ARTÍCULO NEMA NATALIKGALHTAWAKGA 40
Lhuwa tiku kamakgtayakan “xlakata natlawakgo tuku xaʼakgstitum”
«Tiku nakamakgtayakgo amakgapitsin xlakata natlawakgo tuku xaʼakgstitum, namakaxkgakgenankgo chuna la staku, xliputum kilhtamaku» (DAN. 12:3).
TAKILHTLIN 151 Jehová nakatasani
TUKU NATALICHUWINAN a
1. ¿Tuku lu tlan nala akxni Cristo namapakgsinan Akgtum Mil Kata?
¿LILAKPUWANAW la nawan kilhtamaku akxni natsuku talakastakwanat unu kKatiyatni akxni namapakgsinan Cristo Akgtum Mil Kata? Putum tiku makgatsankganitaw kkalinin tiku kapaxkiyaw kaʼakxilhputunaw chu Jehová na kaʼakxilhputun (Job 14:15). Kalilakpuwaw tapaxuwan nema naʼanan kxlikalanka Katiyatni akxni latamanin nakaʼakxilhparakgo xfamiliajkan. Chuna la katsiniw kʼartículo nema titaxtulh, «xaʼakgstitum» latamanin, tiku tsokgwilikanit xtukuwanikan klibro xla latamat, «nakamalakastakwanikan xlakata nakgalhikgo latamat» (Hech. 24:15; Juan 5:29). Lhuwa kintalilakgapasnikan tiku kapaxkiyaw max wa pulana tiku nakamalakastakwanikan kKatiyatni. b Nachuna, «tiku ni xaʼakgstitum», tiku nila lakgapaskgolh Jehová chu nila skujnanikgolh «nakamalakastakwanikan xlakata nakalakputsananikan».
2, 3. 1) Chuna la wan Isaías 11:9, 10, ¿la natlawakan uma lanka tamasiy nema nikxni chuna tlawakanit? 2) ¿Tuku nalichuwinanaw kʼuma artículo?
2 Putum tiku nalakastakwanankgo lhuwa tuku xlikatsinitkan nawan (Is. 26:9; 61:11). Wa xlakata, lu xlakaskinka nawan pi namatsukikan tamasiy nema nikxni chuna tlawakanit (kalikgalhtawakga Isaías 11:9, 10). Tiku ni xaʼakgstitum xlikatsinitkan nawan xlakata Jesucristo, xTamapakgsin Dios, talakgmaxtut chu xlakata la natamasantujli xtukuwani Jehová chu pi kajwatiya xla lakgchan namapakgsinan. Asta tiku xaʼakgstitum xlikatsitkan nawan tuku Jehová lakkaxwilinit natlawa. Makgapitsi umakgolh xlakskujnin Jehová, nikgolh akxni nina xtsokgwilikgokan Biblia. Liwana tasiya pi tiku ni xaʼakgstitum chu tiku xaʼakgstitum lhuwa tuku xlikatsinitkan nawan.
3 Kʼuma artículo nakgalhtiyaw umakgolh takgalhskinin: ¿la namakgantaxtikan uma lu xlakaskinka tamasiy?, ¿la nakakitaxtuni tiku namakgamakglhtinankgo uma tamasiy? chu ¿tuku nakakitaxtuni tiku ni namakgamakglhtinankgo? Chuna la naʼakxilhaw, makgapitsi tuku lu xlakaskinka lichuwinan libro xla Daniel chu Apocalipsis nakinkamakgtayakgoyan naʼakgatekgsaw tuku nala akxni naʼanan talakastakwanat. Pulana kalichuwinaw tuku lu xlakaskinka nala nema talichuwinan kDaniel 12:1, 2.
«TIKU LHTATAMAKGOLH […] NALAKASTAKWANANKGO»
4, 5. ¿Tuku wan Daniel 12:1 pi xʼama la kxlisputni kakilhtamaku?
4 (Kalikgalhtawakga Daniel 12:1). Libro xla Daniel kinkawaniyan chuna la nakgantaxtutilha makgapitsi tuku xlakaskinka kxaʼawatiya kilhtamaku. Akgtum liʼakxilhtit, Daniel 12:1 wan pi Miguel, wa Jesucristo, «ya xlakata namakgtaya» xkachikin Dios. Uma tuku xlichuwinankanit tsukulh kgantaxtu kkata 1914, akxni Jesús Mapakgsina limaxtuka anta kxTamapakgsin Dios.
5 Pero, Daniel na wanika pi Jesús xʼama makgtaya xkachikin Dios akxni «xʼanalh talakgaputsit chuna la nikxni xʼananit lata lakatsukulh lanka kachikin asta amacha kilhtamaku». Uma kilhtamaku xla talakgaputsit wa «lhuwa tapatin» nema lichuwinan Mateo 24:21. Jesús taya, o makgtaya xkachikin Dios, kxlisputni uma talakgaputsit, uma wamputun, kʼArmagedón. Libro xla Apocalipsis kakilhchanima uma grupo akxni kalichuwinan «lhuwa latamanin» tiku «lakgtaxtunikgonit lhuwa tapatin» (Apoc. 7:9, 14).
6. ¿Tuku nala akxni lhuwa latamanin nalakgtaxtunikgo lhuwa tapatin, chu tuku xlakata chuna wanaw? (Na kaʼakxilhti kʼuma revista artículo xla sección «Tuku katsiputunkgo tiku likgalhtawakgakgo» nema lichuwinan talakastakwanat kKatiyatni).
6 (Kalikgalhtawakga Daniel 12:2). ¿Tuku nala akxni lhuwa latamanin nalakgtaxtunikgo lhuwa tapatin? Tuku xtsokgwilikanit pi xʼama la lichuwinan akgtum talakastakwanat. Pero uma talakastakwanat ni kaj wi tuku kilhchanima o xaʼespiritual nema la kxaʼawatiya kilhtamaku, chuna la xʼakgatekgsaw xapulana. c Wata kilhchanima talakastakwanat nema naʼanan kxasasti kakilhtamaku. ¿Tuku xlakata chuna wanaw? Anta kJob 17:16 na talichuwinan «pokgxni», chu anta limaklakaskinkan xlakata nalichuwinankan «Putaknun». Uma kinkamasiyaniyan pi Daniel 12:2 lichuwinama xaxlikana talakastakwanat nema naʼanan akxni sputkgonita nawan xaʼawatiya kilhtamaku chu akxni titaxtunita nawan guerra xla Armagedón.
7. 1) ¿Tuku kilhchanima pi makgapitsi nalakastakwanankgo xlakata «nalatamakgo putum kilhtamaku»? 2) ¿Tuku xlakata uma «tlakg xatlan talakastakwanat»?
7 Pero, ¿tuku kilhchanima Daniel 12:2 akxni wan pi makgapitsi nalakastakwanankgo xlakata «nalatamakgo putum kilhtamaku»? Kilhchanima pi akxni titaxtuma nawan 1,000 kata, tiku nalakastakwanankgo chu nalakgapaskgo, o chuntiya nalakgapaskgo, chu nakgalhakgaxmatkgo Jehová chu Jesús namakglhtinankgo latamat nema ni kgalhi xlisputni (Juan 17:3). Uma «tlakg xatlan talakastakwanat» nalitaxtu nixawa talakastakwanat nema analh makgasa (Heb. 11:35). ¿Tuku xlakata? Xlakata tiku kamalakastakwanika makgasa niparakgolh.
8. ¿Tuku kilhchanima pi makgapitsi nakamalakastakwanikan xlakata «nakamamaxanikan chu nakalakgmakgankan putum kilhtamaku»?
8 Pero ni putum tiku nalakastakwanankgo namakgamakglhtinankgo tuku Jehová lakkaxwilinit xlakata nakamasiyanikan. Tuku lichuwinalh Daniel pi xʼama la wan pi makgapitsi nakamalakastakwanikan xlakata «nakamamaxanikan chu nakalakgmakgankan putum kilhtamaku». Xlakata tlankajwanankgo, xtukuwanikan ni katikatsokgwilika klibro xla latamat chu ni namakglhtinankgo latamat nema ni kgalhi xlisputni. «Nakalakgmakgankan putum kilhtamaku» o nakamalakgsputukan. Wa xlakata Daniel 12:2 lichuwinama tuku nakakitaxtuni putum tiku nalakastakwanankgo, chu tuku nakuentajtlawakan wa tuku natlawakgo akxni lakastakwanankgonita nawan d (Apoc. 20:12). Makgapitsi namakglhtinankgo latamat nema ni kgalhi xlisputni, chu amakgapitsi ni.
LHUWA KAMAKGTAYAKAN «XLAKATA NATLAWAKGO TUKU XAʼAKGSTITUM»
9, 10. 1) Chuna la wan Daniel 12:3, ¿tuku atanu nala akxni titaxtunita nawan lhuwa tapatin? 2) ¿Tiku «namakaxkgakgenankgo chuna la xmaxkgakgenat akgapun»?
9 (Kalikgalhtawakga Daniel 12:3). ¿Tuku atanu nala akxni titaxtunita nawan «talakgaputsit» nema talakatsuwima? Daniel 12:3, na lichuwinampara atanu tuku nala akxni titaxtunita nawan lhuwa tapatin.
10 ¿Tiku «lu tlan namakaxkgakgenankgo chuna la xmaxkgakgenat akgapun»? Tuku wa Jesús kMateo 13:43 kinkamakgtayayan nakatsiyaw. Xla wa: «Ama kilhtamaku tiku xaʼakgstitum likatsikgo lu namakaxkgakgenankgo chuna la chichini kxTamapakgsin xTlatkan». Akxni Jesús wa umakgolh tachuwin, xkalichuwinama «xkamanan Tamapakgsin», uma wamputun, xnatalan tiku kalaksakkanit tiku natamapakgsinankgo kTamapakgsin xalak akgapun (Mat. 13:38). Wa xlakata Daniel 12:3 kakilhchanima tiku kalaksakkanit naʼankgo kʼakgapun chu taskujut nema natlawakgo akxni titaxtuma nawan Tamapakgsin xaʼAkgtum Mil Kata.
Tiku likgatsikgo 144,000 akxtum nataskujkgo Jesucristo xlakata napulalinkgo tamasiy nema natlawakan unu kKatiyatni akxni titaxtuma nawan 1,000 kata (Kaʼakxilhti párrafo 11).
11, 12. ¿Tuku taskujut natlawakgo 144,000 akxni titaxtuma nawan 1,000 kata?
11 Tiku kalaksakkanit naʼankgo kʼakgapun lhuwa tiku nakamakgtayakgo xlakata «natlawakgo tuku xaʼakgstitum». ¿La natlawakgo? Akxtum nataskujkgo Jesucristo xlakata napulalinkgo tamasiy nema natatlawa unu kKatiyatni akxni titaxtuma nawan 1,000 kata. Tiku likgatsikgo 144,000 ni kajwatiya mapakgsinanin katilitaxtukgolh, wata na sacerdotes nawankgo (Apoc. 1:6; 5:10; 20:6). Wa xlakata namakgtayanankgo xlakata “nakamapaksakan laklanka kachikinin” chu chuna tsinu tsinu latamanin nialh katikgalhikgolh talakgalhin (Apoc. 22:1, 2; Ezeq. 47:12). ¡Xatalaksakni lu napaxuwakgo akxni namakgtlawakgo uma!
12 ¿Tiku na nakamakgtayakan «xlakata natlawakgo tuku xaʼakgstitum»? Tiku nalakastakwanankgo, tiku nalakgtaxtunikgo Armagedón chu kamanan tiku nalakachinkgo kxasasti kakilhtamaku. Akxni titaxtunita nawan 1,000 kata, putum tiku lamakgolh nawan kKatiyatni nialh katikgalhikgolh talakgalhin. Wa xlakata, ¿tuku kilhtamaku tatsokgtawilanit nawan xtukuwanikan klibro xla latamat chuna la nialh katixapaka?
XAʼAWATIYA TAPUTSAN
13, 14. Putum latamanin tiku nialh katikgalhikgolh talakgalhin chu nalatamakgo unu kKatiyatni, ¿tuku xlimasiyatkan nawan xlakata namakglhtinankgo latamat nema ni kgalhi xlisputni?
13 Kalakapastakwi pi komo wi tiku ni kgalhi talakgalhin ni wamputun pi namakgamakglhtinan latamat nema ni kgalhi xlisputni. Kalilakpuwaw Adán chu Eva. Ni xkgalhikgo talakgalhin, pero xlimasiyatkan xwanit pi xkgalhakgaxmatkgo Jehová xlakata tlan xmakglhtinankgolh latamat nema ni kgalhi xlisputni. Lu nitlan pi ni kgalhakgaxmatnankgolh (Rom. 5:12).
14 Chuna la akxilhnitaw, akxni titaxtunita nawan 1,000 kata, putum tiku lamakgolh nawan kKatiyatni nialh katikgalhikgolh talakgalhin. Putum umakgolh tiku nialh katikgalhikgolh talakgalhin, ¿natatayakgo xtamapakgsin Jehová putum kilhtamaku? ¿O makgapitsi nalitaxtukgo chuna la Adán chu Eva, tiku maski ni xkgalhikgo talakgalhin, makgxtakgkgolh Dios? ¿La nalakkaxtlawakan uma?
15, 16. 1) ¿Tuku kilhtamaku putum latamanin tlan nalimasiyakgo pi ni makgatsankgananikgo Jehová? 2) ¿Tuku nala akxni sputnita nawan uma taputsan?
15 Satanás nalakgachinukan 1,000 kata. Uma kilhtamaku nila tiku katiʼakgskgawilh. Pero akxni titaxtunita nawan 1,000 kata namakgxtakgkan chu nakaʼakgskgawiputun tiku nialh katikgalhikgolh talakgalhin. Akxni titaxtuma nawan uma taputsan, xputumkan tlan nalimasiyakgo komo maxkikgo kakni xtukuwani Dios chu komo tatayakgo xTamapakgsin (Apoc. 20:7-10). Tuku natlawakgo ama kilhtamaku nalimasiya komo xtukuwanikan tlan tsokgwilikan klibro xla latamat chuna la nialhla nataxapa.
16 Ni katsiyaw la xlilhuwa, pero makgapitsi nalitaxtukgo chuna la Adán chu Eva, chu nalakgmakgankgo xtamapakgsin Jehová. ¿Tuku nakaʼakgspula? Apocalipsis 20:15 kinkawaniyan: «Tiku ni xtsokgwilikanit xtukuwanikan klibro xla latamat lhkgen kamakanka niku lakatum wi lanka lhkuyat». Chuna, putum umakgolh tiku tlankajwanankgo putuminika nakamalakgsputukan putum kilhtamaku. Pero atsinu ni putum latamanin tiku nialh katikgalhikgolh talakgalhin lakgtaxtunikgonit nawan xaʼawatiya taputsan. Xtukuwanikan nakatsokgwilikan klibro xla latamat chuna la nialhla naxapakan.
“KXAʼAWATIYA KILHTAMAKU”
17. ¿Tuku wanika Daniel pi xʼama la kkinkilhtamakujkan? (Daniel 12:4, 8-10).
17 ¡Lu kinkamakgapaxuwayan akxni lilakpuwanaw putum tuku nala kkilhtamaku nema aku mima! Pero chatum ángel na wanilh Daniel tuku lu xlakaskinka xʼama la kkinkilhtamakujkan, “kxaʼawatiya kilhtamaku” (kalikgalhtawakga Daniel 12:4, 8-10; 2 Tim. 3:1-5). Xla wa: «Xaxlikana takatsin natalhuwi». Wa xlakata xkachikin Dios tlan xʼama akgatekgsa tuku libro xla Daniel lichuwinalh pi xʼama la. Ángel atanu tuku wampa xpalakata xaʼawatiya kilhtamaku. Wa: «Tiku nitlan likatsikgo lu laklixkajni tuku natlawakgo chu nipara chatum nakgaxmata».
18. ¿Tuku nakaʼakgspula nialh makgas tiku lixkajni likatsikgo?
18 Kkinkilhtamakujkan, tasiya pi tiku lixkajni likatsikgo tlawakgo tuku lakaskinkgo (Mal. 3:14, 15). Pero nialh makgas Jesús nakalakputsanani tiku xtachuna la cabras chu ni lakxtum katikatawililh tiku xtachuna la borregos (Mat. 25:31-33). Tiku lixkajni likatsikgo ni katilakgtaxtunikgolh lhuwa tapatin chu ni katikamalakastakwanika xlakata nalatamakgo kxasasti kakilhtamaku. Xtukuwanikan ni katikatsokgwilika klibro xla talakapastakni nema talichuwinan kMalaquías 3:16.
19. ¿Tuku kilitlawatkan la uku, chu tuku xlakata? (Malaquías 3:16-18).
19 La uku xkilhtamaku xlakata nalimasiyayaw pi ni lakxtum katalayaw tiku lixkajni likatsikgo (kalikgalhtawakga Malaquías 3:16-18). Jehová kamamakxtumima tiku lu “xlakaskinka litaxtunikgo”, tiku tapakgsinikgo. ¿Ni xlikana pi lakaskinaw pi nachuna kakinkaʼakxilhni?
¡Lu lipaxuw nawan akxni naʼakxilhaw pi Daniel, tiku xkapaxkiyaw nema nikgonita chu amakgapitsi nalakastakwanankgo xlakata namakglhtinankgo tuku kalakgchan kxasasti kakilhtamaku! (Kaʼakxilhti párrafo 20).
20. ¿Tuku xaʼawatiya malaknunika Daniel, chu tuku xlakata lakaskina kakgantaxtulh?
20 Xlikana pi lamaw kkilhtamaku niku lu xlakaskinka tuku lama. Pero nialh makgas nala tuku tlakg kaks malakawaninan. Talakatsuwima kilhtamaku akxni nasputa putum tuku nitlan. Chu alistalh, naʼakxilhaw la nakgantaxtu tuku Jehová malaknunilh Daniel: «Kxlisputni kilhtamaku natakiparaya xlakata namakglhtinana tuku lakgchanan» (Dan. 12:13). ¿Lakaskimpat pi kachilha kilhtamaku akxni Daniel chu tiku xkapaxkiya nema nikgonita, nalakastakwanankgo? Komo chuna, lu kaliskujti xlakata ni namakgxtakga Dios, chu mintukuwani natsokgwilikan klibro xla latamat chuna la nialhla nataxapa.
TAKILHTLIN 80 Kaliʼakxilhti pi Jehová tlan likatsi
a Uma artículo lichuwinan xasasti taʼakgatekgsni xlakata la nakamasiyanikan latamanin chuna la lichuwinan Daniel 12:2, 3. Nalichuwinanaw tuku kilhtamaku chuna nala chu tiku namakgtlawakgo. Na naʼakxilhaw la uma tamasiy nakamakgtaya tiku nalatamakgo kKatiyatni xlakata tlan natayanikgo xaʼawatiya taputsan, akxni nasputa xTamapakgsin Cristo xaʼAkgtum Mil Kata.
b Max pulana nalakastakwanankgo xlakskujnin Dios tiku nikgolh kxaʼawatiya kilhtamaku chu alistalh tiku pulana nikgolh, chuna la latamatilhakgonit latamanin. Komo chuna nala, pulakatunu la latamatilhakgonit latamanin tlan nakamakgamakglhtinankgo tiku kalakgapaskgolh. Biblia lichuwinan pi talakastakwanat xalak akgapun nala «chuna la kalakgchan», wa xlakata tlan nawanaw pi talakastakwanat kKatiyatni natatlawa chuna la xlilat (1 Cor. 14:33; 15:23).
c Uma tuku lichuwinanitaw lakgpali tuku xwan capítulo 17 xla libro Prestemos atención a las profecías de Daniel chu revista La Atalaya 1 xla julio kata 1987, páginas 21 asta 25.
d Pero tachuwin «xaʼakgstitum» chu «ni xaʼakgstitum» nema min kʼHechos 24:15 chu «tiku tlawakgolh tuku xatlan» chu «tiku tlawakgolh tuku nitlan» nema min kJuan 5:29 kilhchanima tuku tlawakgolh tiku lakastakwanankgolh akxni nina xnikgo.
