1, 2. 1) ¿Tuku xtitaxtumakgo kstalaninanin Cristo xalak Judea akxni apóstol Pablo kamalakgachanilh tatsokgni? 2) ¿Tuku xlakata lu tlan pi kamalakgachanika uma tatsokgni?

 AKXNI Jesús xninita, kstalaninanin tiku hebreos xlitaxtukgo titaxtukgolh tuku lu tuwa. Akxni nina makgas xlakatsukunit congregación kJerusalén, tsukuka kaputsastalanikan (Hech. 8:1). Chu titaxtulh 20 kata, kstalaninanin Cristo tiku xlamakgo kJudea titaxtukgolh tuku lu tuwa xlakata ni xkgalhikgo tumin, max xlakata xʼananit akgtum lanka tatsinksni uma kilhtamaku (Hech. 11:​27-30). Pero kkata 61, kstalaninanin Cristo xkgalhikgo takaksni, pero uma xʼama talakgpali xlakata nialh makgas xʼamakgo titaxtukgo tuku lu tuwa. Watiya uma kilhtamaku, apóstol Pablo kamalakgachanilh maktum tatsokgni nema Dios malakpuwanilh natsokgwili, chu uma lu xʼama kamakgtaya.

² Lu tlan pi apóstol Pablo kamalakgachanilh tatsokgni kstalaninanin Cristo tiku hebreos xlitaxtukgo, xlakata xtakaksnikan nialh makgas xʼama sputa. Pablo kamaxkilh lu laktlan tastakyaw nema xʼama kamakgtaya natayanikgo tuku tuwa xʼamakgo titaxtukgo. Xʼamaka malakgsputukan Jerusalén chuna la xlichuwinanit Jesús (Luc. 21:20). Xlikana pi Pablo chu kstalaninanin Cristo xalak Judea ni xkatsikgo tuku kilhtamaku xʼama chin lisputni. Pero xkgalhikgojku kilhtamaku xlakata xmatliwakglhkgolh xtakanajlakan chu chuna xtayanikgolh tuku xʼama min (Heb. 10:25; 12:​1, 2).

3. ¿Tuku xlakata na lu tlan nalitamakgtayayaw tuku katsokgnanika hebreos?

³ Nialh makgas, akinin na natitaxtuyaw tuku tlakg tuwa nixawa tuku titaxtukgolh kstalaninanin Cristo tiku hebreos xlitaxtukgo (Mat. 24:21; Apoc. 16:​14, 16). Tastakyaw nema Jehová kamaxkilh na tlan nakinkamakgtayayan. Kalichuwinaw makgapitsi umakgolh tastakyaw.

 «KASTAKWI XLAKATA XAʼAKCHAN NALITAXTUYAW»

4. ¿Tuku tuwa titaxtukgolh kstalaninanin Cristo tiku judíos xwankgonit? (Na kaʼakxilhti dibujo).

⁴ Hebreos tiku apóstol Pablo katsokgnanilh xmakgxtakgkgonit xtakanajlakan judíos chu kstalaninanin Cristo xlitaxtukgonit, chu wa xlakata lhuwa tuku tuwa xtitaxtumakgo. Milh kilhtamaku, judíos xmakgtapakgsikgo kkachikin nema Jehová xlaksaknit. Akglhuwa kata, Jerusalén lu xlakaskinka kachikin xlitaxtunit xlakata anta xtawilakgonit mapakgsinanin tiku Jehová xkalaksaka chu na anta xwi templo. Putum judíos tiku ni xmakgxtakgkgo Jehová xkgalhakgaxmatkgo Limapakgsin nema maxkika Moisés chu limapakgsin nema xpulalinanin takanajla xmasiyakgo. Xkgalhikgo limapakgsin xlakata tuku tlan xwakgolh, xlakata xkaʼakstilichukunika kxuwa xlichixkukan chu xlakata la xkalikatsinikgolh latamanin xalak atanu kachikinin. Pero lata akxni Jesús nilh, Jehová nialh makgamakglhtinalh tamakamastan nema xtlawakan ktemplo. Judíos tiku kstalaninanin Cristo xlitaxtukgonit, lu tuwa makgkatsikgolh nalismanikgo putum uma xlakata xlismanikgonit natlawakgo tuku xwan Limapakgsin (Heb. 10:​1, 4, 10). Asta kstalaninanin Cristo tiku tliwakga xkgalhikgo xtakanajlakan, chuna la apóstol Pedro, tuwa makgkatsikgolh nalismanikgo uma (Hech. 10:​9-14; Gál. 2:​11-14). Pero ni kajwatiya uma, xpulalinanin takanajla na tsukukgolh kaputsastalanikgo kstalaninanin Cristo.

5. ¿Tiku xkaputsastalanimakgo kstalaninanin Cristo?

⁵ Pulaktiy tiku xkaputsastalanimakgo kstalaninanin Cristo xalak Judea. Pulaktum, wa xpulalinanin takanajla tiku xwankgo pi putum kstalaninanin Cristo apóstatas xwankgonit. Atanu, wa tiku xwankgo pi kstalaninanin Cristo xlitaxtukgo, pero xwankgo pi chuntiyaku xlitamakgantaxtit xwanit makgapitsi Limapakgsin nema xmaxkikanit Moisés, max xlakata ni xlakaskinkgo pi xkaputsastalanika (Gál. 6:12). ¿Tuku xʼama kamakgtaya kstalaninanin Cristo ni namakgxtakgkgo Jehová?

6. ¿Tuku kamakgpuwantinilh apóstol Pablo pi xtlawakgolh kstalaninanin Cristo tiku hebreos xwankgonit? (Hebreos 5:​14–6:1).

⁶ Kcarta nema apóstol Pablo kamalakgachanilh  hebreos, kamakgpuwantinilh tlakg nalakgapaskgo xTachuwin Dios (kalikgalhtawakga Hebreos 5:14–6:1). Maklakaskilh Tatsokgni xaʼHebreo xlakata nakalitachuwinan pi chuna la xlakan xkakninanimakgo Jehová tlakg tlan xwanit nixawa la xtlawakgo judíos. a Pablo xkatsi pi komo hebreos tlakg xlakgapaskgolh chu xʼakgatekgskgolh Tatsokgni, xʼama kamakgtaya nalakgapaskgo tuku ni xaxlikana tamasiy chu nalakgmakgankgo, chu chuna ni xtamakgatlinikgolh tuku xaxlikana.

7. ¿Tuku tuwa titaxtuyaw la uku?

⁷ La uku na wilakgo latamanin tiku malakgatumikgo tuku talalakatawaka xlimapakgsin Jehová chu ni lakgatikgo tuku tlawayaw. Lhuwa tiku wankgo pi malakatsaliyaw tuku kanajlayaw chu pi nitlan likatsiyaw xlakata kgalhakgaxmataw xlimapakgsin Biblia xlakata la nalinaw kilatamatkan. Chuna la titaxtu kilhtamaku, latamanin tlakg lakgmakgankgo xtapuwan Jehová (Prov. 17:15). Wa xlakata, lu xlakaskinka pi nakatsiniyaw lakgapasaw tuku ni xaxlikana chu nalakgmakganaw. Ni kamastaw talakaskin pi wi tiku nakinkamaxlajwaniyan chu natlawa pi nialh naskujnaniyaw Jehová (Heb. 13:9).

8. ¿Tuku nakinkamakgtayayan namatliwakglhaw kintakanajlakan?

⁸ Pablo kawanilh kstalaninanin Cristo pi chuntiya xmatliwakglhkgolh xtakanajlakan chu xaʼakchan xlitaxtukgolh, chu akinin nachuna kilitlawatkan. ¿La chuna natlawayaw? Talakaskin tlakg nalakgapasaw xaxlikana chu lu naliskujaw xlakata nalakpuwanaw chuna la Jehová. Chu uma chuntiya kilitlawatkan asta maski tamakamastaninitawa Jehová chu tamununitawa. Wa xlakata, putum akinin ankgalhin kilikgalhtawakgatkan chu kililakputsananitkan xTachuwin Dios, maski makgasa o nina makgas lakgapasaw xaxlikana (Sal. 1:2). Komo nalakkaxwiliyaw kilhtamaku chu hora xlakata kiʼakstukan nakgalhtawakgayaw, namatliwakglhaw kintakanajlakan chuna la lichuwinalh apóstol Pablo (Heb. 11:​1, 6).

TIKU KGALHIKGO TAKANAJLA CHUNTIYA KGALHIKGO LATAMAT

9. ¿Tuku xlakata xtalakaskin pi kstalaninanin Cristo xkgalhikgolh tliwakga takanajla?

⁹ Xtalakaskin pi umakgolh kstalaninanin Cristo tliwakga xkgalhikgolh xtakanajlakan xlakata tlan xlakgtaxtunikgolh tuku xʼama akgspula Judea (Heb. 10:​37-39). Jesús xkawaninit kstalaninanin pi akxni xʼakxilhkgolh pi soldados kstiliwilimakgo Jerusalén, xtsalakgolh kkasipijni. Putum kstalaninanin Cristo xlimakgantaxtitkan xwanit uma tastakyaw, lata tiku xlamakgo kJerusalén chu tiku xlamakgo kxkilhtin Jerusalén, kkapukuxtun (Luc. 21:​20-24). Ama kilhtamaku, akxni soldados xmasputuputunkgo akgtum kachikin, latamanin xputsakgo putatsekgni kkachikin niku xkgalhi xpatsaps, chuna la Jerusalén. Wa xlakata xtalakaskin pi kstalaninanin Cristo xkgalhikgolh tliwakga takanajla xlakata xkgalhakgaxmatkgolh xtastakyaw Jesús.

10. ¿Tuku xʼamakgo tlawakgo kstalaninanin Cristo tiku tliwakga xkgalhikgo xtakanajlakan? (Hebreos 13:17).

¹⁰ Na xtalakaskin pi umakgolh kstalaninanin Cristo xkalipawankgolh natalan tiku Jesús xkamaklakaskima xlakata xpulalinkgolh congregación. Max umakgolh natalan xʼamakgo kawanikgo putum amakgapitsin kstalaninanin Cristo tuku kilhtamaku xlitsalatkan xwanit chu la xʼamakgo tlawakgo (kalikgalhtawakga Hebreos 13:17). Tachuwin xagriego nema maklakaskinkan kʼHebreos 13:17 xlakata nawankan «kakakgalhakgaxpattit», maʼakgatekgsninan pi chatum lataman kgalhakgaxmata tiku wanima  tuku xlitlawat xlakata lipawan, chu nichuna tlawa kaj xlakata chuna xlitlawat. Xtalakaskin pi kstalaninanin Cristo xkalipawankgolh lakgkgolotsin akxni nina xmin lhuwa tapatin. Komo xlakan xatapaxuwan xkgalhakgaxmatnankgolh akxni xʼanan takaksni, tlakg ni tuwa xʼamakgo makgkatsikgo nakgalhakgaxmatnankgo akxni xlalh tuku nitlan.

11. ¿Tuku xlakata talakaskin nakgalhiyaw tliwakga takanajla?

¹¹ Na talakaskin pi nakgalhiyaw tliwakga takanajla chuna la kstalaninanin Cristo tiku Pablo katsokgnanilh. Kkakilhtamaku niku lamaw, latamanin ni kanajlakgo pi talakatsuwima xlisputni kakilhtamaku chu asta kinkalikgalhkgamanankgoyan xlakata akinin chuna kanajlayaw (2 Ped. 3:​3, 4). Nachuna, maski Biblia lhuwa tuku lichuwinan xlakata tuku nala akxni lama nawan lhuwa tapatin, pero lhuwa tuku ni katsiyaw. Talakaskin nakanajlayaw pi Jehová nalimin xlisputni kakilhtamaku akxni xla laklhkawilinit chu nalipawanaw pi Jehová nakinkakuentajtlawayan (Hab. 2:3).

12. ¿Tuku nakinkamakgtayayan nalakgtaxtuyaw akxni lama nawan lhuwa tapatin?

¹² Na talakaskin namatliwakglhaw kintakanajlakan xlakata nalipawanaw pi Jehová maklakaskima «skujni xatalipaw chu xaskgalala» xlakata nakinkapulalinan (Mat. 24:45). Xtachuna la hebreos tiku kstalaninanin Cristo xlitaxtukgo, max kawanika tuku xlitlawatkan xwanit akxni chinkgolh romanos, akinin max na liwana nakinkawanikanan tuku kilitlawatkan nawan xlakata nalakgtaxtuyaw akxni natsuku lhuwa tapatin. Wa xlakata talakaskin pi lata uku nakalipawanaw tiku pulalinkgo xkachikin Jehová. Komo la uku ni kakgalhakgaxmataw chu ni kalipawanaw, tlakg tuwa namakgkatsiyaw nakakgalhakgaxmataw akxni lama nawan lhuwa tapatin.

13. ¿Tuku xlakata lu tlan tastakyaw nema min kʼHebreos 13:5?

¹³ Xtalakaskin pi hebreos tiku kstalaninanin Cristo xwankgonit, xkgalhkgalhikgolh tuku xkalimasiyanilh pi xlitsalatkan xwanit. Pero xlakata nina xchin uma kilhtamaku, xtalakaskin pi kskujnikgolh Jehová chu ni lhuwa tumin xkgalhiputunkgolh (kalikgalhtawakga Hebreos 13:5). Makgapitsi xlakan xtitaxtukgonit talimaxkget chu tatsinkstat (Heb. 10:​32-34). Maski xminit kilhtamaku xatapaxuwan xtayanikgonit tuku tuwa xlakata xlichuwinamakgolh xalaktlan tamakatsinin, makgapitsi tlakg tsukukgolh skujkgo kaj xlakata tlakg xkgalhikgolh tumin chu ni xtitaxtukgolh talimaxkget. Pero maski xkgalhikgolh lhuwa tumin, nila xʼama kalakgmaxtu akxni Jerusalén xʼamaka malakgsputukan (Sant. 5:3). Komo wi tiku lu xpaxki tumin, lu tuwa xʼama makgkatsi natsala chu namakgxtakga xchik chu putum tuku xkgalhi.

14. Komo tliwakga kgalhiyaw kintakanajlakan, ¿tuku nalaksakaw natlawayaw la uku?

¹⁴ Komo liwana kanajlayaw pi xlisputni uma kakilhtamaku talakatsuwima, nakinkamakgtayayan ni napaxkiyaw tumin. Akxni lama nawan lhuwa tapatin, tumin nitu katilitaxtulh. Biblia wan pi latamanin «namakgankgo xplatajkan kkatijin» akxni naʼakxilhkgo pi nipara xplatajkan chu nipara xʼorojkan tlan nakalakgmaxtu akxni Jehová nalimin xtasitsi (Ezeq. 7:19). Wa xlakata, tuku tlakg tlan natlawayaw la uku ni wa pi nalilakgaputsayaw tlakg natlajayaw tumin, wata natlawayaw tuku nakinkamakgtayayan tlakg naskujnaniyaw Jehová. Uma na kilhchanima pi ni nalaklinaw tumin komo ni talakaskin, o ni lhuwa tuku nakgalhiyaw nema natalakaskin nakuentajtlawayaw o namaklakaskinaw chu nialh nakgalhiyaw kilhtamaku xlakata wi atanu tuku natlawayaw. Na kuenta kilitlawatkan xlakata ni lu napaxkiyaw tuku kgalhiyaw (Mat. 6:​19, 24). Max chuna la natalakatsuwitilha xlisputni uma kakilhtamaku, natalakaskin nalimasiyayaw komo tlakg lipawanaw Jehová o komo tlakg lipawanaw tuku xtapalh kgalhiyaw.

 «TALAKASKIN PI WIXIN NATAYANIYATIT»

15. ¿Tuku xlakata lu xlakaskinka pi kstalaninanin Cristo xtayanikgolh?

¹⁵ Chuna la xtitaxtuma kilhtamaku, tlakg tuwa tuku xʼamakgo titaxtukgo kJudea. Wa xlakata, xtalakaskin pi kstalaninanin Cristo xtayanikgolh lhuwa taputsan (Heb. 10:36). Maski makgasa makgapitsi kstalaninanin Cristo xtayanikgonit taputsastalanit, na xwilakgo tiku makgamakglhtinankgolh xaxlikana akxni xwi takaksni. Wa xlakata, Pablo kawanilh pi tlakg xʼamaka kaputsastalanikan chu xlitayanitkan xwanit asta maski xkamakgnika, chuna la Jesús (Heb. 12:4). Xlakata tlakg xtalhuwimakgo kstalaninanin Cristo, lhuwa judíos lu xlisitsimakgo. Nina lhuwa kata xtitaxtunit, akxni Pablo xlichuwinama Dios kJerusalén, makgapitsi latamanin wilinikgolh. Chu liwaka 40 judíos wankgolh pi nitu xʼamakgo wakgo asta akxni xmakgnikgolh Pablo (Hech. 22:22; 23:​12-14). Maski lu lhuwa tiku xkasitsini, xtalakaskin pi umakgolh kstalaninanin Cristo chuntiya xtamakxtumikgolh, xlichuwinankgolh Dios chu xmatliwakglhkgolh xtakanajlakan.

16. ¿La kinkamakgtayayan tatsokgni nema kamalakgachanika hebreos naʼakxilhaw taputsastalanit chuna la xlilat? (Hebreos 12:7).

¹⁶ ¿Tuku xʼama kamakgtaya natayanikgo taputsastalanit? Pablo xkatsi pi xliʼakxilhatkan xwanit uma taputsastalanit chuna la xlilat. Wa xlakata, kawanilh pi akxni Dios masta talakaskin pi wi tiku natitaxtu tuku tuwa, makgtaya tlakg tlan kstalanina Cristo nalitaxtu (kalikgalhtawakga Hebreos 12:7). Xlakan xliʼakxilhatkan xwanit tuku nitlan xtitaxtumakgo la tuku xkamakgtayalh nakgalhikgo laktlan tayat nema lu xlakaskinka. Komo chuna xlakpuwankgolh, tlakg ni tuwa xmakgkatsikgolh natayanikgo tuku tuwa, chu uma xkamakgtayalh tlakg tlan kstalaninanin Cristo xlitaxtukgolh (Heb. 12:11).

17. ¿Tuku xlakata Pablo xkatsi tuku talakaskin xlakata natayanikan taputsastalanit?

¹⁷ Pablo kamakgpuwantinilh kstalaninanin Cristo natayanikgo. Chu xla liwana xkatsi tuku  xlichuwinama. ¿Tuku xlakata? Xlakata makgasa xla xkaputsastalaninit kstalaninanin Cristo, liwana xkatsi tuku xtitaxtumakgo umakgolh natalan. Nachuna, akxni xla nina makgas kstalanina Cristo xlitaxtunit, tipalhuwa la putsastalanika (2 Cor. 11:​23-25). Pablo liwana xkatsi tuku xtalakaskin xlakata natayanikan. Wa xlakata kamalakapastakalh pi ni xʼakstukan xkalipawanka, wata xlipawankgolh Jehová. Wa uma tuku makgtayalh Pablo, wa xlakata tlan wa: «Jehová kimakgtayana. Ni ktipekualh» (Heb. 13:6).

18. ¿Tuku katsiyaw pi nakinkaʼakgspulayan putum akinin, chu tuku kilitlawatkan la uku?

¹⁸ La uku, makgapitsi kinatalankan tayanimakgo taputsastalanit. Tlan natlawayaw oración xpalakatakan xlakata nalimasiyayaw pi kapaxkiyaw, chu min kilhtamaku tlan nakalimakgtayayaw tuku xlakan maklakaskinkgo (Heb. 10:33). Biblia liwana wan: «Putum tiku kakninaniputunkgo Dios kxlatamatkan chuna la kstalaninanin Cristo Jesús, na nakaputsastalanikan» (2 Tim. 3:12). Uma wamputun pi putum akinin wi tuku kilitlawatkan xlakata natayaniyaw akxni nakinkalakgchinan tuku tuwa. Talakaskin lu nalipawanaw Jehová chu nakanajlayaw pi xla nakinkamakgtayayan kaxatukawa tuku natitaxtuyaw. Xla liwana katsi tuku kilhtamaku tlakg tlan nakamakgtaya kskujnin tiku ni makgxtakgkgo (2 Tes. 1:​7, 8).

19. ¿Tuku tlan natlawayaw la uku xlakata natayaniyaw akxni namin lhuwa tapatin? (Na kaʼakxilhti dibujo).

¹⁹ Tatsokgni nema apóstol Pablo kamalakgachanilh hebreos lu kamakgtayalh xlakata xtayanikgolh tuku tuwa titaxtukgolh. Pablo kamakgpuwantinilh tlakg liwana nalakgapaskgo chu naʼakgatekgskgo Tatsokgni. Uma xʼama kamakgtaya skgalalh xtawilakgolh xlakata xkatsikgolh tuku tamasiy xlilakgmakganatkan xwanit xlakata ni xmaxlajwanilh xtakanajlakan. Na kawanilh pi xmatliwakglhkgolh xtakanajlakan xlakata xkgalhakgaxmatkgolh tuku Jesús xkawaninit chu xkakgalhakgaxmatkgolh tiku xpulalinkgo congregación. Chu kamasiyanilh pi tlakg ni tuwa xʼamakgo makgkatsikgo natayanikgo taputsan komo xliʼakxilhkgolh chuna la xlilat: chuna la tuku xʼama kamakgtaya tlakg tlan kstalaninanin Cristo nalitaxtukgo. Komo akinin nastalaniyaw umakgolh tastakyaw nema Dios malakpuwanilh apóstol Pablo natsokgwili, na tlan natayaniyaw asta kxlisputni kakilhtamaku (Heb. 3:14).