1. ¿Niku xtiyakgo xlitliwakgakan xlakskujnin Dios xalamakgasa?

 BIBLIA kalichuwinan kskujnin Dios tiku lu lakgtliwakgan xwankgonit. Pero maski lu lakgtliwakgan xwankgonit ni putum kilhtamaku chuna xmakgkatsikgo. Akgtum li’akxilhtit, milh kilhtamaku mapakgsina David lu «tliwakga» xmakgkatsikan «chuna la akgtum lanka sipi», pero atanu kilhtamaku xmakgkatsi pi ni xkgalhi litliwakga chu lu xpekuan (Sal. 30:7). Nachuna, Sansón lu tliwakga xwan akxni Jehová xmaxki x’espíritu, pero liwana xkatsi la x’ama kitaxtuni komo Dios nialh xmakgtayalh, chu wa: «Nialh ktikgalhilh litliwakga chu naklatama chuna la amakgapitsin lakchixkuwin» (Juec. 14:​5, 6; 16:17). ¿Niku xtiyakgo xlitliwakgakan umakgolh xlakskujnin Dios? Wa Jehová xkamaxki.

2. Akxni Pablo xmakgkatsi pi xtaxlajwani, ¿tuku xmakgtaya natatliwakglhpara? (2 Corintios 12:​9, 10).

² Apóstol Pablo liwana xkatsi pi xla na xmaklakaskin xlitliwakga Jehová (kalikgalhtawakga 2 Corintios 12:​9, 10). Chuna la makgapitsi akinin, Pablo na xtatatla (Gál. 4:​13, 14). Nachuna, lu xliskuja natlawa tuku tlan (Rom. 7:​18, 19). Chu xmin kilhtamaku lu xlakgaputsa chu xpekuan pi namakgnikan (2 Cor. 1:​8, 9). Maski chuna, xla wa: «Akxni ktaxlajwani, lu ktatliwakglha». ¿Tuku xmakgtaya Pablo natatliwakglha? Jehová xmaxki litliwakga nema xkitsankgani, chu chuna tliwakga xmakgkatsikan.

3. ¿Tuku nakatsiniyaw kʼuma artículo?

³ Jehová malaknu pi na nakinkamaxkiyan litliwakga (1 Ped. 5:10). Pero xlakata chuna natlawa talakaskin pi akinin na wi tuku natlawayaw. Kalilakpuwaw akgtum putlaw. Xlakata natsuku tlawan talakaskin pi nakgalhi akgtum tliwakga motor. Pero motor ni x’akstu katimatlawanilh putlaw komo niti namapasi. Xtachuna la uma motor, Jehová kinkamaxkiyan litliwakga nema maklakaskinaw. Pero talakaskin pi akinin na wi tuku natlawayaw. ¿Tuku tamakgtay kinkamaxkiyan Jehová xlakata nakinkamatliwakglhan? ¿Chu tuku kilitlawatkan akinin xlakata nalitamakgtayayaw?  Xlakata nakatsiyaw, kalichuwinaw la matliwakglhli Jehová palakachuwina Jonás, María chu apóstol Pablo. Na naʼakxilhaw pi Jehová kamatliwakglha xlakskujnin xala uku.

4. ¿Tuku kilitlawatkan xlakata namakglhtinanaw xlitliwakga Jehová?

⁴ Pulaktum tuku kilitlawatkan xlakata namakglhtinanaw xlitliwakga Jehová wa pi natlawayaw oración. Xla kgaxmata kiʼoracioneskan chu kinkamaxkiyan «litliwakga tuku latamanin nila kgalhikgo» (2 Cor. 4:7). Na lu tlan nakitaxtu komo nalikgalhtawakgayaw xTachuwin chu nalilakpuwanaw (Sal. 86:11). Tuku xla kinkawaniyan kBiblia kgalhi «lhuwa litliwakga» (Heb. 4:12). Wa xlakata, komo natlawaniya oración Jehová chu nalikgalhtawakgaya xTachuwin, namakglhtinana litliwakga nema maklakaskina xlakata natayaniya, xlakata chuntiya xatapaxuwan naskujniya o namakgantaxtiya taskujut nema lakgayawakanita. Kaʼakxilhwi la matliwakglhli Jehová palakachuwina Jonás.

5. ¿Tuku xlakata Jonás xmaklakaskin litliwakga?

⁵ Jonás xmaklakaskin litliwakga. Jehová xlakgayawanit akgtum taskujut. Pero xlakata xpekuan pi nila xmakgantaxtilh, Jonás tsalalh chu alh kʼakgtum barco nema alakatanu niku xʼama. Xlakata tuku tlawalh Jonás, xla chu amakgapitsi tiku xʼankgo kbarco patikgolh akgtum lanka unisen chu atsinu ni nikgolh. Akxni tiku xʼankgo kbarco makankgolh kpupunu, tantum lanka skiti kgotwalh Jonás. ¿La makgkatsilh Jonás? ¿Lakpuwa pi xʼama niy? ¿Lakpuwa pi Jehová xmakgxtakgnit? Maski ni katsiyaw tuku xlakpuwama, max lu xlakgaputsama.

6. ¿Tuku makgtayalh Jonás natayani akxni xtajuma kxpan skiti? (Jonás 2:​1, 2, 7).

⁶ ¿Tuku tlawalh Jonás xlakata xmakglhtinalh litliwakga akxni xtajuma kxpan skiti? Tlawanilh oración Jehová (kalikgalhtawakga Jonás 2:​1, 2, 7). Maski Jonás ni kgalhakgaxmatli Jehová, xkatsi pi xla xʼama kgaxmatni xʼoración xlakata nitlan xlimakgkatsi tuku xtlawanit. Nachuna, lilakpuwa tuku xwan Tatsokgni. ¿Tuku xlakata chuna wanaw? Xlakata kxʼoración, nema tatsokgtawilanit kJonás capítulo 2, maklakaskilh lhuwa tachuwin nema min kSalmos (akgtum liʼakxilhtit, katamalakxtupi Jonás 2:​2, 5 tuku wan Salmo 69:1; 86:7). Tasiya pi Jonás liwana xlakgapasa uma Tatsokgni. Chu xlakata lilakpuwa uma akxni xtitaxtuma tuku tuwa, lipawa pi Jehová xʼama makgtaya. Alistalh, akxni skiti xkilhtaxtunita, Jonás makgamakglhtinalh taskujut nema xmaxkikanit chu makgantaxtilh (Jon. 2:10–3:4).

7, 8. ¿Tuku makgtayalh Zhiming nakgalhi litliwakga akxni xtitaxtuma tuku tuwa?

⁷ Xliʼakxilhtit Jonás nakinkamakgtayayan akxni titaxtuyaw tuku tuwa. Kalilakpuwaw chatum tala xalak Taiwán tiku wanikan Zhiming. b Xla lu tatatla chu xfamilia lu lisitsini xlakata skujnani Jehová. ¿Tuku makgtaya nakgalhi litliwakga nema Jehová masta? Tlawa oración chu kgalhtawakga. Xla wan: «Min kilhtamaku, akxni ktitaxtu tuku tuwa, lu klakgaputsa chu asta nila kiʼakstu kkgalhtawakga». Pero xla ni taxlajwani. Xla wan: «Pulana ktlawani oración Jehová. Alistalh klakatiya ki’audífonos chu kkgaxmata makgapitsi takilhtlin xla Tamapakgsin. Min kilhtamaku pixtsu ktsuku kkilhtli asta akxni tlakg tlan kmakgkatsi. Chu alistalh ktsuku kgalhtawakga».

⁸ Tuku Zhiming likgalhtawakganit makgtayanit nakgalhi litliwakga akxni talakaskin. Makgtum, akxni tlawanika akgtum lanka operación, chatum enfermera wanilh pi lu ni tliwakga xkgalhni xwanit chu x’ama talakaskin pi xwilinika kgalhni. Pero Zhiming lakapastakli pi akxni nina x’operarlikan xlikgalhtawakganit xliʼakxilhtit chatum tala puskat tiku na xtlawanikanit  watiya uma operación. Uma tala puskat tlakg ni tliwakga xwanit xkgalhni nixawa xla Zhiming, pero uma tala puskat ni makgamakglhtinalh kgalhni chu tatlanilh. Xliʼakxilhtit uma tala makgtayalh Zhiming ni namakgatsankganani Jehová.

9. ¿Tuku tlan natlawaya komo tuku tuwa titaxtupat lu maxlajwaninitan? (Na kaʼakxilhti dibujos).

⁹ Akxni titaxtuya tuku tuwa, ¿lu lakgaputsaya chu makgkatsiya pi nila tlawaya oración? ¿O makgkatsiya pi ni kgalhiya litliwakga xlakata nakgalhtawakgaya? Kalakapastakti pi Jehová akgatekgsa tuku titaxtupat. Wa xlakata, maski ni lhuwa tuku nawaniya akxni natlawaniya oración, liwana kakatsi pi xla namaxkiyan tuku maklakaskina (Efes. 3:20). Chu komo tuwa makgkatsiya nakgalhtawakgaya xlakata katsanajwapat o lu lipuwampat, lu namakgtayayan komo nakgaxpata grabaciones niku likgalhtawakgakanit Biblia o atanu kilikgalhtawakgakan. Atanu tuku na namakgtayayan wa pi nakgaxpata takilhtlin o naʼakxilha akgtum video nema min kjw.org. Akxni tlawaniya oración Jehová o maklakaskina tuku tlawanit xkachikin xlakata nalitamakgtayaya, xtachuna la komo xwani Jehová «katlawa litlan, kakimaxki litliwakga».

10. ¿La kinkamatliwakglhkgoyan kinatalankan?

¹⁰ Jehová tlan nakamaklakaskin natalan xlakata nakinkamatliwakglhan. Xlakan tlan kinkamamakgkatsinikgoyan akxni titaxtumaw tuku lu tuwa o liskujmaw xlakata namakgantaxtiyaw tuku kinkalakgayawakanitan (Col. 4:​10, 11). «Akxni anan talakgaputsit» tlakg kamaklakaskinaw kiʼamigoskan (Prov. 17:17). Komo makgkatsiyaw pi taxlajwaninitaw, natalan tlan nakinkamakgtayakgoyan, tlan nakinkamamakgkatsinikgoyan chu nakinkamatliwakglhnikgoyan kintakanajlakan. Kaʼakxilhwi tuku makgtayalh María, xtse Jesús, xlakata natatliwakglha.

11. ¿Tuku xlakata María xmaklakaskin litliwakga?

¹¹ María xmaklakaskin litliwakga xlakata xmakgantaxtilh xtalakaskin Jehová. Max lu lilakgaputsalh akxni ángel Gabriel makatsinilh lanka taskujut nema xʼamaka lakgayawakan. Xʼama kgalhi chatum aktsu skgata maski nina xmakgaxtokga. Xla ni xkatsi la kakuentajtlawakan kamanan, pero xʼama makgastaka tiku Mesías xʼama litaxtu. Chu xtalakaskin pi xwanilh José, tiku xʼama tatamakgaxtokga, pi xʼama kgalhi aktsu skgata maski niti xtatalakgxtuminit (Luc. 1:​26-33).

12. Chuna la wan Lucas 1:​39-45, ¿la makglhtinalh María litliwakga nema xmaklakaskin?

 ¹² ¿La makglhtinalh María litliwakga nema xmaklakaskin xlakata xmakgantaxtilh lanka taskujut nema lakgayawaka? Makglhtinalh xtamakgtaykan amakgapitsin. Akgtum liʼakxilhtit, wanilh ángel Gabriel pi tlakg xlitachuwinalh xlakata taskujut nema Jehová xlakgayawama (Luc. 1:34). Alistalh, alh lakgapaxialhnan Elisabet, chatum tiku xalak xfamilia, anta «kkasipijni» xalak Judá. ¡Chu lu tlan kitaxtulh uma! Elisabet wanilh María laktlan tachuwin, chu Dios limaklakaskilh xʼespíritu santo xlakata Elisabet xlichuwinalh pulaktum tuku x’ama makgantaxti skgata nema María x’ama malakachini (kalikgalhtawakga Lucas 1:​39-45). Chu María wa pi Jehová xlitlawanit «putum uma xatliwakga xmakxpan» (Luc. 1:​46-51). Jehová kamaklakaskilh ángel Gabriel chu Elisabet xlakata namatliwakglha María.

13. ¿Tuku kitaxtulh akxni Dasurí kaskinilh tamakgtay natalan?

¹³ Xtachuna la María, amakgapitsin kskujnin Dios tiku ni makgxtakgkgo na tlan namatliwakglhkgoyan. Kalichuwinaw xliʼakxilhtit chatum tala xalak Bolivia tiku wanikan Dasurí. Makuchinanin wanikgolh xtlat pi xkgalhi akgtum tajatat nema nialh xkgalhi xalikuchun chu anta tamakgxtakgli k’hospital. Dasurí xkuentajtlawaputun xtlat chuna la xlakgchan (1 Tim. 5:4). Xlakata uma lu tuwa xwanit, xmaklakaskin pi wi tiku xmakgtayalh xlakata tlan namakgantaxti uma lanka taskujut. Dasurí wan: «Makglhuwa lu xaktlakgwanit xakmakgkatsi». Pero xapulana, Dasurí ni skilh tamakgtay. ¿Tuku xlakata? Xla wan: «Ni xakkamaʼakglhuwiputun natalan. Xaklakpuwan: “Wa Jehová tiku nakimakgtaya”. Pero alistalh kakxilhli pi komo xakkatamakgatlinilh natalan, kiʼakstu xaktayaniputun tuku tuwa xaktitaxtuma» (Prov. 18:1). Dasurí lakkaxwililh nakamakatsini makgapitsin xʼamigos tuku xtitaxtuma. Xla wampara: «Ni anan tachuwin xlakata nakwan la xlilhuwa kimakgtayakgolh kinatalan. Xliminkgo liwat kʼhospital chu xkilimakgpuwantinikgo textos xalak Biblia. ¡Lu tlan klimakgkatsilh pi ni kiʼakstu xakwi! Akinin makgtapakgsiyaw kxfamilia Jehová, akgtum familia nema xatapaxuwan namakgtayayan akxni maklakaskimpat, natatasayan akxni lipuwampat chu namakgtayayan natayaniya tuku tuwa titaxtupat».

14. ¿Tuku xlakata kilimakgamakglhtinatkan xtamakgtaykan lakgkgolotsin?

¹⁴ Jehová na kamaklakaskin lakgkgolotsin xlakata nakinkamatliwakglhan. Umakgolh lakchixkuwin akgtum tamaskiwin nema xla kinkamaxkiyan xlakata nakinkamatliwakglhan chu tlan nakinkamamakgkatsiniyan (Is. 32:​1, 2). Wa xlakata kakatachuwinanti akxni wi tuku lilakgaputsaya. Chu komo nawanikgoyan pi namakgtayakgoyan, kamakgamakglhtinanti xtamakgtaykan. Jehová kamaklakaskin umakgolh lakchixkuwin xlakata nakinkamatliwakglhan.

15. ¿Tuku lu tlan takgalhkgalhin kgalhiyaw kstalaninanin Cristo?

¹⁵ Takgalhkgalhin nema kinkamaxkiyan Biblia lu kinkamatliwakglhan (Rom. 4:​3, 18-20). Putum kstalaninanin Cristo kgalhiyaw akgtum lu tlan takgalhkgalhin, pi nalatamayaw putum kilhtamaku kʼakgapun o kʼakgtum paraíso unu kKatiyatni. Uma takgalhkgalhin kinkamaxkiyan litliwakga xlakata natayaniyaw tuku tuwa titaxtuyaw, kinkamakgtayayan nalichuwinanaw xalaktlan tamakatsinin chu namakgantaxtiyaw tuku kinkalakgayawakanitan kcongregación (1 Tes. 1:3). Kaʼakxilhwi la matliwakglhli uma takgalhkgalhin apóstol Pablo.

16. ¿Tuku xlakata apóstol Pablo xmaklakaskin litliwakga?

¹⁶ Pablo xmaklakaskin litliwakga. Ktatsokgni nema kamalakgachanilh corintios wa pi ni tliwakga xmakgkatsikan, pi chuna la patum xalu xatiyat xlitaxtu. Lichuwinalh pi  xmakgapatinankanit, xputsastalanikanit chu xmakgatlajakanit, chu xmin kilhtamaku ni xkatsi tuku natlawa. Asta milh kilhtamaku atsinu ni makgatsankgalh xlatamat (2 Cor. 4:​8-10). Xla tsokgwililh putum uma akxni xlimakgtutu kilichuwinantapulilh Dios. Max ama kilhtamaku ni xkatsi pi xʼamajku titaxtu tuku tlakg tuwa. Ni makgas titaxtulh, makgapitsi latamanin tiku lu ksitsikgonit chipakgolh, linkgolh kxlakatin mapakgsina chu atsinu ni makgatsankgalh xlatamat kpupunu, chu tamaknuka kpulachin.

17. Chuna la wan 2 Corintios 4:​16-18, ¿tuku makgtayalh Pablo natayani tuku tuwa xtitaxtu?

¹⁷ ¿Tuku makgtayalh Pablo nakgalhi litliwakga xlakata natayani? Lilakpuwa xtakgalhkgalhin (kalikgalhtawakga 2 Corintios 4:​16-18). Kawanilh natalan xalak Corinto pi maski “xmakni xtalakglakgalhima”, xtakgalhkgalhin ni xtaxlajwaninit. Pablo lilakpuwa latamat nema xʼama kgalhi kkilhtamaku nema aku xmima. Xla xlilakpuwan latamat nema xʼama kgalhi kʼakgapun chu wa pi ni xʼanan tuku xtatalakxtumi. Chu xlakkaxwilinit natayani putum tuku xlakgmilh xlakata xmakglhtinalh uma tatlaja. Pablo xlilakpuwan uma takgalhkgalhin, chu uma makgtayalh chali chali nakgalhi litliwakga xlakata natayani.

18. ¿La kamatliwakglha Tíjomir chu xfamilia takgalhkgalhin xlakata naʼanan talakastakwanat?

¹⁸ Takgalhkgalhin wa tuku maxki litliwakga chatum tala xalak Bulgaria tiku wanikan Tíjomir. Nina akglhuwa kata, xa’aktsu xtala, Zdravko, nilh akxni lachocarlilh putlaw. Chu Tíjomir lu lilipuwa. ¿Tuku kamakgtayanit Tíjomir chu xfamilia natayanikgo? Lilakpuwankgo talakastakwanat. Tíjomir wan: «Klichuwinanaw niku nakmakgamakglhtinanaw Zdravko, tuku liwat nakkaxtlawaniyaw, tiku nakkawaniyaw pi kaminkgolh kpaskua nema naktlawaniyaw xlakata nakmakgamakglhtinanaw chu tuku naklitachuwinanaw pi lalh kxaʼawatiya kilhtamaku nema xla nialh akxilhli». Tíjomir wan pi akxni lilakpuwankgo uma takgalhkgalhin kamakgtaya chuntiya natayanikgo chu nakgalhkgalhikgo asta akxni Jehová namalakastakwani xtala.

19. ¿Tuku tlan natlawaya xlakata namatliwakglha mintakgalhkgalhin? (Na kaʼakxilhti dibujo).

¹⁹ ¿Tuku tlan natlawaya xlakata namatliwakglha  mintakgalhkgalhin? Komo kgalhkgalhiya pi nalatapaya putum kilhtamaku kKatiyatni, kalikgalhtawakga tuku wan Biblia xlakata Paraíso chu kalilakpuwanti pi anta wila (Is. 25:8; 32:​16-18). Kalilakpuwanti la nawan latamat kxasasti kakilhtamaku. ¿Akxilhkana pi anta wila? ¿Tiku kaʼakxilha? ¿Tuku kgaxpata? ¿Tuku makgkatsiya? Dibujos xlakata Paraíso nema min kkilikgalhtawakgakan namakgtayayan nalilakpuwana la nawan latamat. Na tlan naʼakxilha videos musicales chuna la Latamat xaxlipan, Talakatsuwima xastlan kakilhtamaku o Kakxilhma xasasti kakilhtamaku. Komo lismaniyaw lilakpuwanaw la nawan latamat kxasasti kakilhtamaku, tuku tuwa titaxtuyaw la uku naliʼakxilhaw la tuku «ni makgapala chu tlan tayaniyaw» (2 Cor. 4:17). Takgalhkgalhin nema Jehová kinkamaxkiyan kinkamatliwakglhan.

20. ¿Tuku nakinkamaxkiyan litliwakga asta akxni namakgkatsiyaw pi lu taxlajwaninitaw?

²⁰ «Dios nakinkamaxkiyan litliwakga» akxni makgkatsiyaw pi lu taxlajwaninitaw (Sal. 108:13). Jehová kinkamaxkinitan putum tuku nakinkamakgtayayan tliwakga nawanaw. Wa xlakata, akxni tuwa namakgkatsiya namakgantaxtiya akgtum taskujut, natayaniya tuku tuwa o chuntiya xatapaxuwan naskujnaniya Jehová, xliputum minaku katlawani oración chu kalikgalhtawakga Biblia xlakata xla napulalinan. Nachuna, kamakgamakglhtinanti xtamakgtaykan natalan chu chuntiya kamatliwakglhti mintakgalhkgalhin. Komo chuna natlawaya, Jehová nalimaklakaskin «lanka xlitliwakga» xlakata namatliwakglhan chu chuna “putum xatapaxuwan natayaniya” (Col.1:11).