1. ¿Tuku tlakg tlan nalaksakaw kkilatamatkan?

ANKGALHIN, tuku laksakkgo xanatlatni tlan nakamakgtaya xkamanankan o ni. Komo nitlan tuku nalaksakkgo, nakalimini taʼakglhuwit xkamanankan. Pero komo tlan tuku nalaksakkgo nakamakgtayakgo napaxuwakgo. Xlikana, kamanan na talakaskin wi tuku nalaksakkgo. Tuku tlakg tlan nalaksakaw kkilatamatkan wa pi naskujnaniyaw xapaxkina kinTlatkan xalak akgapun, Jehová (Sal. 73:28).

2. Chuna la wan Biblia, ¿tuku tlan laksakkgolh José, María, chu Jesús?

² Xnatlatni Jesús xkamakgtayaputunkgo xkamanankan naskujnanikgo Jehová, chu tuku laksakkgolh xlimasiya pi wa uma tuku tlakg xlakaskinka xwanit kxlatamatkan (Luc. 2:40, 41, 52). Jesús na lu tlan tuku laksakli nema makgtayalh namakgantaxti xtalakaskin Jehová (Mat. 4:1-10). Chatum chixku tiku lu tlan xlikatsi, ni xmakgxtakgnan chu ni xpekuan, xla litaxtulh chuna la chatum kgawasa tiku kgalhiputunkgo putum natlatni tiku paxkikgo Jehová.

3. ¿Tuku takgalhskinin nakgalhtiyaw kʼuma artículo?

³ Kʼuma artículo, nakgalhtiyaw umakgolh takgalhskinin: ¿Tuku tlan laksakli Jehová xpalakata Jesús? ¿Tuku tlan nakatsinikgo xanatlatni xlakata tuku laksakkgolh José chu María? ¿Chu tuku tlan nakatsinikgo lakkamanan xlakata tuku laksakli Jesús?

4. ¿Tuku lu xlakaskinka laksakli Jehová xpalakata xKgawasa?

⁴ Jehová laksakli lu xalaktlan natlatni nema kgalhilh Jesús (Mat. 1:18-23; Luc. 1:26-38). Xtachuwin María nema likgalhtawakgayaw kBiblia limasiya la xpaxki Jehová chu xTachuwin  (Luc. 1:46-55). Chu tuku tlawalh José xlakata Jehová xpulalilh limasiya pi lu xpaxki chu xmakgapaxuwaputun (Mat. 1:24).

5, 6. ¿Tuku mastalh talakaskin Jehová pi xtitaxtulh xKgawasa?

⁵ Kaʼakxilhwi pi Jehová ni kalaksakli natlatni tiku xkgalhikgo lhuwa tumin xlakata wa xmakgastakkgolh Jesús. Tamakamastan nema mastakgolh José chu María akxni xlakachinita Jesús limasiya pi ni xkgalhikgo tumin (Luc. 2:24). Max José xkgalhi niku kxwaknan kxpaxtun xchik anta kNazaret. Max ni lhuwa tuku xkgalhikgo, liwaka xlakata max kgalhikgolh kgalhtujun kamanan (Mat. 13:55, 56).

⁶ Jehová kuentajtlawalh xKgawasa xlakata nitu xlanilh, pero nachuna mastalh talakaskin pi xtitaxtulh tuku tuwa (Mat. 2:13-15). Akgtum liʼakxilhtit, makgapitsi tiku xalak xfamilia xwankgonit ni xkanajlanikgo Jesús. Kalilakpuwaw tuku xmakgkatsi xlakata xapulana makgapitsin tiku xalak xfamilia ni xkanajlakgo pi wa Mesías xwanit (Mar. 3:21; Juan 7:5). Max nachuna lu nitlan tuku titaxtulh akxni nilh José. Chu xlakata xla xapuxku xwanit, max talakaskilh wa nalakgataya tuku xliskuja xfamilia (Mar. 6:3). Lata titaxtulh kata, katsinilh la nakakuentajtlawa xfamilia. Max lu palha kskuja xlakata nakamaxki tuku xmaklakaskinkgo. Wa xlakata liwana xkatsi la tamakgkatsi akxni lu tlakgwanita nachitana xlakata palha skujti.

7. 1) ¿Tuku takgalhskinin nakamakgtaya tiku makgaxtokgkgo chu kgalhikgo kamanan? 2) Chuna la wan Proverbios 2:1-6, ¿tuku xkalimasiyanitkan xanatlatni xkamanankan?

⁷ Komo wix chu tiku tamakgaxtokga kgalhiputunatit kamanan, kalilakpuwantit umakgolh takgalhskinin: «¿Klitaxtuyaw la latamanin tiku taʼaktujukgo chu tliwakga kgalhikgo xtakanajlakan nema Jehová xkalaksakli xlakata nakuentajtlawakgo chatum skgata?» (Sal. 127:3, 4). Chu nachuna, komo wix chatum tlat o chatum tse, kalilakpuwanti umakgolh takgalhskinin: «¿Kkamasiyani kinkamanan pi lu xlakaskinka palha naskujkgo?» (Ecl. 3:12, 13). «¿Ktlawa putum tuku kmatlani xlakata nitu nakaʼakgspula chu xlakata xkakilhtamaku Satanás ni nakalaktlawani xtalakapastaknikan?» (Prov. 22:3). Xlikana pi nila katitlawa pi ni nakgalhikgo taʼakglhuwit o ni natitaxtukgo tuku tuwa kxlatamatkan. Nila tlawakan uma. Pero tlan xatapaxuwan natsukuya kamasiyaniya xlakata tlan natayanikgo akxni chuna natitaxtukgo. ¿La tlan natlawaya? Nakamasiyaniya naputsakgo  xtapulalit Biblia (kalikgalhtawakga Proverbios 2:1-6). Akgtum liʼakxilhtit, komo chatum tiku xalak mifamilia namakgxtakga xaxlikana, kakalimasiyani minkamanan xTachuwin Dios tuku xlakata lu xlakaskinka ni namakgxtakgaw Jehová (Sal. 31:23). O komo wi tiku nani xalak mifamilia, kakamasiyani makgapitsi textos xalak Biblia nema nakamakgtaya natayanikgo takatsanajwat chu nakgalhikgo takaksni (2 Cor. 1:3, 4; 2 Tim. 3:16).

8. ¿La litsakgsakgolh José chu María limapakgsin nema wi kDeuteronomio 6:6, 7?

⁸ José chu María tlan makgtayakgolh Jesús xlakata Dios tlan x’akxilhli xlakata stalanikgolh tastakyaw nema Jehová kamaxkilh natlatni (kalikgalhtawakga Deuteronomio 6:6, 7). Xchatiykan lu xpaxkikgo Jehová chu tuku tlakg xlakaskinka xliʼakxilhkgo wa pi nakamakgtayakgo xlakkamanankan na napaxkikgo Jehová.

9. ¿Tuku lu xlakaskinka laksakkgolh José chu María?

⁹ José chu María lakkaxwilikgolh la tlan xliskujkgolh xlakata xtakanajlakan putum xfamilia. Akgatunu semana x’ankgo ksinagoga anta kNazaret chu akgatunu kata x’ankgo kPascua anta kJerusalén (Luc. 2:41; 4:16). Max xlimaklakaskinkgo uma kilhtamaku akxni x’ankgo kJerusalén xlakata namasiyanikgo Jesús chu xnatalan tuku xtitaxtukgonit xkachikin Jehová. Chu max xtitaxtukgo kkachikinin o niku kalichuwinan Biblia. Chuna la tsukulh staka xfamiliajkan, max José chu María tlakg tuwa tsukukgolh makgkatsikgo chuntiya naliskujkgo xlakata xtakanajlakan. Pero lu tlan kitaxtulh xlakata wa pulana wilikgolh xtakaknin Jehová, xlakata putum xtakanajlakan familia lu tlan xwi.

10. ¿Tuku tlan nakatsinikgo xanatlatni xlakata José chu María?

¹⁰ ¿Tuku tlan nakatsinikgo xanatlatni xlakata xliʼakxilhtitkan José chu María? Lata tuku natlawayatit, tuku wanatit chu tuku tlawayatit kakalimasiyanilh minkamanankan pi paxkiyatit Jehová xliputum minakujkan. Tamaskiwin nema tlakg xalanka nakamaxkiyatit wa pi nakamakgtayayatit napaxkikgo Jehová. Chu tuku tlakg tlan nakamasiyaniyatit wa pi liwana nalakkaxwilikgo tuku xla xtakanajlakan chuna la x’akstukan nakgalhtawakgakgo, natlawakgo oración, nalakkaxwilikgo tuku nataʼakxilha ktamakxtumit chu akxni lichuwinankan Dios (1 Tim. 6:6). Xlikana, nakamaxkiyatit  tuku maklakaskinkgo (1 Tim. 5:8). Pero kalakapastaktit: tuku nakamakgtaya minkamanankan nalakgtaxtukgo kxlisputni uma kakilhtamaku chu natanukgo kxasasti xkakilhtamaku Dios ni wa tuku lhuwa kgalhikan, wata wa pi tlan natalalinkgo Jehová (Ezeq. 7:19; 1 Tim. 4:8). *

11. 1) ¿La tlan nakamakgtaya xanatlatni tuku wan 1 Timoteo 6:17-19 xlakata tlan tuku nalaksakkgo? 2) ¿Tuku tlan xlakkaxwilikgolh akgatunu familias nema tlan xtlawakgolh, chu tuku tasikulunalin tlan namakglhtinankgo? (Kaʼakxilhti recuadro « ¿Tuku tlan nalakkaxwilikgo familias?»).

¹¹ Lu lipaxuwayaw kaʼakxilhaw pi lhuwa natlatni tlan tuku laksakkgo xlakata la nakamakgtayakgo xfamiliajkan naliskujkgo xlakata xtakanajlakan. Akxtum kakninanikgo Jehová chu ankgalhin ankgo ktamakxtumit, klaklanka tamakxtumit chu ankgalhin ankgo lichuwinankgo Dios. Makgapitsi familias ankgonit makgtayanankgo niku ni lu ankgalhin lichuwinankan Dios. Amakgapitsin ankgo kBetel o makgtayanankgo akxni katlawakan Pukgalhtawakga. Uma kilhchanima pi max nalaktlawakgo xtuminkan o max wi tuku tuwa nakitaxtu. Pero xlakata uma, Jehová lu nakasikulunatlawa (kalikgalhtawakga 1 Timoteo 6:17-19). Tiku kamakgastakkanit k’akgtum familia niku kgalhikan uma talismanin, chuntiya tlawakgo uma maski laklankata chu lu paxtikatsininankgo xlakata la kamakgastakka (Prov. 10:22). *

12. ¿Tuku talakaskilh xtlawalh Jesús akxni kstaktilhama?

¹² Jehová, xTlat Jesús xalak akgapun, ankgalhin tlan tuku laksaka chu xnatlatni xalak katiyatni na lu tlan tuku laksakkgolh. Pero, akxni tsukulh staka, Jesús xʼakstu wi tuku tsukulh laksaka (Gál. 6:5). Chuna la akinin, xla na tlan xlaksaka tuku natlawa. Tlan xtilaksakli natlawa tuku xʼakstu xlakaskin, pero laksakli tlan natalalin Jehová (Juan 8:29). Xliʼakxilhtit tlan nakamakgtaya lakkamanan la uku.

13. ¿Tuku lu xlakaskinka laksakli Jesús akxni tlakg kgawasaku xwanit?

¹³ Akxni kgawasaku xwanit, Jesús laksakli nakakgalhakgaxmata xnatlatni. Nikxni kalakatakilh chu lakpuwa pi tlakg skgalala xwanit nixawa José chu María. Wata «chuntiya xkakgalhakgaxmata»(Luc. 2:51). Xlikana pi ni kaj takgaman liʼakxilhli tuku xlakgaya xlakata xapuxku xwanit. Lu palha skujli xlakata nakatsini natlawa taskujut nema xtlawa xtlat xlakata namakgtayanan nakamaxkikan xfamilia tuku xmaklakaskinkgo.

14. ¿Tuku likatsiyaw pi Jesús lu tlan xlikgalhtawakga xTachuwin Dios?

¹⁴ Xnatlatni max litachuwinankgolh pi Dios tlawalh akgtum milagro xlakata nalakachin chu  tuku wankgolh ángeles (Luc. 2:8-19, 25-38). Pero Jesús ni kajwatiya makgamakglhtinalh uma tuku masiyanika, wata xʼakstu xlikgalhtawakga Tatsokgni. ¿Tuku likatsiyaw pi lu tlan xlikgalhtawakga xTachuwin Dios? Xlakata, akxni kgawasaku xwanit, makgalhtawakgenanin xalak Jerusalén “kaks lilakawankgolh akxni akxilhkgolh la xʼakgatekgsa chu takgalhtin nema xmasta” (Luc. 2:46, 47). Akxni kajku 12 kata xkgalhi, Jesús liwana xkatsi pi Jehová wa xTlat xwanit (Luc. 2:42, 43, 49).

15. ¿La limasiyalh Jesús pi liwana xlaksaknit natlawa xtalakaskin Jehová?

¹⁵ Akxni Jesús liwana katsilh tuku xlakgayawanit Jehová xlakata xkgantaxtulh xtalakaskin, laksakli namakgantaxti (Juan 6:38). Xkatsi pi lhuwa latamanin xʼamakgolh sitsinikgo, chu xlikana pi uma ni lu xlipaxuwa. Pero laksakli nakgalhakgaxmata Jehová. Akxni tamunulh, kkata 29, wa lu liskujli natlawa xtalakaskin xTlat (Heb. 10:5-7). Wa uma tuku ankgalhin xtlawa, asta maski akxni xkatsanima la xpatinama akxni xtokgowakaka kkiwi (Juan 19:30).

16. ¿Tuku tlan nakatsinikgo lakkamanan xlakata xliʼakxilhtit Jesús?

¹⁶ Kakakgalhakgaxpatti minatlatni. Xtachuna la José chu María, minatlatni na makglakgalhinanin. Pero Jehová kalakgayawanit taskujut nakuentajtlawakgoyan, namakgastakkgoyan chu napulalinkgoyan. Milikgaxmatat xtastakyawkan chu milikgalhakgaxmatat tuku limapakgsikgoyan «xlakata tlan nakitaxtuniyan» (Efes. 6:1-4).

17. Chuna la wan Josué 24:15, ¿tuku xʼakstukan xlilaksakatkan lakkamanan?

¹⁷ Kalaksakti tiku naskujnaniya. Talakaskin miʼakstu nalakputsananiya tiku Jehová, tuku xtalakaskin chu la tlan namakgantaxtiya (Rom. 12:2). Komo chuna natlawaya tlan nalaksaka tuku tlakg xlakaskinka kmilatamat: naskujnaniya Jehová (kalikgalhtawakga Josué 24:15; Ecl. 12:1). Komo ankgalhin nalikgalhtawakgaya Biblia chu nalilakpuwana tuku lichuwinan, tapaxkit nema kgalhiniya Jehová chu mintakanajla tlakg natatliwakglhkgo.

18. ¿Tuku xlilaksakatkan lakkamanan, chu tuku nakitaxtu?

¹⁸ Wa pulana kawili kmilatamat natlawaya xtalakaskin Jehová. Xkakilhtamaku Satanás malaknu pi komo nalimaklakaskina tuku tlan tlawaya xlakata miʼakstu nalitamakgtayaya nakgalhiya tapaxuwan. Pero tiku wa liskujkgo  lhuwa tuku nakgalhikgo lu nitlan kakitaxtuni (1 Tim. 6:9, 10). Pero, komo nakgalhakgaxpata Jehová chu nalaksaka wa pulana nawiliya xtalakaskin, tlan nakitaxtuniyan kmilatamat chu nakgalhiya liskgalala (Jos. 1:8).

19. ¿Tuku xlilakapastakatkan xanatlatni?

¹⁹ Natlatni, katlawatit putum tuku matlaniyatit xlakata nakamakgtayayatit minkamanankan naskujnanikgo Jehová. Kalipawantit Jehová, chu xla nakamakgtayayan tlan tuku nalaksakatit (Prov. 3:5, 6). Kalakapastaktit pi tuku tlawayatit tlakg kamakgpuwantini minkamanankan ni xawa tuku kawaniyatit. Wa xlakata kalaksaktit tuku nakamakgtayayan xlakata Jehová tlan nakaʼakxilhan.

20. ¿Tuku tasikulunalin nakgalhikgo kamanan komo nalaksakkgo naskujnanikgo Jehová?

²⁰ Kamanan, minatlatnikan nakamakgtayakgoyan tlan tuku nalaksakatit. Pero wixin miliskujatkan xlakata Dios tlan nakaʼakxilhan. Wa xlakata kastalanitit xliʼakxilhtit Jesús chu kalaksaktit naskujnaniyatit xapaxkina kinTlatkan xalak akgapun. Komo chuna natlawayatit, la uku nalipaxuwayatit akgtum latamat niku lu naskujnaniyatit chu nakgalhiyatit tapaxuwan (1 Tim. 4:16). Chu kkilhtamaku nema aku mima nalipaxuwayatit latamat nema ni anan tuku xtachuna.