1, 2. ¿Tuku talachipat kgalhiyaw kskujnin Jehová?

PUTUM kskujnin Dios tiku makgxtakgkgo, lata Abel asta la uku liskujnitaw xlakata ni namakgatsankgananiyaw Dios. Apóstol Pablo kawanilh kstalaninanin Cristo tiku hebreos xwankgonit, pi lhuwa tapatin xtayanikgonit chu lhuwa xliskujkgonit xlakata Jehová tlan xkaʼakxilhli chu xkasikulunatlawalh (Heb. 10:32-34). Pablo katamalakxtumilh atletas, boxeadores chu luchadores xalak makgan Grecia (Heb. 12:1, 4). La uku, kstalaninanin Cristo lamaw ktiji nema nakinkalinan klatamat nema ni kgalhi xlisputni. Pero wilakgolh tiku atanu tuku kinkamatlawiputunkgoyan chu nialh nalipaxuwayaw tuku tlawamaw chu namakgatsankgayaw tuku Jehová kinkamalaknuninitan.

² Tiku tlakg tliwakga kintalatlawanakan wa Satanás chu xkakilhtamaku (Efes. 6:12). Lu xlakaskinka ni namastayaw talakaskin ni nalakpuwanaw la kakilhtamaku chu xtamasiy chu ni xatlan talismanin, la talakgxtumit xalimaxana, xkulikan, kgachikan o maklakaskinkan drogas. Na talakaskin ni nataxlajwaniyaw chu natalatlawayaw tuku nitlan natlawaputunaw (2 Cor. 10:3-6; Col. 3:5-9).

3. ¿La kinkamamakgatawakgeyan Jehová xlakata nakatalachipayaw kintalatlawanakan?

 ³ ¿Tlan nakatlajayaw umakgolh lakgtliwakgan kintalatlawanakan? Tlan nakatlajayaw, maski tuwa namakgkatsiyaw. Pablo tatalakxtumilh boxeador akxni wa: «Chuna nama [kkgaxinama, TNM], ni cha mpala kaj un kkgaxima» (1 Cor. 9:26). Talakaskin nakatalachipayaw kintalatlawanakan la boxeadores, Jehová kinkamakgtayayan chu kinkamamakgatawakgeyan. ¿La tlawa? Maklakaskin Biblia, kilikgalhtawakgakan, kintamakxtumitkan chu laklanka tamakxtumit. ¿Maklakaskinaw putum tuku kinkalimasiyaniyan Jehová? Komo ni xlimaklakaskiw, ni xlimasiyaw pi lu liskujmaw xlakata nakatalachipayaw kintalatlawanakan. Xlitaxtuw la boxeador tiku kaj un kgaxima.

4. ¿Tuku kilitlawatkan xlakata ni nakinkatlajayan tuku nixatlan?

⁴ Talakaskin pi putum kilhtamaku skgalalh natawilayaw. ¿Tuku xlakata? Xlakata kintalatlawanakan nakinkatlawaniputunkgoyan tuku nitlan akxni ni skgalalh wilaw o akxni taxlajwaninitaw. Biblia kinkawaniyan chu kinkalimatliwakglhan uma tachuwin: «Ni wa ntilitatlajiya wa ntu nixatlan, wampi wa ntu xatlan nkalitlaja wa ntu nixatlan» (Rom. 12:21). Uma wamputun pi komo chuntiya natalatlawayaw tuku nixatlan tlan natlajayaw. Pero komo ni skgalalh natawilayaw chu nialh natalatlawayaw, max Satanás, xkakilhtamaku chu kintalakgalhinkan nakinkatlajayan. Wa xlakata chuntiya katalachipanaw. Chuntiya tliwekglh katawilaw chu ni katamakaxlajwaniw (1 Ped. 5:9).

5. 1) Komo lakaskinaw pi Jehová tlan nakinkaʼakxilhan, ¿tuku kililakapastakatkan? 2) ¿Tiku nakalichuwinanaw?

⁵ Komo tlajanamputunaw, kililakapastakatkan tuku xlakata chuna tlawamaw. Chuna tlawayaw xlakata lakaskinaw pi Dios tlan nakinkaʼakxilhan. Hebreos 11:6, TNM, wan: «Tiku talakatsuwini Dios xlikanajlat pi lama chu xlikanajlat pi kasikulunatlawa tiku kakninaniputunkgo xliputumkan xnakujkan». Chuna la lichuwinaw, komo lakaskinaw pi Jehová nakinkasikulunatlawayan, lu lhuwa naliskujaw (Hech. 15:17). Biblia kalichuwinan lhuwa tiku xliputum xnakujkan tiku chuna tlawakgolh. Makgapitsi wa Jacob, Raquel, José chu Pablo. Xputumkan tuwa tuku titaxtukgolh kxmaknikan chu kxtalakapastaknikan. Pero komo liskujkgolh, Dios kasikulunatlawalh. Xliʼakxilhtitkan kinkamasiyaniyan pi Jehová na nakinkasikulunatlawayan komo nachuna natlawayaw. Kalichuwinaw la tlan nastalaniyaw xliʼakxilhtitkan.

6. 1) ¿Tuku xlakata Jacob nikxni taxlajwanilh? 2) ¿Tuku makglhtinalh? (Kaʼakxilhti xapulana dibujo).

⁶ Jacob nikxni makgantsankgananilh Dios chu ni taxlajwanilh. ¿Tuku xlakata? Xlakata xpaxki Jehová chu xlakaskinka xakxilha pi tlan xtalalin. Xkanajla pi Jehová xʼama kasikulunatlawa xkamanan (Gén. 28:3, 4). Akxni Jacob atsinu ni xmakgatsi 100 kata, talachipalh chatum ángel xlakata namakglhtinan xtasikulunalin Jehová (kalikgalhtawakga Génesis 32:24-28). ¿Tuku xlakata tlan talachipalh chatum ángel? Ni wa xlakata lu tliwakga xwanit. Chuna tlawalh xlakata xlakaskin pi Jehová ksikulunatlawalh. Chu chuna lalh. Jehová sikulunatlawalh xlakata lu liskujli. Wa xlakata limapakuwilh Israel, nema wamputun  «Xtalachipana Dios». Jehová tlan akxilhli chu sikulunatlawalh. Wa uma tuku akinin na makglhtinamputunaw.

7. 1) ¿Tuku lu tuwa xtitaxtuma Raquel? 2) ¿Tuku tlawalh Raquel chu tukuya tasikulunalin makglhtinalh?

⁷ Raquel xpuskat xwanit Jacob chu wa tiku tlakg xpaxki. Raquel na xakxilhputun la xʼama makgantaxti Jehová tamalaknun nema xwaninit xchixku. Pero xʼanan akgtum taʼakglhuwit. Raquel nila xkgalhi kamanan, chu makgasa uma lu xlilipuwankgo lakpuskatin. ¿Tuku tlawalh Raquel xlakata xtalipuwan? Nikxni lakpuwa pi ni xʼama lakkaxla. Makglhuwa xtlawani oración Jehová xlakata chuntiya xtayanilh. Jehová kgaxmatnilh xʼoración chu titaxtulh kilhtamaku sikulunatlawalh, Raquel kgalhilh kamanan. Wa xlakata alistalh wa pi lhuwa xliskujnit. Chu wampa: «¡Na ktlajananit!» (Gén. 30:8, 20-24).

8. 1) ¿Tuku taʼakglhuwit xkgalhi José? 2) ¿Tuku kinkamasiyaniyan xatlan xliʼakxilhtit?

⁸ Xatlan xliʼakxilhtit Jacob chu Raquel makgtayalh José, xkgawasakan, akxni titaxtulh tuku tuwa kxlatamat. Akxni José xkgalhi 17 kata, xlatamat lu talakgpalilh. Xnatalan ksitsinikgo chu wa xlakata stakgolh la chatum skujni. Alistalh, José lhuwa kilhtamaku tamaknuka kpulachin kʼEgipto maski ni xlin kuenta (Gén. 37:23-28; 39:7-9, 20, 21). Pero ni taxlajwanilh, ni sitsilh chu ni lakpuwa nakamalakgaxokge. ¿Tuku xlakata? Xlakata kajwatiya lilakpuwa la xtalalin Jehová (Lev. 19:18; Rom. 12:17-21). Xatlan xliʼakxilhtit José kinkamasiyaniyan pi ni kilitaxlajwanitkan maski tuwa tuku titaxtunitaw akxni laktsujku xwanitaw o maski makgkatsiyaw pi kintaʼakglhuwitkan ni katilakkaxlalh. Liwana kakatsiw pi Jehová nakinkasikulunatlawayan  komo chuntiya naliskujaw (kalikgalhtawakga Génesis 39:21-23).

9. ¿La tlan nastalaniyaw xliʼakxilhtitkan Jacob, Raquel chu José?

⁹ Max akinin na talakaskin natayaniyaw lu laktuwa taʼakglhuwit. Max patimaw tuku ni kinkuentajkan, kinkalaksakpaxkikanan, kinkalikgalhkgamanankanan o max wi tuku kinkatlawaniyan tiku kinkasitsiniyan. Pero ni kataxlajwaniw. Kalakapastakwi tuku kamakgtayalh Jacob, Raquel chu José xlakata chuntiya xatapaxuwan kskujnanikgolh Jehová. Lu lhuwa xtapalh xʼakxilhkgo la xtalalinkgo Jehová, wa xlakata xla kamaxkilh litliwakga chu kasikulunatlawalh. Umakgolh kskujnin Dios chuntiya liskujkgolh chu tlawakgolh chuna la kskinkgo kxoracioneskan. Xlakata lamaw kxaʼawatiya kilhtamaku, xlakaskinka ni namakgatsankgayaw takgalhkgalhin nema kgalhiyaw. ¿Liskujputunaw xlakata namakgamakglhtinanaw xtasikulunalin Jehová?

10, 11. 1)¿Tuku xlakata kiliskujatkan xlakata namakglhtinanaw xtasikulunalin Dios? 2) ¿Tuku nakinkamakgtayayan nalaksakaw tuku tlan?

¹⁰ ¿Tuku xlakata kiliskujatkan xlakata namakglhtinanaw xtasikulunalin Dios? Pulaklhuwa tuku xlakata. Akgtum liʼakxilhtit, xlakata talakgalhin, wilakgolh kstalaninanin Cristo tiku liskujkgo ni natlawakgo tuku nitlan. Makgapitsi liskujkgo tlakg nalipaxuwakgo akxni ankgo lichuwinankgo Dios, chu makgapitsi kgalhikgo tajatat o makgkatsikgo pi xakstukan wilakgolh. Makgapitsi tuwa makgkatsikgo nakatapatikgo tiku nitlan kamamakgkatsinilh. Maski lhuwata kata skujnanimaw Jehová, kimputumkan liskujmaw xlakata chuntiya naskujnaniyaw Dios. Kalakapastakwi pi xla kasikulunatlawa tiku ni makgxtakgkgo.

¹¹ Xlikana pi kstalanina Cristo litaxtukan chu tlawakan tuku xaʼakgstitum lu tuwa, liwaka akxni talatlawamaw tuku nitlan tlawaputunaw (Jer. 17:9). Komo chuna titaxtumaw kaskiniw Jehová xʼespíritu santo. Oración chu espíritu santo tlan nakinkamaxkiyan litliwakga xlakata natlawayaw tuku xaʼakgstitum. Chuna namakglhtinanaw xtasikulunalin Dios. Katlawaw chuna la skinaw kioracionkan. Kaliskujwi nalikgalhtawakgayaw Biblia chali chali chu kalimaxtuw kilhtamaku akstu nakgalhtawakgayaw chu nakakninaniyaw Dios kfamilia (kalikgalhtawakga Salmo 119:32).

12, 13. ¿Tuku kamakgtayalh chatiy xtatayananin Jehová ni natlawakgo tuku nitlan?

¹² Lhuwa kinatalankan limakgatlajakgonit Biblia, espíritu santo chu kilikgalhtawakgakan nixatlan xtapuwankan. Chatum tiku aku stakma likgalhtawakgalh artículo «¿Cómo puede usted resistirse a los malos deseos?» xla revista ¡Despertad! 8 xla diciembre kata 2003. ¿Tuku matlawilh? Xla wan: «Kliskujma xlakata ni nakkgalhi nixatlan tapuwan. Akxni klikgalhtawakgalh pi “lhuwa tiku talatlawamakgolh nitlan tapuwan, lu tuwa makgkatsikgo”, kkatsilh pi ni kiʼakstu chuna xaktitaxtuma, kkatsilh pi xakmakgtapakgsi kxkachikin Jehová». Uma kgawasa na litamakgtayalh artículo «¿Aprueba Dios los estilos de vida alternativos?», nema lichuwinalh ¡Despertad! 8 xla octubre kata 2003. Kʼuma artículo akxilhli pi makgapitsi kstalaninanin Cristo, tuku talatlawamakgolh xtachuna la lhtukun kxliwakan (2 Cor. 12:7). Pero na akxilhli pi chuntiya liskujmakgolh  xlakata tlan tayat nakgalhikgo chu nalakpuwankgo pi tlan nakakitaxtuni. Uma kgawasa alistalh wa: «Wa xlakata klakpuwan pi chuna la titaxtutilhama kilhtamaku, tlan ni nakmakgatsankganani Dios. Kpaxtikatsini Jehová pi maklakaskima xkachikin xlakata nakimakgtaya naktayani chali chali kʼuma xalixkajni kakilhtamaku».

¹³ Na kalichuwinaw chatum tala puskat tiku lama kʼEstados Unidos. Xla tsokgli: «Kkapaxtikatsiniyan pi putum kilhtamaku kilamaxkiyaw liwat xaʼespiritual nema kmaklakaskinaw chu akxni tlakg kmaklakaskinaw. Makglhuwa klakpuwan pi umakgolh artículos akit kintsokgnikanit. Lhuwa kata kliskujnit xlakata ni naktlawa tuku Jehová xkajni. Min kilhtamaku kmakgkatsi pi nialh kkgalhi litliwakga xlakata naktlawa tuku xaʼakgstitum. Kkatsi pi Jehová xalakgalhamana chu tapatinan, pero kmakgkatsi pi ni kilakgchan nakimakgtaya xlakata ktlawaputun tuku nitlan chu ni xliputum kinaku kxkajni. Tuku ktitaxtuma pulaklhuwa la kisakgalinit kkilatamat». Xla likgalhtawakgalh artículo «¿Lakgapasputun Jehová minaku?», krevista Makatsinina 15 xla marzo kata 2013. ¿La makgkatsilh alistalh? Xla wa: «Kʼakgatekgsli pi Jehová lu kimakgtayaputun».

14. 1) ¿Tuku xkatsi Pablo xlakata tuku xtitaxtunit? 2) ¿La namakgatlajayaw tuku nitlan tlawaputunaw?

¹⁴ (Kalikgalhtawakga Romanos 7:21-25). Xlakata tuku xtitaxtunit, Pablo xkatsi pi makgatlajakan nitlan tapuwan lu tuwa. Pero liwana xkatsi pi xtlajalh komo xtlawanilh oración Jehová, xlipawa xtamakgtay chu xkanajlalh xtamakamastan Jesús. ¿Chu akinin? ¿Na tlan namakgatlajayaw tuku nitlan tlawaputunaw? Chuna, natlawayaw la tlawalh Pablo, nakgalhiniyaw takanajla xtamakamastan Jesús chu nalipawanaw Jehová xliputum kinakujkan, wata ni kiakstukan nakinkalipawankanan.

15. ¿La kinkamakgtayayan Jehová ni namakgxtakgaw chu natayaniyaw tuku tuwa?

¹⁵ Min kilhtamaku, max Jehová masta talakaskin kalimasiyaniw la xlilhuwa wi tuku lilakgaputsayaw. Akgtum liʼakxilhtit, ¿tuku natlawayaw komo tiku xalak kifamiliajkan nachipa xasnun tajatat o natlawanikan tuku nitlan? ¿Chu tuku natlawayaw komo akinin chuna nakinkaʼakgspulayan? Komo nalipawanaw Jehová, natasaskiniyaw pi kakinkamaxkin litliwakga xlakata ni namakgxtakgaw chu chuntiya napaxuwayaw chu tlan natalalinaw (Filip. 4:13). Xliʼakxilhtitkan kstalaninanin Cristo xalamakgasa chu xala uku, kinkamasiyaniyan pi akxni tlawaniyaw oración Jehová xla kinkamaxkiyan litliwakga xlakata chuntiya natayaniyaw chu ni napekuanaw.

16, 17. ¿Tuku kilitlawatkan?

¹⁶ Satanás lu xlakgatilh pi akinin xlipuwaw, xtaxlajwaniw chu xtamakaxlajwaniw. Wa xlakata chuntiya katlawaw «wa ntu xatlan» (1 Tes. 5:21). Tlan natlajayaw Satanás, xkakilhtamaku chu atanu nema nitlan. Natlajananaw komo nalipawanaw pi Jehová nakinkamatliwakglhan chu nakinkamakgtayayan (2 Cor. 4:7-9; Gál. 6:9).

¹⁷ Wa xlakata chuntiya kaliskujwi chu nikxni kataxlajwaniw. Liwana kakatsiw pi Jehová nakinkamaxkiyan «akgtum tasikulunalin asta akxni nialhtu» nakinkatsankganiyan (Mal. 3:10).