ISRAELITAS lu xlakaskinka xliʼakxilhkgo tatlakgni. Biblia makglhuwa kalichuwinan latamanin tiku xtlakgnankgo o xkilhtlikgo. Asta makgapitsi libros xalak Biblia akgtum takilhtlin litaxtukgo. Akgtum liʼakxilhtit, libros xla Salmos, El Cantar de los Cantares chu Lamentaciones katsokgwilika xlakata xkalikilhtlika. Libro Music in Biblical Life (Tatlakgni xala makgasa) wan pi Biblia «lichuwinan pi umakgolh latamanin ankgalhin xmaklakaskinkgo tatlakgni».

Chuna la xlimaklakaskinkan tatlakgni chali chali. Israelitas xkilhtlikgo xlakata xlichuwinankgolh la xmakgkatsikgo (Is. 30:29). Lakpuskatin xatapaxuwan xkilhtlikgo, xtantlikgo chu xtlakgkgo pandereta akxni xlaksakkan chatum mapakgsina, kpaskua nema xtlawakan xlakata nalimalankikan Dios chu akxni xtlajanankgo kʼakgtum guerra (Juec. 11:34; 1 Sam. 18:​6, 7; 1 Rey. 1:​39, 40). Akxni wi tiku xniy, israelitas na xkilhtlikgo xlakata xlimasiyakgolh xtalipuwankan (2 Crón. 35:25). Chuna la wan maktum enciclopedia, «hebreos lu xlakgatikgo tatlakgni» (Cyclopedia, de McClintock y Strong).

Chuna la mapakgsinanin xmaklakaskinkgo tatlakgni. Mapakgsinanin xalak Israel lu xlakgatikgo tatlakgni. Mapakgsina Saúl laksakli David xlakata xtlakgnilh arpa (1 Sam. 16:​18, 23). Akxni David mapakgsina litaxtulh, katlawalh makgapitsi litlakgni, tsokgwililh makgapitsi takilhtlin chu kaputsalh tiku tlan xkilhtlikgo chu xtlakgnankgo xlakata xkilhtlikgolh kxtemplo Jehová (2 Crón. 7:6; Amós 6:5). Chu mapakgsina Salomón, xkaputsanit lakchixkuwin chu lakpuskatin tiku xkilhtlikgo kxpalacio (Ecl. 2:8).

Chuna la xmaklakaskinkan tatlakgni akxni xkakninanikan Jehová. Anta kxtemplo Jerusalén xʼanankgo 4,000 tiku lu xkatsinikgo tlakgnankgo, xtlakgkgo címbalos, arpas chu trompetas (1 Crón. 23:5; 2 Crón. 5:12). Pero ni kajwatiya xlakan xmaklakaskinkgo tatlakgni xlakata xlikakninanikgolh Jehová. Akxni israelitas xʼankgo kJerusalén xlakata xtlawakgolh paskua, xlikilhtlitilhakgo takilhtlin nema lilakgapaskan: Canciones de las Subidas (Sal. 120-134). Chu makgapitsi libros lichuwinankgo pi israelitas xlikihtlikgo Hallel a akxni xtlawakan taway xla Pascua.

Xkachikin Jehová xala uku na lu xlakaskinka akxilhaw tatlakgni (Sant. 5:13). Kilhtliyaw xlakata namalankiyaw Jehová (Efes. 5:19). Tatlakgni tlawa pi makxtum nakatatawilayaw kinatalankan chu kinkamatliwakglhan xlakata natayaniyaw tuku tuwa (Hech. 16:25; Col. 3:16). Tatlakgni na kinkamaxkiyan talakaskin nalichuwinanaw pi lu paxkiyaw Jehová chu lu kanajlaniyaw.