Klakachilh kkata 1934. Kinatlatni xalak Suiza xwankgonit, pero xʼankgonit latamakgo kTimmins, akgtum aktsu kachikin nema wi kʼOntario (Canadá). Kkata 1939 kintse tsukulh likgalhtawakga revista La Atalaya chu tsukulh an kxtamakxtumitkan xtatayananin Jehová. Xkinkalinan akit chu kgalhchaxan kinatalan, chu ni lhuwa kilhtamaku titaxtulh, kintse tamunulh.

Kintlat ni lakgatilh pi kintse xlikgalhtawakgama Biblia, pero kintse liwana xlakpuwanit pi ni xʼama makgxtakga uma. Xla chuntiya skujnanilh Jehová maski kkata 1940 nialh mastaka talakaskin naklichuwinanaw Dios kCanadá. Kintse ankgalhin limasiyanilh kakni kintlat chu tlan likatsinilh maski xla xwani lhuwa tuku nitlan. Xliʼakxilhtit kintse kimakgtayalh akit chu kinatalan pi xtatayananin Jehová xaklitaxtuw. Titaxtulh kilhtamaku kintlat lakgpalilh xtayat chu tlakg tlan tsukulh kinkalikatsiniyan.

Kkata 1950, kkalh kNueva York kʼakgtum asamblea nema xwanikan «Aumento de la Teocracia». Anta kkalakgapasli natalan tiku xalak tanu tanu kachikinin xwankgonit chu kkgaxmatli tuku lu tlan xtitaxtukgonit umakgolh natalan tiku xkilakgonit kʼEscuela de Galaad. Uma lu kimaʼakgpuwantinilh nachuna tlakg nakskujnani Jehová. Xaklakpuwanita nakskujnani Jehová putum kilhtamaku, pero uma tlakg kimaʼakgpuwantinilh chuna naktlawa. Akxni kchalh kkinchik tunkun kmalakgachalh kisolicitud xlakata precursor regular xaklitaxtulh. Sucursal xla Canadá kinkgalhtilh chu kiwanilh pi tlakg tlan xwa komo pulana xaktamunulh. Chu chuna ktlawalh 1 xla octubre kata 1950. Titaxtulh akgtum papaʼ, precursor regular klitaxtulh chu kimalakgachaka kKapuskasing xlakata xakmakgtayanalh, akgtum kachikin nema lhuwa kilómetros xwi lata niku xwi kinchik.

 Kkata 1951, sucursal kamaʼakgpuwantinilh natalan tiku xchuwinankgo francés xlakata xʼankgolh tawilakgo kQuebec, xlakata anta chuwinankan uma tachuwin chu ni lhuwa xtatayananin Jehová xwilakgo. Akit kkatsini francés chu inglés, wa xlakata kwa pi nakkan chu kimalakgachaka kRouyn. Anta niti xaklakgapasa, chuna la kkalitachuwinan xapulana, kajwatiya kiwanika niku xakchalh. Pero putum tlan kitaxtulh. Marcel chu akit laktlan amigos klitaxtuw, chu akgtati kata kskujli kQuebec, niku alistalh precursor especial klitaxtulh.

Akxni xaklama kQuebec kiwanika pi xakkalh kclase 26 xla Escuela de Galaad, nema tlawaka kSouth Lansing (Nueva York). Uma lu kimakgapaxuwalh. Escuela kgalhsputli 12 xla febrero kata 1956 chu kimalakgachaka niku la uku litalakgapasa Ghana, b anta kʼÁfrica Occidental. Xlakata tlan xakkalh, pulana xtalakaskin pi xakkgalhilh putum kinkapsnat. Wa xlakata ktaspitli kCanadá, xaklakpuwan pi ni lhuwa semana xʼama makgapala.

Xlakata tlan xakkgalhilh kinkapsnat nema xakmaklakaskin, kkgalhkgalhilh akgtujun papaʼ kToronto. Ama kilhtamaku xakwi kxchik famila Cripps. Xlakan xkgalhikgo chatum xtsumatkan tiku xwanikan Sheila, akit chu xla lu klalakgatiw. Akxni xakkama wani pi xkintatamakgaxtokgli kilakgchilh kivisa o kinkapsnat nema xakmaklakaskin xlakata tlan xakkalh alakatanu kachikin. Sheila chu akit ktlawaniw oración Jehová, chu klaksakwi pi xakama skujnani Jehová alakatanu kachikin pero chuntiya xakamaw lamalakgachaniyaw cartas xlakata tlan xakakxilhwi komo tlan xaktamakgaxtokgwi alistalh. Maski tuwa kmakgkatsiw naklaksakaw uma, titaxtulh kilhtamaku kakxilhwi pi wa uma tuku tlakg tlan xwanit.

Akgtum papaʼ talakaskilh xlakata nakchan kʼAccra niku tapakgsi Ghana, talakaskilh naktawaka ktren, kbarco chu kʼavión. Superintendente de circuito kilimaxtuka chu kiliʼanat xwanit xlilakgatum Ghana, Costa de Marfil chu Togolandia (nema la uku lilakgapaskan Togo). Sucursal kimaxkilh  akgtum putlaw nema tlan xʼan kaxanikawa tiji xlakata tlan xakchalh niku kiliʼanat xwanit. Ankgalhin kiʼakstu xakan chu lu xaklipaxuwa xakkalakgapaxialhnan umakgolh kachikinin.

Akxni xlakgchan asambleas de circuito, ksputat semana lhuwa taskujut xakkgalhi. Ni xakkgalhiyaw Salones de Asamblea. Wa xlakata, natalan xmalakgnukgo matluk chu xliʼakgstitlapakgo palmera xlakata ni xakʼakgchichiw. Xlakata ni xʼanan refrigerador niku namakikan liwat, natalan tiku xlakgayakgo uma taskujut, xlinkgo animales xlakata xkamakgnikgolh chu xkamawikgolh tiku xʼankgo kʼasamblea.

Xmin kilhtamaku kʼasambleas wi tuku xla nema lu xkinkamakgalitsinan. Akgtum kilhtamaku, chatum misionero tiku xwanikan Herb Jennings, c xmastama xtaʼakgchuwin akxni kaj xalan mincha tantum toro nema xtsalanit chu lakapala titaxtulh kxlakatin auditorio. Tala Herb nialh chuwinalh chu toro ni xkatsi niku xʼan. Alistalh kgalhtati natalan chipakgolh uma toro chu maspitkgolh niku xminitancha, chu putum natalan makgapakgxnankgolh.

Xʼitat semana xakmasiya película La Sociedad del Nuevo Mundo en acción kmakgapitsi kachikinin nema lakatsu xwilakgolh. Xakchiwaka maktum sabana kkgantiy kiwi o poste chu anta xakmasiya película. Latamanin lu xlakgatikgo, makgapitsi xlimakgtumku xʼakxilhmakgo akgtum película. Xatapaxuwan xmakgapakgxnankgo akxni xʼakxilhkgo pi makgapitsi latamanin xtamunumakgo. Uma película kamakgtayalh naʼakxilhkgo pi akinin litaxtuyaw akgtum familia kxlikalanka katiyatni.

Akxni xtitaxtunita akgtiy kata lata kimalakgachaka kʼÁfrica, kimaxkika talakaskin nakkan kʼasamblea internacional nema tlawaka kkata 1958 kNueva York. ¡Lu kpaxuwalh akxni kakxilhli Sheila anta! Xla precursora especial xlitaxtu kQuebec chu xminit kʼasamblea anta kNueva York. Xaklamalakgachaniyaw carta, pero komo la uku xaklaʼakxilhmaparaw kkgalhskilh komo xkintatamakgaxtokgputun, chu xla kiwanilh pi tlan. Kmalakgachanilh maktum carta tala Knorr d xlakata nakkgalhskin komo Sheila tlan xʼalh kʼGalaad chu alistalh xmalakgachaka kʼÁfrica, chu tala Knorr wa pi tlan. Akxni Sheila malakgachaka kʼGhana, ktamakgaxtokgwi kʼAccra 3 xla octubre kata 1959. Kakxilhwi pi Jehová kinkasikulunatlawan xlakata wa pulana kwiliw kkilatamatkan.

Kkata 1961 kinkamalakgachakan kCamerún chu kiwanika pi xakmakgtayanalh xlakata xlakkaxwilimaka akgtum xasasti sucursal. Lhuwa taskujut xakkgalhi, chu xlakata na kiwanika pi siervo de sucursal xaklitaxtulh, lhuwa tuku kilikatsinit xwanit. Kkata 1965 kkatsiw pi xakkamaw kgalhiyaw chatum aktsu skgata. Lu tuwa kmakgkatsiw akxni kkatsiw pi natlatni xakkamaw litaxtuyaw. Pero akxni xaklipaxuwamawa pi xakkamaw kgalhiyaw chatum aktsu skgata chu xaklakkaxwilimaw naktaspitaw kCanadá, lu nitlan tuku kinkaʼakgspulan.

Nilh kiskgatakan tiku nina xlakachin. Makuchina kinkawanin pi kgawasa xwanit. Maski titaxtunita tipuxamakaw kata, nila kpatsankgayaw tuku lanit. Pero maski lu nitlan xaklimakgkatsiyaw uma, ktamakgxtakgwi anta niku xakskujnimaw Jehová.

Natalan xalak Camerún xkaputsastalanikan xpalakata ni xmakgtanukgo kpolítica, chu taputsastalanit tlakg xtaliwaka akxni xkalaksakkan mapakgsinanin. Kilhtamaku 13 xla mayo kata 1970 lalh tuku ni xaklakaskinaw pi xlalh: mapakgsinanin malakgachokgokgolh xtaskujutkan xtatayananin Jehová. Malakchuwakgolh xasasti sucursal nema kajku akgkitsis papaʼ xakmaklakaskinitaw. Chu kaj akgtum semana titaxtulh, kinkatamakxtukan putum misioneros kʼuma país. Lu tuwa kmakgkatsiw nakkamakgaxtakgaw natalan xlakata lu xakkapaxkiyaw chu lu xaklilakgaputsayaw la xʼama kakitaxtuni.

Ktamakgxtakgwi akgchaxan papaʼ ksucursal xalak Francia. Chu lata anta, kliskujwi xlakata nakkamakgtayayaw natalan xalak Camerún. Diciembre watiya uma kata, kinkamalakgachakan ksucursal xalak Nigeria. Uma sucursal tsukulh pulalin taskujut kCamerún. Natalan xalak uma kachikin xatapaxuwan kinkamakgamakglhtinankgon chu akglhuwa kata xatapaxuwan kskujnaniw Jehová anta.

Kkata 1973 wi tuku klaksakwi nema lu tuwa kmakgkatsiw. Sheila lhuwata kilhtamaku la xtatatla. Akxni xakwilaw kʼakgtum asamblea kNueva York, Sheila tsukulh tasa chu kiwanilh: «Nialhla ktayani. Lu ktlakgwanit, ankgalhin ktatatla». Liwakaya akgkutati kata lata akxtum xakskujnanimaw Jehová kʼÁfrica Occidental. Lu tlan xaklimakgkatsi xlakata akxtum xakskujnaninitaw Jehová. Pero maski chuna, xtalakaskin wi tuku xaklakgpaliw. Klichuwinaw uma chu ktlawaniw oración Jehová. Alistalh klaksakwi naktaspitaw kCanadá, xlakata anta Sheila tlan xʼalh kpumakuchin. Lu tuwa kmakgkatsiw kmakgxtakgwi chuna la xakskujnanimaw Jehová putum kilhtamaku. Lu kinkamakgalipuwan.

Akxni kchalh kCanadá ktsukulh taskuja chatum amigo tiku ksta putlaw kxnorte Toronto. Krentarliw akgtum cuarto, ktamawaw muebles nema xmaklakaskinkanita chu ni talakaskilh naklaklinaw tumin. Ni lhuwa tuku xakkgalhiputunaw kkilatamatkan xlakata xakskujnaniputumparayaw Jehová putum kilhtamaku. Chu uma ni xlimakgas chuna lalh.

Akgatunu sábado ktsukulh kmakgtayanan niku xtlawamaka Salón de Asambleas kNorval (Ontario). Titaxtulh kilhtamaku, kiwanika komo tlan superintendente de Salón de Asambleas xaklitaxtulh. Chu xlakata Sheila tlakg tlan xmakgkatsi, kmakgamakglhtinaw uma taskujut. Wa xlakata, junio  kkata 1974 kkaw tawilayaw kʼakgtum cuarto nema xkgalhi uma Salón de Asambleas. Lu xakpaxuwayaw xlakata xakskujnanimaparaw Jehová putum kilhtamaku.

Lu tlan pi Sheila tlakg tlan tsukulh makgkatsi. Akgtiy kata alistalh, kiwanika komo tlan superintendente de circuito xaklitaxtulh, chu kwaw pi xakkamaw tlawayaw uma taskujut. Xakkalakgapaxialhnanaw congregaciones xalak Manitoba, nema tapakgsi kCanadá, uma kachikin xlilakgapaskan xlakata lu xlonkgnan. Pero maski lu xlonkgnan, lu tlan xaklimakgkatsiyaw xlakata natalan xalak umakgolh congregaciones tlan xkinkalikatsinikgoyan. Kkatsiniw pi tuku tlakg xlakaskinka, ni wa niku skujnanimaw Jehová, wata wa pi kaxanikawa niku naskujnaniyaw, kamaxkiw Jehová tuku tlakg tlan kgalhiyaw.

Akglhuwata kata lata superintendente de circuito xaklitaxtu. Pero kkata 1978, kinkawanikan pi xakkaw makgtayananaw kBetel xalak Canadá. Alistalh wi tuku kkatsinilh nema lu xlakaskinka, pero lu nitlan kimamakgkatsinilh. Kiskinika pi xakmastalh akgtum taʼakgchuwin nema xmakgapala akgtum hora a itat ktachuwin francés kʼakgtum lu xlakaskinka tamakxtumit nema tlawaka kMontreal. Pero xlakata ni lu tlan kmastalh kintaʼakgchuwin, tiku xkinkgaxmatnimakgo nialh kuenta kintlawanikgolh. Wa xlakata, chatum tala tiku kskujma kDepartamento de Servicio kintachuwinalh. Amacha kilhtamaku ni xakʼakgatekgsa tuku la uku liwana kkatsi: pi akit ni lu kkatsini kmasta taʼakgchuwin. Tuku kiwanilh uma tala lu kinkatsanilh, xtachuna la xkinpatayaka. Xakmakgkatsi pi tanu tanu la xaklakpuwanaw chu pi xla xmalakatsalima tuku xkiwanima, chu kajwatiya xkiwanima tuku nitlan ktlawalh. Klakgmakgalh uma tastakyaw kaj xlakata ni xaktalalin uma tala chu xlakata ni klakgatilh la kiwanilh.

Makgapitsi kilhtamaku alistalh, chatum tala tiku xmakgtapakgsi kComité de sucursal kintachuwinalh. Klitayalh pi nitlan la klikatsilh, chu kwanilh pi lu nitlan xaklimakgkatsi tuku ktlawalh. Alistalh klakgalh tala tiku xkimaxkinit tastakyaw chu kwanilh pi xkintapatilh, chu xla xatapaxuwan kintapatilh. Uma tuku ktitaxtulh wi tuku lu xlakaskinka kimasiyanilh nema nikxni ktipatsankgalh, wa pi lu xlakaskinka nataktujuyaw (Prov. 16:18). Akxni ktlawani oración Jehová, klitachuwinan tuku nitlan ktlawalh chu liwana klakpuwanit pi nialh makgtum chuna ktitlawapa akxni wi tiku nakimaxki akgtum tastakyaw.

Liwaka 40 kata lata kskujma kBetel xalak Canadá, chu lata kkata 1985 kmakgtapakgsi kComité de Sucursal. Febrero kata 2021 nilh kimpuskat chu lu klakapastaka. Nachuna, la uku tlakg ktatatla. Pero xlakata chuntiya xatapaxuwan kskujnanima Jehová, kmakgkatsi pi lakapala titaxtuma kilhtamaku (Ecl. 5:20 nota). Maski ktitaxtunit tuku lu tuwa, tlakg lhuwa tuku klipaxuwanit xlakata kskujnanima Jehová. Xlakata wa pulana kwilinit kkilatamat chu kskujnaninit putum kilhtamaku 70 kata, lu kimakgapaxuwanit. Kskini Jehová pi putum kamanan wa pulana kawilikgolh kxlatamatkan, xlakata liwana kkatsi pi komo chuna natlawakgo, xlakan na napaxuwakgo.