1. ¿Tuku tamaskiwin kinkamaxkinitan Jesús?

 NI ANAN atanu lataman tiku tlakg lakgalhamanan chuna la Jesús. Akgtum li’akxilhtit, akxni xlama kKatiyatni, limaklakaskilh xlitliwakga xlakata tlan xtlawalh milagros chu chuna tlan xkalimakgtayalh latamanin (Luc. 9:​12-17). Chu akxni mastalh xlatamat kimpalakatakan, kinkamaxkin akgtum lanka tamaskiwin (Juan 15:13). Lata akxni lakastakwanalh xla chuntiya limasiyanit pi xalakgalhamana. Chuna la malaknulh, xla skininit Jehová pi kamaklakaskilh xʼespíritu santo xlakata nakinkamasiyaniyan chu tlan nakinkamamakgkatsiniyan (Juan 14:​16, 17, nota; 16:13). Nachuna, anta ktamakxtumit Jesús kinkamasiyaniyan la nakamakgtayayaw latamanin kxlikalanka Katiyatni xlakata kstalaninanin nalitaxtukgo (Mat. 28:​18-20).

2. ¿Tiku litaxtukgo «la akgtum tasikulunalin»? (Efesios 4:​7, 8).

² Pero na wilapa atanu tamaskiwin nema kinkamaxkinitan Jesús. Apóstol Pablo tsokgwililh pi akxni Jesús alh kʼakgapun, kamastalh lakchixkuwin tiku litaxtukgo «la akgtum tasikulunalin» (kalikgalhtawakga Efesios 4:​7, 8). Lichuwinalh pi Jesús kinkamaxkin uma tasikulunalin xlakata tipalhuwa la xmakgtayanankgolh kcongregación (Efes. 1:​22, 23; 4:​11-13). La uku, makgapitsi umakgolh «tasikulunalin» kakilhchanima siervos ministeriales, lakgkgolotsin xalak congregación chu superintendentes de circuito. a Xlikana, umakgolh lakchixkuwin makglakgalhinanin chu min kilhtamaku tlawakgo tuku nitlan (Sant. 3:2). Pero litaxtukgo la akgtum tamaskiwin nema kgalhikgo lhuwa xtapalh chu Jesús kamaklakaskin xlakata nakinkamakgtayayan.

3. Kalichuwinanti akgtum liʼakxilhtit nema limasiya la tlan nakamakgtayayaw umakgolh lakchixkuwin.

³ Jesús kawililh umakgolh lakchixkuwin tiku «la akgtum tasikulunalin»  litaxtukgo xlakata xkamatliwakglhli congregaciones (Efes. 4:12). Pero putum akinin tlan nakamakgtayayaw xlakata tlan namakgantaxtikgo uma lu xlakaskinka taskujut nema lakgayakgo. Xlakata naʼakgatekgsaw uma, kalilakpuwaw akxni tlawamaka akgtum Pukgalhtawakga. Wi tiku chikinamakgo, pero amakgapitsi makgtayanankgo akxni tlawakgo liwat, masakwaninankgo xputlawkan, o tlawamakgo atanu taskujut. Xtachuna la uma, siervos ministeriales, lakgkgolotsin chu superintendentes de circuito tlawakgo makgapitsi taskujut, chu putum akinin tlan nakamakgtayayaw akxni wi tuku nawanaw o natlawayaw. Kaʼakxilhwi la litamakgtayayaw xtaskujutkan umakgolh lakchixkuwin chu la tlan nakalimasiyaniyaw pi kapaxtikatsiniyaw xlakan chu Jesús xlakata kinkamakgtayamakgon.

SIERVOS MINISTERIALES «KAMAKGTAYAKGO AMAKGAPITSIN»

4. ¿Tuku taskujut xtlawakgo siervos ministeriales kxapulana siglo?

⁴ Kxapulana siglo, makgapitsi natalan siervos ministeriales xkalimaxtukan (1 Tim. 3:8). Max umakgolh lakchixkuwin wa “tiku xkamakgtayakgo amakgapitsin” nema kalichuwinalh Pablo k’1 Corintios 12:28. Xlakan xtlawakgo makgapitsi taskujut xlakata lakgkgolotsin tlan xliskujkgolh xmasiyakgolh chu xkamatliwakglhnikgolh xtakanajlakan amakgapitsin. Akgtum liʼakxilhtit, siervos ministeriales max xmakgtayanankgo xlakata klhkaxtuka xTachuwin Dios o xtamawakgo tuku xtalakaskin xlakata xtlawaka uma taskujut.

5. ¿Tuku taskujut tlawakgo la uku siervos ministeriales?

⁵ ¿Tuku taskujut tlawakgo la uku siervos ministeriales? (1 Ped. 4:10). Max wa kuentajtlawakgo chu akxilhkgo la maklakaskinkan tumin nema mastakgo natalan kcongregación, lakkaxwilikgo niku lakgchan congregación nalichuwinan Dios, skinkgo likgalhtawakga chu kamatitaxtinikgo natalan, maskujukgo equipo xla audio chu video, lakkaxwilininanin litaxtukgo, o makgtayanankgo akxni wi tuku kaxtlawakan kPukgalhtawakga. Putum umakgolh taskujut xlakaskinka xlakata congregación tlan natawila (1 Cor. 14:40). Nachuna, makgapitsi siervos ministeriales kalakgayawakan wi tuku namatitaxtikgo ktamakxtumit xla itat semana chu taʼakgchuwin xalak Biblia. Na tlan kalakgayawakan xlakata nakamakgtayakgo superintendente de grupo. Chu min kilhtamaku, chatum kgolotsin tlan naskini siervo ministerial pi kataʼalh xlakata nalakgapaxialhnankgo chatum tala xlakata namatliwakglhkgo.

6. ¿Tuku xlakata lu xtapalh liʼakxilhaw taskujut nema tlawakgo siervos ministeriales?

⁶ ¿Tuku xlakata lu kapaxtikatsiniyaw siervos ministeriales xtaskujutkan? Kalichuwinaw tuku wankgo makgapitsi natalan. Chatum tala puskat xalak Bolivia tiku wanikan Beberly, b wan: «Xlakata siervos ministeriales lu skujkgo, tlan klitamakgtaya putuminika tamakxtumit. Tuku xlakan tlawakgo kimakgtaya nakkilhtli, nakmasta kintakgalhtin ktamakxtumit, nakkgaxmata taʼakgchuwin chu tlakg naklitamakgtaya videos chu dibujos nema matitaxtikan. Xlakan na kinkakuentajtlawakgoyan chu kamakgtayakgo natalan tiku akxilhkgo tamakxtumit kvideoconferencia. Akxni sputa tamakxtumit, makgtayanankgo nakaxakakan kPukgalhtawakga chu maxtukgo donaciones nema mastakan. Na lu liskujkgo xlakata nakgalhiyaw likgalhtawakga nema maklakaskinaw. ¡Lu kkapaxtikatsini tuku tlawakgo!». Leslie tiku lama kColombia chu xpuskat chatum kgolotsin litaxtu, wan: «Siervos ministeriales lu makgtayakgo kinchixku. Komo xlakan ni xtlawakgolh tipalhuwa taskujut nema anan, kinchixku tlakg lhuwa taskujut xkgalhilh. Wa xlakata lu kkapaxtikatsini xlakata lhuwa skujkgo chu xatapaxuwan chuna tlawakgo». Xlikana pi putum akinin nachuna lakpuwanaw la umakgolh natalan (1 Tim. 3:13).

7. ¿La nalimasiyayaw pi kapaxtikatsiniyaw siervos ministeriales xlakata tuku tlawakgo? (Na kaʼakxilhti dibujo).

⁷ Max lakpuwanaw pi paxtikatsiniyaw tuku siervos ministeriales tlawakgo, pero Biblia kinkamakgpuwantiniyan pi kakawaniw pi  kapaxtikatsiniyaw (Col. 3:15). Kalichuwinaw tuku tlawa David, chatum kgolotsin xalak congregación tiku lama kFinlandia, xlakata nakalimasiyani siervos ministeriales pi kapaxtikatsini: «Kkamalakgachani maktum tarjeta o kkamalakgachani akgtum mensaje niku kwili akgtum texto xalak Biblia chu kkalitachuwinan pulaktum tuku xlakan kilimatliwakglhkgonit, o kkawani pulaktum tuku lu xlakaskinka kliʼakxilha nema tlawakgo». Pascal chu Jael, tiku lamakgo kNueva Caledonia, kapalakaskinkgo siervos ministeriales akxni tlawanikgo oración Jehová. Xlakan wankgo: «Lu kpaxtikatsiniyaw Jehová xlakata wilakgo siervos ministeriales kkincongregaciónkan chu na kskininitaw pi ankgalhin kakamakgtayalh». Jehová kgaxmata umakgolh oraciones chu putum congregación litamakgtaya (2 Cor. 1:11).

LAKGKGOLOTSIN XALAK CONGREGACIÓN LU «PALHA SKUJKGO»

8. ¿Tuku xlakata Pablo wa pi lakgkgolotsin xalak pulana siglo lu palha kskujkgo? (1 Tesalonicenses 5:​12, 13).

⁸ Kxapulana siglo, lakgkgolotsin xalak congregación lu palha kskujkgo (kalikgalhtawakga 1 Tesalonicenses 5:​12, 13; 1 Tim. 5:17). Xlakan xkapulalinkgo congregaciones, chu xlakata tlan chuna xtlawakgolh, xtalakaskin xlakkaxwilikgolh tamakxtumit chu limakxtum xlaksakkgolh tuku xlitatlawat xwanit. Nachuna, xlakata xkakuentajtlawakgolh congregaciones, xkastakyawakgo natalan akxni chuna xtalakaskin, pero xkalimasiyanikgo tapaxkit (1 Tes. 2:​11, 12; 2 Tim. 4:2). Na lu xliskujkgo xlakata xlakan chuntiya tliwakga xkgalhikgolh xtakanajlakan chu liwana xkuentajtlawakgolh xfamiliajkan (1 Tim. 3:​2, 4; Tito 1:​6-9).

9. Kalichuwinanti makgapitsi taskujut nema lakgayakgo lakgkgolotsin xalak congregación la uku.

⁹ La uku, lakgkgolotsin na lu lhuwa taskujut kgalhikgo. Lichuwinankgo xatlan tamakatsinin (2 Tim. 4:5). Kinkawilinikgoyan lu tlan liʼakxilhtit xlakata xatapaxuwan lichuwinankgo Dios, lakkaxwilikgo niku nalichuwinanaw Dios chu kinkamasiyanikgoyan la nalichuwinanaw chu la liwana namasiyayaw. Nachuna, min kilhtamaku talakaskin nalitaxtukgo chuna la jueces tiku ni laksakpaxkinankgo chu lakgalhamaninankgo. Akxni wi tiku tlawa akgtum lanka talakgalhin, lu liskujkgo xlakata namakgtayakgo tlan natalalimpara Jehová. Pero na lu liskujkgo xlakata nitu namaxkajwi congregación (1 Cor. 5:​12, 13; Gál. 6:1). Pero taskujut nema tlakg xlakaskinka lakgayakgo lakgkgolotsin wa pi nakuentajtlawakgo congregación (1 Ped. 5:​1-3). Xlakan matitaxtikgo taʼakgchuwin, liskujkgo xlakata nakalakgapaskgo putum natalan xalak congregación chu kalakgapaxialhnankgo xlakata nakamakgpuwantinikgo. Nachuna, makgapitsi lakgkgolotsin, makgtlawakgo Pukgalhtawakga o makgtayanankgo xlakata nalakkaxtlawakan, makgtayanankgo xlakata natlawakan asambleas regionales, makgtapakgsikgo kComités de Enlace con los Hospitales, kʼGrupos de Visita a Pacientes chu lhuwa atanu taskujut. ¡Lu lhuwa skujkgo kimpalakatakan!

10. Kalichuwinanti makgapitsi tuku xlakata lu kapaxkiyaw lakgkgolotsin xalak congregación.

¹⁰ Jehová lichuwinalh pi lakgkgolotsin lu tlan xʼamakgo kinkakuentajtlawakgoyan chu pi nialhtu xʼamaw lilakgaputsayaw chu nialh xʼamaw pekuanaw (Jer. 23:4). Chuna lalh xpalakata chatum tala xalak Finlandia tiku wanikan Johanna akxni xtse xtatatla. Xla wan: «Lu tuwa kmakgkatsi nakkawani amakgapitsin tuku ktitaxtuma. Pero chatum kgolotsin tiku ni liwana xaklakgapasa kaks kinkgaxmatnilh, kintatlawalh oración chu kimalakapastakalh pi Jehová kimpaxki. Ni liwana klakapastaka tuku kiwanilh, pero klakapastaka pi tlan kmakgkatsilh. Klakpuwan pi Jehová malakgachalh xlakata xkimakgtayalh akxni tlakg xakmaklakaskima». ¿Chu wix? ¿La makgtayakgonitan lakgkgolotsin xalak mincongregación?

11. ¿La tlan nalimasiyayaw pi kapaxtikatsiniyaw lakgkgolotsin tuku tlawakgo? (Na kaʼakxilhti dibujo).

¹¹ Jehová lakaskin pi kakalimasiyaniw lakgkgolotsin xalak congregación tapaxkit nema kakgalhiniyaw xlakata lu skujkgo (1 Tes. 5:​12, 13). Henrietta, tiku na kFinlandia lama, lichuwinan:  «Lakgkgolotsin lu xatapaxuwan kamakgtayakgo amakgapitsin, pero uma ni wamputun pi kaʼakgataxtuni kilhtamaku chu litliwakga o pi xlakan ni kgalhikgo taʼakglhuwit. Wa xlakata, min kilhtamaku ktalakatsuwini chatum kgolotsin chu kwani: “Kajwatiya kwaniputunan pi lu tlan la tlawapat mintaskujut”». Chatum tala puskat xalak Turquía tiku wanikan Sera, wan: «Lakgkgolotsin maklakaskinkgo litliwakga xlakata chuntiya naskujkgo. Wa xlakata kkatsokgnani tarjetas, kkatawayan o akxtum kkan katalichuwinan Dios». Kalilakpuwanti chatum kgolotsin tiku lu paxtikatsiniya tuku tlawanit. Kalakputsa la na tlan nalimasiyaniya pi paxtikatsiniya (1 Cor. 16:18).

SUPERINTENDENTES DE CIRCUITO KAMATLIWAKGLHKGO CONGREGACIONES

12. ¿Tuku atanu tamaskiwin kamaxkilh Jesús congregaciones xlakata nakamatliwakglha? (1 Tesalonicenses 2:​7, 8).

¹² Anan atanu tamaskiwin nema Jesús kamaxkilh congregaciones. Kxapulana siglo, kapulalilh lakgkgolotsin xalak Jerusalén xlakata superintendentes viajantes xkalimaxtukgolh Pablo, Bernabé chu amakgapitsi kstalaninanin Cristo, chu kamalakgachakgolh kʼalakatanu kachikinin (Hech. 11:22). ¿Tuku xlakata? Xlakata xtlawakgolh tuku tlawakgo siervos ministeriales chu lakgkgolotsin: nakamatliwakglhkgo congregaciones (Hech. 15:​40, 41). Umakgolh lakchixkuwin lhuwa tuku limakgxtakgkgolh chu asta kalipekua wilikgolh xlatamatkan xlakata xkamasiyanikgolh chu xkamakgpuwantinikgolh amakgapitsin (kalikgalhtawakga 1 Tesalonicenses 2:​7, 8).

13. Kalichuwinanti makgapitsi taskujut nema lakgayakgo superintendentes de circuito.

¹³ Superintendentes de circuito lakatum lakatum niku ankgo. Makgapitsin lhuwa ciento kilómetros xlilakgamat ankgo xlakata tlan nachankgo kʼakgtum congregación. Akgatunu semana matitaxtikgo tipalhuwa taʼakgchuwin, kalakgapaxialhnankgo natalan xlakata nakamatliwakglhkgo chu pulalinkgo tamakxtumit nema katakgalhikgo precursores, lakgkgolotsin xalak congregación chu tamakxtumit nema tlawakan akxni ankan  lichuwinankan Dios. Na lakkaxwilikgo tipalhuwa taʼakgchuwin chu lakkaxwilikgo la natlawakan asambleas de circuito chu asambleas regionales. Nachuna, lakkaxwilikgo escuelas de precursores, xlakaskinka tamakxtumit nema katatlawakan precursores xalak circuito chu na tlawakgo makgapitsi taskujut nema kalakgayawa sucursal, chu min kilhtamaku umakgolh taskujut lakapala xlitatlawat.

14. Kalichuwinanti makgapitsi tuku xlakata lu xtapalh liʼakxilhaw xtaskujutkan superintendentes de circuito.

¹⁴ ¿La litamakgtayakgo congregaciones taskujut nema tlawakgo superintendentes de circuito? Chatum tala chixku xalak Turquía, wan: «Akxni kinkalakgapaxialhnankgoyan superintendentes lu kimakgpuwantinikgo akxtum nakkatatawila kinatalan chu nakkamakgtaya. Kkalakgapasnit lhuwa superintendentes de circuito, chu xputumkan ankgalhin kilimaxtunikgonit kilhtamaku xlakata nakintachuwinankgo». Johanna, tiku lichuwinaw kpárrafo 10, akxtum kilitachuwinalh Dios chatum superintendente de circuito, pero ni katekgskgolh latamanin. Xla wan: «Maski ni kkatekgswi latamanin, ankgalhin naklakapastaka uma kilhtamaku. Nina makgas xtitaxtunit, chatiy kinatalan laktsuman xʼankgonit latamakgo alakatanu chu lu xakkalakapastaka. Superintendente kimatliwakglhli chu kimakgpuwantinilh naklilakpuwan pi la uku kaj ni makgas kilhtamaku makgat lawilaniw, pero kxasasti kakilhtamaku, nakgalhiyaw lhuwa kilhtamaku xlakata akxtum nakatatawilayaw kifamiliajkan». Putum uma limasiya pi tuku tlawakgo superintendentes de circuito tlawanit pi lhuwa natalan lu nakapaxkikgo (Hech. 20:​37–21:1).

15. 1) ¿La tlan namakgantaxtiyaw tuku wan 3 Juan 5-8 chu nalimasiyayaw pi xtapalh kaliʼakxilhaw superintendentes de circuito? (Na kaʼakxilhti dibujo). 2) ¿Tuku xlakata na talakaskin nalimasiyayaw pi xtapalh kaliʼakxilhaw xlakpuskatinkan natalan tiku lu palha skujkgo kcongregación, chu la chuna natlawayaw? (Kaʼakxilhti recuadro « Xtapalh kakaliʼakxilhwi xpuskatkan»).

¹⁵ Apóstol Juan makgpuwantinilh Gayo pi tlan xkamakgamakglhtinalh natalan tiku xkalakgapaxialhnankgo  congregaciones chu wanilh: «Kakalimakgtaya tuku namaklakaskinkgo kxtijikan chu katlawa chuna la lakgati Dios» (kalikgalhtawakga 3 Juan 5-8). ¿La tlan nachuna natlawayaw? Natawayanaw superintendente de circuito chu namakgtlawayaw putum tuku lakkaxwilikanit natlawakan semana akxni nakinkalakgapaxialhnankgoyan. Kalichuwinaw tuku tlawa Leslie, tiku lichuwinaw kpárrafo 6, xlakata nalimasiya pi kapaxtikatsini xtaskujutkan. Xla wan: «Kskini Jehová pi kakamaxkilh tuku maklakaskinkgo. Kinchixku chu akit na kkatsokgnaniyaw cartas niku kkawaniyaw la kinkamatliwakglhkgon xlakata kinkalakgapaxialhnankgon». Kalakapastakwi pi superintendentes de circuito na titaxtukgo tuku tuwa chu na tlakgwankgo. Min kilhtamaku tatatlakgo, wi tuku lilakgaputsakgo chu asta taxlajwanikgo. Komo wix nakawaniya laktlan tachuwin o nakatlawaniya akgtum tamaskiwin, max wa uma tuku Jehová nakalikgalhti xʼoracioneskan (Prov. 12:25).

TLAKG TALAKASKIN LAKCHIXKUWIN TIKU «LA AKGTUM TASIKULUNALIN» LITAXTUKGO

16. ¿Tuku tlan nalilakpuwankgo natalan lakchixkuwin? (Proverbios 3:27).

¹⁶ Kxlikalanka Katiyatni, congregaciones tlakg maklakaskimakgo natalan tiku litaxtukgo «la akgtum tasikulunalin». Komo wix tamununitata, ¿tlan xliskujti xlakata chuna nalitaxtuya? (kalikgalhtawakga Proverbios 3:27). ¿Liskujpat xlakata siervo ministerial nalitaxtuya? Chu komo siervo ministerial litaxtuyata, ¿liskujpat xlakata kgolotsin nalitaxtuya? c ¿Tlan wi tuku xlakgpali kmilatamat xlakata xmalakgatsama solicitud xla Escuela xla Tiku lichuwinankgo xTamapakgsin Dios? Komo napina kʼuma escuela, Jesús tlan tlakg namaklakaskinan. Komo lakpuwana pi nila katimakgantaxti putum uma, kalitachuwinanti Jehová. Kaskini pi kamaxkin xʼespíritu santo xlakata tlan namakgantaxtiya kaxatukawa taskujut nema nalakgayawakana (Luc. 11:13; Hech. 20:28).

17. ¿Tuku limasiya taskujut nema tlawakgo lakchixkuwin tiku Jesús kalaksaknit?

¹⁷ Taskujut nema tlawakgo lakchixkuwin tiku Jesús «la akgtum tasikulunalin» kalimaxtunit, limasiya pi xla kinkapulaliman kʼuma xaʼawatiya kilhtamaku (Mat. 28:20). KiMapakgsinakan lu kinkapaxkiyan, lhuwa tuku kinkamaxkiyan, liwana katsi tuku maklakaskinaw chu kinkamaxkiyan natalan tiku kinkamakgtayakgoyan. ¿Paxtikatsiniya Jesús putum tuku tlawa? Komo chuna, kalakputsaw la nalimasiyaniyaw pi paxtikatsiniyaw. Chu na nikxni kapatsankgaw napaxtikatsiniyaw Jehová, xlakata wa tiku masta «putum xalaktlan tamaskiwin» (Sant. 1:17).