ARTÍCULO NEMA NATALIKGALHTAWAKGA 41
Kamakgtayaw tiku makgalhtawakgemaw xlakata natamunu (xlipulaktum)
«Wixin [...] la akgtum carta [ne]ma lichiwinan kintaskujutkan» (2 COR. 3:3).
TAKILHTLIN 78 Kamasiyaw xTachuwin Dios
TUKU NATALICHUWINAN *
Tuku tlakg makgapaxuwa akgtum congregación wa akxni akxilhkgo pi natamunu chatum tiku limakgalhtawakgekan Biblia chu tiku lu paxkikgo (kaʼakxilhti artículo nema natalikgalhtawakga 41, párrafo 1).
1. ¿La kinkamakgtayayan 2 Corintios 3:1-3 naʼakxilhaw pi lu lanka talakgalhaman namakgtayayaw natamunu chatum tiku limakgalhtawakgeyaw Biblia? (Kaʼakxilhti xmakni revista).
¿LA MAKGKATSIYAW akxni tamunu chatum tiku limakgalhtawakgekan Biblia tiku xalak kincongregaciónkan? Xlikana pi lu lipaxuwayaw (Mat. 28:19). Chu komo akinin tiku xlimakgalhtawakgemaw Biblia, tlakg lu lipaxuwayaw (1 Tes. 2:19, 20). Kstalaninanin Cristo tiku aku tamunukgonit litaxtukgo chuna «la akgtum carta [ne]ma lichiwinan» lu xatlan xtaskujutkan xmakgalhtawakgenakan, chu nachuna xtaskujut putum congregación (kalikgalhtawakga 2 Corintios 3:1-3).
2. 1) ¿Tuku xlakaskinka takgalhskinin kililakpuwanatkan, chu tuku xlakata? 2) ¿Tuku kilhchanima kalimakgalhtawakgekan Biblia latamanin? (Kaʼakxilhti nota).
2 Lu lipaxuwayaw akxilhaw pi akgtati kata nema titaxtunit, akgatunu papaʼ liwaka 10,000,000 la xlimakglhuwa kamakgalhtawakgeka latamanin * xlikalanka katiyatni. Chu akgtati kata nema titaxtunit, akgatunu kata tamunukgolh liwaka 280,000 latamanin. Chuna la akxilhaw, ananku lhuwa millones tiku kalimakgalhtawakgekan Biblia tiku max tlan natamunukgo. ¿La tlan nakamakgtayayaw? Jehová lu xakgalhkgalhina chu kamaxkimajku talakaskin latamanin xlakata kstalaninanin Cristo nalitaxtukgo. Nialh anan lhuwa kilhtamaku, wa xlakata tlawaputunaw putum tuku matlaniyaw xlakata nakamakgtayayaw lakapala namatliwakglhkgo xtakanajlakan chu natamunukgo (1 Cor. 7:29a; 1 Ped. 4:7).
3. ¿Tuku nalichuwinan uma artículo?
3 Xlakata lu xlakaskinka pi nakamakgtayayaw latamanin kstalaninanin Cristo nalitaxtukgo, Lakgkgolotsin tiku Pulalinankgo kakgalhskinkgolh sucursales xlakata la tlan nakamakgtayayaw natamunukgo tiku kalimakgalhtawakgemaw Biblia. Kʼuma artículo chu tuku stala, naʼakxilhaw tuku tlan nakatsiniyaw xlakata tuku tlawakgo makgapitsin superintendentes de circuito, misioneros chu precursores tiku lu tlan tlawakgo xtaskujutkan (Prov. 11:14; 15:22). * Tuku wankgolh kinkamasiyaniyan tuku tlan natlawakgo tiku limakgalhtawakgenankgo Biblia xlakata tlakg tlan nakakitaxtuni. Uma artículo nalichuwinan pulakkitsis tuku xlitlawat tiku limakgalhtawakgekan Biblia xlakata tlan natamunu chu la makgtaya xmakgalhtawakgena.
NAKAMAKGALHTAWAKGEYAW AKGATUNU SEMANAS
Kakgalhskiw tiku makgalhtawakgemaw komo tlan natawilayaw xlakata nalitachuwinanaw Biblia (Kaʼakxilhti párrafos 4 asta 6).
4. ¿Tuku kilikatsitkan xlakata mastakan takgalhtawakga xalak Biblia anta kmalakcha?
4 Lhuwa natalan mastakgo takgalhtawakga xalak Biblia anta kxmalakchakan latamanin. Maski uma lu tlan kitaxtu xlakata nakamakgtayakgo tlakg nakatsiputunkgo tuku wan Biblia, ni lu lhuwa kilhtamaku katachuwinankgo chu max ni akgatunu semana. Chu xlakata tlakg nakamakgtayakgo nakatsiputunkgo, makgapitsin kaskinikgo latamanin xnúmerojkan xlakata nakatachuwinankgo kteléfono o kamalakgachanikgo mensaje akxni ni katekgskgo chu chuna nakalitachuwinankgo tuku masiya Biblia. * Uma max lhuwa papaʼ namakgapala chu tiku limakgalhtawakgemaka Biblia ni staka xtakanajla. Pero talakaskin naʼakgatekgsaw pi max ni katitamakamastanilh Dios chu ni katitamunulh komo ni limaxtu kilhtamaku chu ni liskuja xlakata tlakg nakatsini xTachuwin Dios.
5. ¿Tuku masiyalh Jesús kLucas 14:27-33 nema nakinkamakgtayayan xlakata nakamakgtayayaw tiku kamakgalhtawakgemaw?
5 Akgtum kilhtamaku, Jesús limaklakaskilh makgapitsi liʼakxilhtit xlakata namasiya tuku xlitlawat tiku kstalanina litaxtuputun. Lichuwinalh chatum lataman tiku tlawaputun akgtum torre chu chatum mapakgsina tiku natalatlawa achatum. Lichuwinalh pi tiku tlawaputum akgtum torre pulana xliʼakxilhat komo naʼakchani xtumin xlakata namasputu, chu mapakgsina pulana xliʼakxilhat komo ksoldados tlan natlajanankgo kʼguerra (kalikgalhtawakga Lucas 14:27-33). Jesús xkatsi pi, xtachuna la uma, putum tiku kstalanina litaxtuputun liwana xlilakapastakat tuku tlan natlawa xlakata namakgantaxti. Xlakata tiku kgalhtawakgama tlan namakgantaxti tuku wa Jesús, talakaskin namakgpuwantiniyaw pi nakgalhtawakga akgatunu semana. ¿La tlan natlawayaw?
6. ¿Tuku tlan natlawayaw xlakata tlan nastaka xtakanajla tiku makgalhtawakgemaw?
6 Tuku pulana kilitlawatkan wa pi tlakg namakgapala chuna la tachuwinanaw kxmalakcha. Akgtum liʼakxilhtit, ni kajwatiya akgtum versículo xalak Biblia kalitachuwinaw akxni lakgapaxialhnanaw. Akxni uma lataman lismaninita nawan pi tlakg lhuwa kilhtamaku tachuwinanaw akxni makgatunu lakgapaxialhnanaw, kakgalhskiw komo wi niku tlan natawilayaw xlakata tlakg natachuwinanaw. Tuku nakinkawaniyan nalimasiya komo xlakaskinka akxilha takgalhtawakga xalak Biblia. Chu alistalh, asta tlan nakgalhskinaw komo xkgalhtawakgaputulh ni kaj makgtum akgtum semana, nema namakgtaya tlakg lakapala nastaka xtakanajla. Kaʼakxilhwi tuku atanu xlitlawat tiku kgalhtawakgama.
LIWANA KALAKKAXWILIW TUKU NALIMAKGALHTAWAKGEYAW
Liwana kalakkaxwiliw tuku nalitachuwinanaw tiku makgalhtawakgemaw chu kamasiyaniw la tlan natlawa (Kaʼakxilhti párrafos 7 asta 9).
7. ¿La tlan liwana nalakkaxwili tiku makgalhtawakgenama tuku nalitachuwinan tiku makgalhtawakgema?
7 Lu xlakaskinka pi tiku makgalhtawakgenama liwana nalakkaxwili tuku nalimakgalhtawakgenan. Akxni nalakkaxwiliyaw tuku namasiyayaw pulana nalikgalhtawakgayaw chu naputsayaw textos. Kaʼakxilhwi tuku tlakg xlakaskinka lichuwinan. Kalilakpuwaw xatítulos, subtítulos, takgalhskinin, textos niku wan «kalikgalhtawakga», xadibujos chu videos nema nakinkamakgtayayan liwana namaʼakgatekgsni tema nema litachuwinamaw. Alistalh kalilakpuwaw tuku titaxtuma tiku makgalhtawakgemaw, chu la tlan liwana chu ni tuwa namaʼakgatekgsniyaw xlakata chuna natlawa kxlatamat (Neh. 8:8; Prov. 15:28a).
8. Chuna la wa Pablo kColosenses 1:9, 10, ¿tuku kilitlawatkan xpalakata tiku makgalhtawakgemaw?
8 Akxni lakkaxwilimaw tuku namasiyayaw na tlan nawaniyaw Jehová kʼoración xlakata tiku makgalhtawakgemaw chu tuku titaxtuma kxlatamat. Kaskiniw pi kakinkamakgtayan tlan nalimaklakaskinaw Biblia xlakata tlan nalakgchanaw xnaku (kalikgalhtawakga Colosenses 1:9, 10). Kalilakpuwaw komo wi tuku tuwa naʼakgatekgsa o tuwa namakgkatsi namakgamakglhtinan. Ankgalhin kalakapastakwi pi tuku tlawaputunaw wa pi namakgtayayaw natamunu.
9. ¿La tlan namakgtayayaw tiku makgalhtawakgemaw nalakkaxwili xtakgalhtin?
9 Kgalhkgalhiyaw pi xlakata ankgalhin natalikgalhtawakgayaw Biblia tiku makgalhtawakgemaw namakgtaya lanka xtapalh naliʼakxilha tuku tlawakgonit Jehová chu Jesús, chu tlakg nakatsiputun (Mat. 5:3, 6). Xlakata tuku katsinima namakgtaya, tiku makgalhtawakgemaw talakaskin pi kuentajnatlawa tuku katsinima. Wa xlakata, kamalakapastakaw pi lu xlakaskinka xʼakstu nalikgalhtawakga tuku nalimakgalhtawakgeyaw chu nalilakpuwan la tlan nalilatama. Tlan namasiyaniyaw la nalakkaxwili tuku nalitakgalhtawakgayaw. * Kamasiyaniw la naputsa xtakgalhtin akgtum takgalhskinin chu komo ni lhuwa tachuwin nalhtita namakgtaya nalakapastaka xatakgalhtin. Chu kawaniw pi ni kaj kalikgalhtawakgalh xatakgalhtin. Chuna nakatsiyaw komo liwana akgatekgsma tuku litakgalhtawakgamaw. Kaʼakxilhwi xlipulaktutu tuku xlitlawat tiku makgalhtawakgemaw.
KAMAKGPUWANTINI NATACHUWINAN JEHOVÁ CHALI CHALI
Kamasiyaniw tiku makgalhtawakgemaw la natachuwinan Jehová (Kaʼakxilhti párrafos 10 chu 11).
10. ¿Tuku xlakata xlakaskinka pi tiku makgalhtawakgemaw nalikgalhtawakga Biblia chali chali, chu tuku xlitlawat xlakata tlan nalitamakgtaya?
10 Maski akgatunu semana limakgalhtawakgekan Biblia, xlakaskinka pi wi tuku xʼakstu xlitlawat chali chali. Tlan natachuwinan Jehová chu nakgaxmatni. Tlan nakgaxmatni akxni nalikgalhtawakga Biblia chali chali (Jos. 1:8; Sal. 1:1-3). Kamasiyaniw la tlan nalimaklakaskin programa la likgalhtawakgakan Biblia nema wi kjw.org chu tlan imprimirlikan. * Xlakata tlan nalitamakgtaya la likgalhtawakga Biblia, kamakgpuwantiniw nalilakpuwan tuku masiyani xpalakata Jehová chu la tlan nalilatama tuku katsinima (Hech. 17:11; Sant. 1:25).
11. ¿La tlan nakatsini la natlawa xʼoración tiku makgalhtawakgemaw, chu tuku xlakata lu xlakaskinka ankgalhin chuna natlawa?
11 Kamakgpuwantiniw tiku makgalhtawakgemaw pi katlawanilh oración Jehová chali chali. Xliputum kinakujkan katlawaw akgtum oración akxni matsukiyaw chu akxni makgalhsputuyaw akgatunu takgalhtawakga chu kamapakuwiw tiku makgalhtawakgemaw. Chuna nakatsini la natlawa oración xliputum xnaku chu nalimaklakaskin xtukuwani Jesucristo akxni natachuwinan Jehová (Mat. 6:9; Juan 15:16). Kalilakpuwaw la natalakatsuwini Dios akxni nalikgalhtawakga Biblia chali chali chu akxni natachuwinan kʼoración (Sant. 4:8). Uma namakgtaya xlakata tlan natamakamastani Jehová chu natamunu. Kaʼakxilhwi tuku uma.
KAMAKGTAYAW XʼAMIGO JEHOVÁ NALITAXTU
12. ¿La tlan namakgtayayaw tiku makgalhtawakgemaw xlakata xʼamigo Jehová nawan?
12 Tuku katsinima tiku makgalhtawakgemaw ni kajwatiya talakaskin natawila kxtalakapastakni, na xlakaskinka nalakgchan kxnaku. ¿Tuku xlakata? Xlakata naku, nema na kilhchanima tuku lakaskinaw chu tuku makgkatsiyaw, wa tuku kinkamakgpuwantiniyan wi tuku natlawayaw. Jesús xkalakgchani xtalakapastaknikan latamanin xlakata lu tlan tuku xmasiya. Pero latamanin kstalanikgo xlakata xkalakgchani kxnakujkan (Luc. 24:15, 27, 32). Tiku makgalhtawakgemaw xliʼakxilhat pi Jehová xlikana lama, tiku tlan natalalin chu naliʼakxilha la xTlat, xDios chu xʼAmigo (Sal. 25:4, 5). Akxni natakgalhtawakgayaw, kalitachuwinaw laktlan tayat nema kgalhi kiDioskan (Éx. 34:5, 6; 1 Ped. 5:6, 7). Lata tuku litachuwinamaw kamasiyaniy la likatsi Jehová. Kamakgtayaw lanka xtapalh naliʼakxilha xtapaxkit, la kinkalakgalhamanan chu la kinkalakgkatsanan. Jesús lichuwinalh pi «tlakg xalanka chu xapulana limapakgsin» wa uma: «Milipaxkit Jehová miDios» (Mat. 22:37, 38). Lu kaliskujwi xlakata tiku makgalhtawakgemaw napaxki Jehová.
13. Kalichuwinanti akgtum liʼakxilhtit xlakata la tlan namakgtayayaw tiku makgalhtawakgemaw liwana nalakgapasa la likatsi Jehová.
13 Akxni tachuwinanaw tiku makgalhtawakgemaw, kawaniw la paxkiyaw Jehová. Uma max namakgtaya naʼakxilha pi talakaskin natalalin Dios chu napaxki (Sal. 73:28). Akgtum liʼakxilhtit, kalilakpuwaw pi litakgalhtawakgamaw maktum likgalhtawakga o akgtum texto nema lakgchan kinakujkan niku lichuwinan xtapaxkit Jehová, xliskgalala, xlitliwakga chu pi xla lu xaʼakgstitum. Tlan nawaniyaw tiku takgalhtawakgamaw pi uma wa pulaktum tuku xlakata lu paxkiyaw kinTlatkan xalak akgapun. La uku kaʼakxilhwi xlipulakkitsis tuku tlan natlawa xlakata tlan natamunu.
KAMAKGPUWANTINIW ANKGALHIN NAʼAN KTAMAKXTUMIT
Kamakgpuwantiniw tiku makgalhtawakgemaw xlakata tunkun naʼan ktamakxtumit (Kaʼakxilhti párrafos 14 chu 15).
14. Chuna la wan Hebreos 10:24, 25, ¿tuku namakgtaya tiku makgalhtawakgemaw xlakata natatliwakglha xtakanajla?
14 Kimputunkan lakaskinaw pi tiku kamakgalhtawakgemaw natamunukgo. Pulaktum tuku tlan natlawayaw wa pi nakamakgpuwantiniyaw naʼankgo ktamakxtumit. Natalan tiku makgasata la kamakgalhtawakgekgo latamanin wankgo pi tiku tunkun ankgo ktamakxtumit wa tiku tlakg lakapala stakkgo xtakanajlakan (Sal. 111:1). Makgapitsi kawanikgo pi tlakg nakatsinikgo xlakata Biblia ktamakxtumit chu ni kaj xman wa akxni kamakgalhtawakgekan akgatunu semana. Kalitakgalhtawakgaw Hebreos 10:24, 25 chu kalitachuwinaw tuku tlan nakitaxtuni komo naʼan ktamakxtumit (kalikgalhtawakga). Nachuna tlan namasiyaniyaw video ¿Tuku tatlawa kPukgalhtawakga? * Kamakgtayaw nalakkaxwili pi naʼan kʼakgatunu tamakxtumit.
15. ¿Tuku tlan natlawayaw xlakata namakgpuwantiniyaw tiku makgalhtawakgemaw xlakata naʼan ktamakxtumit?
15 ¿Tuku tlan natlawayaw komo tiku makgalhtawakgemaw nina anit nipara makgtum ktamakxtumit o komo ni ankgalhin an? Xatapaxuwan kalitachuwinaw tuku katsiniw ktamakxtumit nema aku kilaw. Uma tlakg namakgpuwantini nixawa komo kajwatiya nawaniyaw pi kaʼalh ktamakxtumit. Kamaxkiw maktum revista Makatsinina o likgalhtawakga nema taʼakxilha xʼitat semana Tuku natalikgalhtawakga nema lakgchan natalikgalhtawakga semana akxni nalakgapaxialhnanaw. Kamasiyaniw tuku nataʼakxilha ktamakxtumit chu kakgalhskiw tuku tlakg lakgati xlakata tuku natalichuwinan. Tuku naʼakxilha o tuku nakgaxmata akxni xlimakgtumku naʼan ktamakxtumit nipara tsinu tatalakxtumi tuku akxilhnit o tuku kgaxmatnit knixaxlikana takanajla (1 Cor. 14:24, 25). Nakalakgapasa latamanin tiku nawilinikgo lu tlan liʼakxilhtit chu tiku namakgtayakgo xlakata tlan natamunu.
16. 1) ¿Tuku kilitlawatkan xlakata namakgtayayaw natamunu tiku makgalhtawakgemaw? 2) ¿Tuku nakatsiniyaw kʼatanu artículo?
16 Xlakata putum tuku akxilhwi, ¿tuku tlan natlawayaw xlakata namakgtayayaw natamunu tiku makgalhtawakgemaw? Xlakata namakgtayayaw xlakaskinka naliʼakxilha xtakgalhtawakga xalak Biblia, kamakgpuwantiniw pi kakgalhtawakgalh akgatunu semanas chu kalakkaxwililh tuku nalimakgalhtawakgeyaw. Kamasiyaniw la natachuwinan Jehová chali chali chu tlan xʼamigo nawan. Chu kamakgpuwantiniw xlakata naʼan ktamakxtumit. (Kaʼakxilhti recuadro kpágina 12, « Tuku xlitlawat tiku limakgalhtawakgemaka Biblia»). Pero, chuna la naʼakxilhaw kʼatanu artículo, wi pulakkitsis tuku xlitlawatkan tiku makgalhtawakgenankgo xlakata tlan nakamakgtayakgo natamunukgo tiku kamakgalhtawakgekgo.
TAKILHTLIN 76 Kakiwani tuku makgkatsiya
^ párr. 5 Wi tuku namasiyaniya chatum lataman kilhchanima pi namakgtayaya nalakapastaknan, namakgkatsi o natlawa tuku nichuna xtlawa. Texto xla kata 2020, Mateo 28:19, kinkamalakapastakniyan tuku xlakata lu xlakaskinka nakalimakgalhtawakgeyaw Biblia latamanin, chu nakamasiyaniyaw tuku xlitlawatkan xlakata tlan kstalaninanin Cristo nalitaxtukgo chu natamunukgo. Kʼuma artículo chu kʼartículo nema stala, naʼakxilhaw tuku tlan natlawayaw xlakata tlakg liwana namakgantaxtikay uma lu xlakaskinka taskujut.
^ párr. 2 TUKU LU XLAKASKINKA: Komo ni xmagasni litachuwinanaw Biblia chatum lataman chu limaklakaskimaw maktum likgalhtawakga o kaj litachuwinanaw, uma kilhchanima pi limakgalhtawakgemaw Biblia. Tlan nalhkawiliyaw kʼinforme nema mastayaw akgatunu papaʼ komo liwaka makgtiy kilakgapaxialhnanitaw lata xapulana litachuwinaw la tlawayaw xlakata nakamakglhtawakgeyaw latamanin chu komo lakpuwanaw pi chuntiya nakatsiniputun xlakata Biblia.
^ párr. 3 Umakgolh pulaktiy artículos nalichuwinankgo tastakyaw nema masta likgalhtawakga La Natlawayaw xTaskujut Dios kserie «Dirijamos estudios bíblicos progresivos» nema taxtukgolh knúmeros xla julio kata 2004 asta mayo kata 2005.
^ párr. 4 Chuna la tipalhuwa lichuwinanaw Dios, talakaskin namakgantaxtiyaw limapakgsin xlakata ni namakgpitsiyaw xtukuwanikan latamanin, xnúmerojkan o atanu.
^ párr. 9 Kaʼakxilhti video nema makgapala akgtati minutos Kamasiyani milimakgalhtawakget la nalakkaxwili tuku naʼakxilhatit. Anta kJW Library®, kapit MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ párr. 10 Kapit LIKGALHTAWAKGA > LIBROS CHU FOLLETOS > PROGRAMA LA LIKGALHTAWAKGAKAN BIBLIA.
^ párr. 14 Anta kJW Library®, kapit MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
