1. Kalichuwinanti la kaʼakxilha Jehová latamanin tiku tataktujukgo.

JEHOVÁ lu kapaxki latamanin tiku taktujukgo. Kajwatiya tiku xlikana nalimasiyakgo uma tayat tlan xʼamigos nalitaxtukgo. Pero, «tiku tlankajwa kaj xalakgamakgat akxilha» (Sal. 138:6). Kimputumkan makgapaxuwaputunaw Jehová chu lakaskinaw pi xkinkapaxkin, wa xlakata talakaskin nalimasiyayaw tataktujut.

2. ¿Tuku nalichuwinanaw kʼuma artículo?

² Kʼuma artículo nalichuwinanaw umakgolh akgtutu takgalhskinin. 1) ¿Tuku tataktujut? 2) ¿Tuku xlakata xlakaskinka nataktujuyaw? 3) ¿Tuku max natlawa pi nialh nalimasiyayaw tataktujut? Chuna la naʼakxilhaw, namakgapaxuwayaw Jehová komo nataktujuyaw chu nachuna akinin tlan nakinkakitaxtuniyan (Prov. 27:11; Is. 48:17).

3. ¿Tuku tataktujut?

³ Tataktujut kilhchanima ni lanka chu ni tlakg xlakaskinka namakgkatsikana. Biblia masiya pi tiku taktuju liwana katsi pi Jehová tlakg lanka nixawa xla chu amakgapitsin tlakg xlakaskinka litaxtukgo (Filip. 2:3, 4).

4, 5. ¿Tuku xlakata wanaw pi taktujukan ni kaj xman litasiyakan?

⁴ Wilakgolh latamanin tiku kaj litasiyakgo pi tataktujukgo. Max ni lu xlakaskinka kamakgkatsikan o tlan kalikatsinikgo amakgapitsin xlakata max chuna kamakgastakkanit o xlakata chuna xtalismaninkan. Pero max kxnakujkan xlakaskinka kamakgkatsikan.  Pero maski chuna, namin kilhtamaku nalimasiyakgo la xlikana likatsikgo (Luc. 6:45).

⁵ Pero nachuna, max latamanin tiku wankgo tuku lakpuwankgo o nawanikgoyan tuku militlawat ni wamputun pi laklanka kamakgkatsikan (Juan 1:46, 47). Maski chuna, latamanin tiku lu tlan likatsikgo ni xlilakpuwanatkan pi ni talakaskin naliskujkgo xlakata nalimasiyakgo tataktujut. Kimputumkan talakaskin naliskujaw xlakata nalimasiyayaw uma tayat.

6. Chuna la wan 1 Corintios 15:10, ¿tuku kinkamasiyaniyan xliʼakxilhtit apóstol Pablo?

⁶ Kaʼakxilhwi xliʼakxilhtit apóstol Pablo. Jehová maklakaskilh xlakata namalakatsuki congregaciones ktanu tanu kachikinin. Asta max nipara chatum xʼapóstol Jesucristo tlawalh taskujut nema xla tlawalh. Maski chuna, Pablo ni tlakg xlakaskinka makgkatsika nixawa xnatalan, wata taktujulh chu wa: «Akit tlakg ni xlakaskinka klitaxtu, chu ni kiminini apóstol nakilimapakuwikan, xlakata kputsastalanilh xcongregación Dios» (1 Cor. 15:9). Chu alistalh lichuwinalh pi xla xʼamigo Jehová xlitaxtu xlakata xla xlimasiyaninit talakgalhaman, ni wa xlakata lu xlakaskinka xlitaxtu o lhuwa tuku tlan xtlawa (kalikgalhtawakga 1 Corintios 15:10). Xlikana, kinkawilinin lu xatlan liʼakxilhtit xlakata la limasiyakan tataktujut akxni xla kamalakgachanilh maktum carta corintios, maski makgapitsin nitlan xlichuwinankgo (2 Cor. 10:10).

7. ¿La limasiyalh tataktujut chatum tala?

⁷ Lhuwa natalan kamakgtayanit xbiografía tala Karl Klein, tiku makgtapakgsilh Lakgkgolotsin tiku pulalinkgo xtatayananin Jehová. Anta kxbiografía, tala Klein litayalh taʼakglhuwit nema xtitaxtunit chu tuku max  xtalakaskin xliskujli. Kaʼakxilhwi makgapitsi liʼakxilhtit. Akxni xlimakgtumku alh lichuwinan Dios kʼakgatunu chiki lu tuwa makgkatsilh, wa xlakata titaxtulh akgtiy kata ni alh lichuwinan Dios. Alistalh, akxni xwija kBetel, lu sitsinilh chatum tala xlakata maxkilh akgtum tastakyaw. Nachuna, milh kilhtamaku chipalh tajatat xla talipuwan pero alistalh tatlanipa. Nachuna, lu lipaxuwalh taskujut nema lakgayawaka. ¿Nixlikana pi uma tala lu taktujulh xlakata ni matsekgli tuku xtitaxtunit? Lhuwa natalan xatapaxuwan lakapastakkgo tala Klein xlakata tuku titaxtulh chu xlakata tuku lichuwinalh anta kxbiografía. *

8. ¿La kinkamakgtayayan 1 Pedro 5:6 liwana naʼakxilhaw pi tataktujut makgapaxuwa Jehová?

⁸ Pulaktum tuku xlakata kilikgalhitkan uma tayat wa pi makgapaxuwa Jehová, chuna la limasiyalh apóstol Pedro (kalikgalhtawakga 1 Pedro 5:6). Libro «Ven, sé mi seguidor» lichuwinan: «Tatlankit xtachuna la akgtum veneno nema laktlawanan. Uma nixatlan tayat tlawa pi asta tiku lu tlan tuku tlawa nila katitlawalh taskujut nema Dios nalakgayawa. Pero tataktujut, tlawa pi tiku tasiya pi nila tuku tlawa tlan naskujnani Jehová». Chu lichuwinampara pi Dios «nakinkasikulunatlawayan komo nalimasiyayaw uma tayat». * Xlikana pi ni anan tuku tlakg xlakaskinka nixawa namakgapaxuwayaw xnaku Jehová (Prov. 23:15).

9. ¿Tuku xlakata amakgapitsin lakgatikgo akxtum katalakgo tiku taktujukgo?

⁹ Kgalhikan tataktujut ni kajwatiya makgapaxuwa Jehová nachuna akinin lu tlan kinkakitaxtuniyan. Tataktujut tlawa pi amakgapitsin nakinkatalakatsuwinikgoyan. Xlakata naʼakgatekgsaw uma, kalilakpuwaw tiku katalalimputunaw (Mat. 7:12). ¿Nixlikana pi ni lakgatiyaw akxtum katalayaw tiku tlanka kamakgkatsikan chu ni makglhtinankgo tastakyaw? Akxni akxtum katalayaw natalan tiku limasiyakgo tapaxkit, tataktujut chu makgkatsikgo tuku makgkatsiyaw lu lipaxuwayaw (1 Ped. 3:8). Uma kinkalimasiyaniyan pi komo akinin lakaskinaw pi chuna xkinkalikatsinikan, nachuna amakgapitsin lakaskinkgo pi chuna xkalikatsiniw.

10. ¿Tuku xlakata tataktujut kinkamakgtayayan natayaniyaw tuku tuwa titaxtuyaw?

¹⁰ Tataktujut na kinkamakgtayayan natayaniyaw tuku tuwa titaxtuyaw kkilatamatkan. Xlikana pi min kilhtamaku wi tuku nitlan akxilhaw o ni matlaniyaw. Asta mapakgsina Salomón  lichuwinalh: «Kakxilhnit pi lakskujnin kgetawilakgo kawayu, pero tiku kgalhikgo limapakgsin kaj tlawankgo chuna la komo lakskujnin xlitaxtukgolh» (Ecl. 10:7). Ni ankgalhin kamalankikan latamanin tiku tlan tuku tlawakgo, chu lakgachunin wa kamalankikan tiku ni lu la tuku tlawakgo. Pero Salomón akgatekgsli pi lu xlakaskinka namakgamakglhtinanaw tuku titaxtuyaw chu ni wa nalakapastakaw tuku xlakaskinaw pi xtitaxtulh (Ecl. 6:9). Komo taktujuyaw, tlakg ni tuwa katimakgkatsiw chuna nalakpuwanaw.

11. ¿Tuku xlakata talakaskin nataktujuyaw akxni kinkastakyawakanan?

¹¹ Chali chali, lhuwa tuku titaxtuyaw niku tlan nalimasiyayaw tataktujut. Kaʼakxilhwi makgapitsi liʼakxilhtit. Akxni kinkastakyawakanan. Talakaskin nalakapastakaw pi, komo wi tiku limaxtulh kilhtamaku xlakata nakinkastakyawayan, max chuna tlawalh xlakata tuku tlawaw lu nitlan nixawa la lakpuwanaw. Komo chuna titaxtumaw, max tuku pulana natlawayaw wa pi nalakgmakganaw uma tastakyaw. Max nitlan nalichuwinanaw tala tiku kinkastakyawan. Pero komo taktujuyaw nalakgpaliyaw tuku lakpuwanaw.

12. Chuna la wan Proverbios 27:5, 6, ¿tuku xlakata talakaskin napaxtikatsininanaw akxni nakinkamaxkikanan akgtum tastakyaw? Kawili akgtum liʼakxilhtit.

¹² Tiku taktuju paxtikatsininan akxni maxkikan akgtum tastakyaw. Kawiliw akgtum liʼakxilhtit. Kalilakpuwaw pi anta wilaw kPukgalhtawakga chu katachuwinamaw makgapitsi natalan. Pero chatum tala kinkalinan alakatanu chu tsekg kinkawaniyan pi wi tuku kinkakilhyan kkintatsankan. Max lu namaxananaw. Pero paxtikatsiniyaw xlakata kinkawanin. Asta lakpuwanaw pi wi tiku lakapala xkintikawanin. Nachuna, talakaskin napaxtikatsiniyaw tala tiku kinkamaxkin akgtum tastakyaw akxni xmaklakaskimaw. Ni kaliʼakxilhwi la chatum kintalamakgasitsinkan, wata kaliʼakxilhwi la chatum amigo tiku lu kinkapaxkiyan (kalikgalhtawakga Proverbios 27:5, 6; Gál. 4:16).

13. ¿La limasiyayaw tataktujut akxni chatum tala maxkikan akgtum taskujut kcongregación?

¹³ Akxni chatum tala maxkikan akgtum taskujut kcongregación. Chatum tala tiku wanikan Jason lichuwinan: «Akxni kakxilha pi wi tiku lakgayawakan akgtum taskujut kcongregación, min kilhtamaku klakapastaka tuku xlakata ni akit kimaxkika uma taskujut». ¿Minit kilhtamaku nachuna makgkatsinitaw? Ni talakgalhin komo tlakg naskujnaniputunaw  Jehová (1 Tim. 3:1). Pero talakaskin kuenta natlawayaw tuku nalakpuwanaw, xlakata max natlawa pi kkinakujkan lanka natsukuyaw makgkatsiyaw. Akgtum liʼakxilhtit, max chatum tala natsuku lakpuwan pi kaj xʼakstu tlakg tlan natlawa akgtum taskujut. O max chatum tala puskat nalakpuwan pi xchixku tlakg tlan namakgantaxti akgtum taskujut nixawa atanu tala. Komo xlikana taktujuyaw nichuna katilakpuwaw.

14. ¿Tuku kinkamasiyaniyan tuku tlawalh Moisés akxni amakgapitsi na kamaxkika taskujut?

¹⁴ Kaʼakxilhwi tuku tlawalh Moisés chu tuku kinkamasiyaniyan akxni kamaxkika akgtum taskujut amakgapitsi latamanin. Xla lu lanka xtapalh xliʼakxilha napulalin kachikin Israel. Pero ¿tuku tlawalh akxni Jehová na kamaxkilh taskujut amakgapitsi israelitas xlakata namakgtayakgo? Ni lakgsitsilh (Núm. 11:24-29). Nachuna, limasiyalh tataktujut akxni mastalh talakaskin pi amakgapitsin israelitas xmakgtayakgolh nakastakyawa kachikin (Éx. 18:13-24). Xlakata lhuwa jueces xwilakgolh, tlakg lakapala xlakkaxtlawakan akgtum taʼakglhuwit chu israelitas ni lhuwa kilhtamaku xkgalhkgalhikgo. Moisés tlakg lanka xtapalh xakxilha pi kachikin tlan natawila nixawa taskujut nema xlakgayawakanit. ¿Nixlikana pi lu tlan liʼakxilhtit kinkawilinin? Kalakapastakwi pi komo xlikana skujnaniputunaw Jehová, tlakg xlakaskinka nalimasiyayaw tataktujut nixawa tuku tlan tlawayaw. Chuna la wan Salmo 138:6, «Jehová lanka xlakatsukut, kuenta tlawani tiku taktuju».

15. ¿Tuku talakgpalinit kxlatamatkan makgapitsi natalan?

¹⁵ Akxni wi tuku talakgpali kkilatamatkan. Lhuwa natalan tiku akglhuwata kata la skujmakgolh kalakgpalinikanit xtaskujutkan. Akgtum liʼakxilhtit, kkata 2014, superintendentes de distrito chu xlakpuskatinkan tanu taskujut kalakgayawaka. Chu lata uma kata, superintendentes  de circuito makgxtakgkgo xtaskujutkan akxni makgatsikgo 70 kata. Nachuna, natalan tiku kgalhikgo 80 kata nialhla kapulalinkgo lakgkgolotsin xalak congregación. Chu nachuna la titaxtunit kata, lhuwa betelitas kawanikanit pi kaskujkgolh la precursores. Amakgapitsi makgxtakgkgonit la kskujmakgolh putum kilhtamaku xlakata tajatat, wi tiku kuenta tlawamakgolh kxfamiliajkan o atanu tuku titaxtumakgolh.

16. ¿La limasiyakgonit makgapitsi natalan pi lu taktujukgo?

¹⁶ Xlikana, umakgolh natalan tuwa makgkatsikgolh akxni wi tuku talakgpalilh kxlatamatkan. Lhuwa lu lilipuwankgolh xlakata makgxtakgkgolh taskujut nema lu xkamakgapaxuwa chu xlismanikgonita. Pero titaxtulh kilhtamaku lismaniparakgolh xasasti xtaskujutkan. ¿Tuku xlakata? Xlakata lu paxkikgo Jehová. Liwana lakapastakkgolh pi wa Jehová xmakamaxkikgonit xlatamatkan chu ni wa akgtum taskujut (Col. 3:23). Lu lipaxuwakgo xlakata chuntiya skujnanimakgolh Jehová kxasasti xtaskujutkan. Umakgolh natalan “makamaxkikgo Jehová putum tuku lilakgaputsakgo” xlakata katsikgo pi xla lu kalilakgaputsa (1 Ped. 5:6, 7).

17. ¿Tuku xlakata lu lanka xtapalh akxilhaw pi xTachuwin Dios kinkawaniyan pi kataktujuw?

¹⁷ Lu lanka xtapalh akxilhaw pi xTachuwin Dios kinkawaniyan pi kataktujuw. Lu tlan kinkakitaxtuniyan akxni limasiyayaw tataktujut chu na kamakgtaya amakgapitsin. Uma lu xatlan tayat, kinkamakgtayayan natayaniyaw tuku tuwa titaxtuyaw kkilatamatkan chu tuku tlakg xlakaskinka wa pi kinkamakgtayayan tlakg natalakatsuwiniyaw kinTlatkan xalak akgapun. Lu lipaxuwayaw pi Jehová, maski wa «tiku tlakg xaLanka», kapaxki chu lanka xtapalh kaʼakxilha xlakskujnin tiku taktujukgo (Is. 57:15).