1. ¿Tuku litasiya tapaxkit nema lakgalhiniyaw xlakskujnin Dios?

AKININ xlakskujnin Dios akgtum familia xaʼespiritual nema litalakgapasa tapaxkit (1 Juan 4:16, 21). Akxni limasiyayaw uma tapaxkit, ni kaj xman akxni wi tuku lhuwa tlawayaw xpalakatakan amakgapitsin, nachuna akxni kalimasiyaniyaw tapaxkit, akxni kawaniyaw lakwan tachuwin. Akxni tlan kalikatsiniyaw amakgapitsin chu kaʼakgatekgsniyaw, tlawayaw «chuna la Dios, chuna la xkamanan tiku lu kapaxki» (Efes. 5:1).

2. ¿La makglhkatilh Jesús xtapaxkit xTlat?

² Jesús liwana makglhkatilh xTlat. Ankgalhin tlan kalikatsinilh latamanin. Lichuwinalh: «Kakilakgtantit xlipaks wixin wa nti skujtamakganitantit, chu nkukananitantit, lakimpi kit nakkamajaxayan». Chu alistalh wampa: «Lu xasmalhwa nkit, chu na tsatata nkinaku» (Mat. 11:28, 29). Akxni stalaniyaw xli’akxilhtit chu limasiyayaw pi «[makgtayayaw] chatum [tiku nitu kgalhi]», Jehová tlan nakinka’akxilhan chu lu napaxuwayaw  (Sal. 41:1, SXP). Ka’akxilhwi la nalimasiyayaw ta’akgatekgsni kfamilia, kcongregación chu akxni lichuwinanaw Dios.

3. ¿La nalikatsini chixku xpuskat? (Kaʼakxilhti xapulana dibujo).

³ Anta kfamilia, tiku pulana nalimasiya ta’akgatekgsni wa xachixku (Efes. 5:25; 6:4). Akgtum li’akxilhtit, Biblia lichuwinan pi akxtum «xlitatawilat xpuskat chu lakatitum natawilakgo». Uma tachuwin na kilhchanima pi talakaskin «na’akgatekgsni» (1 Ped. 3:7). Xlakata wi tiku nalimasiyaniyaw ta’akgatekgsni, talakaskin liwana na’akgatekgsniyaw tuku titaxtuma. Chixku tiku akgatekgsni xpuskat, katsi pi xpuskat kaj xmakgtayana chu tanu tanu tayat kgalhikgo, pero katsi pi uma ni tlawa pi tlakg xlakaskinka nalitaxtu nixawa xpuskat (Gén. 2:18). Wa xlakata, xla xlakaskinka akxilha tuku makgkatsi xpuskat chu maxki kakni. Chatum tala xalak Canadá lichuwinan: «Kinchixku ankgalhin lilakgaputsa tuku kmakgkatsi, chu nikxni kiwani: “Ni xlilat chuna namakgkatsiya”. Nachuna liwana kinkgaxmatni. Xatapaxuwan kimakgtaya naklakgpali tuku ni xlilat la xaklakpuwan».

4. ¿La nalimasiyani chixku xpuskat pi akgatekgsni akxni katachuwinan amakgapitsin lakpuskatin?

⁴ Chixku tiku liwana akgatekgsa tuku makgkatsi xpuskat nikxni limasiya pi lakgati atanu puskat. Na nichuna tlawa anta kredes sociales chu ni para k’atanu sitios xla Internet (Job 31:1). Ankgalhin maxki kakni xpuskat, ni kaj xman wa xlakata paxki, wata nachuna xlakata paxki Dios chu lakgmakgan tuku nitlan (kalikgalhtawakga Salmo 19:14; 97:10).

5. ¿La tlan xapuskat nalimasiyani pi akgatekgsni xchixku?

⁵ Akxni xachixku stalani xliʼakxilhtit Jesucristo, makgtaya pi xpuskat lu namaxki kakni (Efes. 5:22-25, 33). Xla liwana nalikatsi, la komo akxni xla tlakg nalimaxtu kilhtamaku xlakata natlawa taskujut nema lakgaya kcongregación o akxni anan ta’akglhuwit nema max lu lilakgaputsama. Chatum tala xalak Gran Bretaña lichuwinan: «Lakgachunin kimpuskat akxilha pi wi tuku klilakgaputsama, xlakata nichuna klikatsi akxni kpaxuwa. Wa xlakata tlawa tuku wan tastakyaw nema wi kProverbios 20:5, maski talakaskin nakgalhkgalhi kilhtamaku xlakata tlan nakwani tuku klakpuwan, pero min kilhtamaku nila kwani tuku klilakgaputsama».

6. ¿La tlan kimputumkan nakamasiyaniyaw kamanan pi nakaʼakgatekgsnikgo amakgapitsin chu la nakamakgtaya uma laktsu kamanan?

⁶ Akxni xanatlatni la akgatekgsni, lu tlan liʼakxilhtit kawilinikgo xkamanankan. Pero nachuna talakaskin nakamasiyanikgo xkamanankan pi nakaʼakgatekgsnikgo amakgapitsin. Akgtum liʼakxilhtit, tlan nakawanikgo pi nina kgosnankgo kPukgalhtawakga o nakawanikgo pi akxni tlawakan akgtum convivio nakamaxkikgo talakaskin pi pulana natalan tiku tlakg laklankata wa pulana namujukgo xliwatkan. Xlikana, putum tiku xalak congregación tlan nakamakgtayayaw tiku xanatlatni. Akgtum li’akxilhtit, komo chatum aktsu kgawasa wi tuku natlawa kimpalakatakan, la komo nakinkamalakkiniyan malakcha, tlan nawaniyaw pi tlan tuku tlawalh. Uma lu tlan namamakgkatsini chu ankgalhin nalakapastaka pi «tlakg anan tapaxuwan akxni mastakan nixawa akxni makglhtinankan» (Hech. 20:35).

7. ¿La limasiyalh Jesús pi x’akgatekgsni chatum akgatapa chu tuku kinkamasiyaniyan uma?

⁷ Akgtum kilhtamaku akxni xwi kDecápolis, «tiliminika Jesús nchatum akgatapa [chu ni lu la xchuwinan]» (Mar. 7:31-35). Pero Jesús alakatanu niku lilh chu mapaksalh. ¿Tuku xlakata ni anta mapaksalh kxlakatinkan lhuwa latamanin? Max xlakata lakpuwa pi komo akgatapa xwanit, max nitlan xmakgkatsilh kxlakgstipankan lhuwa latamanin. Xlikana pi akinin nila tlawayaw milagros. Pero tlan kuenta natlawayaw tuku maklakaskinkgo chu tuku makgkatsikgo kinatalankan. Apóstol Pablo tsokgli: «Kalakputsaw la nalamakgtayayaw kinchatunukan xlakata nalimasiyayaw tapaxkit chu  natlawayaw tuku tlan» (Heb. 10:24). ¿La tlan namakglhkatiyaw xliʼakxilhtit Jesús chuna la likatsinilh chixku tiku akgatapa?

8, 9. ¿La tlan nakaʼakgatekgsniyaw tiku linkgoya kata chu tiku tatatlakgo? Kalichuwinanti makgapitsi li’akxilhtit.

⁸ Kaka’akgatekgsniw tiku linkgoya kata chu tiku tatatlakgo. Tuku tlakg xlakaskinka xlitawilat kcongregación wa tapaxkit (Juan 13:34, 35). Uma tapaxkit nakinkamakgtayayan natlawayaw putum tuku matlaniyaw xlakata nakamakgtayayaw tiku linkgoya kata chu tiku tatatlakgo xlakata tlan na’ankgo lichuwinankgo Dios chu na’ankgo ktamakxtumit. Chu chuna tlawayaw maski xlakan nila tlakg lhuwa tuku tlawakgo (Mat. 13:23). Michael, tiku wi k’akgtum silla de ruedas, lu paxtikatsini pi xfamilia makgtayakgo chu nachuna natalan xalak congregación. Lichuwinan: «Kpaxtikatsini tuku tlawayatit kimpalakata, tlan kan ktamakxtumit chu tlan kan lichuwinan Dios. Tuku tlakg klakgati wa klichuwinan Dios niku titaxtukgo lhuwa latamanin».

⁹ Anta kBetel lhuwa wilakgolh natalan tiku linkgoya kata chu tatatlakgo. ¿Tuku tlawakgo lakgkgolotsin xlakata nakalimasiyanikgo tapaxkit chu ta’akgatekgsni? Wa xlakata kuenta natlawakgo nalichuwinankgo Dios kteléfono chu natlawakgo carta. Chatum tala wanikan Bill, tiku kgalhi 86 kata chu katsokgnani latamanin tiku lakgamakgat kxkachikinkan, lichuwinan: «Lu kpaxtikatsiniyaw xlakata tlan ktlawayaw cartas». Nancy, tiku kgalhi 90 kata, lichuwinan: «Lu xlakaskinka kli’akxilha naktlawa cartas, xlakata xTachuwin Dios tuku klichuwinan. Latamanin xlikatsitkan tuku xaxlikana». Ethel, tiku lakachilh kkata 1921, lichuwinan: «Ankgalhin wi tuku kinkatsani. Min kilhtamaku tuwa kmakgkatsi naklhakganan». Maski chuna, lu lakgati lichuwinan Dios kteléfono chu kgalhi tiku kamakgalhtawakge. Chu Barbara, tiku kgalhi 85 kata, lichuwinan: «Xlakata ankgalhin ktatatla, tuwa kmakgkatsi ankgalhin nakan lichuwinan Dios. Pero kmaklakaskin teléfono xlakata tlan nakkatachuwinan amakgapitsin latamanin. ¡Lu kpaxtikatsini Jehová!». Ni takgatsilh akgtum kata, makgapitsi natalan tiku linkgoya kata lichuwinankgolh Dios 1,228 horas, tlawakgolh 6,265 cartas, 2,000 lata chuwinankgolh kteléfono chu makgpitsikgolh 6,315 likgalhtawakga. ¡Uma lu lipaxuwa Jehová! (Prov. 27:11).

10. ¿Tuku pulaktum tlan natlawayaw xlakata nakamakgtayayaw natalan tlakg nalitamakgtayakgo tamakxtumit?

¹⁰ Kakaʼakgatekgsniw natalan xalak congregación. Komo naka’akgatekgsniyaw natalan, nakamakgtayayaw tlakg nalitamakgtayakgo tuku talichuwinan ktamakxtumit. ¿La natlawayaw? Pulaktum la natlawayaw wa sokgku nachanaw ktamakxtumit xlakata ni nakamakglhuwikgoyaw natalan. Xlikana, namin kilhtamaku wi tuku nakinkamamakgapaliyan chu nila sokgku nachanaw ktamakxtumit. Pero komo kgalhiyaw talismanin ankgalhin ni sokgku chanaw ktamakxtumit, talakaskin nakatsiyaw tuku natlawayaw xlakata nalimasiyayaw pi kuenta tlawayaw tuku lakpuwankgo natalan. Nachuna, kalakapastakwi pi tiku kinkawanikgoyan pi kaʼaw ktamakxtumit wa Jehová chu xKgawasa (Mat. 18:20). Chu xlakan talakaskin nakalimasiyaniyaw kakni.

11. ¿Tuku xlakata talakaskin nakgalhakgaxmatkgo uma tastakyaw xla 1 Corintios 14:40 tiku matitaxtikgo ta’akgchuwin anta ktamakxtumit?

¹¹ Apulaktu la nalimasiyayaw ta’akgatekgsni kcongregación wa nakgalhakgaxmataw uma tastakyaw «lakatitum nalitlawayatit xlipaks, chu na wa ntu aktanks», kilhchanima pi liwana natlawayaw chu xalakatitum (1 Cor. 14:40). Akgtum li’akxilhtit, natalan tiku kalakgchan ta’akgchuwin ktamakxtumit talakaskin kuenta natlawakgo xlakata ni namalakatsalikgo la xlilhuwa kilhtamaku nema kalakgchan. Chuna nalimasiyakgo pi kuenta katlawakgo tiku nachuna namatitaxtikgo xtaʼakgchuwinkan chu nachuna natalan tiku kgaxmatmakgo. ¿Tuku xlakata? Xlakata makgapitsi natalan max makgat kxchikkan, makgapitsi kputlaw ankgo kxchikkan chu wilakgolh natalan tiku ni xtatayana Jehová tiku tamakgaxtokgkgo chu max kawanikan tuku hora nachankgo.

12. ¿Tuku xlakata lakgkgolotsin talakaskin nakalimasiyaniyaw ta’akgatekgsni chu tapaxkit? (Kaʼakxilhti recuadro « Kakalimasiyaniw ta’akgatekgsni tiku pulalimakgolh xkachikin Dios»).

 ¹² Tiku pulalinkgo congregación lhuwa skujkgo chu wilikgo akgtum tlan li’akxilhtit akxni lichuwinankgo Dios, wa xlakata talakaskin nakamaxkiyaw kakni (kalikgalhtawakga 1 Tesalonicenses 5:12, 13). Xlikana pi kimputumkan kapaxtikatsiniyaw tuku tlawakgo kimpalakatakan. Wa xlakata akxtum kakamakgtayaw. Xlakata xlakan «kuentajtlawamakgolh milatamatkan chu namaxkikgo kuenta Dios» (Heb. 13:7, 17).

13. ¿Tuku katsiniyaw xlakata la Jesús xkalikatsini latamanin?

¹³ Palakachuwina Isaías lichuwinalh xpalakata Jesús: «Ni katilaktukxli nipara kgantum kgatit nema tatukxmaja; chu mecha xla lino nema mixmaja, ni katimamixilh» (Is. 42:3). Jesús lu xkapaxki latamanin chu nachuna xmakgkatsi tuku xmakgkatsikgo. Xʼakgatekgsa la xmakgkatsikgo tiku xlitaxtukgo la kgantum kgatit nema tatukxma o la tiku akgtum mecha xla lino nema mixmaja. Wa xlakata, lu xkaʼakgatekgsni latamanin chu xkalimasiyani takgalhkgalhin. Asta kamanan lu tlan xmakgkatsikgo akxni xkatachuwinan (Mar. 10:14). Xlikana, akinin nila liwana kamasiyaniyaw chu kaʼakgatekgsniyaw latamanin chuna la xtlawa Jesús. Pero tlan nakalimasiyaniyaw taʼakgatekgsni latamanin akxni kalitachuwinanaw xlakata Dios. Kaʼakxilhwi la laktlawa akxni katachuwinanaw, tukuya kilhtamaku chuna tlawayaw chu la xlilhuwa kilhtamaku chuna tlawayaw.

14. ¿Tuku xlakata kuenta kilitlawatkan akxni katachuwinanaw latamanin?

¹⁴ La nakatachuwinanaw latamanin. La uku lhuwa  latamanin makgkatsikgo pi nitlan kalikatsinikan chu kalakgmakgankan, xlakata tiku pulalinkgo política chu takanajla lu nitlan kalikatsinikgo (Mat. 9:36). Niti kalipawankgo chu ni kgalhikgo takgalhkgalhin. Wa xlakata lu xlakaskinka pi kintachuwinkan chu chuna la chuwinanaw nakalimasiyaniyaw pi kapaxkiyaw chu kalakgalhamanaw. Min kilhtamaku, lhuwa latamanin liwana kgaxmatkgo tamakatsinin xalak Biblia pero ni wa xlakata akinin lu lakgskgalalan o liwana kakgalhtiyaw xtakgalhskininkan, wata kgaxmatkgo xlakata tlan kalikatsiniyaw chu kamaxkiyaw kakni.

15. ¿La nakalimasiyaniyaw taʼakgatekgsni latamanin tiku kalitachuwinanaw xlakata Dios?

¹⁵ Pulaklhuwa anan la nakalimasiyaniyaw taʼakgatekgsni latamanin tiku kalitachuwinanaw Dios. Akgtum liʼakxilhtit, xlikana pi takgalhskinin lu tlan maklakaskinkan akxni kamasiyaniyaw latamanin, pero talakaskin liwana nalilakpuwanaw tuku nakgalhskininanaw chu nalimasiyayaw tapaxkit. Chatum precursor xmakgtayanama anta niku latamanin tsinu maxanankgo o ni lu chuwinankgo. Wa xlakata xtalakaskin ni nakatlawani takgalhskinin nema nakamamaxani komo nila xkgalhtinankgolh. Nikxni xkakgalhskin komo xkatsikgo tuku wanikan Dios o tuku xTamapakgsin Dios. Wata xkawani la uma: «Biblia kimasiyaninit pi Dios kgalhi akgtum tukuwani. ¿Tlan nakmasiyaniyan?». Chuna la akxilhaw, akgatunu talismanin chu latamanin tanu la likatsikgo, wa xlakata akinin ni katikawaniw latamanin tuku natlawakgo. Pero ankgalhin nalimasiyayaw taʼakgatekgsni chu takaknin, wa xlakata talakaskin nakatsiyaw la likatsikgo latamanin kkinkachikinkan.

16, 17. 1) Komo kalimasiyaniputunaw taʼakgatekgsni latamanin, ¿tukuya kilhtamaku nakalakganaw kxchikkan? 2) Komo kalimasiyaniputunaw taʼakgatekgsni latamanin, ¿la xlilhuwa kilhtamaku nakatachuwinanaw?

¹⁶ Tukuya kilhtamaku tlan nakatachuwinanaw latamanin. Akxni lichuwinanaw Dios akgatunu chiki, latamanin nikinkakgalhkgalhikgoyan xlakata ni kinkawanikgonitan pi naʼanaw kxchikkan. Wa xlakata lu xlakaskinka nakalakganaw akxni max kgalhikgo kilhtamaku xlakata nakinkakgaxmatnikgoyan (Mat. 7:12). Akgtum liʼakxilhtit, ¿ni sokg takikgo latamanin niku lichuwinanaw Dios xlisputni semana? Komo chuna, max tlan pulana nalichuwinanaw Dios ktiji, o kcarritos, o nakalakganaw tiku katsiyaw pi takikgonita.

¹⁷ La xlilhuwa kilhtamaku nakatachuwinanaw. Latamanin ankgalhin wi tuku liskujmakgo, wa xlakata talakaskin pi akxni nakatachuwinanaw ni lu namakgapalayaw, max chuna natlawayaw akxni xlipulana nakatachuwinanaw. Lu xlakaskinka pi lakapala namasputuyaw kintachuwinkan nixawa namakgapala (1 Cor. 9:20-23). Akxni latamanin naʼakxilhkgo pi kuenta tlawayaw pi wi tuku liskujmakgo, uma natlawa pi alistalh nakinkakgaxmatnikgoyan. Komo kgalhiyaw tayat nema masta espíritu santo, tlan «xtaskujnin Dios» nawanaw. Asta Jehová tlan nakinkamaklakaskinan xlakata wi tiku namasiyaniyaw tuku xaxlikana chu chuna tlan kstalanina Cristo nalitaxtu (1 Cor. 3:6, 7, 9).

18. ¿Tuku tasikulunalin namakglhtinanaw komo nakalimasiyaniyaw taʼakgatekgsni amakgapitsin?

¹⁸ Chuna la katsininitaw, kaliskujwi xlakata nalimasiyayaw taʼakgatekgsni kfamilia, kcongregación chu akxni lichuwinanaw Dios. Komo chuna natlawayaw, namakglhtinanaw lhuwa tasikulunalin la uku chu kilhtamaku nema aku mima. Salmo 41:1, 2, [SXP] wan: «Snun lipaxaw kamakglhkatsilh nama chixku ti [makgtaya] chatum [tiku nitu kgalhi]; [Jehová] nalakgmaxtu akxni naʼakgspula tu tuwaj». Nachuna «namaxki lipaxaw latamat nak katiyatni».