¿Tuwa makgkatsiya nalakapastaka tuku likgalhtawakgaya? Putum akinin chuna kinkaʼakgspulayan. ¿Tuku tlan nakinkamakgtayayan? Nalilakpuwamparayaw tuku tlakg xlakaskinka.

Akxni kgalhtawakgapat, kalilakpuwanti pulakatunu pulakatunu tuku katsinipat. Wa uma tuku kawanilh apóstol Pablo pi xtlawakgolh natalan tiku xlikgalhtawakgamakgo xcarta. Xla kawanilh: «Xliputum tuku lichuwinamaw, wa uma tuku tlakg xlakaskinka» (Heb. 8:1). Uma tuku kawanilh, kamakgtayalh chuntiya xlilakpuwankgolh chu xʼakxilhkgolh la xlatatalakxtumi putum tuku xlikgalhtawakgamakgo.

Akxni nakgalhtawakgaya, kalimaxtu tsinu kilhtamaku, max 10 minutos, xlakata nalilakpuwana tuku tlakg xlakaskinka. Komo ni liwana lakapastaka, tlan nalikgalhtawakgaparaya subtítulos o tuku litsuku akgatunu párrafo. Akxni wi tuku aku katsini, kalichuwinanti tuku akgatekgsti. Akxni lilakpuwamparaya tuku tlakg xlakaskinka, ni lakapala katipatsankga chu namakgtayayan nalilatapaya.