1. ¿Tuku xtitaxtuma apóstol Juan akxni ksputmaja xapulana siglo?

AKXNI ksputmaja xapulana siglo, apóstol Juan lu tuwa tuku xtitaxtuma. Xla xlina kata, xlakgachinukanit kpulachin anta kPatmos chu max xla xaʼawatiya apóstol nema xlamajku (Rev. 1:9). Xkatsi pi tiku xtalalakatawakakgo tuku xaxlikana xkaʼakgskgawimakgolh chu xkamapapitsimakgolh natalan. Xtasiya la komo kaj nialh makgas nialh xʼama anan xaxlikana kstalaninanin Cristo (Jud. 4; Rev. 2:15, 20; 3:1, 17).

2. Chuna la wan Revelación 7:9-14, ¿tuku lu tlan maʼakxilhnika Juan? (Ka’akxilhti xmakni revista).

² Maski tuwa tuku xtitaxtuma, Juan wi tuku lu tlan maʼakxilhnika. Uma tuku maʼakxilhnika tasiya chatum ángel tiku kawani amakgapitsi ángeles pi xmalakgachokgokgolh un nema xʼama limin lhuwa tapatin asta akxni xkamulhkaka tiku xatalaksakni (Rev. 7:1-3). Tiku makgtapakgsikgo kʼuma grupo litakgatsi 144,000 latamanin tiku natamapakgsinankgo Jesús anta kʼakgapun (Luc. 12:32; Rev. 7:4). Pero Juan lichuwinampara amakgapitsi latamanin nema lu lhuwa chu asta wa: «¡Kaʼakxilhtit!». Uma tachuwin limasiya pi lu kaks lakawa xlakata tuku akxilhli. ¿Tuku uma? «Lhuwa latamanin nema nila tiku tlan xkaputlakge. Xtaxtukgonitancha kputum laklanka kachikinin, laklanka familias chu kachikinin chu tipalhuwa tachuwin xchuwinankgo, chu xyakgolh kxlakatin pumapakgsin chu kxlakatin Borrego» (kalikgalhtawakga Revelación 7:9-14). Xlikana pi max lu lipaxuwalh akxni akxilhli pi lhuwa latamanin xkakninanimakgolh Jehová.

3. 1) ¿Tuku xlakata matliwakglha kintakanajlakan tuku maʼakxilhnika Juan? 2) ¿Tuku na’akxilhaw k’uma artículo?

³ Xlikana pi uma tuku maʼakxilhnika Juan lu matliwakglhli xtakanajla. Chu nachuna akinin tlan namatliwakglha kintakanajlakan, xlakata tuku maʼakxilhnika kgantaxtuma la uku. Akxilhnitaw  la lhuwa latamanin makgtanumakgolh kxkachikin Dios chu chuna kgalhikgo takgalhkgalhin xlakata nalakgtaxtukgo akxni namin lhuwa tapatin chu nalatamakgo putum kilhtamaku xlikalanka Katiyatni. K’uma artículo na’akxilhaw tuku xlichuwinanit Jehová liwakaya 80 kata xlakata tiku x’amakgo makgtapakgsikgo k’grupo xla lhuwa latamanin. Nachuna na’akxilhaw pulaktiy tuku litalakgapaskgo uma grupo: 1) la xlilanka chu 2) tiku makgtapakgsikgo k’uma grupo tanu tanu xkachikinkan. Tuku na’akxilhaw namatliwakglha xtakanajlakan putum tiku kgalhkgalhimakgolh namakgtapakgsikgo k’uma grupo.

4. ¿Tuku ni akgatekgskgo latamanin tiku wankgo pi kstalaninanin Cristo, chu tuku xkanajlakgo xLikgalhtawakgananin Biblia?

⁴ Nixaxlikana takanajla ni masiyakgo pi tiku tlan likatsikgo nalatamakgo kKatiyatni (2 Cor. 4:3, 4). La uku, putum takanajla wankgo pi tiku tlan likatsikgo ankgo k’akgapun akxni nikgo. Pero akxni ksputmaja siglo 19, akgtum aktsu grupo tiku xlikgalhtawakgakgo Biblia chu xmakgpitsikgo revista nema la uku lilakgapasaw Makatsinina tanu tuku xkanajlakgo. X’akgatekgskgo pi Dios akgtum paraíso natlawa Katiyatni chu pi lhuwa latamanin tiku xkgalhakgaxmatkgolh xlatamakgolh unu kKatiyatni chu ni anta k’akgapun. Maski chuna xkanajlakgo, titaxtulh kilhtamaku xlakata liwana na’akgatekgskgo tiku umakgolh latamanin (Mat. 6:10).

5. ¿Tuku xkanajlakgo xLikgalhtawakgananin Biblia xlakata 144,000 latamanin?

⁵ Nachuna xLikgalhtawakgananin Biblia x’akgatekgskgo pi xTachuwin Dios xmasiya pi makgapitsin latamanin x’amakgolh tamapakgsinankgo Jesús anta k’akgapun, latamanin «tiku Dios katamawaxtulh kkatiyatni» (Rev. 14:3). Kaj 144,000 latamanin x’amakgo makgtapakgsikgo k’uma grupo chu xlakan xtalakaskin ni xmakgxtakgkgolh Dios. Pero ¿tiku xkakilhchanima xalhuwa latamanin?

6. ¿Tuku xlakpuwankgo xLikgalhtawakgananin Biblia xlakata xalhuwa latamanin?

⁶ Juan akxilhli uma grupo pi xyakgo «kxlakatin pumapakgsin chu kxlakatin Borrego» (Rev. 7:9). Xlakata tuku wan uma versículo, xLikgalhtawakgananin Biblia xlakpuwankgo pi xalhuwa latamanin xʼamakgolh latamakgo kʼakgapun, xtachuna la 144,000 latamanin tiku xatalaksakni. Pero, komo umakgolh akgtiy grupos xʼamakgolh latamakgo kʼakgapun, ¿tuku xlitalakgpalikgo? Umakgolh xLikgalhtawakgananin Biblia xlakpuwankgo pi xalhuwa latamanin wa latamanin tiku ni lu xkgalhakgaxmatkgonit Dios akxni xlamakgolh kKatiyatni. Maski umakgolh latamanin tlan la xlinkgonit xlatamatkan, max makgapitsin chuntiyaku xmakgtapakgsikgo knixaxlikana takanajla. Tiku xLikgalhtawakgananin Biblia xlakpuwankgo pi umakgolh latamanin ni lu xliputum xnakujkan kskujnanikgonit Dios xlakata tlan xtamapakgsinankgolh Jesús kʼakgapun. Xlakata tapaxkit nema xkgalhinikgo Dios ni lu tliwakga xwanit, xʼamakgolh tayakgo kʼakgapun kxlakatin pumapakgsin, pero ni xʼamakgolh tawilakgo kputawilh.

7. 1) Chuna la xlakpuwankgo xLikgalhtawakgananin Biblia, ¿tiku xʼamakgolh latamakgo kKatiyatni akxni Cristo xmapakgsinalh akgtum Mil kata? 2) ¿Tuku xlakpuwankan xlakata lakchixkuwin xalamakgasa tiku ni makgxtakgkgolh Dios?

⁷ Wa xlakata, ¿tiku xʼamakgo latamakgo kKatiyatni? Tiku xLikgalhtawakgananin Biblia xlakpuwankgo pi akxni 144,000 tiku xatalaksakni chu xalhuwa latamanin xʼankgolh kʼakgapun, lhuwa latamanin xkgalhikgolh takgalhkgalhin nalatamakgo kKatiyatni chu xmakglhtinankgolh tasikulunalin akxni Cristo xmapakgsinalh akgtum Mil kata. Xlakpuwankgo pi xʼamaka kamasiyanikan akxni xmapakgsinalh Cristo akgtum Mil kata ni xlakpuwankgo pi umakgolh latamanin xlakskujnanikgolh Jehová akxni nina xtsuku uma tamapakgsin. Alistalh, tiku  xtlawakgolh tuku Dios xkalimapakgsi, xkamaxkika latamat nema ni kgalhi xlisputni unu kKatiyatni, chu tiku ni xkgalhakgaxmatnankgolh xkamasputuka. Pero tiku «Mapakgsinanin» xlitaxtukgolh akxni Jesús xmapakgsinalh akgtum Mil kata unu kKatiyatni, xLikgalhtawakgananin Biblia xlakpuwankgo pi makgapitsi max xmakglhtinankgolh talakgalhaman nalatamakgo kʼakgapun akxni ksputli akgtum Mil kata. Chu na xlakastakwanankgolh latamanin tiku nikgolh akxni nina xmin Cristo (Sal. 45:16).

8. ¿Tuku pulaktutu xkanajlakgo xLikgalhtawakgananin Biblia?

⁸ Wa xlakata, xLikgalhtawakgananin Biblia xlakpuwankgo pi xʼanan akgtutu grupos: 1) 144,000, tiku xtamapakgsinankgolh Jesús anta kʼakgapun; 2) lhuwa latamanin tiku ni xliputum xnakujkan kskujnanikgonit Dios, tiku xtayakgolh kxlakatin pumapakgsin chu xlakatin Borrego anta kʼakgapun, chu 3) lhuwa latamanin tiku xʼamaka kamasiyanikan xlimapakgsin Jehová anta kKatiyatni akxni xmapakgsinalh Cristo akgtum Mil kata. * Pero alistalh, Jehová kamakgtayalh tlakg liwana naʼakgatekgskgo uma (Prov. 4:18).

9. 1) ¿Tuku kilhchanima pi xalhuwa latamanin natayakgo «kxlakatin pumapakgsin chu kxlakatin Borrego» komo xlakan lamakgolh anta kKatiyatni? 2) ¿Tuku xlakata tlan nakanajlayaw tuku lichuwinanka xlakata Revelación 7:9?

⁹ Kkata 1935, xtatayananin Jehová liwana akgatekgskgolh tiku kakilhchanima xalhuwa latamanin nema maʼakxilhnika Juan. Akxilhkgolh pi ni xtalakaskin pi uma grupo x’ankgolh k’akgapun xlakata tlan natayakgo «kxlakatin pumapakgsin chu kxlakatin Borrego» chu pi umakgolh tachuwin kaj wi tuku xkilhchanima. Maski xalhuwa latamanin lamakgolh unu kKatiyatni, yakgolh «kxlakatin pumapakgsin» komo xlikana makgamakglhtinankgo Jehová la xMapakgsina xlikalanka Katiyatni chu komo tapakgsinikgo (Is. 66:1). Chu yakgolh «kxlakatin Borrego» komo kgalhinikgo takanajla xtamakamastan Jesús. Chuna kinkamasiyaniyan tuku lichuwinan Mateo 25:31, 32. Anta wan pi «putum laklanka kachikinin», asta maski tiku nitlan likatsikgo «nakamamakgstokgkan kxlakatin» Jesús chu kxlakatin xalanka xpumapakgsin. Liwana tasiya pi putum umakgolh kachikinin anta unu kKatiyatni wilakgolh chu ni anta kʼakgapun. Wi tuku kinkamakanajliyan pi xaxlikana tuku lichuwinanka kkata 1935. Lichuwinanka tuku xlakata Biblia ni wan pi xalhuwa latamanin naʼankgo kʼakgapun. Kajwatiya kamalaknunikan latamat nema ni kgalhi xlisputni anta kʼakgapun tiku xatalaksakni: 144,000 latamanin nema «na[ta]mapakgsinankgo kkatiyatni» Jesús (Rev. 5:10).

10. ¿Tuku xlakata xalhuwa latamanin talakaskin pi nalakgapaskgo xlimapakgsin Jehová akxni nina tsuku mapakgsinan Cristo akgtum Mil kata?

¹⁰ Lata kkata 1935, xtatayananin Jehová akgatekgsnitaw pi tuku maʼakxilhnika Juan xlakata xalhuwa latamanin wa kakilhchanima xlakskujnin Dios nema ni makgxtakgkgo chu kgalhkgalhimakgo nalatamakgo putum kilhtamaku unu kKatiyatni. Xlakata tlan nalakgtaxtukgo akxni nachin lhuwa tapatin chu «xlakata tlan nalakgtaxtuni[kgo] putum tuku xlikgantaxtut», umakgolh kstalaninanin Cristo talakaskin nalakgapaskgo xlimapakgsin Jehová chu nalimasiyakgo pi tliwakga kgalhikgo xtakanajlakan akxni nina tsuku mapakgsinan Cristo akgtum Mil kata (Luc. 21:34-36).

11. ¿Tuku xlakata makgapitsin xLikgalhtawakgananin Biblia xlakpuwankgo pi makgapitsin latamanin xʼamakgolh ankgo kʼakgapun akxni ksputli xtamapakgsin Jesús akgtum Mil kata?

¹¹ Chuna la akxilhwi kpárrafo 7, makgapitsin xLikgalhtawakgananin Biblia xlakpuwankgo pi makgapitsi lakchixkuwin tiku ni makgxtakgkgolh Jehová xʼamakgolh ankgo kʼakgapun  akxni ksputli xtamapakgsin Jesús akgtum Mil kata. ¿Tuku xlakata chuna xlakpuwankgo? Tuku xkanajlakgo talichuwinalh krevista 15 xla febrero kata 1913 nema la uku lilakgapasaw Makatsinina. Makgapitsi max chuna xlakpuwankgo: komo kstalaninanin Cristo tiku ni lu kgalhakgaxmatkgonit naʼankgo kʼakgapun, ¿tuku xlakata lakchixkuwin xala makgasa tiku ni makgxtakgkgolh Dios kajwatiya nakamaxkikan latamat unu kKatiyatni? Chuna xlakpuwankgo xlakata xkanajlakgo uma pulaktiy tuku nixaxlikana: 1) xalhuwa latamanin xʼamakgo latamakgo kʼakgapun chu 2) xalhuwa latamanin xkakilhchanima tiku ni lu kgalhakgaxmatkgolh Dios.

12, 13. ¿Tuku liwana katsikgo tiku xatalaksakni chu xalhuwa latamanin xlakata xtakgalhkgalhinkan?

¹² Pero, chuna la akxilhnitaw, lata kkata 1935 xtatayananin Jehová akgatekgsnitaw pi tiku nalakgtaxtukgo kʼArmagedón wa xalhuwa latamanin nema maʼakxilhnika Juan. Xlakan «wa tiku lakgtaxtunikgonit lhuwa tapatin» unu kKatiyatni chu nawankgo: «¡Lakgtaxtut wa kinkamaxkiyan Dios, tiku wi kpumapakgsin, chu Borrego!» (Rev. 7:10, 14). Nachuna, Biblia masiya pi latamanin nema naʼankgo kʼakgapun makglhtinankgo «tuku tlakg xatlan» nixawa tuku namakglhtinankgo xlakskujnin Dios xala makgasa (Heb. 11:40). Uma xasasti tuku akgatekgska kamaʼakgpuwantinilh natalan nakawanikgo amakgapitsin latamanin pi na kaskujnikgolh Jehová xlakata chuna tlan xlatamakgolh unu kKatiyatni.

¹³ Takgalhkgalhin nema kgalhikgo xalhuwa latamanin lu kamakgapaxuwakgo. Liwana katsikgo pi wa Jehová tiku laksaka komo xlakskujnin nalatamakgo unu kKatiyatni o anta kʼakgapun. Tiku xatalaksakni chu xalhuwa latamanin liwana katsikgo pi takgalhkgalhin nema kgalhikgo wa xlakata Jehová kalimasiyaninit talakgalhaman akxni mastalh xKgawasa xlakata nakalakgmaxtu (Rom. 3:24).

14. ¿Tuku xlakata lhuwa xLikgalhtawakgananin Biblia xlilakpuwankgo la xʼama lhuwan tiku xʼamakgo latamakgo unu kKatiyatni?

¹⁴ Tuku lichuwinanka kkata 1935 xlakata xalhuwa latamanin, xLikgalhtawakgananin Biblia xlilakpuwankgo la xʼama lhuwan tiku xʼamakgo latamakgo unu kKatiyatni. Akgtum liʼakxilhtit, Ronald Parkin, tiku kajku 12 kata xkgalhi, akxni liwana akgatekgska tiku xlitaxtu xalhuwa latamanin, lakapastaka: «Kaj 56,000 xʼanan tiku xlichuwinankgo Dios xlikalanka katiyatni, chu max putum xatalaksakni xwankgonit. Wa xlakata, xalhuwa latamanin ni lhuwa xwankgonit».

15. Kalichuwinanti la talhuwinit xalhuwa latamanin.

¹⁵ Pero titaxtulh kilhtamaku tsukuka kamalakgachakan misioneros kmakgapitsi kachikinin, chu xtatayananin Jehová tsukulh lhuwan.  Kkata 1968, tsukuka limakgalhtawakgenankan libro La verdad que lleva a vida eterna. Xlakata tuku xlichuwinan ni tuwa xʼakgatekgskan, lhuwa latamanin tsukukgolh talakatsuwikgo kxkachikin Jehová. Kaj akgtati kata titaxtulh, liwaka itat millón latamanin tamunukgolh. Chu lhuwa tiku tamunukgolh akxni lhuwa latamanin tsukukgolh tamakgatlinikgo pusikulan kʼAmérica Latina chu kʼamakgapitsi kachikinin, chu akxni tlakg tsukuka mastakan talakaskin nalichuwinankan Dios kʼEuropa oriental chu kʼÁfrica (Is. 60:22). Nina makgas kilhtamaku, xkachikin Jehová lakkaxwililh lhuwa tuku nakamakgtaya latamanin nalakgapaskgo tuku masiya Biblia. La uku, lhuwa latamanin talakatsuwimakgo kxkachikin Jehová, la uku liwaka 8 millones.

16. ¿Niku taxtukgonitancha xalhuwa latamanin?

¹⁶ Juan akxilhli pi xalhuwa latamanin «xtaxtukgonitancha kputum laklanka kachikinin, laklanka familias chu kachikinin chu tipalhuwa tachuwin xchuwinankgo». Palakachuwina Zacarías na xlichuwinanit uma. Xla tsokgwililh: «Ama kilhtamaku kgalhakaw lakchixkuwin naminkgo xalak tipalhuwa kachikinin chu tipalhuwa xtachuwinkan nachipakgo, chuna, xlikana liwana nachipakgo klhakgat chatum tiku judío,  chu nawankgo: “Nakkataʼanan, xlakata kkgaxmatnitaw pi Dios katalaman”» (Zac. 8:23).

17. ¿Tuku tatlawama la uku xlakata nakamakgtayakan lhuwa latamanin tiku minkgoyacha klaklanka kachikinin chu tipalhuwa tachuwin chuwinankgo?

¹⁷ Xtatayananin Jehová liwana katsiyaw pi, xlakata tlan nakamamakxtumikan latamanin tiku tipalhuwa tachuwin chuwinankgo, talakaskin pulana nakalitachuwinankan xalakwan tamakatsinin ktanu tanu tachuwin. Wa xlakata, liwakaya 130 kata lata matitaxtimaka kilikgalhtawakgakan ktanu tanu tachuwin. Chu la uku, tlakg talhuwinit uma taskujut chu lhuwa likgalhtawakga matitaxtikan klhuwa tachuwin. Xlikana pi Jehová tlawama akgtum milagro: Kamamakxtumima xalhuwa latamanin tiku minkgoyacha klaklanka kachikinin. Xlakata anan lhuwa liwat xaʼespiritual, umakgolh xlakskujnin Dios akxtum skujnanikgo Jehová. Chu kalilakgapaskan pi xatapaxuwan lichuwinankgo Dios chu lapaxkikgo. ¿Nixlikana pi uma lu matliwakglha kintakanajlakan? (Mat. 24:14; Juan 13:35).

18. 1) Chuna la wan Isaías 46:10, 11, ¿tuku xlakata ni kaks kinkamalakawaniyan pi Jehová makgantaxtinit tuku xlichuwinankanit xlakata xalhuwa latamanin? 2) ¿Tuku xlakata tiku kgalhkgalhimakgo nalatamakgo unu kKatiyatni ni lakpuwankgo pi nitu litaxtukgo?

¹⁸ Tlan nalipaxuwayaw uma tuku maʼakxilhnika Juan. Ni kaks kinkamalakawaniyan pi Jehová makgantaxtinit uma (kalikgalhtawakga Isaías 46:10, 11). Tiku makgtapakgsikgo kxalhuwa latamanin lu paxtikatsinikgo Jehová pi kamaxki lu xatlan takgalhkgalhin. Ni lakpuwankgo pi nitu litaxtukgo xlakata xlakan ni kalaksakka xlakata natamapakgsinankgo Jesús anta kʼakgapun. Biblia lichuwinan makgapitsin lakchixkuwin chu lakpuskatin tiku kapulalilh espíritu santo, pero ni makgtapakgsikgo kʼgrupo xla 144,000, la komo Juan tiku xMununan chu David (Mat. 11:11; Hech. 2:34). Xlakan chu lhuwa amakgapitsin nakamalakastakwanikan akxni kKatiyatni akgtum Paraíso nawan. Chu akxtum nakataskujkgo xalhuwa latamanin, chu tlan nalimasiyakgo komo ni makgxtakgkgo Jehová chu xTamapakgsin.

19. Komo liwana naʼakgatekgsaw tuku maʼakxilhnika Juan xlakata xalhuwa latamanin, ¿tuku talakaskin natlawayaw?

¹⁹ La uku kilhtamaku Jehová tlakg kamamakxtumima lhuwa latamanin xlakata nakakninanikgo nixawa xapulana. Komo kgalhkgalhimaw nalatamayaw kKatiyatni o naʼanaw kʼakgapun, kimputumkan talakaskin nakamakgtayayaw lhuwa latamanin xlakata namakgtapakgsikgo kʼgrupo xla lhuwa latamanin chu «amakgapitsi borregos» nalitaxtukgo (Juan 10:16). Nialh makgas, Jehová nalimin lhuwa tapatin nema nakamasputu laklanka mapakgsinanin xalak kakilhtamaku chu ni xaxlikana takanajla nema kamakgapatinankgo latamanin. Xalhuwa latamanin wi tuku lu tlan nalipaxuwakgo: naskujnanikgo Jehová unu kKatiyatni xliputum kilhtamaku (Rev. 7:14).