1. ¿Tuku tlan natlawayaw akxni akxilhaw pi kgolomaw?

AKXNI akxilhaw pi kgolomaw max lilakgaputsayaw akxni lakpuwanaw pi nialh katiskujnaniw Jehová chuna la xapulana. Xlikana pi max nialh lhuwa litliwakga katikgalhiw, pero tlan nalimaklakaskinaw liskgalala chu tuku katsininitaw chuna la titaxtunit kata xlakata nakalimakgtayayaw lakgkgawasan chu laktsuman tlakg lhuwa tuku nalimakgtayanankgo kxkachikin Jehová, chu namakgamakglhtinankgo tuku xasasti nakalakgayawakan. Chuna la wa chatum tala tiku akglhuwata kata la skujma chuna la kgolotsin: «Akxni kmakgkatsilh pi ktsukulh kgolon kpaxtikatsinilh xlakata xʼanankgo natalan lakgkgawasan tiku tlan xtlawakgolh taskujut».

2. ¿Tuku naʼakxilhaw kʼuma artículo?

² Kʼartículo nema titaxtulh, akxilhwi pi kamanan kamakgtaya akxni xʼamigos litaxtukgo tiku linkgoya kata. Kʼuma artículo, naʼakxilhaw pi tayat la tataktujut, katsikan pi ni putum tlan tlawakan, paxtikatsininankan chu lhuwa tuku maskiwinankan tlan nakamakgtaya natalan tiku linkgoya kata xlakata makxtum nakataskujkgo lakgkgawasan chu laktsuman, chu uma nalitamakgtaya putum congregación.

3. 1) Chuna la wan Filipenses 2:3, 4, ¿tuku kilhchanima limasiyakan tataktujut? 2) ¿La makgtaya tataktujut chatum kstalanina Cristo?

³ Komo tiku linkgoya kata kamakgtayaputunkgo tiku lakgkgawasanku, xlikgalhitkan tataktujut. Tiku limasiya tataktujut tlakg xlakaskinka kaʼakxilha amakgapitsin (kalikgalhtawakga Filipenses 2:3, 4). Tiku linkgoya kata chu limasiyakgo  uma tayat akgatekgskgo pi akxni wi tuku tlawakan max pulaklhuwa la tlan chuna natlawakan, chuna la ni nalakatsala tuku wan Biblia chu tlan nakitaxtu. Wa xlakata ni kgalhkgalhikgo pi amakgapitsin natlawakgo taskujut chuna la xlakan xtlawakgo xapulana (Ecl. 7:10). Maski lhuwa tuku tlan xkamasiyanikgolh amakgapitsin, xlakata lhuwa tuku katsinikgonit, liwana lakapastakkgo pi «xlakata tuku lama kkakilhtamaku talakgpalima» max natalakaskin nakatsinikgo tlawakgo tuku xalaksasti (1 Cor. 7:31).

4. ¿La limasiyakgo superintendentes de circuito tayat chuna la xkgalhikgo levitas?

⁴ Natalan tiku linkgoya kata chu limasiyakgo tataktujut akgatekgskgo pi chuna la titaxtu kilhtamaku nialhla lhuwa tuku tlawakgo chuna la xapulana. Akgtum liʼakxilhtit, kalilakpuwaw xlakata superintendente de circuito. Akxni makgatsikgo 70 kata, atanu taskujut kalakgayawakan. Max xapulana uma lu tuwa namakgkatsikgo xlakata lu xlakgatikgo la xkaskujnanikgo xnatalankan. Lu xlakgatikgo taskujut nema xtlawakgo, chu chuntiya tlawaputunkgo. Pero akgatekgskgo pi tlakg tlan natlawakgo uma taskujut natalan tiku tlakg lakgkgawasanku. Xtayatkan xtachuna tayat nema xkgalhikgo levitas kxamakgan Israel, tiku xmakgxtakgkgo taskujut nema xtlawakgo ktabernáculo akxni xmakgatsikgo 50 kata. Umakgolh levitas xkamakgapaxuwa kaxatukawa taskujut nema xtlawakgo, tlawakgolh putum tuku xmatlanikgo kamakgtayakgolh tiku lakgkgawasanku xwankgonit (Núm. 8:25, 26).  La uku, maski superintendentes de circuito tiku makgatsikgo 70 kata nialh kalakgapaxialhnankgo congregaciones, chuntiya makgtayanankgo chu makgpuwantininankgo kcongregación niku lakskujmakgolh.

5. ¿Tuku masiyaniyan xliʼakxilhtit Dan chu Katie?

⁵ Kalichuwinaw xliʼakxilhtit Dan, tiku skujli 23 kata la superintendente de circuito. Akxni makgatsilh 70 kata, xla chu xpuskat, Katie, precursores especiales kalimaxtuka. ¿La kakitaxtunima kxasasti xtaskujutkan? Dan wan pi la uku tlakg lhuwa taskujut kgalhi chuna la makgtayanama kcongregación, kamakgtaya natalan xlakata siervos ministeriales nalitaxtukgo chu kamasiyani amakgapitsin xlakata nalichuwinankgo Dios niku titaxtukgo lhuwa latamanin chu nachuna kpulachin. Natalan tiku kgalhiyatita kata, maski skujnanipatit Dios putum kilhtamaku o ni, lhuwa tuku tlan natlawayatit xlakata nakamakgtayayatit amakgapitsin. ¿La tlan chuna natlawayatit? Kalismanitit tuku talakgpalinit kmilatamatkan, kalakkaxwilitit tuku tlan nalakgchipinatit chu kalilakpuwantit tuku tlan tlawayatit.

6. ¿Tuku xlakata limasiyakan liskgalala akxni katsikan pi ni putum tlan tlawakan? Kawili akgtum liʼakxilhtit.

⁶ Tiku katsi pi ni putum tlan tlawa ni lakpuwan pi natlawa tuku ni katimatlanilh (Prov. 11:2). Uma namakgtaya xlakata napaxuwa chu chuntiya naskujnani Jehová. Tiku katsi pi ni putum tlan tlawa tlan natamalakxtumikan tiku matlawani xputlaw kkasipijni, xlakata tlan natawaka, talakaskin ni lakapala nalin xputlaw. Xtachuna uma, lataman tiku katsi pi nila tlan putum tlawa katsi akxni wi tuku xlilakgpalit xlakata chuntiya naskujnani Jehová chu nakamakgtaya amakgapitsin (Filip. 4:5).

7. ¿La limasiyalh Barzilái pi ni putum tlan xtlawa?

⁷ Kaʼakxilhwi xliʼakxilhtit Barzilái, tiku xkgalhi 80 kata akxni mapakgsina David wanilh pi xmakgtapakgsilh kxpumapakgsin. Uma chixku limasiyalh pi xkatsi pi ni putum tlan xtlawa chu ni makgamakglhtinalh tuku xwanima mapakgsina. Xla xkatsi pi xlakata xkgolonita nialhla xʼama makgantaxti xtaskujut chu wa xlakata wa pi Kimham, tiku tlakg kgawasaku xwanit, wa tiku xlakgxokgo kskujli (2 Sam. 19:35-37). Chuna la Barzilái, natalan tiku linkgoya kata, paxuwakgo akxni kamaxkikgo talakaskin tiku tlakg lakgkgawasanku namakgantaxtikgo akgtum taskujut.

8. ¿La limasiyalh David pi xkatsi pi ni putum tlan xtlawa akxni tlawaputulh templo?

⁸ Mapakgsina David na kinkawilinin akgtum tlan liʼakxilhtit. Xlakata limasiyalh pi ni putum tlan xtlawa. Xliputum xnaku xtlawaniputun Jehová akgtum chiki. Pero akxni Jehová wanilh pi wa xlaksaknit Salomón, xkgawasa, xlakata wa xtlawalh uma chiki, David makgamakglhtinalh chu makgtayalh xlakata tlan xmakgantaxtilh (1 Crón. 17:4; 22:5). Ni lakpuwa pi wa xlitlawat xwanit uma taskujut xlakata Salomón kgawasaku xwanit chu nina lhuwa tuku xkatsini (1 Crón. 29:1). David xkatsi pi xlakata tlan xmakgantaxtika uma taskujut xtalakaskin xtasikulunalin Jehová chu ni lu xtalakaskin pi tiku xpulalinkgolh umakgolh taskujut lu xlinkgolha kata o lhuwa tuku xkatsinikgolh. Chuna la David, kstalaninanin Cristo tiku linkgoya kata la uku chuntiya skujnanikgo Dios maski talakgpalinit tuku lakgayakgolh kxkachikin. Chu katsikgo pi Jehová nakasikulunatlawa lakgkgawasan tiku la uku tlawakgo taskujut nema xlakan xtlawakgo xapulana.

9. ¿La limasiyalh pi xkatsi pi nila putum tlan xtlawa chatum tala tiku makgtapakgsi akgtum Comité de Sucursal?

⁹ Akgtum liʼakxilhtit xalak kinkilhtamakujkan xlakata tiku katsi pi nila putum tlan tlawa wa chatum tala tiku wanikan Shigeo.  Kkata 1976, akxni xkgalhi 30 kata, lakgayawaka namakgtapakgsi akgtum Comité de Sucursal. Kkata 2004, litaxtulh coordinador xla uma comité. Titaxtulh kilhtamaku makgkatsilh pi nialh lu tliwakga xwanit chuna la xapulana chu nialh lu lakapala xtlawa xtaskujut. Wa xlakata litachuwinalh Jehová xlakata uma, chu lilakpuwa tuku tlan xkitaxtulh komo chatum tala tiku tlakg kgawasaku xlakgatayalh taskujut nema xla xkgalhi. La uku, nialh coordinador litaxtu, pero chuntiya makgtapakgsi kComité de Sucursal chu chuntiya kamakgtaya tiku anta tapakgsikgo. Xliʼakxilhtitkan Barzilái, mapakgsina David chu Shigeo kinkamasiyaniyan pi tiku taʼaktuju chu ni lakpuwan pi putum tlan tlawa ni wa akxilha pi tiku lakgkgawasanku nina lhuwa tuku katsinikgo, wata wa kuenta tlawa tuku tlan tlawakgo. Nakaʼakxilha xtachuna tiku akxtum kataskuja, chu ni la xtalamakgasitsin (Prov. 20:29).

10. Natalan tiku linkgoya kata, ¿la kaʼakxilhkgo natalan tiku lakgkgawasanku xalak congregación?

¹⁰ Natalan tiku linkgoya kata, kaliʼakxilhkgo natalan lakgkgawasan chuna la xtamaskiwin Jehová chu paxtikatsininankgo xlakata tuku tlawakgo. Xlakata xlitliwakgakan litaktama, xtapalh akxilhkgo pi lakgkgawasanku tiku kgalhikgo litliwakga namakgtayanamputunkgo chu naliskujkgo tuku talakaskin kcongregación.

11. ¿La limasiya Rut 4:13-16 pi tiku linkgoya kata litamakgtayakgo akxni paxtikatsininankgo xtamakgtaykan tiku tlakg lakgkgawasanku?

¹¹ Noemí akgtum lu tlan liʼakxilhtit nema lichuwinan Biblia xlakata chatum tiku xlina kata chu paxtikatsininalh. Chu makgamakglhtinalh xtamakgtay tiku tsumatku xwanit. Akxni xkgawasa Noemí xninita, xla wanilh xpuwiti Rut pi xkalakgtaspitli xfamilia. Pero,  akxni Rut wanilh pi ni xʼama makgxtakga chu xʼama taʼan kBelén, Noemí makgamakglhtinalh xtamakgtay (Rut 1:7, 8, 18). Chu uma litaxtulh lanka tasikulunalin xpalakatakan (kalikgalhtawakga Rut 4:13-16). Natalan tiku linkgoya kata chu tataktujukgo stalanikgo xliʼakxilhtit Noemí.

12. ¿La limasiyalh apóstol Pablo pi xpaxtikatsininan?

¹² Apóstol Pablo atanu liʼakxilhtit xlakata tiku paxtikatsininalh tamakgtay nema maxkika. Akgtum kilhtamaku, xla kamaxkilh tapaxtikatsinit natalan xalak Filipos xlakata tamakgtay nema malakgachanikgolh (Filip. 4:16). Nachuna, wa pi lu xpaxtikatsini Timoteo xlakata la xmakgtayanit (Filip. 2:19-22). Chu maxkilh tapaxtikatsinit Dios xlakata natalan tiku ankgolh makgpuwantinikgo akxni chilinka kRoma (Hech. 28:15). Pablo chatum chixku tiku tliwakga xwanit, lhuwa miles kilómetros xʼan lichuwinan Dios, chu xkamatliwakglha congregaciones. Pero ni mastalh talakaskin pi tatlankit xtlawalh pi ni xmakgamakglhtinalh tamakgtay nema maxkikgolh natalan.

13. ¿La tlan nalimasiyakgo natalan tiku linkgoya kata pi paxtikatsininankgo xlakata tuku tlawakgo tiku nina lhuwa kata kgalhikgo?

¹³ Natalan tiku lipinatita kata, anan lhuwa la tlan nalimasiyayatit pi paxtikatsiniyatit tuku tlawakgo tiku lakgkgawasanku anta kmincongregacionkan. Komo nakawanikgoyan pi nakalinkgoyan akxni napinatit tamawananatit, o akxni napinatit tlawayatit atanu tuku maklakaskinatit, kapaxtikatsinitit xtamakgtaykan chu kamakgamakglhtinantit. Kaliʼakxilhtit la komo Jehová kalimasiyaniman xtapaxkit. Ni katikatsi komo uma natlawa pi tlan amigos nalitaxtuyatit. Nachuna, ankgalhin kalilakgaputsatit pi umakgolh lakkamanan tlakg natalakatsuwinikgo Jehová. Kakawanitit la xlilhuwa lipaxuwayatit pi anankgo lakkamanan tiku lu liskujmakgo xlakata tlakg namakgtayanankgo kcongregación. Chu kakalimaxtunitit kilhtamaku xlakata nakalitachuwinanatit tuku wixin titaxtunitantit. Akxni chuna natlawayatit, nalimasiyayatit pi paxtikatsiniyatit Jehová xlakata xla kaliminit kcongregación lakgkgawasan chu laktsuman (Col. 3:15; Juan 6:44; 1 Tes. 5:18).

14. ¿La limasiyalh mapakgsina David pi xatapaxuwan xmasta tuku xkgalhi?

¹⁴ Mapakgsina David akgtum lu tlan liʼakxilhtit xlakata limasiyalh atanu lu xlakaskinka tayat nema na xlikgalhitkan natalan tiku linkgoya kata: wa xatapaxuwan namastakan tuku kgalhikan. Xla xatapaxuwan mastalh tuku xtapalh xkgalhi xlakata xlimakgtayanalh akxni xtlawaka templo (1 Crón. 22:11-16; 29:3, 4). Chuna tlawalh maski xkatsi pi wa Salomón, xkgawasa, wa tiku xʼamaka maxkikan kakni xlakata uma taskujut. Komo wix lipinata kata chu nialh kgalhiya litliwakga xlakata namakgtlawaya Pukgalhtawakga nema tlawayaw, tlan chuntiya nalimakgtayanana mintumin chuna la matlaniya. Chu kakamatitaxtini tiku lakgkgawasanku chu laktsuman tuku wix katsininita putum uma kata nema latapanita.

15. ¿Tuku lu lhuwa xtapalh matitaxtinilh Pablo Timoteo?

¹⁵ Apóstol Pablo na lu tlan liʼakxilhtit litaxtu xlakata xatapaxuwan mastalh tuku xkgalhi. Wanilh Timoteo pi akxtum xtaʼalh akxni makgat xʼalh lichuwinan Dios chu masiyanilh la tlan xlichuwinalh Dios chu la xmasiyalh (Hech. 16:1-3). Tastakyaw nema maxkilh apóstol Pablo, makgtayalh xlakata tlan makgalhtawakgena xlitaxtulh akxni xlichuwinalh xatlan tamakatsinin (1 Cor. 4:17). Chu Timoteo, na limaklakaskilh tuku Pablo xmasiyaninit xlakata xkamasiyanilh amakgapitsin.

16. ¿Tuku xlakata Shigeo kamasiyanilh amakgapitsin?

 ¹⁶ Natalan tiku linkgoya kata xala uku ni lipekuankgo pi nialhtu nalitaxtukgo komo nakamasiyanikgo natalan tiku tlakg lakgkgawasanku natlawakgo taskujut nema xlakan xlakgayakgolh. Akgtum liʼakxilhtit, Shigeo, tiku lichuwinaw kpárrafo 9, umakgolh kata nema titaxtunit kamasiyaninit natalan tiku tlakg lakgkgawasanku chu makgtapakgsikgo kComité de Sucursal. Chuna tlawalh xlakata xmakgtayanalh ktaskujut xla Tamapakgsin kpaís niku skujnanima Dios. Wa xlakata, akxni lakgchalh kilhtamaku, makgxtakgli taskujut nema xlakgaya chuna la coordinador xlakata xwi chatum tala tiku tlan xtlawalh taskujut nema xla xtlawa. Shigeo chuntiya kamasiyanima natalan lakgkgawasan tuku katsininit chuna la skujli kComité de Sucursal liwaka 45 kata. Xlikana pi natalan chuna la Shigeo, akgtum tasikulunalin litaxtukgo kxkachikin Dios.

17. ¿Tuku tlan namastakgo tiku linkgoya kata? (Lucas 6:38).

¹⁷ Natalan tiku lipinatita kata, wixin wa tuku litasiya pi skujnanikan chu ni makgxtakgkan Jehová wa tlakg xatlan latamat. Miliʼakxilhtitkan limasiya pi tlan kitaxtu akxni liskujkan nalakgapaskan xtastakyaw Biblia chu nalilatamakan. Xlakata tuku titaxtunitantit katsiyatit la kskujnanikan Dios makgasa, pero na akxilhatit pi lu xlakaskinka natlawayatit tuku xasasti lakkaxwilikanit. Chu komo makgapitsi wixin nina makgas chuna la tamununitantit, na lhuwa tuku tlan natlawayatit, xlakata tlan nakalitachuwinanatit amakgapitsin tuku xlakata kamakgapaxuwayan pi lakgapastit Jehová maski lipinatita kata. Lakkamanan lu nalakgatikgo nakakgaxmatnikgoyan tuku titaxtukgonitantit chu tuku katsininitantit. Komo lismaninitantit nalichuwinanatit putum tuku katsininitantit, Jehová lu nakasikulunatlawayan (kalikgalhtawakga Lucas 6:38).

18. ¿La tlan makxtum nalamakgtayakgo tiku linkgoya kata chu tiku lakgkgawasanku?

¹⁸ Komo tiku linkgoya kata nalakgtalakatsuwinikgo tiku lakgkgawasanku, tlan nalamakgpuwantini (Rom. 1:12). Chatunu chatunu kgalhi tuku lhuwa xtapalh nema atanu ni kgalhi. Tiku linkgoya kata lhuwa tuku katsinikgonit chu kgalhikgo liskgalala xlakata tlakg lhuwata kata la latamakgonit. Chu lakgkgwasan kgalhikgo litliwakga. Akxni tiku lakgkgawasanku chu tiku linkgoya kata akxtum skujkgo chuna la amigos, malankikgo xapaxkina kinTlatkan xalak akgapun chu akgtum tasikulunalin litaxtukgo kcongregación.