Xtatayananin Jehová tsukukgolh kalimakgalhtawakgekgo Biblia kinatlatni akxni xtsukuma kata 1940. Maski alistalh nialh kgalhtawakgakgolh, kintse chuntiya xmakglhtinan revistas La Atalaya chu ¡Despertad! Kkata 1950, tlawaka akgtum asamblea internacional kkachikin Nueva York, chu kifamilia na kilakgolh.

Ni makgas kilhtamaku titaxtulh, tala Lawrence Jeffries tsukulh kinkalakgapaxialhnanan chu liskujli xlakata nakimasiyani xaxlikana. Xapulana, nitlan xakakxilha pi xtatayananin Jehová ni xmakgtanukgo kpolítica chu ni soldados xlitaxtukgo. Xakwani pi komo putum tiku xalak Estados Unidos ni xʼankgolh kʼguerra, kintalamakgasitsinkan tlan xʼakgchipakgolh uma país. Tala Jeffries xatapaxuwan xkimaʼakgatekgsni. Xkiwani: «¿Chu tuku lakpuwana pi xtlawalh Jehová komo putum tiku xalak Estados Unidos xlakskujnanikgolh chu xminkgolh xtalamakgasitsinkan xlakata xʼakgchipakgolh?». Tuku kilitachuwinalh xlakata uma chu atanu tema, kimakgtayalh nakakxilha pi nitlan tuku xaklakpuwan, chu uma tlawalh pi tlakg xakkatsiputulh.

Akglhuwa hora klimaxtulh xlakata naklikgalhtawakga revistas La Atalaya chu ¡Despertad! xalamakgasa nema kintse xkamakinit xtampin chiki. Titaxtulh kilhtamaku, kkakxilhli pi xakkatsinima xaxlikana, wa xlakata kwanilh tala Jeffries pi xkilimakgalhtawakgelh Biblia chuna la xkiwaninit xapulana. Na ankgalhin ktsukulh kkan ktamakxtumit. Xaxlikana kiliminilh tapaxuwan, chu tsukulh klichuwinan xalaktlan tamakatsinin. Tuku xaklakkaxwilinit naklakgchan talakgpalilh akxni kʼakgatekgsli pi «lanka xkilhtamaku Jehová lakatsu wi» (Sof. 1:14). Nialh wa xaklilakpuwan nakkan kʼuniversidad, la uku xakkamakgtayaputun amakgapitsin nakatsinikgo xaxlikana xalak Biblia.

Kmasputulh preparatoria 13 xla junio kkata 1956, chu akgtutu kilhtamaku alistalh ktamunulh kʼakgtum asamblea de circuito. Ni xaklilakpuwanit tasikulunalin nema xakama makglhtinan xlakata klaksakli naklimaklakaskin  kilatamat naklakgapasa Jehová chu nakmasiya xaxlikana.

Akgchaxan papaʼ alistalh lata xaktamununit, precursor regular klitaxtulh. Ministerio del Reino xla diciembre kata 1956 kxaʼinglés xlimin akgtum artículo niku xkamakgpuwantini natalan xʼankgolh makgtayanankgo niku tlakg xtalakaskin tiku nalichuwinankgo Dios. Xaklakpuwan pi uma tlan chuna xaktlawalh; xakmakgtayanamputun niku ni lhuwa xʼanankgo tiku xlichuwinankgo xalaktlan tamakatsinin (Mat. 24:14).

Kkalh latama kʼEdgefield (Carolina del Sur), kʼakgtum congregación niku kaj kgalhtati xʼanan tiku xlichuwinankgo Dios. Akxni kchalh kinkgalhkitsiskan kwaw. Xaktlawayaw tamakxtumit kxsala chatum tala. Akgatunu papaʼ, 100 horas xaklichuwinan Dios. Lu lhuwa kilhtamaku xaklimaxtu chuna la xaklichuwinan Dios, tuku xkilakgayawakanit kcongregación chu taʼakgchuwin nema xkilakgchan ktamakxtumit. Lu kaks kimalakawani pi akxni tlakg xakskujnani Jehová, tlakg xakkatsini xpalakata.

Chatum puskat tiku xaklimakgalhtawakge Biblia xmalana xwanit niku xlakgatawilakan tiku nikgo anta kJohnston, kachikin nema lakatsu xwi. Xla tlan kilikatsinilh chu kimaxkilh taskujut kaj ni lhuwa kilhtamaku chu xkinkamaxkiyan talakaskin nakmaklakaskinaw akgtum aktsu chiki xlakata anta naktlawayaw tamakxtumit.

Tala Jolly Jeffries, xkgawasa tiku kilimakgalhtawakgelh Biblia, alh latama kBrooklyn (Nueva York) niku akit xaklama chu wa kincompañero xla precursorado litaxtulh. Xakwilaw kʼakgtum aktsu chiki nema tlan xmalakxijkan nema kinkamasakuanin chatum tala.

Ksur Estados Unidos ni tapalaxla xkamaskgawikan skujnin. Kaj akgtiy o akgtutu dólar xaktlajayaw akgatunu kilhtamaku. Akgtum kilhtamaku, klaktlawakgolh xaʼawatiya tumin nema xakkgalhi xlakata ktamawalh kiliwat, pero akxni ktaxtulh kpustan, chatum chixku kilakgtalakatsuwilh chu kinkgalhskilh: «¿Putsapat taskujut? Akgtum dólar nakxokgoniyan akgatunu kilhtamaku». Akgtutu kilhtamaku ktaskujli, xakmakaki kʼakgtum putawilh niku xtlawamaka chiki. Liwana xakkatsi pi Jehová xkimakgtayama chuntiya naktamakgxtakga kʼEdgefield. Asta maski chuna xaktitaxtuma tlan kkalh kʼasamblea internacional nema tlawaka kNueva York kkata 1958.

Xliʼakgtiy kilhtamaku la xtlawamaka asamblea lu tlan tuku lalh. Klakgapasli Ruby Wadlington, tiku precursora regular xwanit kʼGallatin (Tennessee). Xlakata kinchatiykan misioneros xaklitaxtuputunaw, kkilaw ktamakxtumit nema tlawakan xpalakatakan tiku amputunkgo kʼGalaad. Alistalh, ktsukuw latsokgnaniyaw. Alistalh kiwanika pi xakkalh masta akgtum taʼakgchuwin kʼGallatin, chu uma kilhtamaku kkgalhskilh Ruby komo xkintatamakgaxtokgputun. Kkalh makgtayanan kxcongregación, chu ktamakgaxtokgwi kkata 1959.

Xakkgalhi 23 kata akxni kilakgayawaka taskujut xla siervo de congregación kʼGallatin (nema la uku lilakgapaskan kgolotsin tiku lakkaxwili xtaskujutkan amakgapitsi lakgkgolotsin). Kincongregacionkan wa xapulana nema xʼama lakgapaxialhnan xasasti superintendente de circuito nema xwanikan Charles Thompson. Xla lhuwa tuku xkatsini. Maski chuna, kinkgalhskilh  tuku xmaklakaskinkgo natalan chu tuku xtlawakgonit amakgapitsi superintendentes de circuito xlakata tlan xtalakkaxtlawalh. Xla kimasiyanilh pi lu xlakaskinka tlawakan takgalhskinin chu nakatsikan putum tuku lama akxni wi tuku nila laksakkan.

Mayo kkata 1964, kiwanika pi xakkalh kʼEscuela xla Lakgkgolotsin xalak congregación, nema xmakgapala akgtum papaʼ chu xʼamaka tlawakan kSouth Lansing (Nueva York). Makgalhtawakgenanin kimakgpuwantinikgolh chuntiya xaklakgapasli Jehová chu chuntiya xakmatliwakglhli kintakanajla.

Enero kkata 1965, kilakgayawaka taskujut xlakata superintendente de circuito naklitaxtu chu akxtum ktaskujli Ruby. Kinkamalakgachakan kʼakgtum circuito nema lu lanka xwanit, lata Knoxville (Tennessee) asta kRichmond (Virginia). Xmakgtanuma congregaciones xla Carolina del Norte, Kentucky chu Virginia Occidental. Kajwatiya xakkgalakgapaxialhnanaw congregaciones niku xwilakgolh xalakgtsitsakga natalan, xlakata ama kilhtamaku tiku tanu xtasiyakgo tanu tanu niku xkawilikan ksur xalak Estados Unidos, wa xlakata tiku lakgtsitsekgan nila akxtum xkatalakgo tiku lakglhmumokgon. Natalan ni lhuwa tumin xkgalhikgo, wa xlakata xakkatatapapitsiyaw tuku xakkgalhiyaw tiku ni lhuwa tuku xkgalhikgo. Chatum superintendente de circuito tiku lhuwa tuku xkatsini lu xlakaskinka tuku kimasiyanilh. Kiwanilh: «Kalikatsi la chatum tala. Akxni nakalakgapaxialhnana akgatunu congregaciones ni kalikatsi la chatum malana. Ankgalhin tlan nakamakgtayaya komo naliʼakxilhkgoyan la chatum tala».

Akgtum kilhtamaku, xaklakgapaxialhnamaw aktsu congregación akxni Ruby tsukulh limakgalhtawakge Biblia chatum puskat tiku xkgalhi aktsu xtsumat nema akgtum kata xkgalhi. Xlakata ni xʼanan tiku xmakgalhtawakgelh, Ruby limaklakaskilh cartas xlakata chuntiya xmakgalhtawakgelh. Akxni klakgapaxialhnamparaw congregación, uma puskat kilalh kputum tamakxtumit. Alistalh chatiy precursoras especiales chinkgolh kʼuma kachikin chu chuntiya makgalhtawakgekgolh asta akxni tamunulh. Puxamakaw kata alistalh, kkata 1995, kBetel xalak Patterson, chatum tsumat lakgtalakatsuwilh Ruby chu tachuwinalh. Xtsumat xwanit puskat tiku xmakgalhtawakge Ruby. Uma kilhtamaku xtsumat uma puskat chu xpuwiti kilakgolh kclase 100 xla Galaad.

Xliʼakgtiy circuito nema xaklakgapaxiʼalhnamaw xkichan asta kFlorida. Ama kilhtamaku xakmaklakaskinaw akgtum putlaw. Wa xlakata ktamawaw akgtum nema ni lu tapalaxla xwanit. Pero xapulana semana laklalh bomba nema xmaskuju chuchut, chu ni xakkgalhiyaw tumin xlakata xakmakaxtlawinaw. Klilakpuwa chatum tala tiku tlan xkaxtlawalh, wa xlakata ktachuwinalh. Xla wanilh xtasakua pi xkaxtlawalh putlaw chu ni lakaskilh pi xakxokgoniw. Kajwatiya wa: «Nitu kilakgawilanitit». Asta kinkamaskiwin tsinu tumin. Uma akgtum lu tlan liʼakxilhtit pi Jehová kakuentajtlawa xlakskujnin chu kinkamalakapastakan pi lu xlakaskinka xatapaxuwan wi tuku namastayaw.

Ankgalhin akxni xakkalakgapaxialhnanaw congregaciones xaktamakgxtakgaw kxchikkan natalan, chu chuna lu tlan kkatalaliw. Akgtum kilhtamaku, kmakgxtakgli kkimáquina de escribir informe nema xaktlawama xlakata congregación. Akxni ktaspitli kakgotanun kakxilhli pi aktsu kgawasa tiku xkgalhi akgtutu kata xalak familia tiku xaktatamakgxtakgmaw «xkimakgtayanit» nakmasputu informe. Xla chu akit akglhuwa kata klilitsiw uma tuku xlanit.

Kkata 1971 kmakglhtinalh maktum carta niku xkiwanimaka pi superintendente de distrito xakama litaxtu kkachikin Nueva York. Lu kaks klilakawaw. Akit kajku 34 kata xakkgalhi akxni kinkamalakgachakan anta. Akit tiku xapulana superintendente de distrito xatsitsakga tiku xʼama kalakgapaxialhnan, pero natalan lu xatapaxuwan kimakgamakglhtinankgolh.

Akxni xakskujma la superintendente de distrito lu xaklakgati xakmasiya xaxlikana xlakata Jehová ksputat semana kʼasambleas de circuito. Lhuwa superintendentes de circuito tlakg lhuwa tuku xkatsinikgo nixawa akit. Chatum xmastanit taʼakgchuwin akxni ktamunulh. Atanu, Theodore Jaracz, titaxtulh kilhtamaku makgtapakgsilh Lakgkgolotsin tiku Pulalinankgo. Na xʼanankgo lhuwa natalan tiku kskujmakgolh kBetel xalak Brooklyn chu lhuwa tuku xkatsinikgo. Lu kpaxtikatsini pi umakgolh superintendentes de circuito chu betelitas tlawakgolh pi tlan xakmakgkatsilh. Kakxilhli pi xlakan xapaxkinanin mapuchwayaninanin tiku xlipawankgo xTachuwin Dios chu xmakgtayakgo xkachikin. Xlakata xlimasiyakgo tataktujut, tlawalh pi ni tuwa xakmakgkatsilh superintendente de distrito naklitaxtu.

Kkata 1974, Lakgkgolotsin tiku Pulalinankgo kamalakgachalh la superintendentes de distrito amakgapitsi superintendentes de circuito; wa xlakata akit superintendente de circuito klitaxtupa, anta kCarolina del Sur. Lu tlan pi congregaciones chu circuitos nialh xtapitsikgonit, chu uma lu xlipaxuwakgo natalan.

Akxni ksputmaja kata 1976, kimalakgachaka kʼGeorgia kʼakgtum circuito nema tatekgsa kʼAtlanta chu kColumbus. Nila kpatsankga kilhtamaku akxni kmastalh akgtum taʼakgchuwin xlakata kamaknuka kgalhkitsis laktsu kamanan tiku xnikgonit xlakata lhkuyuka xchikkan. Xatse linka kʼhospital xlakata xchichinit. Kʼhospital xchinkgo lhuwa natalan, natalan xalakglhmumokgon chu xalakgtsitsakgan, xlakata xkamakgoxamixikgolh xnatlatnikan. Tlan kakxilhli la xlikana lapaxkikgo natalan. Uma talakgalhaman tlan nakamakgtaya xlakskujnin Dios natayanikgo tuku lu tuwa titaxtukgo.

Kkata 1977, kinkawanikan pi xakkaw makgapitsi papaʼ kBetel xalak Brooklyn xlakata nakmakgtayananaw kʼakgtum taskujut. Akxni uma taskujut xʼamaja sputa, chatiy tiku xmakgtapakgsikgo Lakgkgolotsin tiku Pulalinankgo kintatamakxtumikgolh chu kinkgalhskinkgolh komo Ruby chu akit tlan xaktamakgxtakgwi anta kBetel. Chu xatapaxuwan kwaw pi tlan.

Kskujli kDepartamento de Servicio 24 kata, niku natalan makglhuwa kgalhtinankgo takgalhskinin nema lu laktuwa. Chuna la titaxtunit kata, Lakgkgolotsin tiku Pulalinankgo mastakgonit tapulalit chuna la wan xtastakyaw Biblia. Uma tapulalit maklakaskinkanit xlakata nakgalhtikan makgapitsi takgalhskinin, pero na maklakaskinkanit xlakata nakamasiyanikan superintendentes de circuito, lakgkgolotsin chu precursores. Uma tamasiy lhuwa tiku kamakgtayanit xlakata namastakakgo xtakanajlakan, chu uma makgtayananit xlakata natatliwakglha xkachikin Jehová.

Lata kkata 1995 asta 2018 kkalakgapaxialhnalh akglhuwa sucursales chuna la tiku minacha niku pulalinkan kintaskujutkan, nema makgasa xlilakgapaskan superintendente de zona. Xakkatatamakxtumi comités de sucursales, betelitas chu misioneros xlakata xakkamakgpuwantini chu xakkamakgtaya komo wi tuku xlilakgaputsamakgolh. Pero Ruby chu akit ankgalhin xkinkamakgpuwantinikgoyan tuku xkinkalitachuwinankgoyan. Akgtum liʼakxilhtit, kkilaw kRuanda kkata 2000. Lu lakgchalh kinakujkan akxni kkakgaxmatniw natalan chu betelitas tiku akxilhkgolh la kamakgnika lhuwa latamanin xalak akgtum kachikin kkata 1994. Lhuwa xmakgatsankgakgonit tiku lu xkapaxkikgo. Maski chuna, xtasiya xtakanajlakan, xtakgalhkgalhinkan chu xtapaxuwankan umakgolh natalan.

La uku kkgalhiyaw liwaka 80 kata. Umakgolh 20 kata kmakgtapakgsinit kComité de Sucursal xalak Estados Unidos. Nikxni kkalh kgalhtawakga kʼuniversidad, pero Jehová chu xkachikin lu tlan la kimasiyanikgonit. Uma kimakgtayanit xlakata nakkamasiyani amakgapitsin xaxlikana xalak Biblia, nema tlan nakamakgtaya putum kilhtamaku (2 Cor. 3:5; 2 Tim. 2:2). Kakxilhnit la tamakatsin xalak Biblia kamakgtaya latamanin tlakg tlan latamat nakgalhikgo chu xʼamigos Jehová nalitaxtukgo (Sant. 4:8). Akxni kmatlaniyaw, Ruby chu akit kkamakgpuwantiniyaw amakgapitsin xlakata akgtum talakgalhaman naliʼakxilhkgo nakatsinikgo xlakata Jehová chu namasiyakgo xaxlikana xalak Biblia… tlakg xalanka talakgalhaman nema tlan kgalhi chatum kskujni Jehová.