Kaʼakxilhwi takgalhtin nema masta Biblia.

Hechos 24:15 wan pi «nakamalakastakwanikan tiku xaʼakgstitum chu tiku ni xaʼakgstitum». Tiku xaʼakgstitum wa tiku xkgalhakgaxmatkgo Dios akxni nina xnikgo, wa xlakata xtukuwanikan tatsokgtawilanit klibro xla latamat (Mal. 3:16). Tiku ni xaʼakgstitum na kakilhchanima tiku ni lakgapaskgolh Jehová akxni nina xnikgo, wa xlakata xtukuwanikan ni tatsokgtawilanit klibro xla latamat.

Juan 5:28, 29 watiya kalichuwinan akgtiy grupo nema kalichuwinankan kʼHechos 24:15. Jesús wan pi «tiku tlawakgolh tuku xatlan» nakamalakastakwanikan «xlakata nakgalhikgo latamat, chu tiku tlawakgolh tuku nitlan nakamalakastakwanikan xlakata nakalakputsananikan». Tiku xaʼakgstitum tlawakgolh tuku tlan akxni nina xnikgo. Nalakastakwanankgo xlakata nakamaxkikan latamat nema ni kgalhi xlisputni xlakata xtukuwanikan chuntiya tatsokgtawilanit klibro xla latamat. Pero, tiku ni xaʼakgstitum tlawakgolh tuku nitlan akxni nina xnikgo. Nakamalakastakwanikan xlakata nakalakputsananikan. Xtukuwanikan nina tatsokgtawilanit klibro xla latamat, chu nakalakputsananikan. Uma kilhtamaku, nakamaxkikan talakaskin nalakgapaskgo Jehová chu xtukuwanikan tlan natatsokgtawila klibro xla latamat.

Apocalipsis 20:12, 13 wan pi putum tiku nakamalakastakwanikan xlikgalhakgaxmatatkan nawan tuku “tsokgwilikanit krollos”, uma wamputun, xalaksasti limapakgsin nema nakinkamaxkikanan kxasasti kakilhtamaku. Tiku ni nakgalhakgaxmatkgo nakamasputukan (Is. 65:20).

Daniel 12:2 lichuwinan pi makgapitsi tiku lhtatamakgolh kkalinin nalakastakwanankgo «xlakata nalatamakgo putum kilhtamaku chu amakgapitsi xlakata nakamamaxanikan chu nakalakgmakgankan putum kilhtamaku». Uma versículo lichuwinan tuku nala alistalh akxni kamalakastakwanikanita nawan: «nalatamakgo putum kilhtamaku» o «nakalakgmakgankan putum kilhtamaku». Wa xlakata akxni sputnita nawan 1,000 kata, makgapitsi namakglhtinankgo latamat nema ni kgalhi xlisputni chu amakgapitsi nakamasputukan putum kilhtamaku (Apoc. 20:15; 21:3, 4).

Tuku nakaʼakgspula pulaktiy grupo tiku nalakastakwanankgo tlan nakatamalakxtumiyaw latamanin tiku latamaputunkgo kʼatanu país. Tiku xaʼakgstitum xtachuna la tiku xalak atanu país tiku makglhtinankgo akgtum visa xlakata tlan naskujkgo o tiku kamaxkikan talakaskin anta nalatamakgo nema kamaxki talakaskin wi tuku natlawakgo o wi tuku namakglhtinankgo. Pero, tiku ni xaʼakgstitum xtachuna tiku latamaputunkgo kʼatanu país chu kamaxkikan talakaskin kaj tsinu natamakgxtakgkgo o kaliʼakxilhkan la tiku kaj ankgo paxialhnankgo. Xlakata nakamaxkikan talakaskin chuntiya nalatamakgo kʼuma xasasti país, talakaskin nalimasiyakgo pi makgatsikgo tuku skin uma país. Xtachuna la uma, xlakata tlan nalatamakgo kParaíso, tiku ni xaʼakgstitum natalakaskin nakgalhakgaxmatkgo xlimapakgsin Jehová chu nalimasiyakgo pi xaʼakgstitum litaxtukgo. Chu maski kaxatukawa tuku nakamaxkikan talakaskin natlawakgo tiku latamaputunkgo kxasasti país, nachan kilhtamaku akxni makgapitsi nakamaxkikan talakaskin namakgtapakgsikgo kʼuma kachikin chu amakgapitsi nakamalakgachaparakan kxkachikinkan. Tuku nalaksakkan chuna nakitaxtu xlakata tuku tlawakgolh kxasasti país. Nachuna, tuku nalaksakkan xpalakata tiku nalakastakwanankgo anta nakikilhtiyakan chuna la ni makgxtakgnankgo chu tuku natlawakgo kxasasti kakilhtamaku.

Jehová ni kaj chatum Dios xalakgalhamana, wata na xaʼakgstitum chu tlawa tuku tlan (Deut. 32:4; Sal. 33:5). Nalimasiya tapaxkit akxni nakamalakastakwani tiku xaʼakgstitum chu tiku ni xaʼakgstitum, pero na nakgalhkgalhi pi putum nakgalhakgaxmatkgo limapakgsin xlakata tuku tlan chu tuku nitlan. Kajwatiya tiku napaxkikgo chu nakgalhakgaxmatkgo xlimapakgsin chuntiya nalatamakgo kxasasti kakilhtamaku.