1. ¿Tuku xlakata liwana katsiyaw pi lamaw «xaʼawatiya kilhtamaku»?

KOMO lakachiw akxni xtitaxtunita kata 1914, putum kilhtamaku latamanitaw «kxaʼawatiya kilhtamaku» (2 Tim. 3:1). Kimputumkan akxilhnitaw la kgantaxtunit putum tuku Jesús xlichuwinanit pi xʼama la kkinkilhtamakujkan o max kgaxmatnitaw anta knoticias pi anan: guerras, tatsinkstat, la tachiki tiyat, lhuwa tajatat, talhuwinit tuku nitlan chu la kaputsastalanimaka xlakskujnin Dios, chu atanu tuku nitlan (Mat. 24:3, 7-9, 12; Luc. 21:10-12). Nachuna, akxilhnitaw pi latamanin chuna likatsikgo la lichuwinalh apóstol Pablo (kaʼakxilhti recuadro « La likatsikgo latamanin la uku»). Xlakskujnin Jehová liwana katsiyaw pi lamaw «kxlikgalhsputni xaʼawatiya kilhtamaku» (Miq. 4:1).

2. ¿Tuku takgalhskinin nakgalhtiyaw?

² Xlakata lhuwata kata titaxtunit lata kata 1914, lamaw kxlikgalhsputni «xaʼawatiya kilhtamaku». Xlisputni uma kakilhtamaku lu lakatsu wi, wa xlakata talakaskin nakgalhtiyaw uma akgtiy lu xlakaskinka takgalhskinin: ¿Tuku nala kxlikgalhsputni «xaʼawatiya kilhtamaku»? Chu ¿tuku lakaskin Jehová pi natlawayaw la uku?

3. Chuna la wan 1 Tesalonicenses 5:1-3, ¿tuku tamakatsinin namastakgo laklanka kachikinin?

³ (Kalikgalhtawakga 1 Tesalonicenses 5:1-3). Kʼuma texto, Pablo lichuwinan «xkilhtamaku Jehová». Uma tachuwin kilhchanima akxni natalatlawakan «xaLanka Babilonia», nema makgtanuma putum nixaxlikana takanajla nema anankgo kxlikalanka katiyatni, chu nasputa kʼArmagedón (Apoc. 16:14, 16; 17:5). Akxni nina tsuku nawan uma «kilhtamaku», kachikinin  natsukukgo wankgo pi anan «takaksni chu ni anan tapekua». Laklanka mapakgsinanin maklakaskinkgo tachuwin xtachuna la uma akxni wi tuku katalakkaxlakgo kachikinin xala alakatanu. * Pero tamakatsinin nema lichuwinan Biblia pi namastakan nixtachuna la uma. ¿Tuku xlakata? Xlakata akxni namastakan uma tamakatsinin lhuwa latamanin nalakpuwankgo pi mapakgsinanin lakkaxtlawakgonit pi kakilhtamaku tlakg tlan natawilakgo. Pero tuku xaxlikana nala wa pi natsuku «lhuwa tapatin» nema lakapala namasputunan (Mat. 24:21).

4. 1) ¿Tuku ni katsiyaw xlakata akxni nawankan «¡Uku kgalhiyaw takaksni kkilatamatkan chu nitu kinkamakgapekuanan!»? 2) ¿Tuku katsiyaw xlakata uma tamakatsinin?

⁴ Tsinu tuku katsiyaw xlakata akxni nawankan «¡Uku kgalhiyaw takaksni kkilatamatkan chu nitu kinkamakgapekuanan!». Chu wi tuku ni katsiyaw la komo tuku natlawa pi namastakan uma tamakatsinin chu la natlawakan. Nachuna ni katsiyaw komo makglhuwa namastakan uma tamakatsinin o kaj makgtum. Pero wi tuku liwana katsiyaw: pi ni namastayaw talakaskin nakinkaʼakgskgawikanan chu ni nakanajlayaw pi kachikinin nawilikgo takaksni. Uma tuku kgalhkgalhimaw, wa tuku nalikatsiyaw pi «xkilhtamaku Jehová» amaja tsuku.

5. ¿La kinkamakgtayayan 1 Tesalonicenses 5:4-6 xlakata nakatsiyaw tuku natlawayaw akxni nachin «xkilhtamaku Jehová»?

⁵ (Kalikgalhtawakga 1 Tesalonicenses 5:4-6). Pablo kinkawaniyan tuku kilitlawatkan xlakata nakatsiyaw tuku natlawayaw akxni nachin «xkilhtamaku Jehová». Ni kalhtataw «chuna la tlawakgo amakgapitsin», wata skgalalh katawilaw. Akgtum liʼakxilhtit, kuenta natlawayaw xlakata ni namakgtanuyaw kpolítica xalak kakilhtamaku chu chuna namakgatsankgananiyaw Jehová. Komo chuna xtlawaw, xmakgtapakgsiw «kkakilhtamaku» (Juan 15:19). Liwana katsiyaw pi kajwatiya xTamapakgsin Dios nalimin takaksni kkatiyatni.

6. ¿La kamakgtayayaw latamanin chu tuku xlakata?

⁶ Ni kajwatiya akinin ni nalhtatayaw, talakaskin nakamakgtayayaw amakgapitsin xlakata na ni «nalhtatakgo», uma wamputun pi nakamakgtayayaw nalakgapaskgo tuku masiya Biblia xlakata tuku naʼakgspula uma kakilhtamaku. Kalakapastakwi pi akxni tsukunita nawan lhuwa tapatin, nialh katiʼanalh kilhtamaku xlakata naputsakgo Jehová. Wa xlakata lu xlakaskinka nalichuwinanaw Dios. *

7. ¿Tuku lakaskin Jehová pi natlawayaw la uku?

⁷ Jehová lakaskin pi kaliskujwi nalichuwinanaw xtachuwin xlakata nina min «xkilhtamaku».  Talakaskin naskujaw «kxtaskujut Malana» (1 Cor. 15:58). Akxni Jesús lichuwinalh tuku xʼama kgantaxtu kxaʼawatiya kilhtamaku na lichuwinalh tuku xʼamaw tlawayaw xlakskujnin Dios. Xla wa: «Nachuna, klakgatum laklanka kachikinin pulana natalichuwinan xatlan tamakatsinin» (Mar. 13:4, 8, 10; Mat. 24:14). Kalilakpuwaw uma: akxni anaw lichuwinanaw Dios, makgtayanamaw xlakata nakgantaxtu uma tuku xlichuwinankanit.

8. ¿Tuku limasiya pi talhuwinit chuna la lichuwinamaka xTamapakgsin Dios?

⁸ Akgatunu kata, tlakg lhuwa latamanin kgaxmatkgo tamakatsinin xla Tamapakgsin. Kaʼakxilhwi la talhuwinit tiku lichuwinankgo xTamapakgsin Dios kata nema titaxtukgonit. Kkata 1914, xʼanan 5,155 tiku xlichuwinankgo Dios kliwaka 43 países. La uku, anan 8,500,000 tiku lichuwinankgo Dios kliwaka 240 países. Pero kintaskujutkan nina sputa. Talakaskin chuntiya nalichuwinanaw pi kajwatiya xTamapakgsin Dios namasputu taʼakglhuwit nema anan kkakilhtamaku (Sal. 145:11-13).

9. ¿Tuku xlakata chuntiya talakaskin nalichuwinanaw tamakatsinin xla Tamapakgsin?

⁹ Chuntiya nalichuwinanaw Dios asta akxni xla nakinkawaniyan pi nialh natlawayaw. ¿Lhuwaku kilhtamaku anan xlakata latamanin nalakgapaskgo Jehová chu Jesús? (Juan 17:3). Ni katsiyaw. Pero wi tuku liwana katsiyaw, xlakata nina tsuku lhuwa tapatin, latamanin tiku «kxnakujkan makgamakglhtinamputunkgo xaxlikana tuku masta latamat nema nikxni sputa» tlan nalakgapaskgo xalakwan tamakatsinin nema lichuwinan Biblia (Hech. 13:48). ¿La nakamakgtayayaw umakgolh latamanin xlakata ananku kilhtamaku?

10. ¿Tuku kinkamaxkiyan Jehová xlakata tlan nakamasiyaniyaw latamanin tuku xaxlikana?

¹⁰ Jehová limaklakaskima xkachikin xlakata nakinkamaxkiyan putum tuku maklakaskinaw xlakata nakamasiyaniyaw latamanin tuku xaxlikana. Akgtum liʼakxilhtit, akgatunu semana kinkamasiyanikanan ktamakxtumit xla itat semana tuku nawanaw akxni wi tiku pulana natachuwinanaw chu akxni nalakgtaspitparayaw chu nachuna la nakamakgalhtawakgeyaw latamanin. Xkachikin Jehová na kinkamaxkiyan likgalhtawakga nema kgalhiyaw. Uma pulaklhuwa la kinkamakgtayayan:

• namatsukiyaw takgalhchuwin,

• xlakata latamanin nakinkakgaxmatniputunkgoyan,

•   xlakata nakamakgpuwantiniyaw tlakg nakatsiputunkgo,

• xlakata namasiyayaw tuku xaxlikana akxni namakgalhtawakgenanaw chu

• nakawaniyaw tiku xlikana katsiputunkgo pi katanukgolh kkisitiojkan xla Internet chu kaʼankgolh ktamakxtumit.

Xlikana, ni kajwatiya nakgalhiyaw uma likgalhtawakga wata nakamaklakaskinaw. * Akgtum liʼakxilhtit, komo wi tiku tachuwinamaw chu tlakg katsiputun, tlan namakgxtakgniyaw maktum tratado o maktum revista, chu uma lataman tlakg nalikgalhtawakga xlakata tuku litachuwinaw asta akxni nalakgtaspitparayaw. Chatunu chatunu akinin kinkalakgchanan naliskujaw xlakata naʼanaw lichuwinanaw Dios akgatunu papaʼ.

11. ¿Tuku xlakata lakkaxwilika kkisitiojkan xla Internet pi namastakan takgalhtawakga xalak Biblia?

¹¹ Kaʼakxilhwi tuku atanu tlawama Jehová xlakata nakamakgtaya latamanin nalakgapaskgo tuku xaxlikana. Kkisitiojkan xla Internet, jw.org^®, mastakan takgalhtawakga xalak Biblia. * ¿Tuku xlakata tlawakanit uma? Akgatunu papaʼ lhuwa latamanin kxlikalanka katiyatni putsakgo takgalhtawakga xalak Biblia anta kkisitiojkan xla Internet. Takgalhtawakga nema wilikanit kkisitiojkan tlan nakamakgtaya latamanin nalakgapaskgo xTachuwin Dios. Makgapitsi latamanin tiku max katachuwinanaw lakgachunin ni makglhtinamputunkgo akgtum takgalhtawakga xalak Biblia. Komo chuna titaxtuyaw, kakamasiyaniw uma anta kkisitiojkan xla Internet o kakawaniw pi kaputsakgolh ktachuwin nema akgatekgskgo.

12. ¿Tuku tlan nakatsinikan ktakgalhtawakga nema wilikanit kkisitiojkan xla Internet?

¹² Uma takgalhtawakga lichuwinan xlakata Biblia chu tiku matsokgninalh, tiku lu xlakaskinka kalichuwinan Biblia chu takgalhkgalhin nema kinkamaxkiyan. Akxni chatum lataman nalikgalhtawakga uma, wa uma tuku nakatsini:

• la kinkamakgtayayan Biblia,

• tiku Jehová, Jesús chu ángeles,

• tuku xlakata Dios katlawalh latamanin chu

• tuku xlakata anan tapatin chu tuku nitlan.

Kʼuma takgalhtawakga nachuna lichuwinan uma:

• tuku natlawa Jehová xlakata namasputu tapatin chu linin,

• la nakamalakastakwani tiku nikgonita chu

• tuku natlawa xlakata nakamasputu mapakgsinanin xalak kakilhtamaku chu pi wa xTamapakgsin xlakgxokgo natawila.

13. Xlakata wi takgalhtawakga kkisitiojkan xla Internet, ¿wamputun pi nialh katimastaw takgalhtawakga kʼakgatunu chiki? Kalichuwinanti.

¹³ Maski wi takgalhtawakga kkisitiojkan xla Internet ni wamputun pi nialh katimastaw takgalhtawakga kʼakgatunu chiki. Jesús kinkamaxkinitan talakgalhaman xlakata nakaputsayaw tiku na kstalaninanin nalitaxtukgo. Lakaskinaw pi latamanin naʼakxilhkgo takgalhtawakga nema wi kkisitiojkan xla Internet, lanka xtapalh kaʼakxilhkgolh tuku katsinimakgolh chu pi tlakg kakatsiniputunkgolh. Komo chuna natlawakgo, max natalakaskin pi chatum tala nakamaxki akgtum takgalhtawakga xalak Biblia. Akxni sputa akgatunu takgalhtawakga, wanikan tiku kgalhtawakgama komo lakaskin pi wi tiku xlakgapaxialhnalh xlakata namakgtaya tlakg nakatsini tuku masiya Biblia. Akgatunu kilhtamaku, liwaka 230 latamanin skinkgo kkisitiojkan xla Internet pi  kakalimakgalhtawakgeka Biblia. Lu xlakaskinka pi latamanin wi tiku nakalakgapaxialhnan xlakata nakamakgalhtawakge.

14. Chuna la lichuwinalh Jesús anta kMateo 28:19, 20, ¿tuku liskujaw natlawayaw chu tuku xlakata?

¹⁴ (Kalikgalhtawakga Mateo 28:19, 20). Akxni mastayaw akgtum takgalhtawakga xalak Biblia, talakaskin naliskujaw namasiyaniyaw tiku makgalhtawakgemaw la kstalanina Cristo nalitaxtu chu namasiyaniyaw nakgalhakgaxmata putum tuku Jesús masiyalh. Talakaskin nakamakgtayayaw naʼakgatekgskgo pi lu xlakaskinka natatayakgo Jehová chu xTamapakgsin. Uma wamputun pi nakamaʼakgpuwantiniyaw nalilatamakgo tuku katsinimakgolh, namakamaxkikgo xlatamatkan Jehová chu natamunukgo. Komo chuna natlawakgo tlan nalakgtaxtukgo akxni namin xkilhtamaku Jehová (1 Ped. 3:21).

15. ¿Talakaskin chuntiya nakamakgalhtawakgeyaw tiku ni kstalanina Cristo litaxtuputunkgo, chu tuku xlakata?

¹⁵ Chuna la akxilhnitaw, nialh makgas namasputukan uma kakilhtamaku. Wa xlakata, ni kgalhiyaw kilhtamaku xlakata chuntiya nakamakgalhtawakgeyaw tiku ni kstalanina Cristo litaxtuputunkgo (1 Cor. 9:26). Xlakata wijku kilhtamaku, talakaskin pi lu lakapala natlawayaw kintaskujutkan xlakata wilakgolhku lhuwa latamanin tiku xlikgaxmatatkan tamakatsinin xla Tamapakgsin.

16. Chuna la wan Apocalipsis 18:2, 4, 5, 8, ¿tuku kilitlawatkan kimputumkan? (Na kaʼakxilhti nota).

¹⁶ (Kalikgalhtawakga Apocalipsis 18:2, 4, 5, 8). Umakgolh textos lichuwinankgo tuku lakaskin Jehová pi natlawayaw la uku. Putum xaxlikana kstalaninanin Cristo talakaskin namakgxtakgaw putum tuku tatalakxtumi xaLanka Babilonia. Max tiku kalimakgalhtawakgemaka Biblia xmakgtapakgsikgo knixaxlikana takanajla akxni nina xlakgapaskgo tuku xaxlikana. Max xʼankgo akxni wi tuku xtlawakan kxpukgalhtawakgakan, xmakgtlawakgo talismanin nema tlawakan anta o xmastakgo tumin. Talakaskin pi pulana namakgxtakga putum tuku makgtanuma knixaxlikana takanajla xlakata tlan naʼan lichuwinan Dios. Talakaskin namasiya maktum kapsnat niku wan pi makgxtakgma pusikulan niku xʼan o atanu pukgalhtawakga nema makgtapakgsi kxaLanka Babilonia. *

17. ¿Tuku taskujut ni katitlawaw kstalaninanin Cristo, chu tuku xlakata?

¹⁷ Xaxlikana kstalaninanin Cristo talakaskin liwana nakatsiyaw pi kintaskujutkan ni tatalakxtumi  xaLanka Babilonia (2 Cor. 6:14-17). Akgtum liʼakxilhtit, ni katiskujwi kʼakgtum pusikulan. Nachuna, komo skujmaw kʼakgtum empresa ni katitlawaw akgtum taskujut nema maklakaskinkan knixaxlikana takanajla. Chu komo kgalhiyaw akgtum taskujut nema kilakan, ni katimalaknuw chu ni katimakglhtinaw taskujut xlakata anta namaklakaskinkan kxaLanka Babilonia. ¿Tuku xlakata chuna natlawayaw? Xlakata nipara tsinu makgtanuputunaw ktalakgalhin nema tlawamakgolh nixaxlikana takanajla, xlakata Dios lu nitlan kaʼakxilha (Is. 52:11). *

18. ¿Tuku tlawalh chatum tala akxni wanika pi xtlawalh akgtum taskujut anta kpusikulan?

¹⁸ Makgasata, chatum chixku wanilh chatum kgolotsin xalak congregación pi xtlawalh akgtum taskujut kʼakgtum pusikulan niku xlama. Uma chixku xkatsi pi tala xwanit pi nikxni xʼama skuja kʼakgtum pusikulan. Pero uma kilhtamaku lu xlakaskin pi wi tiku xmakgtayalh natlawa uma taskujut. Maski chuna, tala kgalhakgaxmatli xtastakyaw Biblia chu ni makglhtinalh uma taskujut. Titaxtulh akgtum semana, anta kperiódico taxtulh xfoto chatum xwakna nema xmawakama kgantum cruz anta kpusikulan. Komo uma tala xtimakglhtinalh uma taskujut, wa tiku xtaxtulh kperiódico. Kalilakpuwaw tuku nitlan xkitaxtulh, Jehová nitlan xlimakgkatsilh chu uma tala nitlan xlichuwinanka.

19, 20. 1) ¿Tuku katsinitaw? 2) ¿Tuku atanu talakaskin nakatsiyaw?

¹⁹ Chuna la lichuwinankanit anta kBiblia, tuku lu xlakaskinka kgalhkgalhimaw pi nakgantaxtu wa akxni nawankan «¡Uku kgalhiyaw takaksni kkilatamatkan chu nitu kinkamakgapekuanan!». Pero Jehová kinkamasiyaninitan pi mapakgsinanin ni katiwilikgolh takaksni. ¿Tuku natlawayaw la uku xlakata nina mastakan uma tamakatsinin chu nina min lisputni? Dios lakaskin pi chuntiya kaliskujwi nalichuwinanaw xTamapakgsin chu nakaputsayaw latamanin tiku kstalaninanin Cristo nalitaxtukgo. Nachuna, talakaskin natamakgatliniyaw nixaxlikana takanajla. Uma kilhchanima pi namakgxtakgaw nixaxlikana takanajla chu kintaskujutkan ni natatalakxtumi xaLanka Babilonia.

²⁰ Wi atanu tuku nala akxni amaja sputa nawan «xaʼawatiya kilhtamaku» chu wi tuku atanu Jehová lakaskin natlawayaw. ¿Tuku uma? Chu ¿tuku kilitlawatkan xlakata nakatsiyaw tuku natlawayaw kkilhtamaku nema talakatsuwima? Naʼakxilhaw kʼatanu artículo.