ARTÍCULO NEMA NATALIKGALHTAWAKGA 43
TAKILHTLIN 90 Kalamakgpuwantiniw chatunu amakgapitsin
¿Tuku tlan natlawayaw komo wi tuku ni liwana kanajlayaw?
«Putum kalakputsananitit» (1 TES. 5:21).
TUKU NAʼAKXILHAW
Tuku tlan natlawaya komo natsukuya lakpuwana pi ni xlakaskinka litaxtuya kxkachikin Jehová o pi nitlan tuku laksakti makgasa xlakata la naskujnaniya Jehová o komo lakpuwana pi nialhla lhuwa tuku tlawaya.
1, 2. 1) ¿Tuku max natsukuyaw lakpuwanaw? 2) ¿Tuku naʼakxilhaw kʼuma artículo?
PUTUM akinin minit kilhtamaku ni liwana kanajlayaw a komo tlan tuku laksakwi makgasa o komo xlakaskinka kinkaʼakxilhan Jehová. Kalilakpuwanti chatum kgawasa tiku ni liwana kanajla pi Jehová xtapalh akxilha, wa xlakata ni tamunu. O chatum tala tiku akxni kgawasaku xwanit laksakli naskujnani Jehová nixawa natlaja lhuwa tumin. Pero la uku kgalhi xfamilia chu makgkatsi pi tumin ni akchani xlakata nakuentajtlawa, wa xlakata lilakpuwan komo tlan tuku laksakli makgasa. Atanu liʼakxilhtit: chatum tala tiku lina kata nialh kgalhi lhuwa litliwakga chu tsuku taxlajwani xlakata nialhla lhuwa tuku tlawa chuna la xapulana. Max minit kilhtamaku lilakpuwanita uma: «¿Xlikana pi Jehová xlakaskinka kiʼakxilha? ¿Ni kaj paxkat wa putum tuku ktlawalh xlakata xakskujnanilh? ¿Chuntiya xtapalh kili’akxilha Jehová?».
2 Uma nixatlan tapuwan max natlawa pi kintakanajlakan nataxlajwani chu asta max nialh naskujnaniyaw Jehová. Kʼuma artículo, naʼakxilhaw la Biblia tlan nakinkamakgtayayan komo lakpuwanaw pi Jehová nialh kinkalilakgaputsayan, pi tuku laksakwi makgasa ni wa tuku tlakg tlan xwanit o komo lakpuwanaw pi Jehová nialhla kintikamaklakaskin.
TUKU TLAN NATLAWAYAW KOMO WI TUKU NI LIWANA KANAJLAYAW
3. ¿Tuku nakinkamakgtayayan komo wi tuku ni liwana kanajlayaw?
3 Komo wi tuku ni liwana kanajlayaw, kalakputsananiw tuku wan xTachuwin Dios. Komo chuna natlawayaw, takanajla nema kgalhiniyaw Jehová chu la talalinaw tlakg natatliwakglha (1 Cor. 16:13).
4. Chuna la wan 1 Tesalonicenses 5:21, ¿tuku kilitlawatkan xlakata nalakputsananaw?
4 (Kalikgalhtawakga 1 Tesalonicenses 5:21). Biblia masta uma tastakyaw: «Putum kalakputsananitit». ¿La tlawakan uma? Natamalakxtumiyaw tuku lakpuwanaw chu tuku wan Biblia. Kalilakpuwaw chatum kgawasa tiku ni liwana kanajla komo Jehová lilakgaputsa. ¿Xlilat chuntiya nalakpuwan uma? Ni, tuku tlan natlawa wa pi nalikgalhtawakga kBiblia tuku lakpuwan Jehová.
5. ¿Tuku tlan natlawayaw xlakata nakgaxmataw tuku Jehová kinkawaniyan?
5 Akxni likgalhtawakgayaw Biblia, xtachuna la Jehová xkinkatachuwinan. Pero xlakata tlan «nakgaxmataw» tuku Jehová kinkawaniyan, wi tuku kilitlawatkan. Talakaskin naputsayaw textos xalak Biblia nema lichuwinan tuku lilakgaputsayaw chu nalimaklakaskinaw likgalhtawakga nema kinkamaxkiyan xkachikin Jehová niku lichuwinan xlakata tuku putsamaw (Prov. 2:3-6). Lu xlakaskinka naskiniyaw Jehová pi kakinkapulalin akxni lakputsanamaw chu pi kakinkamakgtayan natekgsaw xatakgalhtin. Liwana kalakputsananiw textos xalak Biblia chu kaputsaw likgalhtawakga nema tlan nakinkamakgtayayan. Na lu nakinkamakgtayayan komo nalilakpuwanaw xliʼakxilhtitkan xlakskujnin Dios tiku latamakgolh makgasa tiku nachuna makgkatsikgolh chuna la akinin.
6. ¿La kinkamakgtayakgoyan tamakxtumit?
6 Na “kgaxmataw” xtakgalhtin Jehová akxni anaw ktamakxtumit. Komo ankgalhin anaw ktamakxtumit, max akxni mastakan akgtum taʼakgchuwin o akxni chatum tala masta xtakgalhtin, max natekgsaw xatakgalhtin takgalhskinin nema akinin xkgalhiyaw (Prov. 27:17). La uku kalichuwinaw makgapitsi tuku max tuwa makgkatsiyaw nakanajlayaw chu tuku tlan natlawayaw xlakata nialh chuna nalakpuwanaw.
«¿XLIKANA PI JEHOVÁ KILILAKGAPUTSA?»
7. ¿Tuku takgalhskinin max natlawayaw?
7 Max minit kilhtamaku tlawanitaw uma takgalhskinin: «¿Xlikana xlakaskinka ki’akxilha Jehová?». Komo lakpuwana pi ni xlakaskinka litaxtuya, max tuwa namakgkatsiya nakanajlaya pi tlan natalalipina kiMalakatsukinakan. Max mapakgsina David nachuna xmakgkatsi. Lu kaks xlilakawan pi Jehová xkalilakgaputsa latamanin chu wa xlakata kgalhskilh: «Oh, Jehová, ¿tuku litaxtu chixku xlakata nalakapastaka, chu xkgawasa chixku xlakata kuenta natlawaniya?» (Sal. 144:3). Kaʼakxilhwi la tlan natekgsaw xtakgalhtin uma takgalhskinin.
8. Chuna la wan 1 Samuel 16:6, 7, 10-12, ¿tuku akxilha Jehová?
8 Biblia kinkamasiyaniyan pi Jehová kuenta katlawani tiku ni xlakaskinka tasiyakgo kxlakatin amakgapitsin. Akgtum liʼakxilhtit, malakgachalh Samuel kxchik Jesé xlakata xlaksakli chatum xkgawasa tiku mapakgsina xalak Israel xlitaxtulh. Jesé malakgapasnilh Samuel kgalhtujun xlakgkgawasan, pero ni malakgapasnilh tiku tlakg aktsujku xwanit, David. b Pero ¡wa uma tiku Jehová xlaksaknit! (Kalikgalhtawakga 1 Samuel 16:6, 7, 10-12). ¿Tuku xlakata Jehová laksakli David? Xlakata xʼakxilhnit tuku xwi kxnaku chu xʼakxilhnit pi David chatum kgawasa tiku lu xlakaskinka xliʼakxilha tuku xla xtakanajla.
9. ¿Tuku xlakata tlan nalipawana pi Jehová lilakgaputsayan? (Na kaʼakxilhti dibujo).
9 Kalilakpuwanti tuku Jehová tlawanit xlakata nalimasiyaniyan pi lilakgaputsayan. Maxkiyan tastakyaw nema maklakaskina (Sal. 32:8). Chu xlakata tlan chuna natlawa, talakaskin pi liwana nalakgapasan (Sal. 139:1). Akxni wix namakgantaxtiya umakgolh tastakyaw chu naʼakxilha tuku tlan kitaxtu, tlakg nakanajlaya pi Jehová lilakgaputsayan (1 Crón. 28:9; Hech. 17:26, 27). Xla kuenta tlawa putum tuku tlawaya xpalakata chu akxilha xatlan mintayat (Jer. 17:10). Xla waniyan pi xʼamigo kawanti chu lakaskin pi wix na xʼamigo nawamputuna (1 Juan 4:19).
«Komo wix naputsaya, xla namaxkiyan talakaskin natekgsa» (1 Crón. 28:9) (Kaʼakxilhti párrafo 9). c
«¿TLAN TUKU KLAKSAKLI?»
10. Akxni lakapastakaw tuku tlawaw makgasa, ¿tuku takgalhskinin max nalilakpuwanaw?
10 Chuna la titaxtu kilhtamaku, max wi tiku nalakapastaka tuku tlawalh makgasa chu nalilakpuwan komo tlan tuku laksakli. Max limakgxtakgli akgtum tlan taskujut o lakpuwa ni namatsuki akgtum negocio xlakata tlakg kskujnaniputun Jehová. Pero la uku max akxilha pi makgapitsi tiku kalakgapasa tiku limaklakaskinkgolh xlatamatkan xlakata nakgalhikgo tumin tasiya pi tlakg tlan lamakgo. Wa xlakata max nalilakpuwan: «¿Ni kaj paxkat wa putum tuku ktlawalh xlakata xakskujnanilh Jehová? ¿O tlakg tlan xkintikitaxtunilh komo atanu tuku xaktilaksakli?».
11. ¿Tuku xlakata xlakgaputsa tiku tsokgwililh Salmo 73?
11 Komo minit kilhtamaku lilakpuwanita umakgolh takgalhskinin, kalakapastakti la makgkatsilh tiku tsokgwililh Salmo 73. Xla xʼakxilha pi tiku ni kskujnanikgo Jehová xtasiya pi nitu xlitatatlakgo, xkgalhikgo takaksni chu lhuwa tumin (Sal. 73:3-5, 12). Xlakata xtasiya pi lu tlan xkakitaxtunima, salmista xlakpuwan pi ni xtapalh xwanit putum tuku xtlawa xpalakata Jehová. “Tantaku lu xlilakgaputsa” uma ni xatlan tapuwan (Sal. 73:13, 14). ¿Tuku makgtayalh?
12. Chuna la wan Salmo 73:16-18, ¿tuku makgtayalh salmista xlakata liwana xlakapastaknalh?
12 (Kalikgalhtawakga Salmo 73:16-18). Salmista alh kxtemplo Jehová, niku xʼanan takaksni, chu uma makgtayalh xlakata liwana xlakapastaknalh. Akgatekgsli pi maski xtasiya pi makgapitsi tlan xkakitaxtunima kxlatamatkan, xlakan ni xkgalhikgo akgtum takgalhkgalhin. Akxilhli pi tlakg tlan xwanit naskujnanikan Jehová, chu uma makgtayalh nakgalhi takaksni chu litliwakga xlakata chuntiya xatapaxuwan kskujnanilh (Sal. 73:23-28).
13. ¿Tuku militlawat xlakata nakgalhiya takaksni komo lakpuwana pi nitlan tuku laksakti makgasa? (Na kaʼakxilhti dibujos).
13 Chuna la salmista, wix na tlan nakgalhiya takaksni. Xlakata nialh nalilakpuwana ni xatlan tapuwan, pulana kalilakpuwanti tuku tlan kgalhiya chu pi Jehová tlan akxilhan xlakata skujnaniya. Pero ¿tuku kgalhikgo tiku ni skujnanikgo Jehová? Xlakan kajwatiya kgalhikgo tuku malaknu uma kakilhtamaku. Chu lu lipawankgo uma xlakata lakpuwankgo pi ni anan atanu tlakg tlan latamat. Pero Jehová kinkamalaknuniyan pi tlakg lhuwa tuku nakinkamaxkiyan nixawa tuku lakpuwanaw (Sal. 145:16). Atanu tuku tlan max nalilakpuwanaw wa pi ni liwana katsiyaw la xkinkakitaxtunin komo ni xtilaksakwi naskujnaniyaw Jehová. Pero wi tuku liwana katsiyaw: pi akxni laksakaw naskujnaniyaw Jehová xlakata paxkiyaw chu kapaxkiyaw latamanin, nikxni wi tuku kintikatsankganin.
Ankgalhin kalilakpuwaw tuku Jehová kinkamalaknuninitan (Kaʼakxilhti párrafo 13). d
«¿CHUNTIYA XTAPALH KILIʼAKXILHA JEHOVÁ?»
14. ¿Tuku titaxtukgo makgapitsi xlakskujnin Jehová, chu tuku max natsukukgo lilakpuwankgo?
14 Makgapitsi xlakskujnin Jehová tlakg lhuwa tuku tlawaputunkgo xlakata tlakg naskujnanikgo, pero nila chuna tlawakgo xlakata linkgoya kata o tatatlakgo. Chu uma max natlawa pi natsukukgo makgkatsikgo pi ni xlakaskinka kaʼakxilha Jehová o nalilakpuwankgo: «¿Chuntiya xtapalh kiliʼakxilha?».
15. ¿Tuku liwana xkatsi tiku tsokgwililh Salmo 71?
15 Tiku tsokgwililh Salmo 71 nachuna xmakgkatsi. Wanilh Jehová: «Akxni nialh nakkgalhi litliwakga, ni kakiʼakgxtakgmakganti» (Sal. 71:9, 18). Pero xla liwana xkatsi pi komo chuntiya kskujnanilh Jehová chu ni xmakgxtakgli, xla xʼama pulalin chu xʼama makgtaya. Katsinilh pi Jehová lu makgapaxuwa akxni akxilha pi tiku skujnanikgo tlawakgo putum tuku matlanikgo (Sal. 37:23-25).
16. ¿Tuku xlakata wanaw pi natalan tiku linkgoya kata tlan chuntiya naskujnanikgo Jehová? (Salmo 92:12-15).
16 Komo wix lipinata kata, kaliskujti naʼakxilhkana chuna la Jehová akxilhan. Maski nialhla lhuwa tuku tlawaya, Jehová tlan namakgtayayan xlakata chuntiya naskujnaniya chu ni namakgxtakga (kalikgalhtawakga Salmo 92:12-15). Ni wa kalilakpuwanti tuku nila tlawaya, wata wa kalilakpuwanti tuku tlan tlawaya. Miliʼakxilhtit tlan nakamatliwakglha amakgapitsin chu na tlan nakalimasiyaniya pi kalilakgaputsaya. Na tlan nakalitachuwinana la makgtayanitan Jehová kmilatamat chu pi lu akxilhputuna kakgantaxtulh xtamalaknun. Chu nikxni kapatsankga pi oraciones nema tlawaya xpalakata amakgapitsin, lu makgtayanan (1 Ped. 3:12). Kaxatukawa tuku titaxtuyaw, putum akinin tlan wi tuku natlawayaw xpalakata Jehová chu xpalakata amakgapitsin.
17. ¿Tuku xlakata ni kilitamalakxtumitkan tuku tlawayaw chu tuku tlawakgo amakgapitsin?
17 Komo nitlan limakgkatsiya xlakata nialhla lhuwa skujnaniya Jehová chuna la wix lakaskina, kalakapastakti pi xla xtapalh liʼakxilha putum tuku tlawaya. Nachuna, ni katamalakxtupi tuku tlawaya chu tuku tlawakgo amakgapitsin. ¿Tuku xlakata? Xlakata Jehová nikxni kinkatamalakxtumiyan amakgapitsin (Gál. 6:4). Kalilakpuwaw uma, María lituchakgelh Jesús xamuksun aceite nema lu tapalaxla xwanit (Juan 12:3-5). Pero puskat tiku xninita xchixku, kaj okgxtiy laktsu tumin mujulh kʼarca nema xwilakgo ktemplo (Luc. 21:1-4). Pero kxlakatin Jesús, tuku tlawakgolh umakgolh chatiy lakpuskatin limasiyalh la xlitliwakga xwanit xtakanajlakan. KinTlatkan Jehová lu xtapalh liʼakxilha kaxatukawa tuku wix tlawaya xlakata nalimasiyaniya pi paxkiya chu maxkiya kakni, maski wix lakpuwana pi ni lhuwa xtapalh.
18. Komo wi tuku nila kanajlayaw o wi tuku kinkamaxlajwaniman, ¿tuku nakinkamakgtayayan? (Na kaʼakxilhti recuadro « Xtachuwin Dios namakgtayayan komo wi tuku ni liwana kanajlaya»).
18 Min kilhtamaku putum akinin wi tuku nila kanajlayaw o wi tuku kinkamaxlajwaniyan. Pero chuna la lichuwinanitaw, xTachuwin Dios kinkamakgtayayan nialh chuna namakgkatsiyaw. Wa xlakata kaputsa xatakgalhtin nema masta Biblia, chu uma namakgtayayan nialh nalakgaputsaya. Jehová xtapalh liʼakxilha putum tuku tlawaya xpalakata, xtapalh liʼakxilhan chu malaknu pi nasikulunatlawayan. Nikxni kapatsankga: Jehová kapaxki chu kakuentajtlawa chatunu kskujnin.
TAKILHTLIN 111 Wantuku kinkamakgapaxuwayan
a TUKU LU XLAKASKINKA: Kʼuma artículo, akxni lichuwinanaw tuku nila kanajlayaw, ni wa kilhchanima pi ni kanajlaniyaw Jehová chu xtamalaknun, wata wa kilhchanima akxni chatum kskujni Jehová tuwa makgkatsi nakanajla pi xla lu xtapalh liʼakxilha o lilakpuwan komo tlan o nitlan tuku laksakli makgasa.
b Maski Biblia ni wan la akglit kata xkgalhi David akxni Jehová laksakli, max kajku aktsu kgawasa xwanit (kaʼakxilhti revista La Atalaya 1 xla septiembre kata 2011, página 29, párrafo 2).
