuwa tapatin» (Mat. 24:21). Liwana lichuwinalh tuku xʼamakgolh akxilhkgo chu tuku xʼamakgolh titaxtukgo xlakskujnin akxni xtalakatsuwitilhalh ama kilhtamaku. Lhuwa tuku lichuwinalh nema xʼama la kxlikalanka Katiyatni nema akxilhmaw la uku (Mat. 24:3-12; Luc. 21:10-13).

Chuna la lichuwinankanit, Jehová kawani putum latamanin pi kaskujnanikgolh chu kakgalhakgaxmatkgolh. Lakaskin pi putum tiku kgalhakgaxmatkgo tlan kakakitaxtunilh la uku chu nakamaxki tasikulunalin kxasasti kakilhtamaku (2 Ped. 3:13). Xlakata latamanin nakanajlakgo xtamalaknun, Jehová mastanit «xatlan tamakatsinin xla Tamapakgsin», akgtum tamakatsinin nema nalakgmaxtu xlatamatkan. Jesús lichuwinalh pi xʼama talichuwinan Dios «kputum laklanka kachikinin» (Mat. 24:14). Dios kalakkaxwilinit xlakskujnin xlakata namakatsininankgo uma kliwaka 240 países. Lakaskin pi lhuwa latamanin nakgaxmatkgo xtamakatsinin chu tlan nalakgtaxtukgo ktalakgaputsit nema nialh makgas nachin (Sof. 1:14, 15; 2:2, 3).

Chuna la akxilhnitaw, Jehová kamaxki kilhtamaku latamanin xlakata nakgaxmatkgo xtamakatsinin. Wa xlakata, tuku tlakg xlakaskinka wa pi nalilakpuwanaw komo latamanin nakgalhakgaxmatkgo xtamakatsinin. Akinin, xlakskujnin Dios, chuntiya kakamakgtayaw latamanin xlakata tlan nalakgtaxtukgo akxni namalakgsputukan uma kakilhtamaku.