1. ¿Tuku talakaskin chuntiya natlawayaw akinin tiku tamununitawa?

KOMO tamununitawa, kilhchanima pi limasiyanitaw xlakatin amakgapitsin pi kanajlaniyaw Jehová chu pi akxtum taskujputunaw xkachikin. * Xlikana, talakaskin pi chuntiya namatliwakglhaw kintakanajlakan chu chuntiya nalipawanaw pi xla maklakaskima xkachikin la uku xlakata namakgantaxti xtalakaskin.

2, 3. ¿Tuku tayat limasiya Jehová chuna la pulalima xkachikin?

² La uku kilhtamaku, chuna la Jehová pulalima xkachikin limasiya la xla likatsi, xtalakaskin chu xlimapakgsin. Kaʼakxilhwi pulaktutu xtayat Jehová nema limasiya chuna la pulalin xkachikin.

³ Pulana, «Dios ni laksakpaxkinan» (Hech. 10:34). Tapaxkit tlawalh pi Jehová namakamasta xKgawasa xlakata nakinkalakgmaxtuyan (Juan 3:16; 1 Tim. 2:6). Xlakata nakamakgtaya lhuwa latamanin nalitamakgtayakgo uma talakgmaxtut, Jehová maklakaskin xkachikin xlakata nakamakatsini xalaktlan tamakatsinin putum tiku kgaxmatputunkgo. Xlipulaktiy, Jehová chatum Dios tiku liwana tuku tlawa chu kgalhi takaksni (1 Cor. 14:33, 40). Wa xlakata xkachikin liwana tuku tlawa chu kgalhi takaksni. Xlipulaktutu, Jehová wa «xaLanka Makgalhtawakgena» (Is. 30:20, 21). Wa xlakata, xkachikin liskuja namasiya xTachuwin, chuna la kcongregación chu akxni lichuwinankgo Dios. ¿La limasiyalh umakgolh pulaktutu xtayat Jehová congregación xla kstalaninanin Cristo xalak pulana siglo? ¿La limasiya umakgolh tayat xkachikin xala uku? ¿Chu la kinkamakgtayayan espíritu santo akinin tiku akxtum taskujaw xkachikin Jehová xala uku?

4. Chuna la wan Hechos 1:8, ¿tuku kalimapakgsilh Jesús kstalaninanin, chu tuku tamakgtay xʼama kamaxki?

⁴ Kxapulana siglo. Tamakatsinin nema Jesús lichuwinalh kamaxkilh  akgtum takgalhkgalhin latamanin (Luc. 4:43). Kawanilh kstalaninanin pi xtlawakgolh taskujut nema xla xmatsukinit chu chuntiya xlichuwinankgolh xlikalanka kkatiyatni (kalikgalhtawakga Hechos 1:8). Xlikana, nila xʼakstukan xtlawakgolh. Xmaklakaskinkgo xtamakgtay espíritu santo, «makgtayana» nema Jesús xkamalaknuninit (Juan 14:26; Zac. 4:6).

5, 6. ¿La kamakgtayalh espíritu santo kstalaninanin Jesús?

⁵ Kstalaninanin Jesús makglhtinankgolh espíritu santo kPentecostés kata 33. Xlakata xtamakgtay espíritu, tunkun tsukukgolh lichuwinankgo Dios, chu ni makgas kilhtamaku titaxtulh lhuwa latamanin makgamakglhtinankgolh xalaktlan tamakatsinin (Hech. 2:41; 4:4). Chu akxni tsukuka kaputsastalanikan, ni pekuankgolh. Wata skinikgolh tamakgtay Dios chu tlawanikgolh oración: «Kamaxkikgo nchu litliwakga miskujnin ni aʼnan [tapekua] nalichuwinankgoy mintachuwin». Kamaxkika espíritu santo chu chuntiya lichuwinankgolh “xtachuwin Dios chu ni pekuankgolh” (Hech. 4:18-20, 29, 31).

⁶ Pero umakgolh tiku ni xmakgxtakgkgo Dios chuntiya titaxtukgolh tuku tuwa. Akgtum liʼakxilhtit, ni xʼanan maklhuwa xaSanto Tatsokgni chu ni xkgalhikgo tuku tlan xkamakgtayalh xlakata nalikgalhtawakgakgo chuna la akinin kgalhiyaw la uku. Chu xkalitachuwinatkan xwanit xtachuwin Dios latamanin tiku tanu tanu tachuwin xchuwinankgo. Maski chuna, umakgolh kstalaninanin Cristo tiku lu xatapaxuwan tlawakgolh tuku xapulana xtasiya pi nila xʼamakgo makgantaxtikgo: ni akglhuwa kata titaxtulh, xkamakatsinikgonit xalaktlan tamakatsinin putum latamanin (Col. 1:6, 23).

7. Liwakaya akgtum ciento kata, ¿la liwana xkatsikgo xlakskujnin Jehová tuku xla xlakaskin xtlawakgolh, chu tuku tlawakgolh?

⁷ La uku kilhtamaku. Jehová chuntiya pulalima xkachikin chu maxki litliwakga nema maklakaskin. Xlikana, Jehová maklakaskin xTachuwin xlakata napulalin xkachikin. Anta talhkatawilanit xlakata la lichuwinalh Dios Jesús chu limapakgsin nema kamaxkilh kstalaninanin xlakata xtlawakgolh taskujut nema xla xmatsukinit (Mat. 28:19, 20). Lata kkata 1881, uma revista lichuwinalh: «Ni kinkatasanikan chu ni kinkalaksakkan xlakata nakinkamaxkikanan kakni chu namakgstokgwiliyaw tuku lhuwa xtapalh, wata kinkatasanikan xlakata namaklakaskinaw putum tuku kgalhiyaw xlakata nalichuwinanaw xalaktlan tamakatsinin». Folleto To Whom the Work Is Entrusted (Tiku kalakgayawakanit natlawakgo taskujut), nema taxtulh kata 1919, lichuwinalh: «Taskujut tasiya pi lu lanka chu lu tuwa, pero wa xla Malana chu, xlakata xtamakgtay, tlan namakgantaxtiyaw». Chuna, xtachuna la kstalaninanin Cristo xalak pulana siglo, umakgolh natalan lu liskujkgolh namakgantaxtikgo xtaskujutkan chu ni pekuankgolh, liwana xkatsikgo pi espíritu santo xʼama kamakgtaya xlakata nakalitachuwinankgo putum latamanin xlakata Dios. La uku akinin na liwana katsiyaw uma.

8, 9. ¿Tuku limaklakaskinit xkachikin Jehová xlakata namalakgatumi xalaktlan tamakatsinin?

⁸ Xlakata tlan natamalakgatumi xalaktlan tamakatsinin, xkachikin Jehová limaklakaskinit chu chuntiya limaklakaskima tuku lu makgtayanankgo namalakgatumikan. Pulaktum tuku limaklakaskinka wa likgalhtawakga nema imprimirlikan, «Foto-Drama de la Creación», gramófonos, putlaw nema xkgalhikgo bocinas, programas nema xmatitaxtikan kradio chu, la uku kamaklakaskinkan, tuku aku taxtuma chuna la Internet o computadoras. Nachuna, niti atanu matitaxtikgonit likgalhtawakga klhuwa tachuwin chuna la xkachikin Dios. ¿Chu tuku xlakata chuna tlawayaw? Xlakata putum latamanin nakgaxmatkgo xalaktlan tamakatsinin kxtachuwinkan. Jehová ni laksakpaxkinan chu lichuwinalh pi xalaktlan tamakatsinin xʼama talichuwinan «klaklanka kachikinin, tribu, tachuwin chu laktsu kachikinin» (Apoc. 14:6, 7). Xla  lakaskin pi putum latamanin nakgaxmatkgo tamakatsinin xla Tamapakgsin.

⁹ ¿Chu tuku kitaxtu xpalakata latamanin tiku wilakgolh niku tuwa chankan, max chuna la kʼedificios niku ni mastakan talakaskin natanukan? Xlakata tlan nakalakgchankan latamanin, Jehová makgtayalh xkachikin xlakata nalichuwinankgo Dios niku lhuwa titaxtukan. Akgtum liʼakxilhtit, kkata 2001 Lakgkgolotsin tiku Pulalinankgo wankgolh pi tlan xkamaklakaskinka carritos chu niku kawilikan likgalhtawakga kFrancia, chu alistalh alakatanu kkachikinin. Uma lu tlan kitaxtulh. Kkata 2011, wi tuku xasasti tsukuka tlawakan klakatum niku lhuwa xtitaxtukan kNueva York (Estados Unidos). Kxapulana kata, kamaxkika latamanin 102,129 libros chu 68,911 revistas, chu 4,701 latamanin skinkgolh pi xkalimakgalhtawakgeka Biblia. Liwana tasiya pi espíritu santo pulalima uma taskujut. Wa xlakata, Lakgkgolotsin tiku Pulalinankgo wankgolh pi tlan nakamaklakaskinkan niku kawilikan likgalhtawakga kxlikalanka katiyatni.

10. ¿Tuku tlan natlawayaw xlakata tlakg tlan natlawayaw kintaskujutkan?

¹⁰ Tuku akinin tlan natlawayaw. Lu kalitamakgtayaw tastakyaw nema Jehová kinkamaxkiyan ktamakxtumit. Ankgalhin akxtum kakataʼaw grupo nema kinkalakgchanan xlakata nalichuwinanaw Dios. Komo wi tuku talakaskin nalakgpaliyaw, natalan xalak kigrupojkan tlan nakinkamakgtayakgoyan chu nakinkamakgpuwantinikgoyan xlakata lu xatlan xliʼakxilhtitkan. Chuntiya kalichuwinaw Dios maski titaxtuyaw tuku tuwa. Chuna la kinkamalakapastakayan texto nema litsuku uma artículo, tlawayaw xtalakaskin Dios xlakata espíritu santo kinkamakgtayayan, chu ni wa kilitliwakgakan (Zac. 4:6). Uma taskujut wa xla Dios.

11. ¿La akxtum skujkgolh Lakgkgolotsin tiku xPulalinankgo kxapulana siglo xlakata ni xʼanalh taʼakglhuwit kxkachikin Dios?

¹¹ Kxapulana siglo. Lakgkgolotsin tiku xPulalinankgo, nema xwilakgo kJerusalén, akxtum kskujkgo xlakata lakatitum tuku natlawakgo chu naʼanan takaksni kxkachikin Dios (Hech. 2:42). Akgtum liʼakxilhtit, akxni xtitaxtuma kata 49 analh akgtum taʼakglhuwit xlakata circuncisión, Lakgkgolotsin tiku xPulalinankgo liwana akxilhkgolh  tuku xlama chu mastakgolh talakaskin pi espíritu santo xkapulalilh. Komo congregación xtitapapitsilh, nialh tlan xkitaxtulh chuna la xlichuwinankan Dios. Maski apóstoles chu lakgkgolotsin judíos xwankgonit, ni mastakgolh talakaskin pi xtalismaninkan o tiku xkamasiyanikgo xkamatlawilh tuku ni xlilat xwanit. Wata putsakgolh xtapulalit xTachuwin Dios chu xʼespíritu santo (Hech. 15:1, 2, 5-20, 28). Tuku kitaxtulh wa pi Jehová sikulunatlawalh tuku laksakkgolh, kcongregación chuntiya analh takaksni chu akxtum tawilakgolh, chu chuntiya lichuwinankgolh Dios (Hech. 15:30, 31; 16:4, 5).

12. ¿Tuku xlakata wanaw pi kxkachikin Jehová la uku anan takaksni chu liwana tuku tlawakan?

¹² La uku kilhtamaku. Xkachikin Jehová lu liskujnit xlakata liwana tuku natlawakan chu naʼanan takaksni. Kkata 1895, Makatsinina número 15 xla noviembre kxaʼinglés xlimin akgtum artículo nema xtakilhtiyanit ktexto xla 1 Corintios 14:40 nema xlitapakuwi «Decentemente y con orden». Uma artículo xwan: «Apóstoles kamaxkikgolh lhuwa tastakyaw congregación xala makgasa xlakata liwana tuku natatlawa [...]. Lu xlakaskinka pi chuntiya kuenta natlawayaw tuku tatsokgtawilanit xlakata nalilatamayaw» (Rom. 15:4). Takaksni chu xlakata liwana tuku xtlawaputunkgo kstalaninanin Cristo xalak pulana siglo na tasiya la uku kxkachikin Jehová. Akgtum liʼakxilhtit, komo xʼaw alakatanu kcongregación akxni matitaxtikan Takgalhtawakga xla Makatsinina, asta maski kʼalakatanu país, liwana xkatsiw la xtamatitaxtilh chu tuku artículo xlitachuwinalh kʼuma Takgalhtawakga. Xmakgkatsiw pi nitu talakgpali. Kajwatiya xʼespíritu Dios tlawa pi makxtum natawilayaw (Sof. 3:9, nota).

13. Chuna la wan Santiago 3:17, ¿tuku takgalhskinin kililakpuwanatkan?

¹³ Tuku akinin tlan natlawayaw. Jehová lakaskin pi naliskujaw xlakata akxtum nataskujaw xʼespíritu xlakata naʼanan takaksni (Efes. 4:1-3). Wa xlakata, kalilakpuwaw umakgolh takgalhskinin: «¿Kmakgtayanan xlakata naʼanan takaksni chu akxtum natawilakan kcongregación? ¿Kkakgalhakgaxmata natalan tiku pulalinkgo? ¿Tlan kilipawankgo amakgapitsin, liwaka komo wi tuku kilakgayawakanit kcongregación? ¿Ankgalhin sokg kchan niku klitaya, tlan kkalikatsini chu kkamakgtaya amakgapitsin?»  (kalikgalhtawakga Santiago 3:17). Komo lakpuwanaw pi nila liwana tlawayaw umakgolh, kaskiniw Jehová xʼespíritu santo. Komo mastayaw talakaskin pi nalakgpali kintayatkan chu nakinkapulalinan akxni wi tuku tlawayaw, kinatalankan tlakg nakinkapaxkikgoyan chu lanka xtapalh nakinkaliʼakxilhkgoyan.

14. Chuna la wan kColosenses 1:9, 10, ¿la kamakgtayalh Jehová xlakskujnin xalak pulana siglo xlakata nakgalhikgo «xatakgatsin [...] xtakatsin Dios»?

¹⁴ Kxapulana siglo. Jehová lu lakgati kamasiyani xkachikin (Sal. 32:8). Lakaskin pi xlakkamanan nalakgapaskgo, napaxkikgo chu nalatamakgo putum kilhtamaku. Putum uma tlan nakgantaxtu kaj xlakata tuku xla kinkamasiyaniyan (Juan 17:3). Kxapulana siglo, limaklakaskilh congregación xla kstalaninanin Cristo xlakata nakastakyawa xkachikin (kalikgalhtawakga Colosenses 1:9, 10). Chu limaklakaskilh xʼespíritu xlakata nakamakgtaya, «makgtayana» nema Jesús xkamalaknuninit (Juan 14:16). Espíritu santo kamakgtayalh kstalaninanin Cristo xlakata liwana xʼakgatekgsnikgolh xTachuwin Dios chu kamalakapastakalh putum tuku Jesús lichuwinalh chu tuku tlawalh, nema alistalh talhkatawilalh kʼEvangelios. Uma kamatliwakglhnilh xtakanajlakan umakgolh kstalaninanin Cristo, tapaxkit nema xkgalhinikgo Dios, xKgawasa chu xnatalan.

15. ¿La akxilhnita wix chuna la kgantaxtunit tuku xlichuwinanit Jehová kʼIsaías 2:2, 3?

¹⁵ La uku kilhtamaku. Jehová lichuwinalh pi «kxaʼawatiya kakilhtamaku», latamanin xalak putum kachikinin xʼamakgolh ankgo ksipi Jehová xlakata xkamasiyanika xtiji (kalikgalhtawakga Isaías 2:2, 3). La uku akxilhmaw la kgantaxtunit uma tuku xlichuwinankanit. Xaxlikana takaknin ni tatalakxtumi putum tuku masiya nixaxlikana takaknin. ¡Chu xlikana pi Jehová kinkamaxkiyan lhuwa liwat xaʼespiritual! (Is. 25:6). Jehová limaklakaskin «skujni xatalipaw chu xaskgalala», xlakata nakinkamaxkiyan lhuwa  liwat, pero nachuna tipalhuwa liwat xaʼespiritual, chuna la artículos chu taʼakgchuwin asta dibujos chu videos (Mat. 24:45). Makgkatsiyaw chuna la Elihú, xʼamigo Job, tiku wa xlakata Dios: «¿Tiku makgalhtawakgena chuna la xla?» (Job 36:22).

16. ¿Tuku kilitlawatkan xlakata namatliwakglhaw kintakanajlakan?

¹⁶ Tuku akinin tlan natlawayaw. Espíritu santo nakinkamakgtayayan nalilatamayaw tuku likgalhtawakgayaw kxTachuwin Dios. Kaskiniw Jehová tuku nachuna skinilh salmista: «Oh, Jehová, kakimasiyani mintiji. Akit ni ktitamakgatlinilh xaxlikana. Kimaxki akgtum naku nema ni nalakgaputiyunan xlakata napekuani mintukuwani» (Sal. 86:11). Wa xlakata, chuntiya kalitamakgtayaw liwat xaʼespiritual nema kinkamaxkiyan Jehová kxTachuwin chu xkachikin. Xlikana pi ni kajwatiya lhuwa tuku katsiniputunaw. Kamakiw tuku xaxlikana kkinakujkan chu kalilatamaw. Xʼespíritu Jehová nakinkamakgtayayan chuna natlawayaw. Nachuna kakamakgpuwantiniw kinatalankan, xlakata xlakan kifamiliajkan xaʼespiritual litaxtukgo (Heb. 10:24, 25). Katlawaniw oración Jehová xlakata xʼespíritu nakinkamakgtayayan xliputum kinakujkan namastayaw kintakgalhtinkan ktamakxtumit chu xlakata natlawayaw putum tuku matlaniyaw akxni wi tuku kinkalakgchanan namatitaxtiyaw ktamakxtumit. Komo chuna natlawayaw, nalimasiyaniyaw Jehová chu xKgawasa pi kapaxkiyaw xborregos (Juan 21:15-17).

17. ¿La tlan nalimasiyayaw pi tatayayaw chu ni makgxtakgaw xkachikin Jehová?

¹⁷ Nialh makgas kilhtamaku, kajwatiya xkachikin Jehová natawila kKatiyatni nema nalipulalin xʼespíritu santo. Wa xlakata, xatapaxuwan akxtum kakataskujwi. Kalimasiyaw xtapaxkit Dios chu ni kalaksakpaxkinaw akxni nakaliniyaw putum latamanin xalaktlan tamakatsinin. Kastalaniw xliʼakxilhtit Dios chu kaliskujwi xlakata naʼanan takaksni kcongregación chu liwana tuku natatlawa. Kakgalhakgaxmatwi xaLanka kiMakgalhtawakgenakan chu kalitamakgtayaw liwat xaʼespiritual nema kinkamaxkiyan. Chuna akxni nasputa xkakilhtamaku Satanás, ni katipekuaw. Wata akxtum nakatatawilayaw xlakskujnin Jehová tiku ni makgxtakgkgo.