ARTÍCULO NEMA NATALIKGALHTAWAKGA 36
TAKILHTLIN 89 Jehová sikulunatlawa tiku kgaxmatni
«Kamakgantaxtitit xtachuwin Dios»
«Kamakgantaxtitit xtachuwin Dios chu ni kajwatiya kakgaxpattit» (SANT. 1:22).
TUKU NAʼAKXILHAW
Uma artículo nakinkamakgtayayan tlakg nalikgalhtawakgaputunaw xTachuwin Dios chali chali. Pero ni kajwatiya uma, wata na nalilakpuwanaw chu nalilatamayaw.
1, 2. ¿Tuku xlakata xlakskujnin Dios paxuwakgo? (Santiago 1:22-25).
JEHOVÁ chu xKgawasa lakaskinkgo pi ankgalhin kapaxuwaw. Tiku tsokgli Salmo 119:2 wa: «Paxuwakgo tiku tlawakgo tuku xla wan, tiku putsakgo xliputum xnakujkan». Jesús nachuna wa: «¡Paxuwakgo tiku kgaxmatkgo xtachuwin Dios chu makgantaxtikgo!» (Luc. 11:28).
2 Xlakskujnin Dios lhuwa tuku lipaxuwayaw. Pero pulaktum tuku tlakg kinkamakgapaxuwayan, wa pi ankgalhin likgalhtawakgayaw xTachuwin Dios chu liskujaw xlakata nalilatamayaw tuku katsinimaw (kalikgalhtawakga Santiago 1:22-25).
3. ¿Tuku tlan kitaxtu akxni makgantaxtiyaw xTachuwin Dios?
3 ¿La litamakgtayayaw akxni “makgantaxtiyaw xTachuwin Dios”? Akxni liskujaw tuku katsiniyaw kBiblia makgapaxuwayaw Jehová chu akinin na paxuwayaw (Ecl. 12:13). Akxni tlawatilhayaw tuku likgalhtawakgayaw kxTachuwin Dios tlakg tlan tawila kifamiliajkan chu tlakg tlan katalalinaw kinatalankan xalak congregación. Chu max chuna akxilhnita kmilatamat. Ni kgalhiyaw taʼakglhuwit nema kgalhikgo tiku ni skujnanikgo Jehová. Lu xlikana tuku wa mapakgsina David k’akgtum takilhtlin. Akxni xlichuwinanitata xlimapakgsin Jehová, xtastakyaw chu la lakputsanan, wa: «Komo nakgalhakgaxmatkan lanka talakgalhaman naʼanan» (Sal. 19:7-11).
4. ¿Tuku xlakata min kilhtamaku tuwa makgkatsiyaw nalilatamayaw xTachuwin Dios?
4 Xlakata tlan nalilatamayaw tuku masiya xTachuwin Dios, talakaskin nalikgalhtawakgayaw chu nalakputsananiyaw Biblia, chu chuna naʼakgatekgsaw tuku Jehová lakaskin natlawayaw. Pero min kilhtamaku tuwa kitaxtu xlakata lhuwa tuku kilitlawatkan. Wa xlakata, talakaskin nalimaxtuyaw kilhtamaku. Kʼuma artículo naʼakxilhaw tuku nakinkamakgtayayan nalikgalhtawakgayaw Biblia chali chali. Na naʼakxilhaw tuku nakinkamakgtayayan nalilakpuwanaw tuku likgalhtawakgamaw chu la nalilatamayaw tuku katsinimaw.
KALIMAXTU KILHTAMAKU XLAKATA NALIKGALHTAWAKGAYA XTACHUWIN DIOS
5. ¿Tuku talakgatay kgalhiyaw akinin xlakskujnin Jehová?
5 Xlakskujnin Jehová ankgalhin kgalhiyaw lhuwa taskujut. Limaxtuyaw kilhtamaku xlakata natlawayaw tuku wan Biblia pi kilitlawatkan. Akgtum liʼakxilhtit, lhuwa akinin skujaw xlakata nakgalhiyaw tuku maklakaskinaw chu tuku maklakaskin kifamiliajkan (1 Tim. 5:8). Lhuwa natalan kuentajtlawakgo chatum xalak xfamiliajkan tiku tatatla o tiku linkgoya kata. Chu putum akinin na limaxtuyaw kilhtamaku xlakata nakuentajtlawayaw ni natatatlayaw. Na kgalhiyaw taskujut kcongregación. Akgtum taskujut nema lu xlakaskinka wa akxni lichuwinanaw Dios. Xlakata kgalhiyaw lhuwa taskujut, max nalilakpuwanaw: «¿Tuku tlan naktlawa xlakata naklimaxtu kilhtamaku ankgalhin naklikgalhtawakga Biblia chali chali, naklilakpuwan tuku klikgalhtawakgama chu naklilatama?».
6. ¿Tuku tlan natlawaya xlakata ankgalhin nalikgalhtawakgaya Biblia? (Na kaʼakxilhti dibujo).
6 Pulaktum «tuku tlakg xlakaskinka» liʼakxilhaw kstalaninanin Cristo wa pi nalikgalhtawakgayaw Biblia, chu chuna kilitlawatkan (Filip. 1:10). Libro xla Salmos wan pi chixku tiku paxuwa, wa tiku «kakuwani chu katsisni likgalhtawakga xlimapakgsin [Jehová] chu lilakpuwan» (Sal. 1:1, 2). Uma kinkamakgpuwantiniyan nalimaxtuyaw kilhtamaku nalikgalhtawakgayaw Biblia. ¿Tuku hora tlakg tlan nalikgalhtawakgaya Biblia? Chatunu akinin nalaksakaw. Pero tuku tlakg xlakaskinka wa pi hora nema nalaksakaw wa tuku nakinkamaxkiyan talakaskin ankgalhin nalikgalhtawakgayaw Biblia. Chatum tala tiku wanikan Víctor, wan: «Klakgati klikgalhtawakga Biblia tsisa. Ni klakgati ktaki lu tsisa, pero uma hora nitu kiʼakgaxkuli, ninajtu klilakgaputsa chu tlakg kuenta ktlawa tuku klikgalhtawakga». ¿Nachuna makgkatsiya chuna la Víctor? Kalilakpuwanti: «Chu akit, ¿tuku hora tlakg tlan naklikgalhtawakga Biblia?».
¿Tukuya kilhtamaku tlan ankgalhin xlikgalhtawakga Biblia? (Kaʼakxilhti párrafo 6).
KALILAKPUWANTI TUKU NALIKGALHTAWAKGAYA
7, 8. Kalichuwinanti akgtum liʼakxilhtit nema limasiya tuku ni kilitlawatkan akxni likgalhtawakgayaw Biblia.
7 Akxni katsiyawa tuku hora nalikgalhtawakgayaw Biblia, talakaskin kuenta natlawayaw pi ni kaj lakapala nalikgalhtawakgayaw chu nitu nakatsiniyaw. Chali chali max wi tuku makglhuwa likgalhtawakgayaw, pero maski chuna, nipara tsinu lakapastakaw tuku likgalhtawakgaw. ¡Lu nitlan komo chuna xkinkaʼakgspulan akxni likgalhtawakgayaw Biblia! Max lakkaxwilinitaw la xlilhuwa capítulos nalikgalhtawakgayaw akgatunu kilhtamaku. Lu tlan pi wi tuku lakkaxwilinitaw natlawayaw chu kiliskujatkan xlakata namakgantaxtiyaw (1 Cor. 9:26). Pero xlakata nalitamakgtayayaw Biblia ni kajwatiya talakaskin nalikgalhtawakgayaw.
8 Kalilakpuwaw uma liʼakxilhtit. Akxni senan lu kamakgtaya tuwan. Pero komo lhuwa nasenan, tiyat nila katichuwakgolh chuchut, chu nila katilitamakgtayalh. Wa xlakata tlakg tlan pi tsinu tsinu nasenan, xlakata tlan nachuwa tiyat, chu tlan nalitamakgtayakgo tuwan. Nachuna kitaxtu akxni likgalhtawakgayaw Biblia. Komo ni lakapala nalikgalhtawakgayaw, tlan nalakapastakaw tuku nalikgalhtawakgayaw chu tlan nalilatamayaw (Sant. 1:24).
Chuna la laktsu tuwan maklakaskinkgo kilhtamaku xlakata nakalakgchuwa chuchut chu nalitamakgtayakgo, akinin na maklakaskinaw kilhtamaku xlakata nalilakpuwanaw chu nalilatamayaw tuku likgalhtawakgayaw kBiblia (Ka’akxilhti párrafo 8).
9. ¿Tuku kilitlawatkan komo lismaninitaw lakapala likgalhtawakgayaw Biblia?
9 Kalilakpuwanti pi likgalhtawakgapat Biblia chu akxilha pi lakapala likgalhtawakgaya. ¿Tuku militlawat? Lakatsuku kalikgalhtawakga xlakata tlan nalilakpuwana tuku likgalhtawakgapat. Komo tuwa namakgkatsiya nalilakpuwana, ni kalipuwanti. Kajwatiya natalakaskin nalilakapastaka tuku likgalhtawakgapat. Tlan nalimaxtuya tlakg lhuwa kilhtamaku nakgalhtawakgaya o ni lhuwa versículos nalikgalhtawakgaya xlakata tlan nalilakpuwana tuku likgalhtawakga. Víctor, tiku lichuwinaw kpárrafo 6, wan: «Ni lhuwa versículos klikgalhtawakga, max kaj akgtum capítulo. Xlakata tsisa klikgalhtawakga, tlan tantaku klilakpuwan». Tuku tlakg xlakaskinka ni wa la xlilhuwa nakgalhtawakgaya, wata wa pi naʼakgatekgsa tuku nalikgalhtawakgaya chu nalitamakgtayaya (Sal. 119:97; kaʼakxilhti recuadro « Takgalhskinin nema namakgtayayan nalilakpuwana tuku likgalhtawakgapat»).
10. ¿Tuku tlan natlawaya xlakata nalilatapaya tuku likgalhtawakgapat kBiblia? Kawili akgtum liʼakxilhtit (1 Tesalonicenses 5:17, 18).
10 Kaxatukawa hora nema nalaksaka nalikgalhtawakgaya Biblia chu la xlilhuwa kilhtamaku nalimaxtuniya, ankgalhin kaliskujti xlakata naputsaya la nalilatapaya tuku katsinipat. Akxni likgalhtawakgapat Biblia, kalilakpuwanti: «¿La nakmakgantaxti la uku chu kkilhtamaku nema aku mima tuku klikgalhtawakgama?». Kalilakpuwanti pi likgalhtawakgapat 1 Tesalonicenses 5:17, 18 (kalikgalhtawakga). Alistalh katachokgo chu kalilakpuwanti tsinu chuna la tlawaya mioración. Akxni tlawaya oración, ¿xliputum minaku chuna tlawaya? ¿La xlimakglhuwa tlawaya oración? ¿Tuku lipaxtikatsiniya Jehová anta kmioración? Max anan pulaktutu tuku tlan nalipaxtikatsiniya Jehová. Komo nalilakpuwana uma pulaktutu tuku nawaniya Jehová, wix ni kaj kgaxpatpat nawan xTachuwin Dios, wata makgantaxtipata. Komo chali chali chuna natlawaya akxni nalikgalhtawakgaya Biblia, chuna la natitaxtu kilhtamaku, wix tlakg tlan kskujni Jehová nalitaxtuya. Komo akxni likgalhtawakgapat Biblia na’akxilha pi lhuwa tuku mililakgpalit kmilatamat, ¿tuku tlan natlawaya?
KALAKAPASTAKTI PI NI PUTUM TLAN KATITLAWA
11. ¿Tuku xlakata max namin kilhtamaku nitlan katilimakgkatsi tuku nalikgalhtawakgaya kBiblia? Kawili akgtum liʼakxilhtit.
11 Akxni nalikgalhtawakgaya Biblia, max nataxlajwaniya xlakata naʼakxilha pi lhuwa tuku mililakgpalit. Kalilakpuwanti uma: akgtum kilhtamaku likgalhtawakgaya makgapitsi versículos niku wan pi nitlan laksakpaxkinankan (Sant. 2:1-8). Akxilha pi talakaskin tlakg tlan nakalikatsiniya amakgapitsin, chu wa xlakata lakkaxwiliya chuna natlawaya. ¡Uma lu tlan! Pero lichali, likgalhtawakgaya kBiblia pi lu xlakaskinka kuenta natlawayaw la chuwinanaw (Sant. 3:1-12). Akxilha pi minit kilhtamaku wanita tuku nitlan o tuku ni makgpuwantininan, wa xlakata lakkaxwiliya pi tlakg kuenta natlawaya chuna la kgalhchuwinana. Xlituxama, likgalhtawakgaya kBiblia pi nitlan nakatalalinaw tiku xalak kakilhtamaku (Sant. 4:4-12). Akgatekgsa pi tlakg kuenta militlawat tuku películas akxilha chu tuku tatlakgni kgaxpata. Xliʼakgtati kilhtamaku, max nitlan limakgkatsiya xlakata akxilha pi lhuwa tuku mililakgpalit kmilatamat.
12. Komo akxni nalikgalhtawakgaya Biblia naʼakxilha pi wi tuku mililakgpalit, ¿tuku xlakata ni militaxlajwanit? (Na kaʼakxilhti nota).
12 Ni kataxlajwani komo naʼakxilha pi wi tuku mililakgpalit. Uma limasiya pi likgalhtawakgapat Biblia chuna la xlilat, taktujupat chu ni miʼakstu akgskgawipaka. a Kalakapastakti pi lin kilhtamaku nakgalhikan «xasasti tayat» (Col. 3:10). ¿Tuku namakgtayayan chuntiya nalilatapaya xTachuwin Dios?
13. ¿Tuku namakgtayayan nalilatapaya tuku katsinipat? (Na kaʼakxilhti dibujos).
13 Pulaktum tuku namakgtayayan wa pi naʼakgatekgsa pi nila putum tlan katitlawa chu nila makgtuminika katililatapa tuku katsinipat (Prov. 11:2). Tlan xtlawa uma: katsokgwili tuku mililakgpalit, kalaksakti pulaktum o pulaktiy tuku tlan pulana natlawaya chu tuku tlan natlawaya alistalh. ¿Tuku tlan pulana xtlawa?
Kalakapastakwi pi ni putum tlan katitlawaw. Wa xlakata ni makgtuminika katlawaputunkgow putum tuku likgalhtawakgayaw kBiblia, wata kaliskujwi pulakatunu pulakatunu (Kaʼakxilhti párrafos 13 chu 14).
14. ¿Tuku tlan pulana xliskujti nalakgpaliya?
14 Pulana tlan xliskujti nalakgchipina tuku tlakg ni tuwa makgkatsiya o tuku tlakg talakaskin pi nalakgpaliya. Akxni katsiyata tuku natlawaya, tlan xlakputsananti kkilikgalhtawakgakan, max tlan xlimaklakaskinti Índice de las publicaciones Watch Tower o Liputsan xla xtatayananin Jehová. Katlawani oración Jehová xlakata nalitachuwinana tuku lakgchipimputuna, kaskini pi kamakgtayan chuna natlawaputuna chu “kamaxkin litliwakga xlakata chuna natlawaya” (Filip. 2:13). Alistalh kalilatapa tuku katsinipat. Akxni naʼakxilha pi tlan kitaxtuniman, uma namakgpuwantiniyan nalakgpaliputuna atanu tuku talakaskin. Chu asta max tuku makgantaxtipata namakgtayayan nalakgpaliya atanu tuku talakaskin.
KAMASTA TALAKASKIN PI XTACHUWIN DIOS NALAKGPALI MILATAMAT
15. ¿Tuku xlakata xlakskujnin Jehová ni xtachuna la latamanin tiku na likgalhtawakgakgo Biblia? (1 Tesalonicenses 2:13).
15 Makgapitsi latamanin wankgo pi makglhuwa likgalhtawakgakgonit Biblia. Pero ¿xlikana kanajlakgo tuku wan chu mastakgonit talakaskin pi tuku masiya nalakgpali xlatamatkan? Lhuwa tiku nichuna tlawakgo. Pero akinin xlakskujnin Jehová liskujaw xlakata nalilatamayaw tuku wan Biblia. Chuna la kstalaninanin Cristo xalak pulana siglo, makgamakglhtinanaw Biblia «chuna la xtachuwin Dios». Wa xlakata, lu liskujaw xlakata nalimasiyayaw pi lakgpalima kilatamatkan (kalikgalhtawakga 1 Tesalonicenses 2:13).
16. ¿Tuku nakinkamakgtayayan nalilatamayaw xTachuwin Dios?
16 Min kilhtamaku tuwa kitaxtu nalikgalhtawakgayaw chu nalilatamayaw xTachuwin Dios. Max ni kgalhiyaw kilhtamaku xlakata nalikgalhtawakgayaw. Max lakapala likgalhtawakgayaw chu patsankgayaw tuku likgalhtawakgaw. O max taxlajwaniyaw akxni akxilhaw putum tuku kililakgpalitkan. Kaxatukawa tuku tuwa makgkatsiya natlawaya, Jehová namakgtayayan. Kamakgamakglhtinanti xtamakgtay, ni kajwatiya kakgaxpatti xTachuwin Dios chu kapatsankga, wata kalilatapa. Akxni tlakg nalikgalhtawakgaya Biblia chu nalilatapaya, tlakg napaxuwaya (Sant. 1:25).
TAKILHTLIN 94 Dios, paxtikatsinilh xlakata mintachuwin
a Kaʼakxilhti kjw.org video Tuku wankgo makgapitsi kamanan: Likgalhtawakgakan Biblia.
