Chuntiya kalimasiyaw tapaxkit nema matliwakglhnan
«Tapaxkit matliwakglhnan» (1 COR. 8:1).
1. ¿Tuku lu xlakaskinka kalitachuwinalh Jesús kstalaninanin xaʼawatiya katsisni akxni xlama kKatiyatni?
XA’AWATIYA katsisni akxni Jesús xkatawi kstalaninanin, liwaka puxamakaw la xlimakglit lichuwinalh tapaxkit. Liwana kawanilh pi xtalakaskin nalapaxkikgo chatunu amakgapitsin (Juan 15:12, 17). Uma tapaxkit x’amaka kalilakgapaskan pi xaxlikana kstalaninanin (Juan 13:34, 35). Tapaxkit nema lichuwinalh Jesús ni kaj kilhchanima tuku makgkatsikan, wata akgtum tayat nema kgalhi litliwakga chu ni kgalhkgalhi pi wi tuku namaxkikan. Xla wa: «Ni anan tiku tlakg lanka xtapaxkit la uma, pi wi tiku namakamasta xlatamat xpalakata xʼamigos. Wixin ti lu kiʼamigos ti kkapaxkiyan lapi tlawayatit wantu nkit kkalimapakgsiyan» (Juan 15:13, 14).
2. 1) ¿Tuku litalakgapaskgo xlakskujnin Dios la uku? 2) ¿Tuku takgalhskinin nakgalhtiyaw kʼuma artículo?
2 Xlakskujnin Dios xala uku litalakgapaskgo tapaxkit nema lakgalhinikgo xlakata ni kgalhkgalhikgo wi tuku nakamaxkikan, chu makxtum wilakgolh (1 Juan 3:10, 11). Liskujaw xlakata nakgalhiyaw uma tapaxkit maski tanu kinkachikinkan, kinkilhtsukutkan, kintachuwinkan o tanu la kinkamakgastakkan. Pero max akstu nakinkakgalhskinkanan: «¿Tuku xlakata lu xlakaskinka tapaxkit la uku? ¿La kinkamatliwakglhan Jehová chu Jesús? Chu ¿la tlan nastalaniyaw xliʼakxilhtit Jesús chu nalimasiyayaw tapaxkit nema “matliwakglhnan”?» (1 Cor. 8:1).
TUKU XLAKATA LA UKU LU XLAKASKINKA TAPAXKIT
3. ¿Tuku kitaxtuma xlakata lamaw «kxaʼawatiya kilhtamaku»?
3 Xlakata kʼuma «xaʼawatiya kilhtamaku» latamat lu «litatsamanit talipuwan chu takatsan» lhuwa latamanin lu lilakgaputsakgo (2 Tim. 3:1-5; Sal. 90:10). Lhuwa nialh latamaputunkgo. Wankan pi akgatunu kata liwaka 800,000 latamanin xʼakstu kamakgnikan, uma wamputun pi atsinu ni takgatsi akgtum minuto chatum lataman xʼakstu makgnikan. Lu nitlan pero makgapitsi natalan nachuna makgkatsikgo chu xʼakstukan kamakgnikanit.
4. ¿Tiku kalichuwinan Biblia pi xniputunkgo?
4 Makgasata kilhtamaku, makgapitsin xlakskujnin Dios lu nitlan xmakgkatsikgo chu asta xniputunkgo. Akgtum liʼakxilhtit, xlakata lu xlipuwama, Job wa pi lu nitlan xmakgkatsi chu lu xniputun (Job 7:16; 14:13). Nachuna, xlakata Jonás nichuna kitaxtunilh la xlakpuwanit niku xmalakgachakanit, lu nitlan makgkatsilh chu wa: «Chu la uku, Jehová, kakimakglhti kilatamat xlakata tlakg tlan nakni nixawa naklatama» (Jon. 4:3). Chu palakachuwina Elías na lu nitlan makgkatsilh chu asta skinilh Dios pi xmaxkilh talakaskin pi xnilh. Wanilh: «¡Tlantiya! La uku, oh Jehová kakimakglhti kilatamat, xlakata akit ni tlakg tlan nixawa kinatlatni tiku nikgonita» (1 Rey. 19:4). Pero Jehová lu lhuwa xtapalh xkaliʼakxilha umakgolh xlakskujnin chu xla xlakaskin pi xlatamakgolh. Nitu kawanilh xlakata tuku xmakgkatsikgo, wata xatapaxuwan kamakgtayalh xlakata chuntiya naskujnanikgo chu nalatamakgo.
5. ¿Tuku xlakata lu xlakaskinka nakapaxkiyaw kinatalankan la uku kilhtamaku?
5 Maski lhuwa kinatalankan ni taxlajwanikgo, makgapitsi titaxtukgo tuku lu tuwa chu talakaskin pi nakalimasiyaniyaw tapaxkit chu nakamakgtayayaw. Makgapitsi kaputsastalanikan chu kalikgalhkgamanankan. Amakgapitsi xlitayanitkan pi nitlan nakalichuwinankgo tiku kataskujkgo. O max lu tlakgwankgonit xlakata lhuwa kilhtamaku skujkgo o xlakata xtaskujutkan lu tuwa. Chu wi tiku kgalhikgo lu xatuwa taʼakglhuwit kxfamiliajkan, xlakata max tatamakgaxtokgkgonit tiku ni xtatayana Jehová chu nitlan lichuwinankgo. Xlakata anankgo umakgolh taʼakglhuwit, lhuwa kstalaninanin Cristo makgkatsikgo pi lu tlakgwankgonit. ¿Tiku tlan nakamakgtaya xlakata ni nataxlajwanikgo?
XTAPAXKIT JEHOVÁ KINKAMATLIWAKGLHAN
6. ¿La kamatliwakglha Jehová xlakskujnin?
6 ¿La kamatliwakglha Jehová xlakskujnin? Pulaktum la tlawa wa pi chuntiya nakapaxki. Kachikin Israel max lu tlan limakgkatsikgolh akxni kgaxmatkgolh xtachuwin Jehová akxni wa: «Xlakata lu tlan kʼakxilhan kkilakatin, lu tlan akxilhkana chu akit lu kpaxkinitan». Chu nachuna wanilh: «Ni kapekuanti, xlakata akit ktawilan» (Is. 43:4, 5). Nachuna, wix liwana kakatsi pi Dios lu paxkiyan chu lu lhuwa xtapalh liʼakxilhan. * Jehová kawani xkachikin: «Xlakata xlitliwakga, nalakgmaxtuyan. Lu nalipaxuwa mimpalakata» (Sof. 3:16, 17).
7. ¿La tatalakxtumi xtapaxkit Jehová chu tapaxkit nema chatum tse limasiyani kskgata? (Kaʼakxilhti xapulana dibujo).
7 Maski lhuwa taputsan nakgalhikgo xlakskujnin Is. 66:12, 13). Umakgolh tachuwin lu tlan tuku malakpuwaninan: chatum tse tiku chaxnit kskgata chu takgamanan. Chuna Jehová limasiya tapaxkit nema kakgalhini xlakskujnin. Ankgalhin kalakapastakwi pi lanka xtapalh litaxtuyaw kxlakatin (Jer. 31:3).
Dios, xla wan pi nikxni katikamakgxtakglhi chu nakamakgtaya. Kxtatsokgni Isaías, Jehová wan: «Wixinan natsikinanatit. Kpaxtun nakalipinkanatit, chu ktsokgosni nakaspalhkanatit. Chuna la chatum tse tlan mamakgkatsini xkgawasa, nachuna akit chuntiya tlan nakkamamakgkatsiniyan» (8, 9. ¿La kinkamatliwakglhan xtapaxkit Cristo?
8 Xaxlikana kstalaninanin Cristo wi atanu tuku tlan likatsiyaw pi Jehová kinkapaxkiyan. Juan 3:16 wan: «Dios lu paxkilh kakilhtamaku, wa xlakata mastalh kaj xachastum xKgawasa, xlakata putum tiku nakanajlani ni namalakgsputukan wata nakgalhi latamat nema nikxni sputa». Chu Jesús limasiyalh xtapaxkit akxni mastalh xlatamat kimpalakatakan. Anta kxTachuwin Dios kinkawaniyan pi nipara wa tuku tuwa titaxtuyaw nakinkamamakgatliniyan «kxtapaxkit Cristo» (Rom. 8:35, 38, 39). ¿Nixlikana pi uma tapaxkit kinkamaʼakgpuwantiniyan ni nataxlajwaniyaw?
9 Komo nalakapastakaw tapaxkit nema Jesús kinkakgalhiniyan, uma nakinkamaxkiyan litliwakga akxni titaxtuyaw tuku xatuwa nema kinkamakgatlakgwanan (kalikgalhtawakga 2 Corintios 5:14, 15). Uma tapaxkit kinkamakgpuwantiniyan pi chuntiya nalatamaputunaw chu naskujnaniyaw Jehová. Uma tlan natlawa pi ni nataxlajwaniyaw maski akxni titaxtu tuku masputunan, taputsastalanit, akxni ni kgantaxtu tuku xlakaskinaw o akxni wi tuku lilakgaputsayaw.
NATALAN LAKASKINKGO PI KAKAPAXKIW
Akxni likgalhtawakgayaw xliʼakxilhtit Jesús tlan nakinkamakgpuwantiniyan pi tlan nakalikatsiniyaw amakgapitsin (Kaʼakxilhti párrafos 10 chu 11).
10, 11. ¿Tiku kalakgchan tlan nakamamakgkatsini tiku taxlajwanikgonit? Kalichuwinanti.
10 Atanu tuku Jehová maklakaskin xlakata nakinkamatliwakglhan wa congregación. Akxni kapaxkiyaw natalan, limasiyayaw pi paxkiyaw Dios. Tlawayaw putum tuku matlaniyaw xlakata nakamakgtayayaw naʼakxilhkgo pi Jehová lu lhuwa xtapalh kaʼakxilha chu lu kapaxki (1 Juan 4:19-21). Apostol Pablo kawanilh kstalaninanin Cristo: «Wa xlakata, chuntiya kalamakgtayatit minchatunukan chu kalamatliwakglhtit minchatunukan, chuna la tlawapatit» (1 Tes. 5:11). Xlikana, putum akinin, ni kaj xman wa lakgkgolotsin, tlan nakamakgoxamixiyaw chu nakamakgpuwantiniyaw kinatalankan chuna la tlawakgo Jehová chu Jesús (kalikgalhtawakga Romanos 15:1, 2).
11 Makgapitsi natalan tiku kgalhikgo tajatat xlakata tuku makgkatsikgo, max maklakaskinkgo xtamakgtaykan makuchinanin chu maklakaskinkgo likuchun (Luc. 5:31). Lakgkgolotsin chu makgapitsi natalan katsikgo pi ni makuchinanin. Pero, katsikgo pi lu xlakaskinka nakgalhakgaxmatkgo uma limapakgsin: «Tlan kakamamakgkatsinitit tiku lu lakgaputsamakgolh, kakamakgtayatit tiku xlajwanankgonit, kalatatayanitit mimputumkan» (1 Tes. 5:14). Lu xlakaskinka pi nalalimasiyaniyaw tapaxkit, namakgkatsiyaw tuku makgkatsikgo amakgapitsin chu nakalimasiyaniyaw takgalhkgalhin tiku taxlajwanikgonit, chu na talakaskin xatapaxuwan nakaxakgatliyaw xlakata tlan namakgkatsikgo. Akstu kakinkakgalhskinkan: «¿Ankgalhin tlan kkamamakgkatsini amakgapitsin chu kkamakgpuwantini? ¿Tuku natlawa pi tlakg liwana nakkamakgtaya amakgapitsin?».
12. Kawili akgtum li’akxilhtit xlakata la xtapaxkit congregación makgtayalh chatum tala.
12 ¿La nakamakgtaya kintapaxkitkan tiku kgalhikgo tajatat xlakata tuku makgkatsikgo? Chatum tala xalak Europa wan: «Lakgachunin, klakapastaka pi nialh xaklatamalh. Pero kkgalhi lu tlan tamakgtay. Kincongregación lakgmaxtunit kilatamat. Natalan ankgalhin kimaxkikgo tamakgtay chu kilimasiyanikgo xtapaxkitkan. Ni lu lhuwa katsikgo pi kkgalhi tajatat xla talipuwan, pero putum lu kimakgtayaputunkgo. Akgtum tamakgaxtokgat lu kuenta kintlawakgo chuna la kinatlatni. Ankgalhin kimakgtayakgo maski tsisa o katsisni». Xlikana pi ni putum tlan kinkamakgtayakgoyan chuna la tlawakgo amakgapitsin. Pero lhuwa tuku tlan natlawayaw xlakata nakamakgtayayaw tiku kgalhikgo akgtum tajatat xlakata tuku makgkatsikgo. *
LA TLAN XATAPAXUWAN NAKAMATLIWAKGLHAW KINATALANKAN
13. ¿Tuku tlan natlawayaw xlakata tlan nakamamakgkatsiniyaw natalan?
13 Kakatsiw la nakgaxmataw (Sant. 1:19). Kgaxmatkan chu makgkatsikan tuku makgkatsi achatum limasiya pi paxkinanaw. ¿La namatliwakglhaw tiku taxlajwanima? Kalilakpuwaw la xmakgkatsiw akinin komo chuna xtitaxtuw chu liwana katlawaniw takgalhskinin xlakata tlan naʼakgatekgsaw tuku makgkatsi. Xlitasiyat kkilakankan pi xlikana kalilakgaputsayaw chu kapaxkiyaw. Komo tala kinkawaniputunan tuku titaxtuma liwana kakgaxmatniw chu kalimasiyaniw takgalhkgalhin. Tlan max liwana naʼakgatekgsniyaw tuku titaxtuma komo liwana nakgaxmatniyaw. Nachuna xla, nakinkalipawanan chu nakinkakgaxmatniyan tuku nawaniyaw. Akxni limasiyayaw pi xlikana kalilakgaputsayaw, tlan nakamamakgkatsiniyaw amakgapitsin.
14. ¿Tuku xlakata ni nakalichuwinanaw amakgapitsin?
14 Ni kakalichuwinaw amakgapitsin. Komo nitlan nalichuwinanaw chatum lataman tiku lu lipuwama, max tlakg nitlan katimakgkatsilh. Chu maski lu namakgtayaputunaw, lu tuwa namakgkatsiyaw namatliwakglhaw. Biblia wan: «Wilakgolh tiku ni lakapastakkgo tuku wankgo xtachuna la akxni lhtukunan kgantum espada, pero tuku wankgo tiku lakgskgalalan mapaksanan» (Prov. 12:18). Xlikana, uma ni wamputun pi nitlan kalimamakgkatsiniputunaw kintachuwinkan amakgapitsin, pero chuna natlawayaw komo ni pulana nalakpuwanaw tuku nawanaw. Xlakata xatapaxuwan nakamatliwakglhaw amakgapitsin, talakaskin pi na namakgkatsiyaw tuku titaxtuma (Mat. 7:12).
15. ¿Tuku tlan namaklakaskinaw xlakata xatapaxuwan nakamakgtayayaw amakgapitsin?
15 Kamaklakaskiw xTachuwin Dios (kalikgalhtawakga Romanos 15:4, 5). Biblia lu lhuwa xtapalh chu lu tlan kinkamamakgkatsiniyan xlakata kinkamaxkinitan «[Dios] wa nti mastay ntapaxuwanaliyan, chu ntakgpuwantin». Nachuna kgalhiyaw Índice de las publicaciones Watch Tower chu Liputsan xla xtatayananin Jehová, nema tlan nakinkamakgtayayan natekgsaw textos chu likgalhtawakga nema tlan nakalimakgtayayaw natalan.
16. ¿Tuku tayat maklakaskinaw akxni makgpuwantiniyaw tiku lu lipuwama?
16 Tlan kakalikatsiniw chu kakalimasiyaniw tapaxkit. Jehová Dios, «wa cha xtlat nkimPuchinakan Jesucristo, chu xmakilhtsukina talakgalhaman, chu xmastana xlipaks ntakgtsiyajni» chu «kalakgalhaman» tiku skujnikgo (kalikgalhtawakga 2 Corintios 1:3-6; Luc. 1:78; Rom. 15:13). Pablo lu tlan liʼakxilhtit kinkawilinin xlakata nakgalhiyaw uma tayat xlakata xla stalanilh xliʼakxilhtit Jehová. Tsokgwililh: «[Kkalimasiyanin tapaxkit] kmilakgstipankan, xtachuna nchatum mpuskat nti lakgkatsan wa nti xlakgskgatan. Lu [kkapaxkiyan], asta xakkamakamaxkin ni xman wa xasasti xtamakatsinin Dios, wampi na xawa wantu lu kilatamatkan; xpalakata mpi lu xatapaxkinin wanitantit» (1 Tes. 2:7, 8). Komo xapaxkinanin akinin chuna la Dios, tlan nalitaxtuyaw xtakgalhtin xʼoración tiku lu lakgaputsama.
17. ¿La talakaskin nakaʼakxilhaw natalan xlakata xatapaxuwan nakamatliwakglhaw?
17 Ni kalakpuwaw pi kinatalankan ankgalhin natlawakgo tuku xatlan. Talakaskin nakaʼakxilhaw chuna la xlilat. Komo nalakpuwanaw pi ni katitlawakgolh tuku nitlan max nitlan katikitaxtulh chu nakinkamakgalipuwanan (Ecl. 7:21, 22). Kalakapastakwi pi Jehová kinkaʼakgatekgsniyan. Komo nastalaniyaw xliʼakxilhtit, tlan natayaniyaw akxni nitlan tuku tlawakgo amakgapitsin (Efes. 4:2, 32). Ni kakamalakpuwaniw natalan pi nila tuku tlawakgo chu ni kakatamalakxtumiw amakgapitsin, xlakata max nalisitsikgo. Wata ankgalhin kakawaniw lakwan tachuwin xlakata tuku tlawakgo. Uma nakamakgpuwantini chu nakamakgtaya xlakata xatapaxuwan naskujnikgo Jehová (Gál. 6:4).
18. ¿Tuku xlakata xatapaxuwan kamatliwakglhputunaw kinatalankan?
18 Jehová lu lhuwa xtapalh kaʼakxilha xlakskujnin. Chu Jesús nachuna kaʼakxilha, tiku mastalh xlatamat la akgtum tamakamastan (Gál. 2:20). Xliputum kinakujkan kapaxkiyaw kinatalankan chu xatapaxuwan kuenta katlawaputunaw. Xlakata tlan nakamamakgkatsiniyaw chuntiya «katlawaw tuku tlawa ni kaʼanalh taʼakglhuwit chu tuku makgtayanan tlan nalatalalinaw» (Rom. 14:19). Lu lakaskinaw pi xchilha xasasti kakilhtamaku niku nialh katiʼanalh tuku nalitaxlajwaniyaw. Tajatat, guerras, linin xlakata makglakgalhinanin akinin, taputsastalanit, taʼakglhuwit xalak familia chu tuku nichuna kitaxtulh tuku xlakaskinaw paks namasputukan. Akxni nasputa akgtum mil kata, latamanin nialh katikgalhikgolh talakgalhin. Jehová xkamanan nakaliʼakxilha putum tiku natayanikgo xaʼawatiya taputsan, chu nakgalhikgo talakgalhaman pi «xlakgskgatan Dios wa yuma lilakgatit ntalakgtaxtun ntu namin» (Rom. 8:21). Chuntiya kalimasiyaw tapaxkit nema matliwakglhnan chu kalamakgtayaw chatunu chatunu xlakata tlan namakglhtinanaw xasasti katiyatni nema Dios malaknunit.
^ párr. 6 Kaʼakxilhti revista Makatsinina 15 xla agosto kata 2015 página 3 asta 8 kʼartículo «Putum kilhtamaku kakatsi pi Jehová paxkiyan».
^ párr. 12 Natekgsa tuku tlan natlawaya komo nakgalhiya nixatlan talakapastakni xlakata max mi akstu makgniputunkana krevista ¡Despertad!: «¿Vale la pena vivir?», «Las cosas pueden cambiar», «Puede encontrar ayuda» chu «Hay esperanza» (abril kata 2014), «Cuando se pierden las ganas de vivir» (enero kata 2012) chu «Merece la pena vivir: Un problema mundial», «Por qué se rinden» chu «Disponemos de ayuda» (22 xla octubre kata 2001).