1. ¿Tuku xlakata kajwatiya Jehová lakgchan nakakninaniyaw?

KAJWATIYA JEHOVÁ lakgchan nakakninaniyaw xlakata wa tiku kinkamalakatsukin chu kinkamaxkin latamat (Apoc. 4:11). Pero, maski paxkiyaw chu maxkiyaw kakni Jehová, max wi tuku natsukuyaw lakgatiyaw chu natlawa pi ni xaʼakchan nakakninaniyaw. Xlakata ni chuna nakinkaʼakgspulayan, talakaskin nakatsiyaw tuku max natlawa pi chuna nala. Pero pulana kaʼakxilhwi tuku kilhchanima pi kajwatiya Jehová nakakninaniyaw.

2. Chuna la wan Éxodo 34:14, ¿tuku ni katitlawaw komo kajwatiya Jehová kakninaniyaw?

² Biblia tamalakxtumi tapaxkit nema kgalhiniyaw Jehová chu chuna la kakninaniyaw. Kajwatiya nakakninaniyaw kilhchanima pi kajwatiya nakgalhakgaxmataw. Ni kamastaw talakaskin pi atanu tuku tlakg xlakaskinka nalitaxtu kkilatamatkan (kalikgalhtawakga Éxodo 34:14).

3. ¿Tuku xlakata kakninaniyaw Jehová?

³ Kakninaniyaw Jehová xlakata lhuwa tuku katsininitaw xpalakata. Lakgatiyaw xalakwan tayat nema kgalhi. Katsiyaw tuku lakgati chu tuku ni lakgati, chu akinin nachuna akxilhaw la xla. Katsiyaw tuku xtalakaskin chu tatayayaw, akxni lilatamayaw xlimapakgsin. Lu tlan limakgkatsiyaw pi kinkamaxkiyan talakaskin xʼamigos nalitaxtuyaw (Sal. 25:14). Putum tuku katsiniyaw xlakata kiMalakatsukinakan tlawa pi tlakg natalakatsuwiniyaw (Sant. 4:8).

4. 1) ¿Tuku maklakaskin Akgskgawini xlakata ni kajwatiya Jehová nakakninaniyaw? 2) ¿Tuku naʼakxilhaw kʼuma artículo?

 ⁴ Akgskgawini mapakgsi uma kakilhtamaku chu limaklakaskin xlakata natlawa pi tuku lakgatiyaw tlakg xlakaskinka nalitaxtu kkilatamatkan chu pi tuku makgkatsiyaw nakinkamatlawiyan tuku nitlan (Efes. 2:1-3; 1 Juan 5:19). Lakaskin pi atanu tuku napaxkiyaw chu ni kajwatiya Jehová nakakninaniyaw. Kalichuwinaw pulaktiy tuku maklakaskin xlakata chuna natlawa. Pulana, tlawaputun pi kapaxkiw tumin. Chu xlipulaktiy, tlawaputun pi nixatlan lilakgastan nalaksakaw.

5. ¿Tuku xlakata kuenta kilitlawatkan ni napaxkiyaw tumin?

⁵ Kimputumkan kgalhiputunaw tuku maklakaskinaw chuna la liwat, tuku nalhakgayaw chu niku natawilayaw. Pero kuenta kilitlawatkan ni napaxkiyaw tumin. La uku, lhuwa latamanin «paxkikgo tumin» chu tuku tlan litamawakgo (2 Tim. 3:2). Jesús xkatsi pi kstalaninanin max chuna xmakgkatsikgolh, wa xlakata kawanilh: «Nila tiku skujni chatiy malana; xlakata nasitsini chatum chu napaxki achatum, o namaxki kakni chatum chu nalakgmakgan achatum. Nila nalitaxtuyatit xlakskujnin Dios chu xlakskujnin Tumin» (Mat. 6:24). Tiku kakninani Dios pero nachuna lhuwa kilhtamaku limaxtu xlakata nakgalhi lhuwa tumin litaxtu la komo chatiy malana kakninanima. Ni kajwatiya Jehová kakninanima.

6. ¿Tuku kinkamasiyaniyan tuku kawanilh Jesús xalak Laodicea?

⁶ Akxni ksputmaja xapulana siglo, kstalaninanin Cristo xalak Laodicea xlilaktlankajwanankgo xlakata xkgalhikgo tumin chu nialhtu xmaklakaskinkgo. Pero kxlakatin Jehová chu kxlakatin Jesús xlitaxtukgo la komo lakglimaxkgenin, ni xlakawanankgo,  nitu xkgalhikgo chu xlitaxtukgo la komo nitu klhakganankgonit. Jesús ni kastakyawalh xlakata xkgalhikgo tumin, wata kastakyawalh xlakata xpaxkikgo tumin chu uma xtlawama pi nialh tlan xtalalinkgolh Jehová (Apoc. 3:14-17). Komo akxilhaw pi kkinakujkan makgkatsiyaw pi kgalhiputunaw tuku lhuwa xtapalh, lakapala kalakgmakgaw uma tapuwan (1 Tim. 6:7, 8). Komo ni chuna natlawayaw, kinakujkan nalakgaputiyunan chu Jehová ni katimakglhtinalh kintakakninkan xlakata xla «lakaskin pi kajwatiya nakakninaniyaw» (Deut. 4:24). ¿Tuku max natlawa pi lu xlakaskinka naʼakxilhaw tumin?

7-9. ¿Tuku kinkamasiyaniyan xliʼakxilhtit chatum kgolotsin wanikan David?

⁷ Kaʼakxilhwi tuku titaxtulh chatum kgolotsin xalak Estados Unidos wanikan David. Xla lichuwinan pi liskuja xlakata tlan namakgantaxti xtaskujut. Kʼempresa niku kskujma, tlakg xatlan taskujut maxkika chu tlakg tsukuka maskgawikan o xokgonikan chu asta kxkachikin lu lakgapaska xlakata lu tlan taskujut tlawalh. Xla lichuwinan: «Xaklakpuwan pi putum tuku tlan xkinkitaxtunima wa xlakata Jehová xkisikulunatlawama». Pero ¿xlikana uma?

⁸ David tsukulh akxilha pi xtaskujut xlaktlawama la xtalalin Jehová. Xla wan: «Ktamakxtumit chu asta akxni xakan lichuwinan Dios kajwatiya xaklakapastaka taʼakglhuwit nema xʼanan kkimputaskujut. Lu lhuwa tumin xaktlaja, pero chali chali tlakg xaktlakgwan chu ktsukulh kgalhi taʼakglhuwit kkintamakgaxtokgat».

⁹ David akxilhli pi xtalakaskin nakuentajtlawa tuku pulana xwilima kxlatamat. Xla lichuwinan: «Klakkaxwililh tuku xakama tlawa». Wa xlakata lakkaxwililh la xʼama skuja chu tachuwinalh tiku xtaskujma. Makgatsankgalh  xtaskujut. ¿Pero tuku tlawalh? Xla wan: «Lichali kmastalh kisolicitud xlakata precursor auxiliar naklitaxtu». Xlakata nakgalhikgo tuku maklakaskinkgo, xla chu xpuskat tsukukgolh skujkgo niku kaj kaxakakgo. Titaxtulh kilhtamaku David tsukulh skuja la precursor regular chu alistalh xpuskat na precursora litaxtulh. Taskujut nema kgalhikgo, amakgapitsin lakgmakgankgo, pero uma xlakan ni wa tlakg xlakaskinka akxilhkgo. Maski ni lhuwa tumin tlajakgo nixawa la xapulana, putum papaʼ kgalhikgo tuku maklakaskinkgo. Wa Jehová tiku pulana wiliputunkgo kxlatamatkan chu xlikana akxilhkgonit pi Jehová kakuentajtlawa tiku wa pulana putsakgo xTamapakgsin (Mat. 6:31-33).

10. ¿La tlan nakuentajtlawayaw kinakujkan?

¹⁰ Maski lhuwa o ni lhuwa tuku kgalhiyaw, kuentajkilitlawatkan kinakujkan. ¿La natlawayaw? Ni napaxkiyaw tumin chu ni namastayaw talakaskin pi kintaskujutkan tlakg xlakaskinka nalitaxtu nixawa la skujnaniyaw Jehová. Xlakata tlan nakatsiyaw komo ni chuna kinkaʼakgspulaman, kalakpuwaw: «¿Wa klakapastaka kintaskujut akxni kanit ktamakxtumit o akxni kanit lichuwinan Dios? ¿Ankgalhin klilakgaputsa tumin xlakata la nakinkitaxtuni kilhtamaku nema aku mima? ¿Anan taʼakglhuwit kkintamakgaxtokgat xlakata tumin? ¿Tlan xakmakglhtinalh akgtum taskujut nema amakgapitsin lakgmakgankgo komo nakimaxki talakaskin tlakg nakskujnani Jehová?» (1 Tim. 6:9-12). Akxni nalilakpuwanaw uma, kalakapastakwi pi Jehová kinkapaxkiyan chu uma tuku kamalaknuni tiku xliputum xnakujkan skujnanikgo: «Nikxni ktimakgxtakgni chu ankgalhin nakmakgtayayan». Wa xlakata apóstol Pablo mastalh uma tastakyaw: «Milatamatkan ni xtachuna kawa chuna la tiku lhuwa tumin kgalhiputunkgo» (Heb. 13:5, 6).

11. ¿Tuku xlakata wanaw pi lilakgastan nema anan kkakilhtamaku ni kinkamakgtayayan?

¹¹ Jehová lakaskin pi kalipaxuwaw kilatamatkan, chu lilakgastan tlawa pi nalipaxuwayaw. Chu asta Biblia wan: «Ni anan atanu tuku tlakg makgapaxuwa chatum chixku, kajwatiya akxni wayan chu kgotnan chu nalipaxuwa xlakata lhuwa skujnit» (Ecl. 2:24). Pero lilakgastan nema anan kkakilhtamaku ni makgtayanan xlakata lakatsalakgo xlimapakgsin Dios chu masiya o asta tlawa pi latamanin napaxkikgo tuku xTachuwin Dios ni masta talakaskin natlawayaw.

12. Chuna la wan 1 Corintios 10:21, 22, ¿tuku xlakata liwana kililaksakatkan tuku nalilakgastananaw?

 ¹² Akinin kajwatiya Jehová kakninaniputunaw, wa xlakata nila wayanaw «kxmesa Jehová» chu «kxmesa demonios» (kalikgalhtawakga 1 Corintios 10:21, 22). Akxni wi tiku tawayanaw limasiya pi tlan talalinaw. Akxni lilakgastananaw niku tasiya pi latalatlawamaka, taxtu xlakata taskuwan o magia, o xlakata talakgxtumit o atanu chu talismanin nema anan kkakilhtamaku xtachuna la komo katawayamaw tiku xtalamakgasitsin Jehová chu la komo wamaw tuku xlakan kaxtlawakgonit. Komo chuna xtlawaw, alistalh nitlan xkinkakitaxtunin chu uma xtlawalh pi nialh tlan xtalaliw Jehová.

13, 14. 1) ¿Tuku xlakata wanaw pi talakgastan xtachuna la liwat? 2) Chuna la wan Santiago 1:14, 15, ¿tuku xlakata kuenta kilitlawatkan akxni laksakaw tuku nalilakgastananaw?

¹³ ¿Tuku xlakata wanaw pi talakgastan xtachuna la liwat? Akxni wayanaw, akinin laksakaw tuku nawayaw. Pero akxni kgotwayaw, kimpulaknikan tlawa xtaskujut chu tlawa pi kiliwatkan namakgtaya kimpulaknikan. Komo xatlan tuku nawayaw nakinkamakgtayayan, pero komo nixatlan tuku nawayaw natlawa pi natatatlayaw. Ni lakapala katiʼakxilhwi komo kinkamakgtayaman o ni, natitaxtu kilhtamaku chu alistalh naʼakxilhaw.

¹⁴ Nachuna, akxni laksakaw tuku nalilakgastananaw, akinin nalaksakaw tuku natanu kkintalakapastaknikan. Pero alistalh nialh akinin laksakaw tuku nala kkintalakapastaknikan nema tlawa pi wi tuku namakgkatsiyaw chu wi tuku nakinkamatlawiputunan. Xatlan lilakgastan tlan kinkamamakgkatsiniyan, pero tuku nixatlan nitlan tuku kinkatlawaniyan (kalikgalhtawakga Santiago 1:14, 15). Ni lakapala katiʼakxilhwi komo kinkamakgtayaman o ni, natitaxtu kilhtamaku chu alistalh naʼakxilhaw. Wa xlakata Biblia kinkawaniyan: «Ni kataʼakgskgawitit: nila likgalhkgamanankan Dios. Xlakata putum tuku chatum lataman chantilhama, na wa namakgala. Xlakata tiku chananama chu wa lilakpuwan tuku lu tlawaputun lakgalhina xmakni, namakgala tuku nitlan kaj xlakata xtatlawaputu lakgalhina xmakni» (Gál. 6:7, 8). Wa xlakata lu xlakaskinka pi nalakgmakganaw putum talakgastan nema masiya tuku Jehová xkajni (Sal. 97:10).

15. ¿Tuku tamaskiwin kinkamaxkinitan Jehová?

¹⁵ Lhuwa xlakskujnin Jehová lu lakgatikgo akxilhkgo JW Broadcasting^®, nema wi kkisitiojkan xla Internet. Chatum tala nema wanikan Marilyn lichuwinalh: «Uma programa kimakgtaya tlakg nakpaxuwa, chu ni talakaskin naklilakpuwan komo tlan o nitlan tuku kakxilhma. Akxni ktaxlajwanima o kiʼakstu kmakgkatsi, ankgalhin ktekgsa akgtum taʼakgchuwin nema tlan kimamakgkatsini. Uma tlawa pi tlakg naktalakatsuwini Jehová chu xkachikin. JW Broadcasting lakgpalinit kilatamat». ¿Limaklakaskimaw uma xtamaskiwin Jehová? Tlan naʼakxilhaw putum videos nema wilakgolh kʼuma canal chu tlan nakgaxmataw taʼakgchuwin chu takilhtlin nema nakinkamakgtayayan chu ni kajwatiya naʼakxilhaw programa nema taxtu akgatunu papaʼ.

16, 17. ¿Tuku xlakata kuenta kilitlawatkan kilhtamaku nema limaxtuyaw xlakata nalakgastananaw, chu la tlan natlawayaw?

¹⁶ Ni kajwatiya kuenta kilitlawatkan tuku akxilhaw. Wata na talakaskin kuenta natlawayaw la xlilhuwa kilhtamaku limaxtuyaw, komo nichuna xtlawaw max tlakg xlimaxtuw kilhtamaku nalakgastananaw nixawa naskujnaniyaw Jehová. Makgapitsin tuwa makgkatsikgo ni lhuwa kilhtamaku nalakgastanankgo. Akgtum liʼakxilhtit, chatum tala tiku kgalhi 18 kata tiku wanikan Abigail lichuwinan: «Akxni  lu lhuwa kskuja, tlan kmakgkatsi kakxilha televisión. Pero komo ni kuenta naktlawa, max lhuwa horas nakakxilha televisión». Chu chatum kgawasa wanikan Samuel lichuwinan: «Lakgachunin kakxilha laktsu videos kʼInternet. Pulana kakxilha akgtum video, chu akxni kakxilha titaxtunita akgtutu o akgtati horas».

¹⁷ ¿La tlan nalakkaxwiliyaw kilhtamaku nema limaxtuyaw xlakata nalakgastananaw? Tuku pulana kilitlawatkan wa pi naʼakxilhaw la xlilhuwa kilhtamaku limaxtumaw talakgastan. Wa xlakata, tlan natsokgwiliyaw kʼakgtum calendario la akglhit horas limaxtuyaw akxni akxilhaw televisión, o akxni maklakaskinaw Internet chu akxni likgamananaw kicelularkan. Komo naʼakxilhaw pi lu lhuwa kilhtamaku limaxtuyaw uma, katlawaw akgtum lista. Wa pulana kalhkawiliw tuku tlakg xlakaskinka chu alistalh kalhkawiliw kilhtamaku nema nalimaxtuyaw xlakata nalakgastananaw. Alistalh kaskiniw Jehová pi kakinkamakgtayan nastalaniyaw uma lista. Chuna nakgalhiyaw kilhtamaku chu litliwakga xlakata nalikgalhtawakgayaw Biblia, nakakninaniyaw Dios kfamilia, naʼanaw ktamakxtumit, naʼanaw lichuwinanaw Dios chu nakamakgtayayaw latamanin xlakata kstalaninanin Cristo nalitaxtukgo. Nachuna, ni katilakpuwaw pi nitlan tuku tlawamaw komo nalakgastananaw.

18, 19. ¿La tlan nalimasiyayaw pi kajwatiya Jehová kakninaniyaw?

¹⁸ Akxni Pedro lichuwinalh xlakata xlisputni xkakilhtamaku Satanás chu xlakata xasasti kakilhtamaku, na lichuwinalh: «Natalan tiku kkapaxkiyan, xlakata kgalhkgalhipatit umakgolh, lu kaliskujtit xlakata Dios tlan nakaʼakxilhan, ni nakatekgsniyan tuku nitlan chu tlan natalalipinatit» (2 Ped. 3:14). Akxni stalaniyaw uma tastakyaw chu liskujaw xlakata nitu nalixkajwan kintalakapastaknikan chu la talalinaw Jehová, limasiyayaw pi kajwatiya Jehová kakninaniyaw.

¹⁹ Satanás chu xkakilhtamaku chuntiya natlawaputunkgo pi ni wa Jehová pulana nawiliyaw kkilatamatkan (Luc. 4:13). Maski lhuwa taʼakglhuwit natitaxtuyaw, ni kamastaw talakaskin pi kkinakujkan atanu tuku tlakg xlakaskinka nalitaxtu nixawa Jehová. Liwana lakpuwanitaw pi kajwatiya namaxkiyaw tuku xla lakgchan: kajwatiya nakakninaniyaw.