ARTÍCULO NEMA NATALIKGALHTAWAKGA 42
Liwana kakanajlaw pi tekgsnitaw xaxlikana
«Putum kalakputsananitit xlakata nakatsiyatit komo xlikana chu putum kilhtamaku katlawatit tuku xatlan» (1 TES. 5:21).
TAKILHTLIN 142 Ni kamakgxtakgwi kintakgalhkgalhinkan
TUKU NATALICHUWINAN *
1. ¿Tuku xlakata lhuwa latamanin ni katsikgo tuku nakanajlakgo?
LICHUWINANKAN pi anan lhuwa miles takanajla nema wankgo pi kstalaninanin Cristo chu wankgo pi kakninanimakgo Dios chuna la xla lakgati. Wa xlakata lhuwa latamanin ni katsikgo tuku nakanajlakgo chu lilakpuwankgo umakgolh takgalhskinin: «¿Anan akgtum xaxlikana takanajla, o makgamakglhtinan Dios putum takanajla?». ¿Chu akinin? ¿Liwana katsiyaw pi xtatayananin Jehová masiyayaw xaxlikana, chu chuna la kakninaniyaw Dios la uku kajwatiya tuku xla makgamakglhtinan? ¿Tuku nalikatsiyaw pi kgalhiyaw xaxlikana? Kaʼakxilhwi tuku nalikatsiyaw.
2. ¿Tuku xlakata apóstol Pablo liwana xkatsi pi tuku xkanajla wa xaxlikana xwanit? (1 Tesalonicenses 1:5).
2 Apóstol Pablo liwana xkatsi pi tuku xkanajla wa xaxlikana xwanit (kalikgalhtawakga 1 Tesalonicenses 1:5). Xla ni xkanajla kaj xlakata tuku xmakgkatsi. Xlakata xlikgalhtawakga xTachuwin Dios xmakgtayanit liwana nakanajla. Xla xkanajla pi «wa Dios masta putum tuku tatsokgnit kxaSanto Tatsokgni» (2 Tim. 3:16). Akxni likgalhtawakgalh, Pablo tekgsli tuku liwana xlimasiya pi Jesús wa Mesías tiku xwankanit pi namin. Pero xpulalinanin takanajla xala amacha kilhtamaku ni tlawanikgolh kuenta tuku xlichuwinankanit. Umakgolh lakgaputiyunanin xwankgo pi kskujnanimakgo Dios, pero tuku xtlawakgo nichuna xlimasiya (Tito 1:16). Pero Pablo, ni laksakli pi kaj makgapitsi tuku lichuwinan xTachuwin Dios xʼama kanajla chu amakgapitsi xlakgmakgalh. Liwana xlakkaxwilinit pi xʼama masiya chu xʼama lilatama «putum xtastakyaw Dios» (Hech. 20:27).
3. Xlakata liwana nakatsiyaw pi kgalhiyaw xaxlikana, ¿kilikgalhitkan xtakgalhtin putum kintakgalhskininkan? (Na kaʼakxilhti recuadro « Xtatlaw chu xtalakapastakni Jehová tlakg lhuwa nixawa tuku tlan nalichuwinanaw»).
3 Makgapitsi wankgo pi xaxlikana takanajla xlikgalhtit putum xtakgalhtin kintakgalhskininkan, asta makgapitsi tuku ni liwana lichuwinan Biblia. ¿Xlilat chuna nalakpuwankan? Kaʼakxilhwi xliʼakxilhtit Pablo. Xlikana pi xla kawanilh kstalaninanin Cristo: «Putum kalakputsananitit xlakata nakatsiyatit komo xlikana», pero na lichuwinalh pi lhuwa tuku ni xʼakgatekgsa (1 Tes. 5:21). Xla wa pi «ni xatakgatsin takatsin kgalhiyaw» chu wa pi «akxilhmaw akgtum espejo niku ni stalanka tasiya» (1 Cor. 13:9, 12). Pablo, ni putum xkatsi chu akinin nachuna. Pero xla xʼakgatekgsa tuku ni xalaktuwa masiya Biblia xlakata Jehová, xkgalhi takatsin nema xmakgtaya liwana nakatsi pi xtekgsnit xaxlikana.
4. ¿La tlakg nakanajlayaw pi tekgsnitaw xaxlikana, chu tuku naʼakxilhaw kʼuma artículo?
4 ¿La tlakg nakanajlayaw pi tekgsnitaw xaxlikana? Pulaktum tuku tlan natlawayaw wa natamalakxtumiyaw la masiyalh Jesús pi nakakninaniyaw Dios chu la kakninaniyaw Dios xtatayananin Jehová la uku. Kʼuma artículo naʼakxilhaw pi xaxlikana kstalaninanin Cristo 1) lakgmakgankgo ídolos, 2) maxkikgo kakni xtukuwani Jehová, 3) paxkikgo xaxlikana chu 4) lu lapaxkikgo chatunu chatunu.
LAKGMAKGANAW ÍDOLOS
5. ¿Tuku liʼakxilhtit wililh Jesús xlakata la kakninanikan Dios, chu la nastalaniyaw?
5 Xlakata Jesús lu xpaxki Jehová, kajwatiya wa kakninanilh. Chuna tlawalh akxni xlama kʼakgapun chu akxni latamalh kKatiyatni (Luc. 4:8). Chu kamasiyanilh kstalaninanin pi nachuna xtlawakgolh. Jesús chu kstalaninanin nikxni maklakaskinkgolh imágenes akxni kakninanikgolh Dios. Xlakata Dios espíritu, nipara pulaktum tuku lakchixkuwin natlawakgo xlakata nalakalhkaxtukgo tlan namalakgchani xlilanka nema ni anan xtachuna (Is. 46:5). ¿Chu tuku tlan nawanaw xlakata katlawakan imágenes nema kalilakgapaskan santos chu katlawanikan oración? Kxlipulaktiy Limapakgsin nema maxkika Moisés, Jehová wa: «Ni katlawa akgtum imagen, nipara atanu nema xtachuna tasiya tuku wi talhman kʼakgapun, tuku wi tutsu kkatiyatni o tuku wi kchuchut. Ni nakalakgtakilhputaya» (Éx. 20:4, 5). Tiku makgapaxuwaputunkgo Dios, liwana akgatekgskgo umakgolh tachuwin.
6. ¿Tuku liʼakxilhtit stalanikgo la uku xtatayananin Jehová?
6 Tiku lakgtsokgwilikgo tuku lanit wankgo pi kstalaninanin Cristo xalak pulana siglo kajwatiya xkakninanikgo Dios. Akgtum liʼakxilhtit, maktum libro nema lichuwinan tuku titaxtukgonit kstalaninanin Cristo, wan pi xapulana kstalaninanin Cristo «nipara tsinu xlakpuwankgolh» nawilikgo imágenes anta niku xkakninanikgo Dios (History of the Christian Church). La uku, xtatayananin Jehová stalaniyaw xliʼakxilhtitkan kstalaninanin Cristo xalak pulana siglo. Ni katlawaniyaw oración «santos» o ángeles, nipara Jesús. Chu na ni kakninaniyaw tuku lilakgapaskan akgtum kachikin, chuna la saludarlikan bandera o atanu. Maski katuwa tuku kalalh, lakkaxwilinitaw nakgalhakgaxmataw uma tuku wa Jesús: «Wa Jehová miDios tiku xlilat nakakninaniya» (Mat. 4:10).
7. ¿Tuku liwana litasiya pi xtatayananin Jehová ni xtachuna la amakgapitsi takanajla?
7 La uku, lhuwa latamanin xatapaxuwan kastalanikgo xpulalinanin takanajla tiku lu kalakgapaskan, chu asta kakakninaniputunkgo. Tatsamakgo kxpusikulankan, tamawakgo xlibroskan chu lhuwa tumin mastakgo xlakata nakamakgtayakgo. Makgapitsi kanajlakgo putum tuku kawanikan. ¡Asta maski xʼakxilhkgolh Jesús ni lu xpaxuwakgolh chuna la paxuwakgo akxni kaʼakxilhkgo tiku kapulalinkgo! Pero xaxlikana kskujnin Jehová ni stalaniyaw chatum chixku tiku nakinkapulalinan. Maski kamaxkiyaw kakni tiku kinkapulalinkgoyan, kgalhakgaxmataw uma tuku masiyalh Jesús: «Putum wixin linatalan» (Mat. 23:8-10). Ni ídolos kalimaxtuyaw lakchixkuwin, maski xpulalinanin takanajla o mapakgsinanin litaxtukgo. Chu ni kgalhmakgtayayaw tuku tlawakgo, wata tamakgatliniyaw chu ni makgtanuyaw tuku xalak kakilhtamaku. Xlakata putum umakgolh akinin ni litaxtuyaw chuna la tiku kaj wankgo pi kstalaninanin Cristo (Juan 18:36).
MAXKIYAW KAKNI XTUKUWANI JEHOVÁ
Xaxlikana kstalaninanin Cristo xatapaxuwan kalitachuwinanaw amakgapitsin xlakata Jehová (Kaʼakxilhti párrafos 8 asta 10). *
8. ¿Tuku likatsiyaw pi Jehová lakaskin kamalankiw xtukuwani chu kakamasiyaniw putum latamanin?
8 Akgtum kilhtamaku, Jesús wa kxʼoración: «Tlat, kamalanki mintukuwani». Jehová pixlanka kgalhticha kʼakgapun chu malaknunilh pi xʼama malanki xtukuwani (Juan 12:28). Putum kilhtamaku akxni lichuwinalh Dios unu kKatiyatni, Jesús malankilh xtukuwani xTlat (Juan 17:26). Wa xlakata xlilat nakgalhkgalhiyaw pi xaxlikana kstalaninanin Cristo xatapaxuwan nalimaklakaskinkgo xtukuwani Dios chu nakamasiyanikgo amakgapitsin.
9. ¿La limasiyakgolh xapulana kstalaninanin Cristo pi xmaxkikgo kakni xtukuwani Dios?
9 Kxapulana siglo, ni lhuwa kilhtamaku alistalh lata xlakkaxwilikanit congregación xla kstalaninanin Cristo, Jehová “kamakgamakglhtinalh tiku ni judíos, xlakata anta tlan xkalaksakli latamanin tiku [...] xlinkgolh xtukuwani” (Hech. 15:14). Umakgolh kstalaninanin Cristo lu xatapaxuwan maklakaskinkgolh xtukuwani Dios chu kamasiyanikgolh amakgapitsin. Ni matsekgkgolh chu maklakaskinkgolh xtukuwani akxni lichuwinankgolh Dios chu akxni tsokgwilikgolh libros xalak Biblia. * Chuna limasiyakgolh pi xlitaxtukgo akgtum kachikin nema xlin xtukuwani Dios (Hech. 2:14, 21).
10. ¿Tuku litasiya pi xtatayananin Jehová akgtum kachikin nema malanki xtukuwani Dios?
10 ¿Wa xtatayananin Jehová akgtum kachikin nema malanki xtukuwani Jehová? Kaʼakxilhwi tuku litasiya. La uku lhuwa xpulalinanin takanajla tlawakgonit putum tuku matlanikgo xlakata namatsekgkgo xtukuwani Dios. Mapanukgonit kxbibliaskan chu minit kilhtamaku asta wankgonit pi ni xlitamaklakaskinat akxni kakninanikgo Dios. * Pero liwana tasiya pi kajwatiya xtatayananin Jehová malankikgo xtukuwani Dios chu maxkikgo kakni nema lakgchan. Ni anan atanu takanajla nema kamasiyani latamanin xtukuwani Dios chuna la akinin tlawayaw. Lu liskujaw xlakata nalitaxtuyaw tuku kintukuwanikan wan pi litaxtuyaw: xtatayananin Jehová (Is. 43:10-12). Katlawanitaw liwaka 240 millones biblias xla Traducción del Nuevo Mundo, nema limaklakaskin xtukuwani Jehová anta niku amakgapitsi tiku matitaxtikgo Biblia mapanukgonit. Chu katlawayaw kliwaka 1,000 tachuwin likgalhtawakga niku min xtukuwani Jehová.
PAXKIYAW XAXLIKANA
11. ¿La limasiyakgolh xapulana kstalaninanin Cristo pi xpaxkikgo xaxlikana?
11 Jesús xpaxki xaxlikana, uma wamputun, xaxlikana xlakata Dios chu tuku lakapastaknit natlawa. Lilatamalh xaxlikana chu kamasiyanilh amakgapitsin (Juan 18:37). Xaxlikana kstalaninanin Jesús na lu xpaxkikgo xaxlikana (Juan 4:23, 24). Asta apóstol Pedro limapakuwilh xtakanajlakan kstalaninanin Cristo, «xaxlikana tiji» (2 Ped. 2:2). Xaxlikana kstalaninanin Cristo lu xpaxkikgo xaxlikana, chu wa xlakata lakgmakgankgolh tuku xmasiyakgo amakgapitsi takanajla, talismanin chu talakpuwan nema ni xtatalakxtumi tuku xaxlikana (Col. 2:8). Chuna la xlakan, xaxlikana kstalaninanin Cristo xala uku lu liskujkgo xlakata “nalilatamakgo tuku xaxlikana” (3 Juan 3, 4). ¿La tlawakgo? Liwana akxilhkgo pi putum tuku kanajlakgo chu chuna la linkgo xlatamatkan natatalakxtumi chuna la wan xTachuwin Jehová.
12. ¿Tuku tlawakgo natalan tiku pulalinkgo kintaskujutkan akxni akxilhkgo pi talakaskin wi tuku nalakgpalikan, chu tuku xlakata chuna tlawakgo?
12 Xtatayananin Jehová ni wankgo pi nipara tsinu akgtsankgakgo chuna la akgatekgskgo Biblia. Minit kilhtamaku akgtsankgakgonit akxni wankgonit tuku kilhchanima akgtum tamasiy xalak Biblia o chuna la lakkaxwilikgonit congregación. Pero uma ni kaks nakinkamalakawaniyan, xlakata xTachuwin Dios liwana kinkawaniyan pi xkachikin tsinu tsinu xʼama akgatekgstilha xaxlikana chuna la xtitaxtutilhalh kilhtamaku (Col. 1:9, 10). Jehová tsinu tsinu masiyatilha xaxlikana. Wa xlakata tlan nawan nakgalhkgalhiyaw pi kxkgakganat xaxlikana tlakg namaxkgakgenan (Prov. 4:18). Akxni natalan tiku pulalinkgo kintaskujutkan akxilhkgo pi wi tuku kililakgpalitkan la akgatekgsaw o la tlawayaw, lakapala tlawakgo talakgpalit nema talakaskin. Lhuwa takanajla tlawakgo akgtum talakgpalit kaj xlakata namakgapaxuwakgo tiku anta ankgo o kaj xlakata tlan nakaʼakxilhkan. Pero akxni xtatayananin Jehová wi tuku lakgpaliyaw, chuna tlawayaw kaj xlakata tlakg natalakatsuwiniyaw Dios chu nakakninaniyaw chuna la kinkamasiyanin Jesús (Sant. 4:4). Akxni wi tuku lakgpaliyaw, nichuna tlawayaw kaj xlakata xtalakapastaknikan latamanin talakgpalinit, wata chuna tlawayaw xlakata tlakg liwana akgatekgsaw tuku wan Biblia. Paxkiyaw xaxlikana (1 Tes. 2:3, 4).
LU LAPAXKIYAW CHATUNU CHATUNU
13. ¿Tuku tlakg xlakaskinka tayat kalilakgapaskan xaxlikana kstalaninanin Cristo, chu la limasiyakgo xtatayananin Jehová uma tayat kkinkilhtamakujkan?
13 Xapulana kstalaninanin Cristo xkalilakgapaskan xlakata xkgalhikgo lhuwa lakwan tayat, pero tlakg xlakaskinka tayat nema xkalilakgapaskan wa tapaxkit. Jesús wa: «Wa uma tuku nalitalakgapasatit pi wixin kintamakgalhtawakgen: komo lapaxkiyatit» (Juan 13:34, 35). Kkinkilhtamakujkan xtatayananin Jehová lakgalhiniyaw tapaxkit chu makxtum wilaw kxlikalanka Katiyatni. Akinin ni xtachuna la amakgapitsi takanajla xlakata litaxtuyaw akgtum familia maski tanu tanu kinkilhtsukutkan chu tanu tanu kinkachikinkan. Chu akxilhaw uma tapaxkit kkintamakxtumitkan chu kkiʼasambleaskan. Uma tlakg kinkamakanajliyan pi kajwatiya akinin kakninaniyaw Jehová chuna la xla lakaskin.
14. Chuna la wan Colosenses 3:12-14, ¿tuku atanu tlan natlawayaw xlakata nalimasiyayaw pi lapaxkiyaw chatunu chatunu?
14 Biblia wan: «Lu kalapaxkitit chatunu chatunu» (1 Ped. 4:8). Pulaktum la nalimasiyayaw uma tapaxkit wa akxni nalatapatiyaw chu nalatatayaniyaw chatunu chatunu xlakata putum akinin makglakgalhinanin. Na lakputsayaw la tlan wi tuku nakamaskiwiyaw chu tlan nakamakgamakglhtinanaw putum kinatalankan, asta maski wi tiku nitlan kinkalikatsininitan (kalikgalhtawakga Colosenses 3:12-14). Xlikana pi uma tapaxkit wa tuku tlakg limasiya pi xaxlikana kstalaninanin Cristo litaxtuyaw.
«AKGTUM TAMASIY NEMA KANAJLAYAW»
15. ¿Tuku atanu na tlawayaw nema xtlawakgo kstalaninanin Cristo xalak pulana siglo?
15 Akxni kakninaniyaw Dios na tlawayaw atanu tuku xtlawakgo kstalaninanin Cristo xalak pulana siglo. Akgtum liʼakxilhtit, talakkaxwilinitaw chuna la xtalakkaxwilikgonit apóstoles. Kgalhiyaw superintendentes viajantes, lakgkgolotsin chu siervos ministeriales chuna la xlakan xkgalhikgo (Filip. 1:1; Tito 1:5). Chu chuna la xlakan, lakgachixkuwiyaw tuku wan xlimapakgsin Jehová xlakata talakgxtumit chu tamakgaxtokgat, tuku Dios wan xlakata la natamaklakaskin kgalhni chu chuna la kuentajtlawayaw congregación xlakata ni anta natamakgxtakgkgo tiku tlawakgo lanka talakgalhin chu ni makgxtakgputunkgo (Hech. 15:28, 29; 1 Cor. 5:11-13; 6:9, 10; Heb. 13:4).
16. ¿Tuku kinkamasiyaniyan Efesios 4:4-6?
16 Jesús wa pi lhuwa tiku xʼamakgo wankgo pi kstalaninanin xlitaxtukgo, pero ni putum xlikana kstalaninanin xʼamakgo litaxtukgo (Mat. 7:21-23). Chu xTachuwin Dios na lichuwinalh pi kxaʼawatiya kilhtamaku, lhuwa kaj xʼamakgo limasiyakgo pi “xkakninanikgo Dios” (2 Tim. 3:1, 5). Pero Biblia liwana masiya pi Dios kaj akgtum takanajla makgamakglhtinan (kalikgalhtawakga Efesios 4:4-6).
17. ¿La uku tiku stalanikgo xliʼakxilhtit Jesús chu lilatamakgo xaxlikana takanajla?
17 Wa xlakata, ¿tiku lilatamakgo xaxlikana takanajla la uku? Akxilhnitawa tuku litasiya. Lichuwinanitaw tuku masiyalh Jesús xlakata la nakakninanikan Dios chu la kakninanikgolh Dios xapulana kstalaninanin Cristo. Liwana tasiya pi wa uma xtakgalhtin: xtatayananin Jehová. Akgtum lanka talakgalhaman makgtapakgsikan kxkachikin Dios chu katsikan tuku xaxlikana xlakata Jehová chu xlakata tuku lakapastaknit natlawa. Wa xlakata, chuntiya liwana kakanajlaw pi tekgsnitaw xaxlikana.
TAKILHTLIN 3 Wix kimaxkiya litliwakga chu klipawanan
^ párr. 5 Kʼuma artículo naʼakxilhaw xliʼakxilhtit Jesús nema kinkamakgxtakgnin xlakata la kakninanikan Dios chu la stalanikgolh uma liʼakxilhtit kstalaninanin tiku xlamakgolh kxapulana siglo. Na naʼakxilhaw tuku limasiya pi xtatayananin Jehová stalanimakgo uma liʼakxilhtit la uku.
^ párr. 9 Kaʼakxilhti recuadro «¿Xlimaklakaskinkgo xtukuwani Dios xapulana kstalaninanin Cristo?», krevista Makatsinina 1 xla agosto kata 2010, página 6.
^ párr. 10 Akgtum liʼakxilhtit, kkata 2008, papa Benedicto XVI limapakgsinalh pi xtukuwani Dios «ni xlichuwinanka chu ni xlimaklakaskinka» ktakilhtlin, kʼoraciones chu akxni católicos xkakninanikgolh Dios.
^ párr. 63 TUKU TASIYA KDIBUJO: Xkachikin Jehová tlawanit Biblia Traducción del Nuevo Mundo kliwaka 200 tachuwin xlakata latamanin tlan nalikgalhtawakgakgo kxtachuwinkan maktum Biblia nema limin xtukuwani Dios.
