¿TUKU tlawayaw akxni katsiputunaw la kamakglit? Max akxilhaw reloj nema makawilaw o atanu reloj nema kaj mawakakan. Komo wi tiku nakinkakgalhskinan la kamakglit, ¿tuku nawaniyaw? Pulaklhuwa tuku tlan nawaniyaw.

Akgtum liʼakxilhtit, kalilakpuwaw pi titaxtunit akgtum hora chu 45 minutos lata takgatsilh tastunut. Tlan nawanaw pi kamakgtum hora chu 45 minutos kakgotanun, o tsankga akgkukitsis minuto lata nachan kamakgtiy hora kakgotanun. O komo lamaw kʼakgtum kachikin niku stalanikan reloj xa veinticuatro horas, max nawanaw pi kamakgkututu hora 45 minutos.

Akxni likgalhtawakgayaw Biblia, max kinkakgalhskinkanitan: «¿La xlikatsikgo la kamakglit xwanit tiku xlamakgo makgasata?». Chuna la akinin, xlakan na pulaklhuwa la xlikatsikgo la kamakglit xwanit. Anta kTatsokgni xaHebreo, lichuwinan «tsisa», «tastunut» «kakgotanun» chu «xa katsisni» (Gén. 8:11; 19:27; 43:16; Juec. 19:9). Pero Biblia lakgachunin maklakaskin tachuwin nema liwana akgatekgskan.

Makgasata, xwi talismanin pi xtawilalh kuentajtlawananin, chu tlakg xtalakaskin xa katsisni. Akxni nina xlakachin Jesús, israelitas pulaktutu la xmapapitsikgo akgtum tsisni nema xkalilakgapaskan «vigilias» (Sal. 63:6). Akgtum liʼakxilhtit, anta kJueces 7:19 lichuwinan vigilia (nema kilhchanima hora) xalak itat tsisni. Kxkilhtamaku Jesús, judíos xlimaklakaskinkgo tuku xmaklakaskinkgo griegos chu romanos, nema pulaktati tuku xlimapapitsikgo tsisni.

Umakgolh horas o tuku xlimapapitsikgo tsisni makglhuwa talichuwinan kʼEvangelios. Akgtum liʼakxilhtit, xlipulaktiy hora o akxni xʼamaja xkgakga Jesús tlawalh kxkgalhni chuchut xlakata nakalakgtalakatsuwi kstalaninanin tiku xwilakgo kbarco (Mat. 14:25). Chu atanu kilhtamaku Jesús lichuwinalh: «Wampi wa yuma kakatsitit, wa mpala pi wa xatlat nti xalak chiki, xkatsilh xatu hora namin nkgalhana, skgalalh xtawi, na ni xtimastalh ntalakaskin mpala ti xkgalhanalh kxchik» (Mat. 24:43).

Jesús lichuwinalh pulaktati tsisni akxni kawanilh kstalaninanin: «Pus chi skgalalh katawilatit, sampi ni katsiyatit akxni namin xmalana nti kxchik, max mpala kakgotanun, su itat tsisni usu akxni ntasaj puyu, usu tsisaj» (Mar. 13:35). Xapulana hora «kilhchanima kakgotanun» max akxni xtatsekga chichini o asta akxni xtakgatsi kamakgnajatsa hora tsisni. Xlipulaktiy hora xla «itat tsisni» xtsukuy kamakgnajatsa hora tsisni asta kamakgkutiy hora tsisni. Xlipulaktutu hora wa akxni «xtasa puyu» nema xtsukuy kamakgkutiy hora tsisni asta max kamakgtutu hora tsisa. Max akxni ama hora akxni tasalh puyu akxni chipaka Jesús (Mar. 14:72). Xlipulaktati hora wa akxni «lu tsisa xwanit» nema xtsukuy kamakgtutu hora tsisa asta akxni xtaxtu Chichini.

Chuna la akxilhaw, makgasata kilhtamaku ni xʼanan reloj chuna la kgalhiyaw la uku, latamanin wi tuku xkgalhikgo xlakata nakatsikgo tuku hora xwanit.