1, 2. 1) ¿Tuku taʼakglhuwit kgalhikgo lhuwa latamanin la uku, chu la titaxtutilha kilhtamaku tuku max nala? 2) ¿Tuku kinkawaniyan Isaías 41:10, 13?

CHATUM tala tiku precursora regular chu tatamakgaxtokgnit tiku kgolotsin xalak congregación, wan: «Maski lu kliskuja tuku xla kintakanajla, makgasata lhuwa tuku lu klilakgaputsa. Xlakata uma nila liwana klhtata, ktatatla chu ni putum kilhtamaku tlan kkalikatsini amakgapitsin. Min kilhtamaku, nialh ktayani kmakgkatsi».

² ¿Akgatekgsaw la makgkatsi uma tala? Lu nitlan pero lamaw kxkakilhtamaku Satanás. Wa xlakata lu tuwa tuku titaxtumaw. Taʼakglhuwit tlawa pi lu naxlajwananaw chu nalakgaputsayaw, la akgtum barco nema kgalhi akgtum ancla nema ni maxki talakaskin natatsuwi (Prov. 12:25). ¿Tuku max lu nalilakgaputsayaw? Max lu nitlan limakgkatsiyaw xlakata nilh tiku lu xpaxkiyaw. Max lu tatatlayaw o kinkaputsastalanimakan. O max lu liskujmaw namaxkiyaw tuku maklakaskin kifamiliajkan xlakata ni anan tumin. Chuna la titaxtutilha kilhtamaku, taʼakglhuwit nakinkamakglhtiyan litliwakga chu tapaxuwan. Pero Biblia kinkawaniyan pi Jehová kinkamakgtayaputunan (kalikgalhtawakga Isaías 41:10, 13).

3, 4. 1) ¿Tuku max kilhchanima Biblia akxni lichuwinan makan? 2) ¿Tuku max natlawa pi natamakaxlajwaniyaw?

 ³ Biblia makglhuwa maklakaskin tuku litakgatsi kimaknikan xlakata nalichuwinan xtayat chatum lataman o tuku tlawa. Akgtum liʼakxilhtit, akglhuwa ciento lichuwinan makan. Akxni Biblia lichuwinan pi wi tiku matliwakglhnikan xmakan, min kilhtamaku kilhchanima pi matliwakglhkan chatum lataman chu tlan namakgantaxti akgtum taskujut (1 Sam. 23:16; Esd. 1:6). Na kilhchanima pi chatum lataman lakpuwan pi kilhtamaku nema aku mima tlakg tlan nawan chu xatapaxuwan.

⁴ Min kilhtamaku, Biblia lichuwinan pi chatum lataman tamakaxlajwani. Uma kilhchanima pi lataman taxlajwaninit o nialh kgalhi takgalhkgalhin (2 Crón. 15:7; Heb. 12:12). Komo makgkatsiyaw pi lu tlakgwanitaw chu ni kgalhiyaw litliwakga, o makgkatsiyaw pi nialh tlan talalinaw Jehová la xapulana, max uma natlawa pi natamakaxlajwaniyaw. ¿Tuku nakinkamatliwakglhan xlakata natayaniyaw chu chuntiya napaxuwayaw?

5. 1) Akxni kgalhiyaw taʼakglhuwit, ¿la max namakgkatsiyaw pero tuku kililakpuwanatkan? 2) ¿Tuku nalichuwinanaw kʼuma artículo?

⁵ (Kalikgalhtawakga Sofonías 3:16, 17). Akxni kgalhiyaw taʼakglhuwit, ni kilipekuanatkan chu ni kilitaxlajwanitkan. Uma kitaxtu la komo tamakaxlajwaniyaw. Kalakapastakwi pi Jehová kinTlatkan chu lu kinkapaxkiyan. Xla lakaskin pi wa kamaxkiw kintaʼakglhuwitkan (1 Ped. 5:7). Chu kinkakuentajtlawayan chuna la kakuentajtlawalh israelitas. Biblia wan: «Xmakan Jehová ni taktsuwinit xlakata nila nalakgmaxtunan». Uma wamputun pi putum kilhtamaku skgalalh wi xlakata nakamakgtaya kskujnin tiku ni makgxtakgkgo (Is. 59:1). Kʼuma artículo akgtutu lakwan liʼakxilhtit xalak Biblia nalichuwinanaw. Nakatsiniyaw pi Jehová kamatliwakglhputun kskujnin xlakata nakamatlawi tuku xla lakaskin, maski kgalhikgo lu laktuwa taʼakglhuwit. Kalichuwinaw la umakgolh liʼakxilhtit na nakinkamatliwakglhan.

6, 7. ¿Tuku kinkamasiyaniyan xlakata la israelitas katlajakgolh amalequitas?

⁶ Akxni israelitas nina makgas kilhtamaku xkalakgmaxtukanit kʼEgipto, katatlawakgolh guerra amalequitas. Moisés wanilh Josué chatum chixku tiku ni xpekuan pi xkapulalilh israelitas kʼguerra. Alistalh Moisés taʼalh Aarón chu Hur kʼakgtum lakatsu sipi. Niku tlan xʼakxilhkgo guerra. ¿Xtsalamakgolh xlakata xpekuankgo? Ni chuna.

⁷ Pero Moisés wi tuku xlakpuwanit xlakata israelitas xkatlajakgolh amalequitas. Chipalh kiwi nema xmaxkinit Jehová chu limakaʼalh kʼakgapun. Akxni Moisés xtapakgayawa, Jehová xkamaxki litliwakga xlakata xtlajakgolh xtalamakgasitsinkan israelitas. Pero akxni Moisés xpakgatlakgwan chu xtsuku makti xmakan, xtalamakgasitsin xtlajanankgo. Wa xlakata Aarón chu Hur lakapala makgtayakgolh Moisés. Biblia wan: «Wilinikgolh akgtum chiwix chu xla laktawilalh. Alistalh Aarón chu Hur tayakgolh kxpaxtunin chu makxpachipakgolh, wa xlakata xmakanin tliwekglh tawilakgolh asta akxni tsankgalh chichini». Israelitas tlajanankgolh xlakata wa kamakgtayalh Dios (Éx. 17:8-13).

8. 1) ¿Tuku tlawalh mapakgsina Asá akxni etíopes xʼamakgolh katatlawakgo guerra Judá? 2) ¿La lakpuwana pi na tlan natlawayaw la Asá?

 ⁸ Jehová na lakapala kalimakgtayalh xmakan xkachikin kxkilhtamaku mapakgsina Asá. Uma mapakgsina xʼama talachipa mapakgsina Zérah tiku xalak Etiopía, chu Biblia lichuwinan pi lhuwa soldados xkgalhi. Akgtum millón soldados xkgalhi tiku lu xkatsinikgo tlawakgo guerra, akgtiy xlilhuwa nixawa tuku xkgalhi Asá. ¿Tuku tlawalh Asá? ¿Lu lilakgaputsalh, litaxlajwanilh o xpekuama? ¿Tamakaxlajwanilh? Ni. Lakapala skinilh tamakgtay Jehová. Soldado tiku lu katsini tlawa guerra max xlakpuwa pi Asá nila xtlajanalh. Pero Biblia wan pi «xpalakata Dios ni pala pulaktum wi wantu napuwanatit pala ni lay tlaway» (Mat. 19:26, Hua Xasasti Talaccaxlan, 1999). Dios maklakaskilh xlitliwakga chu «katlajalh etíopes kxlakatin Asá». Chu uma mapakgsina xliputum xnaku skujnanilh Jehová kxlatamat (2 Crón. 14:8-13; 1 Rey. 15:14).

9. 1) Akxni Nehemías chalh kJerusalén, ¿tuku tekgsli chu tuku tlawalh? 2) ¿La kgalhtilh Jehová xʼoración Nehemías?

⁹ ¿Tuku tekgsli Nehemías akxni alh kJerusalén? Lhuwa xtalamakgasitsin israelitas tiku xalak alakatanu países xkawanimakgolh pi nialh xtlawakgolh xpatsaps Jerusalén. Jerusalén ni xkgalhi xpatsaps, chu judíos lu nitlan xlimakgkatsikgo. ¿La makgkatsilh Nehemías? ¿Lilakgaputsalh chu tamakaxlajwanilh? Ni. Xlismaninit naskini tamakgtay Jehová, chuna la tlawakgolh Moisés, Asá chu atanu kskujnin Dios. Akxni chuna titaxtulh Nehemías, na putsalh xtamakgtay Dios. Tlawanilh oración chu Jehová kgalhtilh. ¿La kgalhtilh? Limaklakaskilh xlimakgatliwakga xlakata xkamatliwakglhli judíos (kalikgalhtawakga Nehemías 1:10; 2:17-20; 6:9). ¿Na kanajlayaw pi Jehová limaklakaskin la uku xlimakgatliwakga xlakata nakinkamatliwakglhan?

10, 11. 1) ¿Tuku tlawa Satanás xlakata natamakaxlajwaniyaw? 2) ¿La kinkamatliwakglhan Jehová? 3) Kalichuwinanti la litamakgtayanita tuku Jehová kinkamasiyaninitan.

¹⁰ Liwana katsiyaw pi Satanás ni katitamakaxlajwanilh. Chuntiya nakinkatlawaniyan tuku nitlan xlakata namalakgachokgoputun la kakninaniyaw Dios. Tlawa pi mapakgsinanin, xpulalinanin takanajla chu apóstatas nakinkatlawaniputunkgoyan tuku nitlan chu nawankgo taʼakgsanin kimpalakatakan. ¿Tuku xlakata chuna tlawa? Lakaskin pi nialh nalichuwinanaw tamakatsinin xla Tamapakgsin. Pero Jehová tlan nakinkamakgtayayan chu kinkamakgtayaputunan. Xla kinkalimatliwakglhputunan xʼespíritu santo (1 Crón. 29:12). Komo ni lakaskinaw pi Satanás chu xkakilhtamaku nakinkamakgatlajayan talakaskin naskiniyaw Dios  xʼespíritu santo (Sal. 18:39; 1 Cor. 10:13). Jehová na kinkalimatliwakglhan xTachuwin, chu lu paxtikatsiniyaw. Nachuna, kalakapastakwi putum tuku katsiniyaw akgatunu papaʼ kkilikgalhtawakgakan. Chu kalakapastakwi tuku wan Zacarías 8:9, 13 (kalikgalhtawakga). Uma tachuwin wanka akxni xkaxtlawamaparaka templo xalak Jerusalén, pero chuntiya tlan nakinkamakgtayayan la uku.

¹¹ Jehová na kinkalimatliwakglhan kintamakxtumitkan, laklanka tamakxtumit chu Escuelas niku masiyakan xlakata Dios. Tuku anta katsiniyaw kinkamakgtayayan nalimasiyaniyaw pi xatapaxuwan skujnaniyaw, wi tuku nalakpuwanaw namakgantaxtiyaw kxtaskujut chu liwana natlawayaw tuku kinkalakgayawakanan kxkachikin (Sal. 119:32). ¿Liwana limaklakaskimputunaw litliwakga nema kinkamaxkiyan Jehová akxni kinkamasiyaniyan?

12. ¿Tuku kilitlawatkan xlakata tliwakga natawilayaw?

¹² Chuna la lichuwinanitaw, Jehová kamakgtayalh kskujnin natlajakgo amalequitas chu etíopes. Nachuna, kamaxkilh litliwakga Nehemías chu judíos xlakata nakaxtlawaparakgo xpatsaps Jerusalén. Nachuna, Dios nakinkamaxkiyan xlitliwakga xlakata chuntiya nalichuwinanaw xpalakata maski katuwa tuku lilakgaputsayaw maski kinkalakatayakanan chu ni kgaxmatputunkgo latamanin (1 Ped. 5:10). Xlikana, Jehová ni katitlawalh akgtum milagro xlakata nalakgsputkgo kintaʼakglhuwitkan. Talakaskin naliskujaw komo lakgtliwakgan tawilaputunaw. ¿Tuku kilitlawatkan? Nalikgalhtawakgayaw Biblia chali chali, nalakkaxwiliyaw tuku naʼakxilhaw ktamakxtumit chu naʼanaw putum semanas, kiakstukan nalikgalhtawakgayaw Biblia chu nakakninaniyaw Dios kfamilia chu naskiniyaw Jehová xtamakgtay. Ni kamastaw talakaskin pi wi tuku natlawa nialh nalitamakgtayayaw tuku Jehová kinkalimatliwakglhan. Komo akxni lilakapastakaw umakgolh tuku kilitlawatkan, makgkatsiyaw pi tamakaxlajwanimaw, kaskiniw Dios kakinkamakgtayan. Naʼakxilhaw la xʼespíritu nakinkamatliwakglhan xlakata natlawaputunaw chu namakgantaxtiyaw tuku kinkaskiniyan (Filip. 2:13). Chu akinin, ¿tlan nakamamakgatliwakglhaw amakgapitsin?

13, 14. 1) ¿Tuku matliwakglhli chatum tala akxni nilh xpuskat? 2) ¿Tuku max tlan natlawayaw xlakata nakamatliwakglhaw amakgapitsin?

¹³ Jehová lhuwa millones natalan kinkamaxkiyan xlikalanka katiyatni tiku xlikana kinkalilakgaputsakgoyan chu tlan nakinkamatliwakglhkgoyan. Apóstol Pablo wa: «Kalitatliwakglhtit kmimakankan ntu ntamakgwasnit, chu mintsokgosnikgan ntu xalakglonkgawanan. Chu na tsaj kalitlawantit mintuwankan» (Heb. 12:12, 13). Lhuwa xapulana kstalaninanin Cristo makgamakglhtinankgolh xtamakgtaykan xnatalankan. La uku nachuna la. Kalichuwinaw xliʼakxilhtit chatum tala tiku nilh xpuskat chu na titaxtulh atanu tuwa taʼakglhuwit. Xla wa: «Kkatsinilh pi nila laksakaw tuku taʼakglhuwit nakgalhiyaw, tuku kilhtamaku nakgalhiyaw chu la xlimakglhuwa. Oración chu xlakata klikgalhtawakga xTachuwin Dios litaxtunit la akgtum chaleco salvavidas nema kimakgtayanit ni nakmuxtu. Nachuna, xtamakgtay kinatalan xaʼespiritual  lu tlan kimamakgkatsininit». Na wampa: «Kkatsinit pi xlakaskinka tlan natalalinkan Jehová akxni nina chin taʼakglhuwit».

¹⁴ Aarón chu Ur matliwakglhkgolh xmakan Moisés akxni katatlawakgolh guerra amalequitas. Akinin na tlan nalakputsayaw la nakamatliwakglhaw amakgapitsin. Akgtum liʼakxilhtit, tlan nakamatliwakglhaw natalan tiku patinamakgolh xlakata linkgoya kata, kgalhikgo tajatat, max xfamiliajkan ni lakgatikgo xtatayananin Jehová nawankgo, xakstukan wilakgolh o max nilh tiku xalak xfamiliajkan. Na tlan nakamakgtayayaw kamanan, xlakata kamatlawiputunkgokan tuku nitlan o kawanikan xlakaskinka nalitaxtuputunkgo kkakilhtamaku (1 Tes. 3:1-3; 5:11, 14). Kalakputsaw la xlikana nakamakgtayayaw amakgapitsin akxni wilaw kkintamakxtumitkan, akxni lichuwinanaw Dios, akxni akxtum wayanaw o akxni katachuwinanaw kteléfono.

15. ¿La nakalimakgtayayaw kinatalankan lakwan tachuwin?

¹⁵ Akxni israelitas xkatlajakgonita soldados etíopes, palakachuwina Azarías matliwakglhli Asá chu xkachikin, kawanilh: «Tliwakga kawantit chu ni kamajaxatit mimakankan, xlakata anan akgtum talakgalhaman xlakata mintaskujutkan» (2 Crón. 15:7). Uma tachuwin tlawalh pi Asá lhuwa tuku xlakgpalilh xlakata kachikin xkakninanikgolh Jehová chuna la xlilat. Komo na nawanaw lakwan tachuwin nakamatliwakglhaw amakgapitsin chu chuntiya  naskujnanikgo Jehová (Prov. 15:23). Na kalakapastakwi pi akxni lakwan takgalhtin mastayaw kkintamakxtumitkan kamatliwakglhaw kinatalankan.

16. 1) ¿La natlawakgo la Nehemías lakgkgolotsin xalak congregación? 2) Kalichuwinanti la makgtayakgonitan makgapitsi natalan.

¹⁶ Xlakata Jehová makgtayalh, Nehemías chu judíos tamakgatliwakglhkgolh xlakata taskujut nema xʼamakgolh tlawakgo. Kaj 52 kilhtamaku litlawakgolh xpatsaps Jerusalén (Neh. 2:18; 6:15, 16). Pero Nehemías ni kaj akxilhli akxni makgapitsi kskujmakgolh. Na tsukulh skuja (Neh. 5:16). La uku, lhuwa lakgkgolotsin tlawakgo la Nehemías, makgtayanankgo natlawakan Pukgalhtawakga xla xtatayananin Jehová, kaxakakgo chu kaxtlawakgo tuku talakaskin. Xlakata paxkikgo xnatalankan, umakgolh lakchixkuwin na kamatliwakglhkgo tiku titaxtumakgolh tuku tuwa, kalakgapaxialhnankgo o akxtum katalichuwinankgo Dios (kalikgalhtawakga Isaías 35:3, 4).

17, 18. Akxni nakgalhiyaw taʼakglhuwit chu lu nalakgaputsayaw, ¿tuku liwana kilikatsitkan?

¹⁷ Akxni kataskujaw kinatalankan kinkamakgtayayan tlakg akxtum nalayaw chu tlan nalatalalinaw xliputum kilhtamaku. Na tlawa pi tlakg nakanajlayaw tasikulunalin nema nalimin xTamapakgsin Dios. Akxni kamamakgatliwakglhaw amakgapitsin, kamakgtayakgo natayanikgo taʼakglhuwit chu xatapaxuwan nakgalhkgalhikgo kilhtamaku nema aku mima. Uma na tlawa pi natamakgatliwakglhaw chu kinkamakgtayayan naʼakxilhlakachanaw tuku aku mima.

¹⁸ Akxni lakpuwanaw la Jehová kamakgtayalh chu kakuentajtlawalh kskujnin xala makgasa, tlakg tatliwakglha kintakanajlakan. Wa xlakata, akxni nakgalhiyaw taʼakglhuwit chu lu nalakgaputsayaw, ni katamakaxlajwaniw. Liwana katsiyaw pi komo naskiniyaw xtamakgtay Jehová, xmakan nakinkamatliwakglhan chu nialh makgas nakinkamaxkiyan tasikulunalin nema nalimin xTamapakgsin (Sal. 73:23, 24).