1. ¿Tuku natlawa Jesús nialh makgas kilhtamaku?

 KKILHTAMAKU nema lamaw lu xlakaskinka. Nialh makgas, Jesús nakalakputsanani putum tiku lamakgo kKatiyatni. Pero ¿la likatsiyaw pi lu lakatsu wi uma kilhtamaku? Xlakata Jesús kawanilh xtamakgalhtawakgen tuku xʼama la nema xʼama “limasiya” pi xkinkatawilan chu pi «xlisputni kakilhtamaku» xtalakatsuwinita (Mat. 24:3). Natekgsaw tuku lichuwinalh Jesús anta kMateo capítulo 24 chu 25, kMarcos capítulo 13 chu kLucas capítulo 21.

2. ¿Tuku nalichuwinanaw kʼuma artículo, chu tuku xlakata?

² Xlakata nakinkamakgtayayan skgalalh natawilayaw, Jesús lichuwinalh akgtutu parábolas o liʼakxilhtit nema wi tuku kinkamasiyaniyan: parábola xla borregos chu cabras, xla kgalhakaw laktsumajan chu xla talentos. Akgatunu parábola kinkamasiyaniyan tuku tayat kgalhikgo chatunu latamanin nema Jesús kuenta natlawa akxni nakalakputsanani. Kʼuma artículo nalichuwinanaw umakgolh parábolas chu tuku kinkamasiyaniyan. Pulana kalichuwinaw parábola xla borregos chu cabras.

BORREGOS CHU CABRAS

3. ¿Tuku kilhtamaku nakalakputsanani Jesús latamanin?

³ Jesús masiyalh pi akxni nalakgchan kilhtamaku nakalakputsanani chatunu latamanin, naʼakxilha komo uma lataman makgamakglhtinalh xatlan tamakatsinin chu kamakgtayalh xnatalan tiku xatalaksakni (Mat. 25:​31-46). ¿Tuku kilhtamaku nawan Jesús komo chatum lataman borrego litaxtu o cabra? Chuna natlawa akxni sputmaja nawan «lhuwa tapatin», akxni atsinu  tsankga nachin Armagedón (Mat. 24:21). Xtachuna la tiku kakuentajtlawa borregos, tanu kawili borregos chu tanu kawili cabras, Jesús tanu nakawili tiku ni kamakgxtakgkgolh xnatalan tiku xatalaksakni chu tanu nakawili tiku ni kamakgtayakgolh.

4. Chuna la wan Isaías 11:​3, 4, ¿tuku xlakata tlan nalipawanaw pi Jesús natlawa tuku xaʼakgstitum akxni nakalakputsanani latamanin? (Na kaʼakxilhti dibujos).

⁴ Jehová juez limaxtulh Jesús, chu Biblia liwana kinkawaniyan pi Jesús xaʼakgstitum nalakputsanan (kalikgalhtawakga Isaías 11:​3, 4). Jesús kuenta tlawa tuku tlawakgo, tuku lakpuwankgo chu tuku wankgo chatunu latamanin, chu la kalikatsinikgo xnatalan xatalaksakni (Mat. 12:​36, 37; 25:40). Nakatsi tiku kamakgtayalh xatalaksakni chu tiku makgtlawalh taskujut nema kalakgayawakanit tiku xatalaksakni. a Pulaktum la nakamakgtayayaw wa pi nalichuwinanaw Dios. Tiku nakamakgtayakgo, «xaʼakgstitum» nalitaxtukgo chu tlan nalatamakgo putum kilhtamaku kKatiyatni (Mat. 25:46; Apoc. 7:​16, 17). ¡Lanka tasikulunalin namakglhtinankgo tiku nikxni namakgxtakgkgo Dios! Komo ni namakgxtakgkgo Dios akxni lama nawan lhuwa tapatin chu akxni titaxtunita uma, xtukuwanikan antiya natawila «klibro xla latamat» (Apoc. 20:15).

5. ¿Tuku kinkamasiyaniyan parábola xla borregos chu cabras, chu tiku kuenta xlitlawatkan uma tamasiy?

⁵ Kalimasiya pi ni makgxtakgnana. Parábola xla borregos chu cabras wa kakilhchanima tiku nalatamakgo unu kKatiyatni putum kilhtamaku. Xlakan limasiyakgo pi ni kamakgxtakgkgo tiku xatalaksakni akxni lichuwinankgo Jehová chu akxni stalanikgo xtastakyaw skujni xatalipaw tiku Jesús laksaknit (Mat. 24:45). Pero tiku kgalhikgo takgalhkgalhin naʼankgo latamakgo kʼakgapun na kuenta xlitlawatkan tuku kamasiyani uma parábola. ¿Tuku xlakata? Xlakata Jesús lu kuenta tlawama tuku tlawakgo, tuku lakpuwankgo chu tuku wankgo. Wa xlakata, lu xlakaskinka pi xlakan na nalimasiyakgo pi ni makgxtakgnankgo. Atanu akgtiy parábolas nema lichuwinan Mateo capítulo 25 wi tuku kamasiyani tiku xatalaksakni. Kaʼakxilhwi parábola xla kgalhakaw laktsumajan.

KGALHAKGAW LAKTSUMAJAN

6. ¿La limasiyakgolh kgalhkitsis laktsumajan pi lakgskgalalan xwankgonit? (Mateo 25:​6-10).

⁶ Kʼuma parábola, Jesús kalichuwinan kgalhakaw laktsumajan tiku ankgo paxtokgkgo kgawasa litatawilat (Mat. 25:​1-4). Putum umakgolh laktsumajan xtanuputunkgo kpaskua xla tamakgaxtokgat. Jesús wa pi kgalhkitsis laktsumajan «lakgskgalalan» xwankgonit chu atanu kgalhkitsis «xalaktontas» xwankgonit. Laktsumajan tiku xalakgskgalalan skgalalh xwilakgo chu xtakaxkgonit; xʼamakgo kgalhikgo kgawasa litatawilat kilhtamaku nema xtalakaskin, asta maski katsisni xchilh. Wa xlakata, linkgolh xmakgskgotkan. Asta xlinkgo aceite kxlametajkan xlakata ni xkatsikgo komo sokg xʼama chin uma kgawasa. Chu ni xlakaskinkgo pi xmakgskgotkan xmixli (kalikgalhtawakga Mateo 25:​6-10). Akxni chilh kgawasa litatawilat, xalakgskgalalan laktsumajan tatanukgolh kpaskua. Uma tlan nakatamalakxtumiyaw kstalaninanin Cristo tiku xatalaksakni. Tiku nalimasiyakgo pi ni makgxtakgnankgo chu ankgalhin skgalalh natawilakgo asta akxni nachin kgawasa litatawilat, Jesús, tlan natatanukgo kTamapakgsin xalak akgapun (Apoc. 7:​1-3). b ¿Chu tuku kaʼakgspulalh kgalhkitsis laktsumajan tiku xalaktontas?

7. ¿Tuku kaʼakgspulalh kgalhkitsis laktsumajan tiku xalaktontas xwankgonit, chu tuku xlakata?

⁷ Laktsumajan tiku xalaktontas ni tlawakgolh chuna la xalakgskgalalan laktsumajan, ni skgalalh  xwilakgo akxni chilh kgawasa litatawilat. Kparábola lichuwinankan pi akxni kgaxmatkgolh pi kgawasa xʼamaja chin, akxilhkgolh pi xmakgskgotkan xʼamaja mixa. Chu xlakata ni xlinkgonit xʼaceitejkan, ankgolh tamawakgo. Akxni chilh kgawasa litatawilat, xlakan nina xtaspitkgo. Uma kilhtamaku, «laktsumajan tiku skgalalh xwilakgolh tatanukgolh kputamakgaxtokgni chu malakchuwaka malakcha» (Mat. 25:10). Alistalh, laktsumajan tiku xalaktontas taspitkgolh chu xtanuputunkgo, pero kgawasa litatawilat kawanilh: «Ni kkalakgapasan» (Mat. 25:​11, 12). Xlakan ni xtakaxkgonit xlakata xkgalhkgalhikgolh kgawasa litatawilat kilhtamaku nema xtalakaskilh. ¿Tuku kamasiyani uma parábola tiku xatalaksakni?

8, 9. ¿Tuku kamasiyani tiku xatalaksakni parábola xla kgalhakaw laktsumajan? (Na kaʼakxilhti dibujos).

⁸ Kalimasiya pi skgalalh wila chu takaxnita. Jesús ni xkilhwama pi xʼama anan akgtiy grupo tiku xatalaksakni: akgtum grupo tiku skgalalh xʼama tawila chu xtakaxli xlakata xkgalhkgalhilh asta akxni xmilh lisputni chu atanu grupo tiku ni skgalalh xʼama tawila. Wata Jesús xkawanima tiku xatalaksakni pi komo ni skgalalh xtawilakgolh chu ni xtayanikgolh asta akxni xchilh xlisputni kakilhtamaku, ni xʼamakgo makgamakglhtinankgo xtatlajakan (Juan 14:​3, 4). ¡Uma lu xlakaskinka xwanit! Putum akinin, lata tiku nalatamayaw kʼakgapun o kKatiyatni, kuenta kilitlawatkan tuku kinkamasiyaniyan parábola xla kgalhakaw laktsumajan: ankgalhin skgalalh kilitawilatkan chu kilitakaxatkan xlakata natayaniyaw asta kxlisputni (Mat. 24:13).

⁹ Chuna la akxilhnitaw, kparábola xla kgalhakaw laktsumajan, Jesús lichuwinalh pi lu xlakaskinka natakaxaw chu skgalalh natawilayaw. Akxni aku xlichuwinankgonita uma parábola, Jesús lichuwinalh parábola xla talentos, chu anta lichuwinalh pi xlakaskinka palha naskujaw.

TALENTOS

10. ¿La limasiyakgolh xapulana chatiy skujnin pi tlan xkalipawankan? (Mateo 25:​19-23).

¹⁰ Kʼuma parábola, Jesús kalichuwinalh chatiy skujnin tiku tlan xkalipawankan chu chatum tiku nila xlipawankan (Mat. 25:​14-18).  Akxni malana nina xʼan kʼalakatanu país, kamaxkilh makgapitsi talentos o tumin. Xapulana chatiy skujnin limasiyakgolh pi tlan xkalipawankan xlakata liskujkgolh tuku kamaxkika chu malhuwinikgolh xtumin xmalanakan. Akxni xmalanakan kitaspittli, makgtiy xtlajakgonit tuku xkamaxkikanit. Wa xlakata xmalanakan lu paxuwalh chu kawanilh: «Katapaxuwa mimalana» (kalikgalhtawakga Mateo 25:​19-23). Chu xlikgalhtutu skujni, ¿la limaklakaskilh tumin nema xmaxkinit xmalana?

11. ¿Tuku akgspulalh xalhkitit skujni, chu tuku xlakata?

¹¹ Malana maxkilh xlikgalhtutu skujni akgtum talento xlakata na xliskujli chu xmalhuwinilh xtumin. Pero uma skujni «xalhkitit» xwanit. Wa xlakata, puwaxnalh kkatiyatni chu anta matsekgli tumin. Akxni xmalana taspitli, kajwatiya maspitnilh tuku xmaxkinit. Ni wanilh xmalana pi xtapatilh xlakata ni xmalhuwininit xtumin, wata limasiyalh pi nitlan skujni xlitaxtu chu limawakalh xmalana pi “lhuwa tuku kskin”. ¿Tuku kitaxtunilh uma skujni? Malana palha stakyawalh, makglhtilh xtalento chu tlakgaxtulh kxchik (Mat. 25:​24, 26-30).

12. ¿Tiku kakilhchanima la uku chatiy skujnin tiku tlan xkalipawankan?

¹² Chatiy skujnin tiku tlan xkalipawankan wa kakilhchanima xatalaksakni kstalaninanin Cristo tiku ni makgxtakgnankgo. Malana, Jesús, nakawani chatunu umakgolh tiku xatalaksakni: «Katapaxuwa mimalana». Uma wamputun pi makgamakglhtinankgo xapulana talakastakwanat chu kamaxkikan xtatlajakan kʼakgapun (Mat. 25:​21, 23; Apoc. 20:5a). Pero xliʼakxilhtit nixatlan skujni na wi tuku kamasiyani tiku xatalaksakni. Kaʼakxilhwi tuku xlakata chuna wanaw.

13, 14. ¿Tuku kamasiyani tiku xatalaksakni parábola xla talentos? (Na kaʼakxilhti dibujos).

¹³ Kalimasiya pi skulujwa wix. Kparábola xla talentos, Jesús ni xkilhwama pi tiku xatalaksakni xʼamakgo lhkititnankgo. Wata kaj wi tuku xkamasiyaniputun, chuna la tlawalh akxni kalitachuwinalh parábola xla kgalhakaw laktsumajan. Jesús xlichuwinama tuku xʼama kaʼakgspula tiku xatalaksakni komo xmilh kilhtamaku nialh xatapaxuwan kskujnikgolh Dios: nialhla xʼamakgo katatapakgsikgo «tiku katasanikanit  chu kalaksakkanit», chu nila xʼamakgo tanukgo kTamapakgsin xalak akgapun (2 Ped. 1:10).

¹⁴ Akxni Jesús lichuwinalh parábolas xla kgalhakaw laktsumajan chu xla talentos, liwana limasiyalh pi putum tiku xatalaksakni skgalalh xlitawilatkan chu xlitakaxatkan, chu chuntiya palha xliskujatkan. Pero ni kajwatiya uma tuku Jesús kamasiyanilh tiku xatalaksakni. Anta kMateo 24:​40, 41 tekgsaw atanu tuku kamasiyanilh. Kaʼakxilhwi umakgolh versículos.

¿TIKU «NALINKAN»?

15, 16. Chuna la wan Mateo 24:​40, 41, ¿tuku xlakata lu xlakaskinka pi tiku xatalaksakni skgalalh natawilakgo?

¹⁵ Akxni Jesús nina xlichuwinan umakgolh akgtutu parábolas, lichuwinalh pi xʼamaka kalakputsananikan tiku xatalaksakni, xlakata xkatsika tiku ni makgxtakgkgolh Dios. Xla kalichuwinalh chatiy lakchixkuwin tiku akxtum kskujmakgo kpukuxtu chu chatiy lakpuskatin tiku kswakganamakgo kxmolinojkan. Xchatiyunkan watiya tuku xtlawamakgo. Pero Jesús wa: «Chatum nalinkan, chu achatum naʼakgxtakgmikan» (kalikgalhtawakga Mateo 24:​40, 41). Kversículo nema stala, Jesús kawani kstalaninanin: «Skgalalh katawilatit, xlakata ni katsiyatit tukuya kilhtamaku namin miMalanakan» (Mat. 24:42). Uma xtachuna tuku Jesús wa akxni lichuwinankgolh parábola xla kgalhakaw laktsumajan (Mat. 25:13). Wa xlakata, umakgolh akgtiy tachuwin watiya tuku kilhchanima. Kajwatiya tiku xlikana kalaksakkanit chu ni makgxtakgnankgo nakalinkan, uma wamputun pi Jesús nakamakgamakglhtinan kTamapakgsin xalak akgapun (Juan 14:3).

¹⁶ Kalimasiya pi skgalalh wila. Komo chatum tiku xatalaksakni nialh skgalalh natawila, nialh katikatamamakxtumika tiku “kalaksakkanit” (Mat. 24:31). Pero putum tiku kgalhkgalhimakgo nalatamakgo kKatiyatni, na kuenta xlitlawatkan tuku Jesús lichuwinalh chu talakaskin ni namakgxtakgkgo Dios chu chuntiya skgalalh natawilakgo.

17. ¿Tuku xlakata ni lilakgaputsayaw komo Jehová kalaksaknit kʼumakgolh xaʼawatiya kata makgapitsi tiku naʼankgo kʼakgapun?

¹⁷ Akinin liwana lakgapasaw Jehová, wa xlakata lipawanaw putum tuku xla tlawa. Wa xlakata, komo Jehová wi tiku kalaksaknit kʼumakgolh xaʼawatiya kata xlakata naʼankgo kʼakgapun, ni lilakgaputsayaw. c Kalakapastakwi tuku Jesús wa xlakata tasakwa tiku kiskujkgolh niku xchankanit xʼuvas nema kasakwaka akxni xkgotanumaja (Mat. 20:​1-16). Tiku kakgotanun tsukukgolh skujkgo nachuna kaxokgonika chuna la tiku tsisa xtsukukgonit skujkgo. Xtachuna la uma, putum tiku xatalaksakni tiku ni makgxtakgnankgo namakglhtinankgo tatlaja xlakata naʼankgo kʼakgapun maski makgasata o nina makgas lata kalaksakkanit.

KUENTA KATLAWAW TUKU KINKAMASIYANIYAN JESÚS KPARÁBOLAS

18, 19. ¿Tuku kinkamasiyaninitan uma artículo?

¹⁸ ¿Tuku lichuwinanitaw kʼuma artículo? Kparábola xla borregos chu cabras masiya pi lu xlakaskinka pi tiku kgalhkgalhimakgo nalatamakgo putum kilhtamaku unu kKatiyatni, nikxni xlimakgxtakgatkan Jehová, la uku chu akxni lama nawan lhuwa tapatin. Akxni nachin uma kilhtamaku, wa Jesús nawan tiku ni makgxtakgkgonit Dios chu wa xlakata «nakgalhikgo latamat nema ni kgalhi xlisputni» (Mat. 25:46).

¹⁹ Na lichuwinanitaw akgtiy parábolas nema kamakgtaya tiku xatalaksakni. Kparábola xla kgalhakaw laktsumajan, kgalhkitsis limasiyakgolh pi skgalalh xwilakgo chu xtakaxkgonit. Lu skgalalh tawilakgolh chu kgalhkgalhikgolh kgawasa litatawilat kilhtamaku nema xtalakaskin.  Xlakata kgalhkitsis xalaktontas xwankgonit chu ni skgalalh xwilakgo, kgawasa litatawilat ni kamaxkilh talakaskin natanukgo kpaskua xla tamakgaxtokgat. ¿Tuku kinkamasiyaniyan? Pi skgalalh kilitawilatkan xlakata chuntiya nakgalhkgalhiyaw asta akxni Jesús nalimin xlisputni uma kakilhtamaku. Kparábola xla talentos akxilhwi pi chatiy skujnin lu palha skujkgolh. Xlakata tlan xkalipawankan chu palha skujkgolh xlakata xmalhuwinikgolh xtuminkan xmalanakan, xmalanakan lu paxuwalh. Pero skujni tiku xalhkitit xwanit tamakxtuka kkilhtin. ¿Tuku kinkamasiyaniyan? Pi lu kiliskujnanitkan Jehová asta akxni namin lisputni. Xaʼawatiya, akxilhwi pi Jesús kamasiyani tiku xatalaksakni pi chuntiya lu skgalalh xlitawilatkan xlakata nakalinkan kTamapakgsin xalak akgapun. Xlakan lu kgalhkgalhimakgo pi kachalh kilhtamaku akxni «makxtum» natatawilakgo Jesús kʼakgapun. Akxni titaxtunita nawan Armagedón, xlakan nalitaxtukgo tsumat litatawilat chu natatamakgaxtokgkgo Jesús (2 Tes. 2:1; Apoc. 19:9).

20. ¿Tuku natlawa Jehová komo kuenta natlawayaw tuku kinkamasiyaniyan?

²⁰ Nialh makgas Jesús nakalakputsanani latamanin, pero ni kilipekuanatkan. Komo ni namakgxtakgaw kinTlatkan xalak akgapun, Jehová, xla nakinkamaxkiyan «litliwakga tuku latamanin nila kgalhikgo» xlakata “tlan natayayachaw kxlakatin xKgawasa chixku” (2 Cor. 4:7; Luc. 21:36). Wa xlakata, putum akinin, lata tiku kgalhkgalhimaw nalatamayaw kʼakgapun o kKatiyatni, lu kuenta kilitlawatkan tuku kinkamasiyaniyan parábolas nema lichuwinalh Jesús. Komo chuna natlawayaw, Jehová tlan nakinkaʼakxilhan chu nakgalhiyaw talakgalhaman xlakata kintukuwanikan “natatsokgtawila klibro” xla latamat (Dan. 12:1; Apoc. 3:5).