1. ¿Tuku takgalhkgalhin kinkamaxkinitan Jehová?

 JEHOVÁ kinkamaxkinitan takgalhkgalhin pi nakgalhiyaw latamat nema nikxni sputa. Makgapitsi xlakskujnin kgalhkgalhimakgo nalatamakgo kʼakgapun chuna la espíritus tiku nila nanikgo (1 Cor. 15:50, 53). Pero tlakg lhuwa tiku kgalhkgalhikgo nalatamakgo kKatiyatni niku xatapaxuwan nalatamakgo chu nialh natatatlakgo (Apoc. 21:3, 4). Putum akinin, lata tiku nalatamayaw kKatiyatni o naʼanaw kʼakgapun lu xtapalh liʼakxilhaw kintakgalhkgalhinkan.

2. ¿Tuku xlakata wanaw pi kintakgalhkgalhinkan ni kaj akgtum tamanixnat, chu tuku xlakata?

² Akxni Biblia lichuwinan takgalhkgalhin, min kilhtamaku wamputun pi liwana kanajlakan pi nakgantaxtu tuku tlan. Liwana katsiyaw pi kintakgalhkgalhinkan nakgantaxtu xlakata wa Jehová tiku kinkamalaknuniyan (Rom. 15:13). Katsiyaw tuku malaknunit chu katsiyaw pi xla ankgalhin makgantaxti tuku wan (Núm. 23:19). Liwana katsiyaw pi Jehová tlawaputun chu kgalhi litliwakga xlakata namakgantaxti tuku malaknu. Wa xlakata tlan wanaw pi kintakgalhkgalhinkan ni kaj akgtum tamanixnat, wata wi tuku kinkalimasiyaniyan pi xaxlikana.

3. ¿Tuku naʼakxilhaw kʼuma artículo? (Salmo 27:14).

³ KinTlatkan xalak akgapun kinkapaxkiyan chu lakaskin pi kalipawaw (kalikgalhtawakga Salmo 27:14). Komo lipawanaw Jehová, tlan natayaniyaw taputsan, ni katipekuaw chu xatapaxuwan nakgalhkgalhiyaw tuku aku mima. Kʼuma artículo naʼakxilhaw la kinkamakgtayayan takgalhkgalhin. Pulana naʼakxilhaw tuku xlakata wanaw pi takgalhkgalhin xtachuna la tuku limachokgowilikan barco chu la akgtum takgnu xalikan. Chu alistalh nalichuwinanaw la tlan namatliwakglhaw.

4. ¿Tuku xlakata kintakgalhkgalhinkan xtachuna la tuku limachokgowilikan barco? (Hebreos 6:19).

⁴ Kcarta nema Pablo kamalakgachanilh Hebreos, lichuwinalh pi kintakgalhkgalhinkan xtachuna la tuku limachokgowilikan barco (kalikgalhtawakga Hebreos 6:19). Makglhuwa xla xʼan kbarco, wa xlakata liwana xkatsi pi tuku limachokgowilikan barco makgtaya xlakata pupunu ni lakatum lakatum nalin. Akgtum kilhtamaku akxni xʼan kbarco, tsukulh lanka unisen. Uma kilhtamaku, kaʼakxilhli tiku xʼankgo kbarco pi makankgolh kpupunu tuku limachokgowilikan xlakata barco ni xtawakacha niku xwilakgo chiwix (Hech. 27:29, 39-41). Xtachuna la tuku limachokgowilikan barco makgtaya ni lakatum lakatum nalinkan, kintakgalhkgalhinkan kinkamakgtayayan ni natamakgatliniyaw Jehová akxni titaxtuyaw tuku tuwa nema xtachuna la lanka unisen. Xlakata kgalhkgalhiyaw pi namin tlakg xatlan kilhtamaku kinkamakgtayayan natayaniyaw tuku tuwa titaxtuyaw. Kalakapastakwi pi Jesús wa pi xʼamaka kinkaputsastalanikanan (Juan 15:20). Wa xlakata, akxni lilakpuwanaw tuku Jehová kinkamalaknuninitan kinkamakgtayayan chuntiya nalinaw kilatamatkan la kstalaninanin Cristo.

5. ¿La makgtayalh xtakgalhkgalhin Jesús akxni xʼamaka makgnikan?

⁵ Kaʼakxilhwi la takgalhkgalhin makgtayalh Jesús ni namakgxtakga Dios maski xkatsi pi xʼamaka makgnikan. Kilhtamaku xla Pentecostés kata 33, apóstol Pedro lichuwinalh pulaktum tuku xwankanit kSalmos nema liwana limasiya la Jesús xlipawan xTlat: «Naklipawanan kkilatamat; xlakata wix ni kintimakgxtakgti kPutaknun, chu ni katimasta talakaskin pi natalakglakgalhi kimakni, xlakata ni kmakgxtakgan. […] Xlakata tlan kiʼakxilha, nakimakgapaxuwaya» (Hech. 2:25-28; Sal. 16:8-11). Maski Jesús xkatsi pi xʼama ni, liwana xkatsi pi Dios xʼama malakastakwani chu pi xʼamapa taspita kʼakgapun kxpaxtun xTlat (Heb. 12:2, 3).

6. ¿Tuku wa chatum tala xlakata takgalhkgalhin?

⁶ Takgalhkgalhin nema kgalhikgo kstalaninanin Cristo kamakgtayanit natayanikgo tuku tuwa titaxtukgo. Kaʼakxilhwi xliʼakxilhtit Leonard Chinn, chatum tala tiku latamalh kʼInglaterra. Akxni xlama xaPulana Guerra xlikalanka Katiyatni, tamaknuka kpulachin xlakata ni amputulh kʼguerra. Akgtiy papaʼ ni maxkika talakaskin wi tiku natachuwinan chu alistalh mafuerzajlinika natlawa palha taskujut. Alh kilhtamaku, xla tsokgwililh: «Uma tuku ktitaxtulh kimasiyanilh pi, xlakata tlan natayaniyaw, lu xlakaskinka nakgalhiyaw takgalhkgalhin. Xliʼakxilhtit Jesús, xliʼakxilhtitkan apóstoles chu palakachuwinanin, chu tamalaknun nema Biblia kinkatlawaniyan kinkamaxkiyan takgalhkgalhin xlakata kilhtamaku nema aku mima chu litliwakga xlakata tlan natayaniyaw». Xtachuna la tuku limachokgowilikan barco, takgalhkgalhin makgtayalh Leonard, chu na tlan nakinkamakgtayayan akinin.

7. ¿La tatliwakglha kintakgalhkgalhinkan akxni titaxtuyaw tuku tuwa? (Romanos 5:3-5; Santiago 1:12).

⁷ Kintakgalhkgalhinkan tatliwakglha akxni tayaniyaw tuku tuwa chu akxilhaw pi Jehová kinkamakgtayayan chu makgapaxuwa tuku tlawamaw (kalikgalhtawakga Romanos 5:3-5; Santiago 1:12). Wa xlakata, la uku kintakgalhkgalhinkan tlakg tliwakga nixawa akxni lakgapaswi xaxlikana. Satanás lakaskin pi tuku tuwa kakinkamaxlajwanin, pero natayaniyaw pulakatunu uma taputsan xlakata Jehová nakinkamakgtayayan.

8. ¿Tuku xlakata takgalhkgalhin xtachuna la takgnu xalikan? (1 Tesalonicenses 5:8).

⁸ Biblia na wan pi kintakgalhkgalhinkan xtachuna la akgtum takgnu xalikan (kalikgalhtawakga 1 Tesalonicenses 5:8). Chatum  soldado lin xtakgnu xalikan xlakata ni natlawanikan tuku nitlan kxʼakgxakga. Kʼguerra nema kgalhiyaw, xlakaskinka kuenta natlawayaw kintalakapastaknikan xlakata Satanás nitu natlawani. Satanás lhuwa tuku kinkaliputsananiyan chu kinkatamaknuniputunan nixatlan talakapastakni. Xtachuna la takgnu xalikan makgtaya chatum soldado, takgalhkgalhin kuentajtlawa kintalakapastaknikan xlakata ni namakgxtakgaw Jehová.

9. ¿Tuku kitaxtu akxni latamanin ni kgalhikgo takgalhkgalhin?

⁹ Takgalhkgalhin xla latamat nema ni kgalhi xlisputni nakinkamakgtayayan nalaksakaw tuku tlan. Pero, komo kajwatiya nalilakpuwanaw tuku tlawaputunaw, kintakgalhkgalhinkan nataxlajwani. Kalilakpuwaw tuku kaʼakgspulalh kstalaninanin Cristo xalak Corinto. Nialh xkanajlanikgo akgtum lu xlakaskinka xtamalaknun Dios, takgalhkgalhin xla talakastakwanat (1 Cor. 15:12). Pablo lichuwinalh pi tiku ni xkanajlanikgo uma tamasiy kajwatiya xlipaxuwakgo tuku xkgalhikgo (1 Cor. 15:32). La uku, anankgo lhuwa latamanin tiku ni lipawankgo xtamalaknun Dios chu wa xlakata kajwatiya lipaxuwakgo tuku kgalhikgo. Pero akinin lipawanaw tuku Dios malaknunit. Kintakgalhkgalhinkan xtachuna la akgtum takgnu xalikan nema makgtaya kintalakapastaknikan chu kinkamakgtayayan ni kiʼakstukan nakinkamakgapaxuwakanan, chu ni nalaktlawayaw la talalinaw Jehová (1 Cor. 15:33, 34).

10. ¿La kinkamakgtayayan takgalhkgalhin nalakgmakganaw nixaxlikana talakpuwan?

¹⁰ Takgalhkgalhin na kinkamakgtayayan ni nalakpuwanaw pi nitu litaxtu naliskujaw xlakata namakgapaxuwayaw Jehová. Akgtum liʼakxilhtit, max wi tiku nalakpuwan: «Akit nila ktimakgamakglhtinalh latamat nema nikxni sputa. Nitlan klikatsi. Nikxnila ktimakgantaxtilh tuku Dios kgalhkgalhi pi katlawakgolh xlakskujnin». Kalakapastakwi pi Elifaz, chatum nixaxlikana xʼamigos Job, wanilh: «¿La tlan xaskulunku nalitaxtu chatum chixku […]?». Chu wampa: «Kaʼakxilhti, Dios ni kalipawan ksantos, chu nipara akgapun xaskulunku liʼakxilha» (Job 15:14, 15). ¡Uma akgtum lanka taʼakgsanin! Kalakapastakwi pi Satanás lakaskin pi chuna kalakpuwaw. Xla katsi pi, komo chuntiya nalakpuwanaw uma, namakgatsankgatilhayaw kintakgalhkgalhinkan. Wa xlakata, kaliskujwi nalakgmakganaw uma taʼakgsanin chu kajwatiya nalilakpuwanaw xtamalaknun Jehová. Ankgalhin kalipawaw pi xla lakaskin pi putum kskujnin kalatamaw putum kilhtamaku chu xla nakinkamakgtayayan nalakgchanaw uma latamat (1 Tim. 2:3, 4).

11. ¿Tuku xlakata chuntiya kilikgalhkgalhitkan asta akxni Jehová namakgantaxti tuku malaknunit?

¹¹ Min kilhtamaku tuwa makgkatsiyaw tliwakga nakgalhiyaw kintakgalhkgalhinkan. Max nialh kgalhkgalhiputunaw asta akxni Dios namakgantaxti tuku malaknunit. Pero Jehová putum kilhtamaku lama chu ni akxilha kilhtamaku chuna la akinin (2 Ped. 3:8, 9). Xla namakgantaxti tuku lakpuwanit natlawa, pero max ni akxni chuna katitlawalh akxni akinin lakpuwanaw. ¿Tuku nakinkamakgtayayan tliwakga nakgalhiyaw kintakgalhkgalhinkan chu chuntiya nakgalhkgalhiyaw asta akxni Jehová namakgantaxti tuku kinkamalaknuninitan? (Sant. 5:7, 8).

12. Chuna la wan Hebreos 11:1, 6, ¿tuku tlawa nakgalhiyaw takgalhkgalhin?

¹² Kintakgalhkgalhinkan tliwakglh natawila komo ni natamakgatliniyaw Jehová xlakata xla wa tiku kinkawaniyan pi namakgantaxti. Biblia wan pi kgalhiyaw takgalhkgalhin xlakata kanajlayaw pi Jehová lama chu «nakasikulunatlawa tiku xatapaxuwan tlawaputunkgo xtalakaskin» (kalikgalhtawakga Hebreos  11:1, 6). Akxni tlakg kanajlayaw pi Jehová xlikana lama, tlakg lipawanaw pi xla namakgantaxti putum tuku malaknunit. Kaʼakxilhwi tuku tlan natlawayaw xlakata tlakg namatliwakglhaw la talalinaw Jehová chu chuna namatliwakglhaw kintakgalhkgalhinkan.

13. ¿La tlan xʼamigos Dios nawanaw?

¹³ Katlawaniw oración Jehová chu kalikgalhtawakgaw xTachuwin. Xlikana pi nila akxilhaw Jehová, pero tlan xʼamigos nawanaw. Tlan tachuwinanaw akxni tlawaniyaw oración, chu liwana katsiyaw pi xla kinkakgaxmatniyan (Jer. 29:11, 12). Chu tlan kgaxmatniyaw akxni likgalhtawakgayaw xTachuwin chu lilakpuwanaw. Akxni likgalhtawakgayaw la Jehová kakuentajtlawalh xlakskujnin xalamakgasa, kintakgalhkgalhinkan tlakg tatliwakglha. Putum tuku wi kxTachuwin Dios «tsokgwilika xlakata nakinkamasiyanikanan, chu kgalhiyaw takgalhkgalhin xlakata xtachuwin Dios nema tatsokgnit kinkamaxkiyan litliwakga chu kinkamakgtayayan natayaniyaw» (Rom. 15:4).

14. ¿Tuku xlakata lu tlan kitaxtu nalilakpuwanaw tuku Jehová tlawanit xpalakatakan amakgapitsin?

¹⁴ Kalilakpuwaw la makgantaxtinit Jehová xtamalaknun. Kalilakpuwaw tuku tlawalh xpalakatakan Abrahán chu Sara. Xlakata xlakan xlinkgoya kata, nialhla xkgalhikgo kamanan, pero Dios kamalaknunilh pi xʼamakgo kgalhikgo chatum kgawasa (Gén. 18:10). ¿Tuku tlawalh Abrahán? Biblia wan: «Xkanajla pi xʼama litaxtu xtlat lhuwa kachikinin» (Rom. 4:18). Kxlakatin latamanin uma nila xʼama kgantaxtu, pero Abrahán liwana xkatsi pi Jehová xʼama makgantaxti xtamalaknun. Uma kskujni Dios tiku ni xmakgxtakga, akxilhli la kgantaxtulh uma tamalaknun (Rom. 4:19-21). Umakgolh liʼakxilhtit kinkamasiyaniyan pi ankgalhin tlan nalipawanaw pi Jehová namakgantaxti xtachuwin, maski max tuwa akxilhaw pi chuna nala.

15. ¿Tuku xlakata lu xlakaskinka nalilakpuwanaw tuku Dios tlawanita kimpalakatakan?

 ¹⁵ Kalilakpuwaw tuku Jehová tlawanit kimpalakatakan. ¿Lilakpuwanitaw la kgantaxtunit makgapitsi xtamalaknun Dios kkilatamatkan? Akgtum liʼakxilhtit, Jesús malaknulh pi xTlat xʼama kinkamaxkiyan tuku xʼamaw maklakaskinaw kkilatamatkan (Mat. 6:32, 33). Jesús na wa pi Jehová nakinkamaxkiyan espíritu santo komo naskiniyaw (Luc. 11:13). Jehová makgantaxtinit umakgolh tamalaknun. Max namin kkintalakapastaknikan amakgapitsi tamalaknun nema kgantaxtunita kkilatamatkan, chuna la kinkatapatiyan, tlan kinkamamakgkatsiniyan chu kinkamatliwakglhniyan kintakanajlakan (Mat. 6:14; 24:45; 2 Cor. 1:3). Komo nalilakpuwanaw tuku Dios tlawanita kimpalakatakan, tlakg nalipawanaw pi namakgantaxti tuku malaknunit xlakata kilhtamaku nema aku mima.

16. ¿Tuku xlakata takgalhkgalhin akgtum lanka xtamaskiwin Dios?

¹⁶ Takgalhkgalhin xlakata latamat nema ni kgalhi xlisputni akgtum lanka xtamaskiwin Dios. Lu lakaskinaw pi kachilha uma kilhtamaku chu liwana katsiyaw pi nakgantaxtu. Takgalhkgalhin xtachuna la tuku limachokgowilikan barco xlakata kinkamakgtayayan natayaniyaw tuku tuwa titaxtuyaw, taputsastalanit chu asta linin. Chu xtachuna la akgtum takgnu xalikan xlakata kuentajtlawa kintalakapastaknikan chu kinkamakgtayayan nalakgmakganaw tuku nixatlan chu wa natlawayaw tuku xatlan. Takgalhkgalhin nema kinkamaxkiyan Biblia tlawa pi tlakg natalakatsuwiniyaw Dios chu kinkalimasiyaniyan pi Jehová kinkapaxkiyan. Lu tlan kinkakitaxtuniyan akxni tliwakga kgalhiyaw kintakgalhkgalhinkan.

17. ¿Tuku xlakata kinkamakgapaxuwayan kintakgalhkgalhinkan?

¹⁷ Ktatsokgni nema apóstol Pablo kamalakgachanilh kstalaninanin Cristo xalak Roma, kawanilh: «Kalipaxuwatit mintakgalhkgalhinkan» (Rom. 12:12). Pablo tlan xpaxuwa xlakata xkatsi pi komo ni xmakgxtakgli Jehová xʼama kgalhi latamat nema nikxni sputa anta kʼakgapun. Akinin na tlan nalipaxuwayaw takgalhkgalhin xlakata liwana katsiyaw pi Jehová namakgantaxti xtamalaknun. Chuna la wa chatum salmista: «Paxuwa tiku […] lipawan Jehová, xDios, […] tiku nikxni makgxtakgnan» (Sal. 146:5, 6).