1, 2. ¿Tuku lu tlan nakitaxtu komo nalilakpuwanaw xlatamat Sansón?

 ¿TUKU pulana lakapastaka akxni kgaxpata pi lichuwinankan Sansón? Max lakapastaka pi chatum tliwakga chixku xwanit. Uma xlikana, pero na tlawalh tuku nitlan nema liminilh lhuwa taʼakglhuwit. Maski chuna, Jehová wa kuenta tlawalh takanajla nema limasiyalh kxlatamat chu matsokgninalh kBiblia xliʼakxilhtit xlakata wi tuku nakinkamasiyaniyan.

² Jehová maklakaskilh Sansón xlakata xtlawalh tuku kaks malakawaninan xlakata xmakgtayalh xkachikin, Israel. Akglhuwa kata alistalh akxni xninita Sansón, Jehová malakpuwanilh apóstol Pablo xtsokgwililh xtukuwani akxni xkalichuwinama xliʼakxilhtitkan kskujnin tiku limasiyakgolh takanajla (Heb. 11:32-34). Sansón lipawa Jehová asta akxni xtitaxtuma tuku lu tuwa. Kʼuma artículo nalichuwinanaw la kinkamakgtayayan xliʼakxilhtit chu tuku kinkamasiyaniyan.

3. ¿Tuku taskujut lakgayawaka Sansón?

³ Akxni Sansón lakachilh, filisteos xʼakgchipanankgonit kʼIsrael chu xkamakgapatinamakgo israelitas (Juec. 13:1). Xlakata filisteos lu lixkajni xlikatsikgo, lu xkamakgapatinankgo israelitas. Wa xlakata Jehová laksakli Sansón xlakata xtsukulh «kalakgmaxtu Israel kxmakankan filisteos» (Juec. 13:5). ¡Uma lu tuwa xʼama kitaxtu! Wa xlakata xtalakaskin pi Sansón xlipawa Jehová.

4. ¿La makgtayalh Jehová Sansón? (Jueces 15:14-16).

⁴ Kalichuwinaw makgtum akxni Sansón limasiyalh pi xlipawan Jehová. Lhuwa soldados xalak Filistea xʼankgonit kLehí,  akgtum kachikin nema max xwi kJudá, xlakata nachipakgo Sansón. Lakchixkuwin xalak Judá lu pekuankgolh, wa xlakata makamastakgolh Sansón kxmakan xtalamakgasitsin. Tiku xalak xkachikin xwankgonit lichikgolh kgantiy xalaksasti tasiw, chu linkgolh kxlakatinkan filisteos (Juec. 15:9-13). Pero «xʼespíritu Jehová maxkilh litliwakga» chu Sansón lakpuchli tasiw. Alistalh «tekgsli akgtum xkilhlukut tantum burro nema aku xmakgnikanit», sakli… ¡chu kalimakgnilh 1,000 filisteos! (Kalikgalhtawakga Jueces 15:14-16).

5. ¿La limasiyalh Sansón pi xlipawan Jehová?

⁵ ¿Tuku xlakata Sansón maklakaskilh xkilhlukut tantum burro? Xlakata xkatsi pi tuku tlakg xlakaskinka xwanit wa nalipawan Jehová, chu ni wa tuku nalimakgninan. Sansón maklakaskilh tuku xkgalhi xlakata natlawa xtalakaskin Jehová. Chu tlan kitaxtunilh xlakata lipawa Jehová.

6. Kalichuwinanti pulaktum tuku kinkamasiyaniyan xliʼakxilhtit Sansón.

⁶ Jehová nachuna nakinkamaxkiyan litliwakga xlakata tlan namakgantaxtiyaw kaxatukawa taskujut nema nakinkalakgayawayan kxkachikin, asta maski lakpuwanaw pi nila katimakgantaxtiw. Max asta kaks nakinkamalakawaniyan chuna la nakinkamakgtayayan. Komo wix nalipawana Jehová, liwana kakatsi pi namakgtayayan namakgantaxtiya xtalakaskin chu namaxkiyan litliwakga, chuna la tlawalh xpalakata Sansón (Prov. 16:3).

7. ¿Tuku liʼakxilhtit limasiya pi lu xlakaskinka naputsayaw xtapulalit Jehová?

⁷ Lhuwa natalan lakchixkuwin chu lakpuskatin tiku makgtayanankgo akxni tlawakan akgtum pukgalhtawakga limasiyakgo pi lipawankgo Jehová. Makgasa, xkachikin Jehová wa xwan la xtlawakan Pukgalhtawakga chu atanu chiki niku nakakninanikan Dios. Pero xlakata lu staknit xkachikin Jehová, talakaskinit natlawakan makgapitsi talakgpalit. Natalan tiku lakgayakgo uma taskujut putsakgolh xtamakgtay Jehová chu tsukukgolh tlawakgo tuku nikxni xtlawakgonit. Akgtum liʼakxilhtit, tsukukgolh tamawakgo chiki nema xkatlawakanita chu xtalakaskin kaj tsinu xlakkaxtlawakgolh. Robert, tiku makgtayananit  niku tlawakan Pukgalhtawakga kxlikalanka Katiyatni, wan: «Xapulana, kimputumkan tuwa kmakgkatsiw naktlawayaw uma tuku xkinkaskinimakan. Nipara tsinu xtachuna xwanit la xaklismaninitaw xakskujaw makgasa. Pero natalan xatapaxuwan tsukukgolh skujkgo chuna la xkinkawanimakan, chu liwana tasiyalh pi Jehová ksikulunatlawama uma talakgpalit». Uma limasiyapara pi Jehová kapulalima xkachikin xlakata natlawakgo xtalakaskin. Wa xlakata kalilakpuwaw uma takgalhskinin: «¿Kputsa xtapulalit Jehová chu kliskuja naklakgpali tuku talakaskin xlakata tlakg tlan nakskujnani?».

8. ¿Tuku tlawalh Sansón akxni lu kgalhputilh?

⁸ Max lakapastaka atanu tuku tlawalh Sansón nema kaks malakawaninan. Akgtum liʼakxilhtit, makgnilh tantum león, chu alistalh kamakgnilh puxamakaw filisteos xalak Asquelón (Juec. 14:5, 6, 19). Sansón xkatsi pi nila xtlawalh putum uma komo ni wa Jehová xmakgtayalh. Limasiyalh pi lu xlipawan Jehová xlakata akxni xkamakgninita 1,000 filisteos chu lu kgalhputilh, ni xʼakstu putsalh chuchut, wata skinilh tamakgtay Jehová (Juec. 15:18).

9. ¿La kgalhtilh Jehová tuku skinilh Sansón? (Jueces 15:19).

⁹ ¿La kgalhtilh Jehová tuku skinilh Sansón? Jehová tlawalh akgtum milagro xlakata xtaxtulh chuchut. Akxni Sansón kgotnalh, «kgalhipa litliwakga chu tlan makgkatsilh» (kalikgalhtawakga Jueces 15:19). Uma taxtunu lhuwa kata makgapalalh, xwijku asta kxkilhtamaku palakachuwina Samuel akxni Jehová malakpuwanilh natsokgwili libro xla Jueces. Max akxni israelitas xʼakxilhkgo uma taxtunu, xlakapastakkgo pi komo xlipawankgolh Jehová, xla xʼama kamakgtaya akxni xtitaxtukgolh tuku tuwa.

10. ¿Tuku kilitlawatkan xlakata Jehová nakinkamakgtayayan? (Na kaʼakxilhti dibujos).

¹⁰ Chuna la Sansón, putum akinin kiliskinitkan xtamakgtay Jehová. Maklakaskinaw xtamakgtay maski lhuwa tuku katsiniyaw tlawayaw o lhuwa tuku tlawanitaw kxkachikin. Kililakapastakatkan pi nila putum tlawayaw chu kajwatiya tlan nakinkakitaxtuniyan komo nalipawanaw Jehová. Sansón kgalhipa litliwakga akxni likgotnalh chuchut nema Jehová maxkilh. Nachuna akinin, tliwakga nakgalhiyaw kintakanajlakan komo namaklakaskinaw putum tamakgtay nema Jehová kinkamaxkiyan (Mat. 11:28).

11. ¿Tuku kilitlawatkan xlakata liwana namaklakaskinaw tamakgtay nema Jehová kinkamaxkiyan, chu tuku liʼakxilhtit kinkawilinin akgtum tamakgaxtokgat?

¹¹ Kalichuwinaw xliʼakxilhtit Alexéi, chatum tala xalak Rusia tiku lu patinama xlakata kaputsastalanimaka natalan kʼuma país. ¿Tuku makgtayanit xlakata natayani? Xla chu xpuskat tlawakgo tuku namatliwakglha xtakanajlakan. Alexéi wan: «Klakkaxwilinit naklikgalhtawakga Biblia chali chali chu lu kliskuja xlakata chuna naktlawa. Nachuna, kimpuskat chu akit klikgalhtawakgayaw texto xala chali chali chu ktlawaniyaw oración Jehová». ¿Tuku kinkamasiyaniyan uma? Ni kiʼakstukan kakinkalipawankan, wata kalipawaw Jehová. Xlakata chuna natlawayaw, talakaskin nalikgalhtawakgayaw Biblia, natlawayaw oración, naʼanaw ktamakxtumit chu nalichuwinanaw Dios xlakata namatliwakglhaw kintakanajlakan. Komo chuna natlawayaw, Jehová nakinkasikulunatlawayan chu nakinkamakgtayayan xlakata chuntiya naskujnaniyaw. Jehová maxkilh litliwakga Sansón chu na nakinkamaxkiyan akinin.

12. ¿Tuku nitlan laksakli Sansón, chu tuku xlakata nitlan xʼama kitaxtuni uma?

¹² Sansón na makglakgalhina xwanit, wa xlakata xmin kilhtamaku nitlan tuku xlaksaka. Pulaktum tuku laksakli lu nitlan kitaxtunilh xlakata ni lakapastakli tuku Jehová xlakgayawanit. Akxni xtitaxtunita kilhtamaku lata juez xlitaxtu, «lakgatilh chatum puskat tiku xlama kxakaxtum Sorec tiku xwanikan Dalila» (Juec. 16:4). Akxni nina xlakgapasa Dalila, xtatamakgaxtokgputun chatum puskat tiku filistea xwanit. Pero Biblia wan pi «wa Jehová tiku chuna xmalakpuwanima, xputsama akgtum kilhtamaku xlakata tlan xkatalatlawalh filisteos». Alistalh, Sansón alh kʼGaza, akgtum kachikin nema xkatapakgsini filisteos, chu tamakgxtakgli kxchik chatum puskat tiku ksta xmakni. Uma kilhtamaku Jehová maxkilh litliwakga Sansón xlakata xlakxtlawalh tuku xlitamakgtaya kachikin, xmalakcha (Juec. 14:1-4; 16:1-3). Pero xlakata Dalila max israelita xwanit, nialhtu tuku xlikilhalh xlakata xkatalatlawalh filisteos.

13. ¿Tuku tlawalh Dalila xlakata xʼakgskgawilh Sansón?

¹³ Filisteos xlakaskinkgo pi Dalila xʼakgskgawilh Sansón. Wa xlakata malaknunikgolh lhuwa plata, chu xla wa pi xʼama kamakgtaya. Max xlakata Sansón lu xpaxki Dalila, nipara tsinu lilakpuwa tuku xla xʼama tlawani. Dalila makglhuwa tasaskinilh pi xwanilh niku xminacha xlitliwakga, chu akxni Sansón litlakgwalh tuku xwanima, wanilh niku xminacha xlitliwakga. Lu nitlan, pero tuku tlawalh Sansón, limakgatsankgalh xlitliwakga chu nialh kgalhilh xtamakgtay Jehová (Juec. 16:16-20).

14. ¿Tuku akgspulalh Sansón xlakata lipawa Dalila?

¹⁴ Sansón tlakg lipawa Dalila nixawa Jehová, chu lu nitlan tuku kitaxtunilh. Filisteos chipakgolh chu maxtunikgolh xlakgastapu. Alistalh  tamaknuka kpulachin kʼGaza, kachikin nema xla xmapanuninit xmalakcha, chu anta skujni limaxtuka chu xlakgswakga talhtsi. Alistalh, filisteos tlawakgolh akgtum paskua chu tlawanikgolh akgtum tamakamastan xdioskan, Dagón, xlakata xlakpuwankgo pi wa xkamakamaxkinit Sansón. «Tamakxtukgolh kpulachin Sansón xlakata xlikgalhkgamanankgolh» (Juec. 16:21-25).

15. ¿La limasiyalh Sansón pi lipawampa Jehová? (Jueces 16:28-30; kaʼakxilhti xmakni revista).

¹⁵ Sansón tlawalh tuku lu nitlan, pero ni chuna tamakgxtakgli. Chuntiya xmakgantaxtiputun tuku xlakgayawanit Jehová, nakamasputu filisteos (kalikgalhtawakga Jueces 16:28-30). Wa xlakata Sansón tasaskinilh Jehová pi xmaxkilh talakaskin nakamalakgaxokge filisteos. Dios kgaxmatnilh xʼoración chu maxkipa xlitliwakga. Ama kilhtamaku, Sansón tlakg lhuwa filisteos kamakgnilh nixawa tiku xkamakgninit putuminika kxlatamat.

16. ¿Tuku kinkamasiyaniyan xliʼakxilhtit Sansón?

¹⁶ Maski Sansón lipatinalh tuku nitlan laksakli, chuntiya liskujli xlakata namakgantaxti xtalakaskin Jehová. Uma kinkamasiyaniyan pi ni kilitaxlajwanitkan akxni natlawayaw tuku nitlan chu max natalakaskin nakinkastakyawakanan o namakgatsankgayaw akgtum talakgatay. Kalakapastakwi pi Jehová ni lakpuwan pi nialhla tuku katitlawaw (Sal. 103:8-10). Maski min kilhtamaku akgsankgatayayaw, Jehová tlan chuntiya nakinkamaklakaskinan chuna la maklakaskilh Sansón.

17, 18. ¿Tuku xlakata makgpuwantiniyan xliʼakxilhtit Michael? (Na kaʼakxilhti dibujos)

¹⁷ Kaʼakxilhwi tuku titaxtulh chatum kgawasa tiku wanikan Michael. Xla siervo ministerial chu precursor regular xlitaxtu, chu lu kskujnanima Jehová. Pero tlawalh tuku nitlan chu wa xlakata makgatsankgalh tuku xlakgaya kcongregación. Xla wan: «Xaktlawanit putum tuku xakmatlani xlakata nakskujnani Jehová. Pero kaj xalan kmakgkatsilh pi nialhla tuku xaktlawa xlakata nakskujnani Jehová. Xakkatsi pi Jehová ni xʼama kimakgxtakga, pero xaklilakpuwan komo tlan chuntiya xaktalalimpa chuna la xapulana o komo tlan xakskujpa kcongregación chuna la xapulana».

¹⁸ Lu tlan pi Michael ni taxlajwanilh. Xla wan: «Kliskujli tlakg naktalakatsuwini  Jehová. Tuku kimakgtayalh wa pi ankgalhin xaktlawani oración xliputum kinaku, xaklikgalhtawakga Biblia chu xaklilakpuwan». Titaxtulh kilhtamaku, Michael lakgayawaparaka taskujut kcongregación, chu la uku kgolotsin chu precursor regular litaxtu. Xla wan: «Xlakata natalan kimakgtayakgolh chu kimakgpuwantinikgolh, liwaka lakgkgolotsin xalak congregación, kimakgtayalh nakʼakgatekgsa pi Jehová chuntiya xkimpaxki. La uku tlan kskujnanipara chu kintalakapastakni tlan wi. Uma tuku ktitaxtulh kimasiyanilh pi Jehová tlan natapati tiku xlikana nitlan limakgkatsi tuku nitlan tlawanit». Xtachuna la Michael, liwana kakatsiw pi maski tlawanitaw tuku nitlan, Jehová chuntiya nakinkamaklakaskinan chu nakinkasikulunatlawayan komo natlawayaw putum tuku matlaniyaw xlakata nalakgpaliyaw kintayatkan chu chuntiya nalipawanaw (Sal. 86:5; Prov. 28:13).

19. ¿La matliwakglhnitan xliʼakxilhtit Sansón?

¹⁹ Kʼuma artículo lichuwinanitaw makgapitsi tuku titaxtulh Sansón. Maski makglakgalhina xwanit chu nitlan tuku laksakli akxni lakgatilh Dalila, ni anta tamakgxtakgli, wata chuntiya skujnanilh Jehová. Chu Jehová ni lakpuwa pi nialhla tuku xʼama tlawa, chu asta maklakaskimpa xlakata xtlawalh tuku kaks malakawaninan. Jehová chuntiya xliʼakxilha la chatum chixku tiku xkgalhi takanajla. Wa xlakata matsokgwilininalh xtukuwani anta kʼHebreos capítulo 11, niku kalichuwinankan amakgapitsi kskujnin Dios tiku ni makgxtakgkgolh. Lu kinkamakgpuwantiniyan pi kinTlatkan xalak akgapun kinkamaxkiputunan litliwakga, liwaka akxni titaxtuyaw taʼakglhuwit chu maklakaskinaw xtamakgtay. Wa xlakata, chuna la Sansón, kaskiniw Jehová: «Katlawa litlan, kakilakapastakti. Oh, Dios, […] kakimaxkipara litliwakga» (Juec. 16:28).