XLIKALANKA katiyatni, lakgkgolotsin lhuwa xtapalh akxilhkgo taskujut nema lakgayakgo kxkachikin Jehová. Chu putum akinin lipaxuwayaw xlakata kinkamaxkikgoyan xtamakgtaykan. Pero nina makgas, kaskinika lakgkgolotsin tiku linkgoya kata pi xkamakamaxkikgolh taskujut nema xlakgayakgolh atanu lakgkgolotsin tiku nina lhuwa kata kgalhikgo.

Akxni tlawaka uma talakgpalit, superintendentes xla circuito chu tiku kamakgalhtawakgekgo tiku tlakg nalichuwinankgo Dios, makgxtakgkgo xtaskujutkan akxni makgatsikgo 70 kata. Nachuna, lakgkgolotsin tiku kgalhikgoya 80 kata kamakgxtakgnikgo xtaskujutkan tiku nina lhuwa linkgo kata, la komo napulalinkgo congregación o Comité xla Sucursal nalitaxtukgo. ¿La makgkatsikgonit natalan tiku linkgoya kata uma talakgpalit? Limasiyakgonit pi ni makgxtakgkgo Jehová chu xkachikin.

Ken, tiku litaxtulh Comité xla Sucursal liwaka 49 kata, lakapastaka: «Akxni kkatsilh xlakata uma talakgpalit, klakpuwa pi tlan tuku xlakkaxwilikanit. Chu watiya ama tsisa, xakwaninit Jehová pi xakmaklakaskinaw chatum tiku kajku kgawasa xlakata  xkinkamakgtayan». Lhuwa natalan xlikalanka katiyatni chuna lakpuwankgo la Ken. Xlikana, putum umakgolh lakgkgolotsin xlipaxuwakgo la xkamakgtayamakgolh natalan chu wa xlakata makgapitsin akxni katsikgolh xlakata uma talakgpalit ni lu tlan makgkatsikgolh.

Esperandio, tiku xkapulalin lakgkgolotsin xalak congregación, lichuwinan pi pulana nitlan makgkatsilh. Pero nachuna lichuwinalh pi nialhla tuku lhuwa xtlawa chu xlakaskin kilhtamaku xlakata nakuentajtlawakan xlakata ni lu natatatla. Xlikana, la uku chuntiya skujnanima Jehová chu la akgtum tasikulunalin litaxtu xpalakata natalan.

¿Chu tuku wankgo natalan tiku lhuwa kata liskujkgolh la superintendentes viajantes? Allan, tiku liskujli liwaka 38 kata, lichuwinan: «Lu kaks klilakawa akxni kimaxkika uma tamakatsinin». Pero lichuwinan pi tlan kitaxtu kamasiyanikan natalan lakchixkuwin tiku nina linkgo kata chu nachuna xlakan chuntiya skujnanimakgo Jehová.

Russell superintendente viajante litaxtulh chu xkamakgalhtawakga tiku tlakg nalichuwinankgo Dios liwaka 40 kata. Lichuwinan pi pulana, xla chu xpuskat lu nitlan makgkatsikgolh. Lichuwinan: «Lu lhuwa xtapalh xakli’akxilhaw taskujut nema xaklakgayaw chu xaklakpuwanaw pi chuntiya xakkgalhiyaw litliwakga xlakata chuntiya naktlawayaw». La uku, xchatiykan chuntiya maklakaskinkgo xliskgalalakan chu tuku titaxtukgonit kxlatamatkan kcongregación niku makgtayanamakgolh chu natalan lu lipaxuwakgo pi anta katawilakgolh.

Max akinin nachuna makgkatsinitaw la umakgolh natalan. Maski chuna, komo na’akxilhaw tuku lichuwinan 2 Samuel nakinkamakgtayayan naka’akgatekgsniyaw.

Kalakapastakwi akxni Absalón talalakatawakalh xtlat, mapakgsina David. Xla taxtucha kJerusalén chu alh kMahanaim, kx’este kgalhtuchokgo Jordán. Anta David chu ksoldados xmaklakaskinkgo tuku xkamakgtayalh xlakata ni nanikgo. ¿Tuku lalh?

Kgalhtutu lakchixkuwin tlan kalikatsinikgolh chu kalinika putama, liwat chu amakgapitsi tuku x’amakgolh maklakaskinkgo. Chatum tiku chuna tlawalh wa Barzilai (2 Sam. 17:27-29). Akxni Absalón nialh talatlawalh David, tlan taspitpa kJerusalén chu Barzilai stalanilh asta kJordán. David wanilh pi kstalanilh asta kJerusalén chu wanilh pi xʼama kuentajtlawa pi xkgalhilh tuku nawa, maski Barzilai ni xmaklakaskin xlakata xla xkgalhi tumin (2 Sam. 19:31-33). Max David lu lhuwa xtapalh liʼakxilhli xlakata xtayat chu tastakyaw nema tlan xmaxkilh xlakata lhuwata tuku xkatsini. Barzilai akgtum lanka talakgalhaman xliʼakxilhli kskujli chu xlatamalh anta kxchik David.

Pero Barzilai ni tlankajwa xwanit chu liwana xlakapastaknan chu wanilh David pi xlakata xkgalhiya 80 kata nialh xkatsi tuku «litalakgpali tuku tlan chu tuku nitlan». ¿Tuku xkilhchanima? Xlikana, uma chixku lhuwa liskgalala xkgalhi xlakata lhuwata kata xlatamanit. Chu tlanku xmasta lakwan tastakyaw, chuna «la lakgkgolotsin» maxkikgolh  tastakyaw mapakgsina Rehoboam (1 Rey. 12:6, 7; Sal. 92:12-14; Prov. 16:31). Max Barzilai wa xkilhchanima pi max nialhla tuku xtlawa xlakata xlina xkata. Asta liwana xkatsi pi nialhla liwana xkgaxmata chu atanu tuku nialhla xtlawa (Ecl. 12:4, 5). Wa xlakata wanilh David pi xlilh Kimham, tiku max xkgawasa xwanit (2 Sam. 19:35-40).

Talakgpalit nema lichuwinaw kxlitsukut uma artículo xtachuna tuku titaxtulh Barzilai. Tlan nalilakpuwanaw pi talakaskilh pi Barzilai nalilakpuwan la tatakgsa chu tuku tlan tlawa chatum lataman. Pero la uku kilhtamaku talakaskin nalilakpuwanaw tuku tlakg tlan xpalakatakan lhuwa lakgkgolotsin xlikalanka katiyatni.

Uma lakgkgolotsin tiku linkgoya kata limasiyakgonit pi ni putum tlan tlawakgo chu lakapala katsikgonit pi tlan kitaxtu talakgpalit nema tlawaka. Komo natalan tiku linkgoya kata nakamaxkikgo taskujut nema xkgalhikgo tiku nina linkgo kata, xkachikin Jehová tlan nakuentajtlawa la nastaktilha xkachikin. Lhuwa natalan tiku linkgoya kata kamasiyanikgonit tiku nina linkgo kata la natlawakgo taskujut, max chuna la masiyanilh Barzilai xkgawasa o chuna la Pablo masiyanilh Timoteo (1 Cor. 4:17; Filip. 2:20-22). Uma natalan tiku nina linkgo kata limasiyakgonit pi litaxtukgo la akgtum tamaskiwin xpalakata natalan chu tlan namakgtayanankgo «lakimpi nalistakkgoy kxtakanajlakan wa nti ntapakgsikgoy kxmakni nCristo» (Efes. 4:8-12; katamalakxtupi Números 11:16, 17, 29).

Xlikalanka katiyatni, lhuwa natalan tiku kamakamaxkikgonit atanu natalan taskujut nema xlakgayakgolh tlakg limaxtukgonit kilhtamaku xlakata naskujnanikgo Jehová.

«Xlakata la uku tlakg kkgalhi kilhtamaku, kimaxki talakaskin tlakg liwana nakkatachuwinan xchixkukan natalan tiku ni xtatayananin Jehová anta kcongregación», chuna lichuwinan Marco tiku liskujli la superintendente viajante akgkunajatsa kata.

Geraldo, tiku puxamatsayan kata liskujli la superintendente viajante, lichuwinan: «Kimpuskat chu akit klakkaxwilinitaw tuku atanu tlan naktlawayaw, pulaktum wa nakkamakgtayayaw tiku nialh ankgo ktamakxtumit chu tlakg nakkgalhiyaw tiku nakkamakgalhtawakgayaw». Lichuwinan pi la uku kgalhakukitsis tiku kamakgalhtawakgama chu lhuwa tiku nialh xʼankgo ktamakxtumit la uku tsukuparakgolh ankgo.

Allan, tiku pulana lichuwinaw, lichuwinampara: «La uku tlakg tlan kkgalhiyaw kilhtamaku xlakata naklichuwinanaw Dios. Lu klakgatiyaw klichuwinanaw Dios niku lhuwa titaxtukan, niku stanankan chu niku kwilaw. Chatiy tiku lakatsu kkatawilaw kilakgolh ktamakxtumit».

¿Wix chatum tala tiku nachuna titaxtupat chu makglhtinanita xasasti taskujut? Komo chuna, atanu tuku tlan natlawaya xlakata nalimasiyaya pi makgtayaya Jehová wa nakalitachuwinana tiku nina linkgo kata tuku wix katsininita kmilatamat. Russell, tiku lichuwinaw, lichuwinampara: «Jehová kamaklakaskima natalan tiku nina linkgo kata xlakata lu tlan taskujut tlawakgo. Natalan xlikalanka katiyatni litamakgtayakgo tuku masiyakgo chu la kapulalinkgo natalan» (kaʼakxilhti recuadro « Kakamakgtaya tiku nina linkgo kata liwana nalimaklakaskinkgo tuku katsinikgo»).

Komo nina makgas talakgpalilh taskujut nema xlakgayat, ni kalilakgaputsa. Taskujut nema tlawanita kamakgtayanit lhuwa latamanin chu chuntiya tlan natlawaya. Wix chatum tala tiku chuntiya napaxkikgoyan natalan.

Pero tuku tlakg xlakaskinka, wa pi makgapaxuwanita xnaku Jehová. Xla malaknunit pi putum kilhtamaku «ni katipatsankgalh paks ntu ntlawanitantit, chu mintaskujutkan xla tapaxkit wa ntu wixin masiyunitantit kxtukuwani, wa cha ntu ntapininitantit, na chunaku ntapinipatit makgtayapakgotit mintasantujlaninkan» (Heb. 6:10). Umakgolh tachuwin kinkamalakapastakayan  pi xla ni kajwatiya lakapastaka tuku tlawanitaw makgasata. Xlakata wix lhuwa xtapalh litaxtuya kxlakatin Jehová, xla ankgalhin nalakapastaka tuku tlawanita chu tuku chuntiya tlawapat xlakata namakgapaxuwaya.

¿Chu komo akinin nitu makglhtinamaw xasasti taskujut kxkachikin Jehová? Maski chuna, akinin tlan nalitamakgtayayaw. ¿Tuku xlakata?

Xlakata max la uku tlan katachuwinanaw natalan tiku linkgoya kata nema makglhtinankgonit xasasti taskujut. Tlan nalitamakgtayayaw tuku xlakan katsinikgo chu xlakata lhuwata kata la skujnanimakgolh Jehová. Kakaskiniw tastakyaw. Nachuna kuenta katlawaw la maklakaskinkgo tuku katsinikgonit akxni tlawakgo xtaskujutkan.

Komo akinin chatum tala tiku linawa kata chu makglhtinanitaw xasasti taskujut o tlan nalitamakgtayayaw tuku katsinikgo, kalakapastakwi pi Jehová lhuwa xtapalh akxilha tiku makgasata skujnanimakgolh chu chuntiya tlawamakgolh.