1. Akxni chatum lataman tamakxtukan kcongregación, ¿la max makgkatsikgo tiku xalak xfamilia?

AKXNI chatum lataman tamakxtukan kcongregación, tiku xalak xfamilia lu lilakgaputsakgo. Chatum tala puskat tiku wanikan Hilda * wan: «Kinchixku nikxni makgxtakgli Jehová chu nilh akxni 41 kata lata xaktamakgaxtokgnitaw, chu akit klakpuwa pi wa tuku tlakg nitlan xkiʼakgspulanit. Pero, akxni kinkgawasa, xpuskat chu xlakkamanan makgxtakgkgolh congregación tlakg nitlan kmakgkatsilh».

2, 3. Chuna la wan Salmo 78:40 chu 41, ¿la makgkatsi Jehová akxni kskujnanin makgxtakgkgo?

² Kalilakpuwaw la max lu nitlan limakgkatsilh Jehová akxni lhuwa ángeles, tiku xmakgtapakgsikgo kxfamilia lakgmakgankgolh (Jud. 6). ¿Chu tlan lilakpuwanaw la lu nitlan limakgkatsilh akxni akxilhli pi xkachikin nema lu xpaxki, Israel, makglhuwa lakatakilh? (Kalikgalhtawakga Salmo 78:40, 41). Komo chatum tiku wix paxkiya makgxtakga Jehová, liwana kakatsi pi kinTlatkan xalak akgapun tiku lu kinkapaxkiyan na katsani. Xla akgatekgsa pi wix patinampat chu nalimasiyaniyan pi lakgalhamanan akxni namatliwakglhan chu namakgtayayan chuna la namaklakaskina.

³ Kʼuma artículo nalichuwinanaw tuku tlan natlawayaw xlakata namakglhtinanaw xtamakgtay Jehová akxni tamakxtukan kcongregación chatum tiku paxkiyaw. Chu na nalichuwinanaw la tlan nakamakgtayayaw natalan xalak congregación tiku chuna titaxtumakgolh. Pero pulana kalichuwinaw akgtum nitlan tapuwan nema ni kilikgalhitkan.

4. ¿La makgkatsikgo lhuwa natlatni akxni chatum xkgawasakan o xtsumatkan makgxtakga Jehová?

⁴ Akxni chatum kgawasa o chatum tsumat makgxtakga Jehová, lhuwa natlatni lakpuwankgo tuku max tlan xtitlawakgolh xlakata  xkamakgtayakgolh ni xmakgxtakgkgolh Jehová. Akxni tamakxtuka kcongregación xkgawasa chatum tala tiku wanikan Luke, wa: «Xaklakpuwan pi akit xaklin kuenta, asta nitlan xakmanixnan. Xmin kilhtamaku xaktasa chu xkinkatsani kinaku». Chatum tala puskat tiku wanikan Elizabeth, tiku nachuna xtitaxtuma, xlakpuwan: «Max chatum nitlan tse klitaxtulh. Xakmakgkatsi pi ni lhuwa tuku xaktlawanit xlakata xakmasiyanilh xaxlikana kinkgawasa».

5. ¿Tiku lin kuenta akxni chatum lataman makgxtakga Jehová?

⁵ Kililakapastakatkan pi Jehová kimputumkan kinkamaxkinitan talakaskin kiʼakstukan nalaksakaw tuku natlawayaw. Wa xlakata kinchatunukan tlan nalaksakaw komo nakgalhakgaxmatniyaw o ni. Makgapitsi lakgkgawasan chu laktsuman ni kgalhikgolh natlatni tiku lu tlan liʼakxilhtit xlitaxtukgo, pero laksakkgolh naskujnanikgo Jehová chu ni makgxtakgkgonit. Chu amakgapitsin kgalhikgolh natlatni tiku lu liskujkgolh xlakata xkamakgastakkgolh chuna la wan Biblia, pero akxni stakkgolh makgxtakgkgolh Jehová. Uma kinkamasiyaniyan pi kinchatunukan kililaksakatkan komo naskujnaniyaw Jehová o ni (Jos. 24:15). Wa xlakata, natlatni, komo minkgawasakan o mintsumatkan makgxtakga Jehová, ni kalakpuwantit pi wixin lipinatit kuenta.

6. ¿La max namakgkatsi chatum kgawasa o chatum tsumat akxni xtlat o xtse makgxtakga Dios?

⁶ Min kilhtamaku, wa xatlat o xatse tiku makgxtakga xaxlikana chu asta max na makgxtakga xfamilia (Sal. 27:10). Uma max lu nitlan nakamamakgkatsinikgo xkamanankan tiku kaʼakxilhkgo xnatlatnikan chuna la akgtum lu xatlan liʼakxilhtit. Esther, wan tuku makgkatsilh akxni xtlat tamakxtuka kcongregación: «Makglhuwa xaktasa xlakata xakkatsi pi ni tsinu tsinu xtamakgatlininit xaxlikana, wata xlakkaxwilinit kxtalakapastakni namakgxtakga Jehová. Lu kpaxki kintlat. Wa xlakata, akxni tamakxtuka kcongregación putum kilhtamaku xalilakgaputsa komo tlan xwi chu xmin kilhtamaku asta lu xakpekuan».

7. ¿La kaʼakxilha Jehová lakgkgawasan chu laktsuman tiku xtlat o xtse tamakxtukanit kcongregación?

⁷ Kgawasa o tsumat, komo mintlat o mintse tamakxtukanit kcongregación, na lu nitlan klimakgkatsiyaw. Chu liwana kakatsitit pi Jehová na katsi tuku makgkatsiyatit. Xla kapaxkiyan chu lu paxuwa xlakata chuntiya skujnanipatit chu ni makgxtakgatit. Chu akinin, minatalankan, nachuna kmakgkatsiyaw. Na kalakapastaktit pi ni wixin lipinatit kuenta xlakata tuku minatlatnikan laksakkgonit. Chuna la akxilhwi, Jehová kinkamaxkinitan talakaskin nalaksakaw komo naskujnaniyaw. Chu chatunu chatunu xlaskujnin Dios tiku tamakamastaninit chu tamununit «nalin xtakuka nema lakgaya» (Gál. 6:5).

8. ¿Tuku tlan natlawakgo tiku makgtapakgsikgo kʼakgtum familia, chuna la nakgalhkgalhikgo pi chatum tiku xalak xfamiliajkan nalakgtaspitpara Jehová? (Na kaʼakxilhti recuadro « Jehová lakaskin kalakgtaspitti»).

⁸ Akxni tiku paxkiya makgxtakga xaxlikana, wix max nakgalhkgalhiya pi akgtum kilhtamaku nalakgtaspitpara Jehová. Pero, ¿tuku tlan natlawaya xlakata uma kilhtamaku nina chin? Chuntiya kakuentajtlawa mintakanajla. Komo chuna natlawaya, lu tlan liʼakxilhtit nakawiliniya atanu tiku xalak mifamilia chu max asta tiku tamakxtukanit kcongregación. Nachuna, uma namatliwakglhan xlakata natayaniya takatsanajwat chu talipuwan. Kalichuwinaw makgapitsi tuku tlan natlawaya xlakata chuntiya tliwakga natawila mintakanajla.

9. ¿Tuku namakgtayayan chuntiya tliwakga natawila mintakanajla? (Na kaʼakxilhti recuadro « Textos nema namatliwakglhan komo chatum tiku lu paxkiya makgxtakgnit Jehová»).

⁹ Katlawa putum tuku matlaniya xlakata tliwakga natawila mintakanajla. Lu xlakaskinka pi namatliwakglha chuna la tlan talalipina Jehová chu chuna la mifamilia talalin Jehová. ¿La tlan chuna natlawaya? Pulaktum tuku namakgtayayan tliwakga natawila mintakanajla wa chali chali nalikgalhtawakgaya xTachuwin Dios chu nalilakpuwana, chu nachuna napina ktamakxtumit. Kalilakpuwaw tuku titaxtulh Joanna. Xtlat chu xtala tsumat makgxtakgkgolh xaxlikana. Xla wan: «Akxni klikgalhtawakga tuku titaxtukgolh makgapitsi tiku kalichuwinankan kBiblia chuna la Abigaíl, Ester, Job, José chu Jesús, skaya kmakgkatsi. Xliʼakxilhtitkan tlawa pi kkinaku chu kkintalakapastakni kajwatiya naʼanan tlan tapuwan nema tlawa pi nialh lu naklakgaputsa. Takilhtlin nema taxtukgo kJW Broadcasting na lu kimatliwakglhkgo».

10. Chuna la wan Salmo 32:6-8, ¿tuku tlan natlawayaw komo lu lakgaputsayaw?

¹⁰ Kalitachuwinanti Jehová putum tuku lilakgaputsaya. Akxni lu lakgaputsapat, chuntiya katlawani oración. Katasaskini kiDioskan tiku lu lakgalhamanan pi kamakgtayan naʼakxilha tuku lama chuna la xla akxilha chu kaskini kamaxkin taʼakgatekgsni chu kamasiyanin tuku tiji milianat (kalikgalhtawakga Salmo 32:6-8). Xlikana, max lu nitlan nalimakgkatsiya nawaniya putum tuku makgkatsiya. Pero Jehová liwana akgatekgsniyan. Xla lu paxkiyan chu waniyan pi kawani putum tuku lilakgaputsaya (Éx. 34:6; Sal. 62:7, 8).

11. Chuna la wan Hebreos 12:11, ¿tuku xlakata kilipawanatkan pi akxni wi tiku tamakxtukan kcongregación chuna tlawakan xlakata Jehová kinkapaxkiyan? (Na kaʼakxilhti recuadro « Akxni wi tiku tamakxtukan kcongregación wa pulaktum tuku Jehová limasiya tapaxkit»).

¹¹ Katataya tuku laksakkgonit lakgkgolotsin. Tamakxtukan chatum lataman anta kcongregación  wa pulaktum tuku limasiyakan tapaxkit nema Jehová lakkaxwilinit xlakata tlan nakakitaxtuni putum tiku wilakgolh kcongregación, chu na limasiyanikan tapaxkit tiku lakgalhinanit (kalikgalhtawakga Hebreos 12:11). Makgapitsi max nawankgo pi lakgkgolotsin nitlan tuku tlawakgolh akxni wi tiku tamakxtukgolh kcongregación, pero kalakapastakti pi tiku chuna wankgo max ni katilichuwinankgolh tuku nitlan tlawalh tiku tamakxtuka chu akinin ni liwana katsiyaw putum tuku lalh. Wa xlakata tlan nalipawanaw pi lakgkgolotsin tiku tlawakgolh comité judicial tlawakgolh putum tuku matlanikgolh xlakata kstalanikgolh xtastakyaw Biblia chu lakputsanankgolh chuna la Jehová lakaskin (2 Crón. 19:6).

12. ¿La litamakgtayakgonit makgapitsi xlakata tatayakgonit tuku Jehová lakkaxwilinit?

¹² Komo natatayaya tuku lakkaxwilikgonit lakgkgolotsin pi natamakxtukan kcongregación chatum tiku xalak mifamilia, max namakgtayaya nalakgtaspita Jehová. Elizabeth, tiku lichuwinaw kpárrafo 4, wan: «Lu tuwa kmakgkatsiw nialh xaktalaliw kinkgawasakan tiku lankata xwanit. Pero, akxni lakgtaspitli Jehová, wa pi xlakgchan natamakxtukan. Chu titaxtulh kilhtamaku wa pi xkatsininit lhuwa tuku lu xtapalh. Uma tlawalh pi lu xtapalh xakliʼakxilhli akxni Jehová lakkaxwili wi tiku natamakxtukan kcongregación». Xchixku, tiku wanikan Mark, wan: «Akglhuwa kata alistalh, kinkgawasa kiwanilh pi pulaktum tuku xtlawanit pi xlakgtaspitpa Jehová wa xlakata nipara tsinu xaktalalinitaw. Lu kpaxtikatsini Jehová pi kinkamakgtayan nakkgalhakgaxmatnanaw».

13. ¿Tuku namakgtayayan ni lu nalakgaputsaya?

¹³ Kakatachuwinanti miʼamigos tiku naʼakgatekgskgo tuku makgkatsiya. Kalimaxtu kilhtamaku akxtum nakatatawilaya natalan tiku tliwakga takanajla kgalhikgo, tiku tlan namakgtayakgoyan tlan talakaspastakni nakgalhiya (Prov. 12:25; 17:17). Joanna, tiku lichuwinaw kpárrafo 9, wan: «Xakmakgkatsi pi kiʼakstu xakwi. Pero tuku kimakgtayalh wa xakkatachuwinalh kiʼamigos tiku xakkalipawan». Pero ¿tuku tlan natlawaya komo chatum nawaniyan tuku tlakg nitlan namamakgkatsiniyan?

14. ¿Tuku xlakata talakaskin chuntiya nalatapatiyaw?

¹⁴ Ni lakapala kakasitsini natalan. Ni kakgalhkgalhiw pi putum kilhtamaku nakinkawanikgoyan laktlan tachuwin (Sant. 3:2). Xlakata kimputumkan makglakgalhinanin, ni kaks kalilakawanti pi makgapitsi ni nakatsikgo tuku nawanikgoyan o komo nawanikgoyan tuku nalimakgalipuwankgoyan. Kalakapastakti xtastakyaw apóstol Pablo: «Chuntiya kalatatayanitit chu lu kalatapatiputuntit maski wi tuku nakalimakgasitsikanatit» (Col. 3:13). Chatum tala puskat tiku tamakxtuka kcongregación tiku xalak xfamilia, wan: «Jehová kimakgtayanit nakkatapati natalan tiku xtlawaputunkgo tuku tlan, pero xlakata makglakgalhinanin nila xmakgantaxtikgo». La uku kaʼakxilhwi tuku tlan natlawa congregación xlakata tlan namakgtaya xfamilia tiku tamakxtukanit kcongregación.

15. ¿La tlan nakamakgtayayaw xfamiliajkan tiku nina makgas katamakxtukanit kcongregación?

¹⁵ Kakalimasiyaniw talakgalhaman chu tapaxkit xfamiliajkan tiku katamakxtukanit kcongregación chu ni makgxtakgkgo Dios. Chatum tala tiku wanikan Míriam wan pi ni xʼamputum ktamakxtumit akxni xtala xtamakxtukanita kcongregación.  Wan: «Xaklilakgaputsa tuku xlakpuwankgolh amakgapitsin. Pero na xwilakgolh amigos tiku tlan xlikatsikgo chu na xlilipuwamakgo chu ni xwankgo tuku nitlan xpalakata kintala. Xlakata tuku tlawakgolh, ni kmakgkatsilh pi kiʼakstu xakwi». Atanu tala puskat lakapastaka: «Akxni tamakxtuka kcongregación kinkgawasakan, minkgolh natalan tiku xkinkapaxkikgoyan chu kinkamakgoxamixikgon. Makgapitsi wankgolh pi ni xkatsikgo tuku nawankgo. Kintatasakgolh chu makgapitsi kintsokgnanikgolh. Lu kimakgtayalh tuku tlawakgolh».

16. ¿La tlan chuntiya nakamakgtaya congregación xfamiliajkan tiku katamakxtukanit?

¹⁶ Chuntiya kakamakgtayaw xfamiliajkan tiku katamakxtukanit kcongregación. La uku tlakg maklakaskinkgo kakapaxkiw chu kakamatliwakglhwi (Heb. 10:24, 25). Lakgachunin, makgapitsi xfamiliajkan tiku katamakxtukanit kcongregación akxilhkgonit pi makgapitsi natalan nialh katachuwinankgonit, la komo xlakan na katamakxtukanit kcongregación. ¡Nikxni chuna katlawaw! Lakgkgawasan chu laktsuman tiku xnatlatnikan katamakxtukanit kcongregación tlakg maklakaskinkgo kakamatliwakglhwi chu kakawaniw laktlan tachuwin. Chatum tala tiku wanikan María lichuwinan tuku titaxtulh akxni xchixku tamakxtuka kcongregación chu makgxtakgli xfamilia: «Makgapitsi kiʼamigos kilakgminkgolh kkinchik, tlawakgolh liwat chu kimakgtayakgolh xakkatakgalhtawakgalh kinkamanan. Makgkatsikgolh tuku xakmakgkatsi chu kintatasakgolh. Chu na kinkgalhmakgtayakgolh akxni amakgapitsi wankgolh taʼakgsanin kimpalakata. Lu kimatliwakglhkgolh» (Rom. 12:13, 15).

17. ¿Tuku tlan natlawakgo lakgkgolotsin xlakata nakamakgoxamixikgo tiku patinamakgolh?

¹⁷ Lakgkgolotsin, kalimaxtutit kilhtamaku xlakata nakamatliwakglhatit xfamiliajkan tiku katamakxtukanit. Wixin tiku tlakg kgalhiyatit talakgatay nakamakgoxamixiyatit natalan tiku xalak xfamilia makgxtakgkgonit Jehová (1 Tes. 5:14). Xlakata nakamakgpuwantiniyatit kakatachuwinantit akxni nina tsuku tamakxtumit chu akxni kgalhsputnita. Kakalakgapaxialhnantit chu katlawatit oración xpalakatakan. Akxtum kakalitachuwinantit Dios chu kakawanitit naʼankgo kminchikkan akxni nakakninaniyatit Dios kfamilia. Xlilat pi lakgkgolotsin nakalimasiyanikgo laktsu xborrego Jehová tiku patinamakgolh pi kalakgalhamankgo,  kapaxkikgo chu nakamakgtayakgo chuna la maklakaskinkgo (1 Tes. 2:7, 8).

18. Chuna la wan 2 Pedro 3:9, ¿tuku lakaskin Jehová katlawakgolh tiku nialh skujnanimakgolh?

¹⁸ Jehová «ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (kalikgalhtawakga 2 Pedro 3:9). Maski chatum lataman natlawa akgtum lanka talakgalhin, xlatamat chuntiya lu xtapalh litaxtu kxlakatin Dios. Kalakapastakti pi Jehová mastalh tuku lu xtapalh xlakata xkinkalakgmaxtun: xlatamat xKgawasa tiku lu paxki. Dios kalimasiyani tapaxkit akxni kamakgtaya tiku makgxtakgkgonit xlakata nalakgtaspitkgo. Chu lakaskin pi kalakgtaspitkgolh, chuna la katsiniyaw kparábola nema lichuwinalh Jesús xlakata kgawasa tiku xʼakgtsankgatayanit (Luc. 15:11-32). Lhuwa tiku makgxtakgkgonit xaxlikana alistalh lakgtaspitparakgonit xapaxkina xTlatkan xalak akgapun, chu congregación lu tlan kamakgamakglhtinankgonit. Elizabeth, tiku lichuwinanitawa, lu paxuwalh akxni xkgawasa makgamakglhtinamparaka kcongregación. Xla wan: «Lu kkapaxtikatsini putum tiku kimakgpuwantinikgolh pi ni xaktaxlajwanilh».

19. ¿Tuku xlakata tlan chuntiya nalipawanaw Jehová?

¹⁹ Putum kilhtamaku tlan nalipawanaw Jehová. Xla nikxni kintikaskinin tuku nitlan nakinkakitaxtuniyan. Xla chatum Tlat tiku lhuwa tuku masta, lakgalhamaninan chu lu kapaxki tiku paxkikgo chu kakninanikgo. Liwana kakatsiw pi Jehová ni kintikamakgxtakgni akxni natitaxtuyaw tuku tuwa (Heb. 13:5, 6). Mark, tiku lichuwinaw kpárrafo 12, wan: «Jehová nikxni kinkamakgxtakgni. Xla ankgalhin akxtum kinkatawilan akxni titaxtuyaw tuku tuwa». Dios chuntiya nakinkamaxkiyan «litliwakga tuku latamanin nila kgalhikgo» (2 Cor. 4:7). Chuna, tlan chuntiya nakgalhiyaw takgalhkgalhin chu akgtum tliwakga takanajla maski tiku lu paxkiyaw namakgxtakga Jehová.