ARTÍCULO NEMA NATALIKGALHTAWAKGA 39
¿Tatsokgtawilanit mintukuwani «klibro xla latamat»?
«Kxlakatin tsokgwilika maktum libro xlakata xkalakapastakka tiku pekuanikgo Jehová» (MAL. 3:16).
TAKILHTLIN 61 ¡Kskujnanin Jehová ni pekuankgo!
TUKU NATALICHUWINAN a
Chuna la titaxtutilhanit kilhtamaku, Jehová tsokgwilitilhanit tukuwani «klibro xla latamat» (Kaʼakxilhti párrafos 1 chu 2).
1. Chuna la wan Malaquías 3:16, ¿tuku libro tsokgwilima Jehová, chu tuku tsokgwilinit?
AKGLHUWATA mil kata Jehová tsokgwilima maktum lu xlakaskinka libro niku talhkatawilanit makgapitsi tukuwani. Uma libro litsuku xtukuwani Abel, xapulana xtatayana Dios tiku ni makgxtakgli (Luc. 11:50, 51). b Chuna la titaxtunit kilhtamaku, Jehová katsokgwilitilhanit makgapitsi tukuwani kʼuma libro, chu la uku uma libro lhuwata tukuwani kgalhi. Anta kBiblia, uma libro tanu tanu tuku lilakgapaskan: «libro xlakata xkalakapastakka», «libro xla latamat» chu «rollo xla latamat». Kʼuma artículo nalimapakuwiyaw «libro xla latamat» (kalikgalhtawakga Malaquías 3:16; Apoc. 3:5; 17:8).
2. ¿Tuku tukuwani tsokgwilikanit klibro xla latamat, chu tuku kilitlawatkan xlakata kintukuwanikan na natatsokgtawila anta?
2 Kʼuma lu xlakaskinka libro limin xtukuwanikan tiku kakninanikgo Jehová chu paxkikgo xtukuwani. Kgalhikgo takgalhkgalhin xlakata namakglhtinankgo latamat nema ni kgalhi xlisputni, anta kʼakgapun o kKatiyatni. Kintukuwanikan tlan natsokgwilikan kʼuma libro komo tlan natalalinaw Jehová chu uma tlan chuna la xlakata xtamakamastan xKgawasa, Jesucristo (Juan 3:16, 36). ¿Ni xlikana pi kimputumkan lakaskinaw pi kintukuwanikan xtatsokgtawilalh kʼuma libro?
3, 4. 1) Komo kintukuwanikan tatsokgtawilanit klibro xla latamat, ¿wamputun uma pi nalatamayaw putum kilhtamaku? 2) ¿Tuku naʼakxilhaw kʼuma artículo chu kʼartículo nema stala?
3 ¿Wamputun pi nakgalhiyaw latamat nema ni kgalhi xlisputni komo kintukuwanikan tatsokgtawilanit klibro xla latamat? Xatakgalhtin tekgsaw kʼÉxodo 32:33, niku Jehová wanilh Moisés: «Nakxapa kkilibro xtukuwani tiku lakgalhinanit kkilakatin». Uma wamputun pi tukuwani nema tatsokgtawilanit kʼuma libro tlan taxapa, xtachuna la komo Jehová litsokgwilinit kgantum lápiz (Apoc. 3:5). Kuenta kilitlawatkan pi kintukuwanikan chuntiya natatsokgtawila kʼuma libro asta akxni Jehová natsokgwili chuna la nila nataxapa.
4 Max nalilakpuwanaw makgapitsi takgalhskinin. Akgtum liʼakxilhtit, ¿tuku wan Biblia xpalakatakan tiku tatsokgtawilanit xtukuwanikan klibro xla latamat chu tiku ni tatsokgtawilanit? ¿Tuku kilhtamaku namakglhtinankgo latamat nema ni kgalhi xlisputni tiku tatsokgtawilanit xtukuwanikan kʼuma libro? ¿Tuku nakaʼakgspula tiku nikgolh chu ni lakgapaskgolh Jehová? ¿Na tatsokgtawilanit xtukuwanikan kʼuma libro? Naʼakxilhaw xatakgalhtin kʼuma artículo chu nema aku mima.
¿TUKU TUKUWANI TATSOKGTAWILANIT KʼUMA LIBRO?
5, 6. 1) Chuna la wan Filipenses 4:3, ¿tiku tatsokgtawilanit xtukuwanikan klibro xla latamat? 2) ¿Tuku kilhtamaku nialhla naxapakan xtukuwanikan?
5 ¿Tuku tukuwani tatsokgtawilanit kʼuma libro nema kaj wi tuku kilhchanima? Xlakata nakgalhtiyaw uma takgalhskinin, nakalichuwinanaw pulakkitsis grupos. Makgapitsi umakgolh grupos tatsokgtawilanit xtukuwanikan klibro xla latamat chu amakgapitsi ni.
6 Xapulana grupo likgatsi tiku kalaksakkanit natamapakgsinankgo Cristo kʼakgapun. ¿Tatsokgtawilanit xtukuwanikan klibro xla latamat? Chuna. Chuna la apóstol Pablo kawanilh xmakgtayananin xalak Filipos, xtukuwanikan tiku kalaksakkanit xlakata natamapakgsinankgo Cristo, wilakgolha klibro xla latamat (kalikgalhtawakga Filipenses 4:3). Pero, xlakata xtukuwanikan ni nataxapa kʼuma libro nema kaj wi tuku kilhchanima, xlakaskinka ni namakgxtakgkgo Dios. Chu, akxni namakglhtinankgo xaʼawatiya sello, akxni nina nikgo o akxni nina tsuku nawan lhuwa tapatin, xtukuwanikan tatsokgtawilanita nawan kʼuma libro chuna la nikxni katixapaka (Apoc. 7:3).
7. ¿La kinkamakgtayayan Apocalipsis 7:16, 17 nakatsiyaw tuku kilhtamaku xtukuwanikan amakgapitsi borregos natatsokgtawila chuna la nila katixapaka klibro xla latamat?
7 Xliʼakgtiy grupo likgatsi lhuwa latamanin tiku litaxtukgo lhuwa borregos. ¿Tatsokgtawilanita la uku xtukuwanikan klibro xla latamat? Chuna. ¿Chuntiya anta natamakgxtakga akxni lakgtaxtukgonita nawan kʼArmagedón? Chuna (Apoc. 7:14). Jesús wa pi umakgolh latamanin, tiku litaxtukgo la borregos, «nakgalhikgo latamat nema ni kgalhi xlisputni» (Mat. 25:46). Pero tiku nalakgtaxtunikgo Armagedón ni tunkun katimakglhtinankgolh latamat nema ni kgalhi xlisputni. Xtukuwanikan xtachuna la komo litatsokgtawilanit nawan kgantum lápiz klibro xla latamat. Ktamapakgsin xla Akgtum Mil Kata, Jesús «nakakuentajtlawa chuna la chatum mapuchwayanina chu nakapulalin niku wi taxtunu xla chuchut nema masta latamat». Tiku nastalanikgo xtapulalit Cristo chu nakalilakgapaskan pi ni makgxtakgkgo Jehová natatsokgtawila xtukuwanikan chuna la nila nataxapa klibro xla latamat (kalikgalhtawakga Apocalipsis 7:16, 17).
8. ¿Tiku ni tatsokgtawilanit xtukuwanikan klibro xla latamat, chu tuku nakaʼakgspula?
8 Xlipulaktutu grupo likgatsikgo tiku chuna la cabras, tiku nakamalakgsputukan kʼArmagedón. Xtukuwanikan ni tatsokgtawilanit klibro xla latamat. Jesús wa pi «nakamalakgsputukan xliputum kilhtamaku» (Mat. 25:46). Chu Pablo lichuwinalh pi umakgolh latamanin “nakamalakgaxokgekan akxni nakamalakgsputukan putum kilhtamaku” (2 Tes. 1:9; 2 Ped. 2:9). Na tlan chuna nawanaw xpalakata latamanin tiku chuna la titaxtunit kilhtamaku makgalipuwankgonit espíritu santo. Xlakan na nakamalakgsputukan putum kilhtamaku, chu ni katikgalhikgolh latamat nema ni kgalhi xlisputni. Liwana tasiya pi ni katikamalakastakwanika (Mat. 12:32; Mar. 3:28, 29; Heb. 6:4-6). La uku, nakalichuwinanaw pulaktiy grupo tiku nalakastakwanankgo kKatiyatni.
TIKU NALAKASTAKWANANKGO
9. ¿Tiku pulaktiy grupo nalakastakwanankgo kKatiyatni, chu tuku ni lakxtum katlawa? (Hechos 24:15).
9 Biblia kalichuwinan pulaktiy grupo tiku nalakastakwanankgo chu nakgalhikgo talakgalhaman xlakata nalatamakgo kKatiyatni putum kilhtamaku: «tiku xaʼakgstitum» chu «tiku ni xaʼakgstitum» (kalikgalhtawakga Hechos 24:15). Latamanin «tiku xaʼakgstitum» wa tiku skujnanikgolh Jehová akxni xlamakgolhku. Chu latamanin «tiku ni xaʼakgstitum» wa tiku ni skujnanikgolh Jehová. Makglhuwa, xtayatkan limasiyalh pi lu xtamakgatlinikgonit xaʼakgstitum xlimapakgsin Dios. Xlakata umakgolh akgtiy grupo nalakastakwanankgo, ¿kilhchanima uma pi xtukuwanikan tatsokgtawilanit klibro xla latamat? Xlakata nakgalhtiyaw uma takgalhskinin, kalichuwinaw pulakatunu umakgolh grupo.
10. ¿Tuku xlakata nalakastakwanankgo «tiku xaʼakgstitum», chu tuku talakgalhaman nakgalhikgo makgapitsi? (Na kaʼakxilhti kʼuma revista artículo xla sección «Tuku katsiputunkgo tiku likgalhtawakgakgo» nema lichuwinan talakastakwanat unu kKatiyatni).
10 Xlipulaktati grupo wa tiku «xaʼakgstitum» litaxtukgo. Akxni nina xnikgo, xtatsokgtawilanita xtukuwanikan klibro xla latamat. ¿Taxapalh xtukuwanikan akxni nikgolh? Ni chuna, xlakata kxtalakapastakni Jehová chuntiya staknamakgolh. «Xla ni xDioskan tiku nikgonita, wata xDioskan tiku staknankgo, xlakata kxlakatin putum staknamakgolh» (Luc. 20:38). Uma kilhchanima pi akxni nalatamaparakgo unu kKatiyatni tiku xaʼakgstitum, xtukuwanikan tatsokgtawilanita nawan klibro xla latamat. Pero xapulana, xtachuna la komo lápiz nalitsokgwilikan (Luc. 14:14). Makgapitsi tiku nalakastakwanankgo nakgalhikgo talakgalhaman xlakata príncipes nalitaxtukgo kKatiyatni (Sal. 45:16).
11. ¿Tuku natalakaskin nakatsinikgo «tiku ni xaʼakgstitum» xlakata natsokgwilikan xtukuwanikan klibro xla latamat?
11 Xaʼawatiya, kalichuwinaw xlipulakkitsis grupo: tiku «ni xaʼakgstitum». Max xlakata ni xlakgapaskgo xlimapakgsin Jehová, ni xaʼakgstitum xlinkgo xlatamatkan akxni xlamakgolhku. Wa xlakata xtukuwanikan ni tatsokgtawilanit klibro xla latamat. Pero, akxni Dios nakamalakastakwani, nakamaxki talakaskin pi chuna la natitaxtu kilhtamaku natatsokgtawila xtukuwanikan kʼuma libro. Tiku ni xaʼakgstitum lu namaklakaskinkgo tamakgtay. Akxni nina xnikgo, makgapitsi umakgolh tlawakgolh tuku lu nitlan, tuku laklixkajnit. Wa xlakata natalakaskin pi nakatsinikgo nalilatamakgo xaʼakgstitum xlimapakgsin Jehová. Xlakata nakamakgtayakan putum umakgolh latamanin, xTamapakgsin Dios nakamasiyani putum latamanin chuna la nikxni chuna tlawakanit.
12. 1) ¿Tiku nakamasiyanikgo tiku ni xaʼakgstitum? 2) ¿Tuku nakaʼakgspula tiku ni nalilatamaputunkgo tuku nakamasiyanikan?
12 ¿Tiku nakamasiyanikgo tiku ni xaʼakgstitum? Tiku kalilakgapaskan lhuwa latamanin chu tiku xaʼakgstitum nema na nalakastakwanankgo. ¿Tuku xlitlawatkan tiku ni xaʼakgstitum komo lakaskinkgo pi xtukuwanikan natatsokgtawila klibro xla latamat? Talakaskin xʼamigos Jehová nalitaxtukgo chu namakamaxkikgo xlatamatkan. Jesús chu tiku xatalaksakni tiku jueces nalitaxtukgo kuenta natlawakgo la nalakgpalitilhakgo xlatamatkan tiku ni xaʼakgstitum (Apoc. 20:4). Komo wi tiku ni namakgamakglhtinan uma tamakgtay, namasputukan maski kgalhiya nawan 100 kata (Is. 65:20). Jehová chu Jesús tlan akxilhkgo tuku wi kxnakujkan latamanin, chu kuenta natlawakgo pi niti natlawa tuku nitlan kxasasti kakilhtamaku (Is. 11:9; 60:18; 65:25; Juan 2:25).
TALAKASTAKWANAT XLAKATA LATAMAT CHU TALAKASTAKWANAT XLAKATA TALAKPUTSAN
13, 14. 1) ¿La xʼakgatekgsaw makgasa tuku wa Jesús anta kJuan 5:29? 2) ¿Tuku ni wa Jesús xlakata tiku xʼamakgo lakastakwanankgo?
13 Jesús na lichuwinalh tiku nalakastakwanankgo kKatiyatni. Akgtum liʼakxilhtit, xla wa: «Mima kilhtamaku akxni putum tiku wilakgolh kputaknun nakgaxmatkgo xtachuwin chu nataxtukgo, tiku tlawakgolh tuku xatlan nakamalakastakwanikan xlakata nakgalhikgo latamat, chu tiku tlawakgolh tuku nitlan nakamalakastakwanikan xlakata nakalakputsananikan» (Juan 5:28, 29). ¿Tuku xwamputun Jesús?
14 Xapulana xkanajlayaw pi Jesús xlichuwinama tuku xtlawakgolh latamanin akxni lakastakwanankgonita xwa. Uma wamputun, pi makgapitsi tiku xkamalakastakwanika xʼamakgo tlawakgo tuku tlan, chu amakgapitsi tuku nitlan. Pero kaʼakxilhwi pi Jesús ni wa pi tiku xʼamakgo lakastakwanankgo xʼamakgo tlawakgo tuku tlan o xʼamakgo tlawakgo tuku nitlan. Xla lichuwinalh tuku xtitaxtunita, xlakata wa «tiku tlawakgolh tuku xatlan» chu «tiku tlawakgolh tuku nitlan». Uma wamputun pi tlawakgolh putum uma akxni xlakan nina xnikgo. Chu uma chuna xlilat, ¿ni xlikana? Kalakapastakwi pi kxasasti kakilhtamaku ni katimastaka talakaskin pi wi tiku natlawa tuku nitlan. Uma wamputun pi tiku ni xaʼakgstitum tlawakgolh tuku nitlan akxni nina xnikgo. Wa xlakata, ¿tuku xwamputun Jesús akxni lichuwinalh pi wi tiku «nakamalakastakwanikan xlakata nakgalhikgo latamat» chu tiku «nakamalakastakwanikan xlakata nakalakputsananikan»?
15. ¿Tiku «nakamalakastakwanikan xlakata nakgalhikgo latamat», chu tuku xlakata?
15 Tiku xaʼakgstitum, uma wamputun tiku tlawakgolh tuku tlan akxni nina xnikgo, «nakamalakastakwanikan xlakata nakgalhikgo latamat» xlakata xtukuwanikan tatsokgtawilanita klibro xla latamat. Uma wamputun pi xtalakastakwanatkan «tiku tlawakgolh tuku xatlan», nema lichuwinankan kJuan 5:29, watiya xtalakastakwanatkan «tiku xaʼakgstitum» nema lichuwinan Hechos 24:15. Uma tatalakxtumi tuku lichuwinan Romanos 6:7: «Tiku ninita, Dios akxilha pi nialhtu laklin xtalakgalhin». Akxni nikgo tiku xaʼakgstitum, xtalakgalhinkan taxapa, pero ni taxapa chuna la skujnanikgolh Dios (Heb. 6:10). Akxni tiku xaʼakgstitum nalakastakwanankgo, natalakaskin ni namakgxtakgkgo Dios xlakata xtukuwanikan ni nataxapa klibro xla latamat.
16. ¿Tiku «nakamalakastakwanikan xlakata nakalakputsananikan»?
16 ¿Tuku nakaʼakgspula tiku tlawakgolh tuku nitlan akxni nina xnikgo? Maski akxni nikgolh taxapalh xtalakgalhinkan, ni tatsokgtawilanit pi ni makgxtakgkgolh Dios xlakata ni skujnikgolh. Xtukuwanikan nitu tatsokgtawilanit klibro xla latamat. Wa xlakata, xtalakastakwanatkan «tiku tlawakgolh tuku nitlan» watiya xtalakastakwanatkan «tiku ni xaʼakgstitum» nema lichuwinan Hechos 24:15. Xlakan «nakamalakastakwanikan xlakata nakalakputsananikan». c Uma wamputun pi Jesús nakaʼakxilha chu nakalakputsanani (Luc. 22:30). Nalin kilhtamaku xlakata nakatsikan tiku kalakgchan nakatsokgwilikan xtukuwanikan klibro xla latamat. Xlakata chuna nala, tiku ni xaʼakgstitum natalakaskin namakgxtakgkgo ni xatlan tayat nema xkgalhikgo xapulana chu namakamaxkikgo Jehová xlatamatkan.
17, 18. ¿Tuku xlitlawatkan tiku nalakastakwanankgo kKatiyatni, chu tuku kilhchanima Apocalipsis 20:12, 13 akxni wan «tuku xtlawakgonit»?
17 Maski xaʼakgstitum o ni xaʼakgstitum xwankgonit xapulana, tiku nalakastakwanankgo xlikgalhakgaxmatatkan limapakgsin nema namin kxasasti rollos, nema natalakgakgekgo akxni titaxtuma nawan 1,000 kata. Apóstol Juan lichuwinalh tuku akxilhli: «Kakxilhli tiku nikgonita, tiku xlakaskinka litaxtukgo chu tiku ni xlakaskinka litaxtukgo, anta xyakgolh kxlakatin pumapakgsin, chu kamalakgakgeka rollos. Pero malakgakgeka atanu rollo: rollo xla latamat. Chu tiku xnikgonita kalakputsananika xlakata tuku xtsokgwilikanit krollos chu xlakata tuku xtlawakgonit» (Apoc. 20:12, 13).
18 ¿Tuku naʼakxilhkan akxni nakalakputsananikan tiku nalakastakwanankgo? ¿Wa tuku tlawakgolh akxni nina xnikgo? Nichuna. Kalakapastakwi pi xtalakgalhinkan taxapalh akxni nikgolh. Akxni Biblia wan tuku xtlawakgonit, ni wa kilhchanima tuku tlawakgolh akxni nina xnikgo. Wata, max kilhchanima la namakgamakglhtinankgo tamasiy nema nakamaxkikan kxasasti kakilhtamaku. Asta lakchixkuwin tiku ni makgxtakgkgolh Jehová chuna la Noé, Samuel, David chu Daniel natalakaskin nakatsinikgo xlakata Jesucristo chu nalimasiyakgo takanajla kxtamakamastan. ¡Liwaka chuna xlitlawatkan tiku ni xaʼakgstitum!
19. ¿La nakakitaxtuni tiku nalakgmakgankgo uma talakgalhaman?
19 ¿La nakakitaxtuni tiku nalakgmakgankgo uma talakgalhaman? Apocalipsis 20:15 kinkawaniyan: «Tiku ni xtsokgwilikanit xtukuwanikan klibro xla latamat lhkgen kamakanka niku lakatum wi lanka lhkuyat». Chuna, putum kilhtamaku nakamasputukan. ¡Lu xlakaskinka nakatsiyaw pi kintukuwanikan natatsokgtawila klibro xla latamat chu pi ni kataxapalh!
Chatum tala makgtayanama ktaskujut xla tamasiy nema natlawakan Akgtum Mil Kata (Kaʼakxilhti párrafo 20).
20. ¿Tuku lu xlakaskinka taskujut natatlawa kTamapakgsin xla Akgtum Mil Kata? (Kaʼakxilhti xmakni revista).
20 Tamapakgsin xla Akgtum Mil Kata lu tlan nawan. Uma kilhtamaku nakamasiyanikan lhuwa latamanin chuna la nikxni xtlawakanit kKatiyatni. Uma kilhtamaku na naʼakxilhkan xtayatkan tiku xaʼakgstitum chu tiku ni xaʼakgstitum (Is. 26:9; Hech. 17:31). ¿La natlawakan uma lu xlakaskinka taskujut? Kʼartículo nema aku mima wa nalichuwinanaw chu nakinkamakgtayayan lanka xtapalh naliʼakxilhaw.
TAKILHTLIN 147 Dios malaknu xaxlipan latamat
a Kʼuma artículo, lichuwinankan xasasti taʼakgatekgsni xlakata tuku wa Jesús anta kJuan 5:28, 29 akxni lichuwinalh tiku «nakamalakastakwanikan xlakata nakgalhikgo latamat» chu tiku «nakamalakastakwanikan xlakata nakalakputsananikan». Naʼakxilhaw tuku kilhchanima umakgolh pulaktiy talakastakwanat chu tiku makgtanumakgo anta.
b Uma libro tsokgwilimaka «lata xkilhtsukut kakilhtamaku». Uma kakilhtamaku wa latamanin tiku tlan kalakgmaxtukan ktalakgalhin (Mat. 25:34; Apoc. 17:8). Wa xlakata, Abel, chatum xaʼakgstitum chixku, wa xapulana tiku talhkatawilanit kʼuma libro xla latamat.
c Xapulana xwanaw pi tachuwin «nakalakputsananikan» kilhchanima pi wi tiku nalakputsananikan xlakata natlawanikan tuku nitlan o namalakgaxokgekan. Xlikana pi uma tachuwin tlan chuna kilhchani. Pero kʼuma texto, Jesús maklakaskilh tachuwin nakalakputsananikan xlakata wi tiku kaks naʼakxilhkan. Maktum diccionario griego nema wan tuku kilhchanima tachuwin nema min kBiblia wan pi uma tachuwin kilhchanima pi wi tiku «lakputsananikan xtayat».
