1, 2. ¿Tuku xlakata Jehová tlawanit pi tlakg napaxuwayaw akxni wi tuku mastayaw?

 JEHOVÁ kinkamalakatsukin xlakata tlakg napaxuwayaw akxni wi tuku mastayaw nixawa akxni wi tuku makglhtinanaw (Hech. 20:35). Maski paxuwayaw akxni wi tuku kinkamaskiwikanan, tlakg kinkamakgapaxuwayan akxni wi tuku tlawayaw xpalakata amakgapitsin. Chu lu litamakgtayayaw pi Jehová chuna kinkamalakatsukin. ¿Tuku xlakata?

² Xlakata akxni Jehová chuna kinkatlawan, kinkamaxkin tuku maklakaskinaw xlakata tlan napaxuwayaw. Komo nalakputsayaw la tlan nakamakgtayayaw amakgapitsin, tlakg napaxuwayaw. ¡Lu stlan la Jehová kinkamalakatsukinitan! (Sal. 139:14).

3. ¿Tuku xlakata Jehová xapaxuwana Dios?

³ Biblia wan pi tiku mastakgo paxuwakgo, chu wa uma xpalakata Jehová «xapaxuwana Dios» (1 Tim. 1:11). Wa tiku pulana mastalh chu ni anan tiku tlakg masta nixawa xla. Chuna la wa apóstol Pablo: «Xpalakata xla kgalhiyaw latamat chu tatsuwiyaw chu lamaw» (Hech. 17:28). “Putum xalaktlan tamaskiwin” wa Jehová tiku kinkamaxkinitan (Sant. 1:17).

4. ¿Tuku nakinkamakgtayayan tlakg napaxuwayaw?

⁴ ¿Tuku tlan natlawayaw komo tlakg paxuwaputunaw akxni mastayaw? Chuna la nalichuwinanaw kʼuma artículo, tlan nalikatsiyaw chuna la Jehová chu wi tuku xatapaxuwan namastayaw (Efes. 5:1). Na nalichuwinanaw tuku tlan natlawayaw komo makgkatsiyaw pi amakgapitsin ni kinkapaxtikatsinikgoyan tuku tlawayaw xpalakatakan. Putum uma nakinkamakgtayayan chuntiya napaxuwayaw akxni wi tuku mastayaw.

 XATAPAXUWAN KAMASTAW CHUNA LA JEHOVÁ

5. ¿Tuku kinkamaxkiyan Jehová?

⁵ Kalichuwinaw makgapitsi tuku limasiya pi Jehová xatapaxuwan masta. Akgtum liʼakxilhtit, kinkamaxkiyan tuku maklakaskinaw kkilatamatkan. Maski ni laktapalaxla tuku kgalhiyaw, xla kinkamaxkiyan putum tuku maklakaskinaw, chuna la liwat, lhakgat chu niku natawilayaw (Sal. 4:8; Mat. 6:​31-33; 1 Tim. 6:​6-8). ¿Kinkamaxkiyan Jehová tuku maklakaskinaw kaj xlakata chuna xlitlawat? Nichuna. ¿Tuku xlakata chuna tlawa?

6. ¿Tuku kinkamasiyaniyan Mateo 6:​25, 26?

⁶ Jehová kinkamaxkiyan tuku maklakaskinaw xlakata kinkapaxkiyan. Kalichuwinaw tuku wa Jesús anta kMateo 6:​25, 26 (kalikgalhtawakga). K’umakgolh versículos, Jesús kalichuwinalh tsiktsi xalak akgapun xlakata wi tuku xkinkamasiyanin chu wa: «Ni chananankgo, ni makgalanankgo chu ni maʼakgstokgwilikgo tachanan». Alistalh wa: «MinTlatkan xalak akgapun kamawi». Chu kgalhskininalh: «¿Pi ni tlakg xtapalh wixin nixawa xlakan?». Jesús xkinkamasiyaniputunan pi Jehová tlakg xtapalh kinkaliʼakxilhan nixawa animales. Komo Jehová kakuentajtlawa animales, liwana katsiyaw pi na nakinkakuentajtlawayan. Xlakata Jehová kintlatkan chu kinkapaxkiyan, kinkamaxkiyan tuku maklakaskinaw (Sal. 145:16; Mat. 6:32).

7. ¿La tlan nastalaniyaw xliʼakxilhtit Jehová chu wi tuku xatapaxuwan namastayaw? (Na kaʼakxilhti dibujos).

⁷ Chuna la Jehová, akinin na kapaxkiyaw amakgapitsin chu wa xlakata kalimakgtayayaw tuku maklakaskinkgo. Akgtum liʼakxilhtit, ¿lakgapasa chatum tala tiku maklakaskin liwat chu lhakgat? Jehová tlan namaklakaskinan xlakata namakgtayaya uma tala. Akinin xlakskujnin Jehová kinkalilakgapaskanan xlakata wi tuku maskiwinanaw akxni wi tuku xalan la. Kalilakpuwaw tuku lalh kpandemia xla COVID-19. Lhuwa natalan mastakgolh liwat, lhakgat, chu atanu tuku xtamaklakaskin. Nachuna, lhuwa tiku xatapaxuwan mastakgolh xtuminkan xlakata tlan xlakkaxwilika Comités de socorro chu tlan xkamakgtayaka natalan kxlikalanka katiyatni. Putum umakgolh natalan makgantaxtikgolh tuku wan Hebreos 13:16: «Putum kilhtamaku kakalimakgtayatit amakgapitsin tuku kgalhiyatit, xlakata uma xtachuna akgtum tamakamastan, chu lu makgapaxuwa Dios».

8. ¿Tuku tlan tlawayaw xlakata Jehová kinkamaxkiyan litliwakga? (Filipenses 2:13).

⁸ Jehová kinkamaxkiyan litliwakga. Xla kgalhi litliwakga chu xatapaxuwan kamaxki  xlakskujnin tiku ni makgxtakgkgo (kalikgalhtawakga Filipenses 2:13). ¿Minit kilhtamaku skininita litliwakga Dios xlakata ni natlawaya tuku nitlan, natayaniya tuku tuwa o xlakata tlan natlawaya tuku militlawat chali chali? Akxni Jehová maxkin litliwakga, max makgkatsi chuna la apóstol Pablo tiku tsokgwililh: «Putum tlan ktlawa xlakata Dios kimaxki litliwakga» (Filip. 4:13).

9. ¿La tlan nastalaniyaw xliʼakxilhtit Jehová chu namaklakaskinaw kilitliwakgakan? (Na kaʼakxilhti dibujo).

⁹ Akinin nila kamaxkiyaw litliwakga amakgapitsin chuna la tlawa Jehová. Maski chuna, tlan nastalaniyaw xliʼakxilhtit Jehová chu namaklakaskinaw kilitliwakgakan xlakata nakamakgtayayaw amakgapitsin. Akgtum liʼakxilhtit, komo chatum tala lina kata o tatatla, tlan naʼanaw tamawaniyaw tuku maklakaskin o natlawaniyaw makgapitsi taskujut kxchik. Komo matlaniyaw, na tlan xatapaxuwan namakgtayananaw akxni skujkan kPukgalhtawakga o wi tuku lakkaxwilikan. Akxni limaklakaskinaw kilitliwakgakan xlakata natlawayaw umakgolh taskujut, lu kamakgtayayaw kinatalankan.

10. ¿La tlan nakalimakgtayayaw kintachuwinkan amakgapitsin?

¹⁰ Ni kapatsankgaw pi kintachuwinkan kgalhi litliwakga chu tlan nakalimatliwakglhaw amakgapitsin. ¿Lakgapasa chatum tiku xmakgtayalh xalaktlan mintachuwin? Komo chuna, katachuwinanti. Tlan xlakgapaxialhnanti, xtachuwinanti kteléfono, xtlawani maktum tarjeta o xmalakgachani akgtum mensaje. Ni talakaskin lu nalakputsananiya tuku nawaniya, wata kminaku kataxtucha. Maski ni lhuwa tuku nawanaw komo nataxtuyacha kkinakujkan, max wa uma tuku maklakaskima kintalakan xlakata natayani tuku titaxtuma o natatliwakglha (Prov. 12:25; Efes. 4:29).

11. ¿La maklakaskin Jehová xliskgalala?

¹¹ Jehová kinkamaxkiyan liskgalala. Discípulo Santiago tsokgwililh: «Komo wi tiku tsankgani liskgalala, xlilat chuntiya naskini Dios». Chu wampa: «Xlakata Dios putum xatapaxuwan kamaxki chu ni katikilhnilh tiku skinima» (Sant. 1:5; nota). Chuna la wan uma versículo, Jehová ni lakgkatsan xliskgalala, wata xatapaxuwan kamaxki amakgapitsin. Nachuna, “ni xatasitsi” kinkamaxkiyan o “ni kinkakilhniyan”, uma wamputun, pi nikxni kinkalilakawaniyan xlakata maklakaskinaw xtapulalit. Wata kinkamakgpuwantiniyan pi naskiniyaw (Prov. 2:​1-6).

12. ¿La tlan nakamasiyaniyaw amakgapitsin tuku katsiniyaw?

¹² ¿Chu akinin? ¿Na tlan nalikatsiyaw chuna la Jehová chu nakamasiyaniyaw amakgapitsin tuku katsiyaw? (Sal. 32:8). ¡Chuna! Tipalhuwa la chuna natlawayaw. Akgtum liʼakxilhtit, kamasiyaniyaw tiku xalaksasti publicadores la  nalichuwinankgo Dios. Nachuna lakgkgolotsin kamakgtayakgo siervos ministeriales chu amakgapitsi natalan tiku tamunukgonita xlakata nakatsikgo la natlawakgo tuku kalakgayawakan kcongregación. Chu lhuwa natalan lakchixkuwin chu lakpuskatin tiku katsikgo la tlawakan Pukgalhtawakga chu la kuentajtlawakan, kamasiyanikgo amakgapitsin xlakata na namakgtlawakgo taskujut kPukgalhtawakga.

13. ¿La tlan nastalaniyaw xliʼakxilhtit Jehová akxni kamasiyaniyaw amakgapitsin tuku katsiniyaw?

¹³ Akxni kamasiyaniyaw amakgapitsin, kilistalanitkan xliʼakxilhtit Jehová. Chuna la akxilhnitaw, xla xatapaxuwan masta xliskgalala. Akinin na kamasiyaniputunaw amakgapitsin tiku katsinimakgojku. Akinin kamasiyaniyaw amakgapitsin tuku katsiniyaw chu ni lakpuwanaw pi tiku masiyanimaw nakinkamakglhtiyan “kintaskujutkan”, chu na ni lakpuwanaw: «Xʼakstu kakatsinilh, ¡akit na niti kimasiyanilh!». Xlakskujnin Jehová ni chuna kililakpuwanatkan. Ni kajwatiya xatapaxuwan kamasiyaniyaw amakgapitsin tuku katsininitaw, wata liskujaw xlakata liwana namasiyayaw (1 Tes. 2:8). Lipawanaw pi «xlakan liwana nakatsinikgo xlakata na nakamasiyanikgo amakgapitsin» (2 Tim. 2:​1, 2). Komo kimputumkan xatapaxuwan namasiyayaw tuku katsiniyaw, kimputumkan nalitamakgtayayaw chu napaxuwayaw.

AKXNI AMAKGAPITSIN NI XTAPALH LIʼAKXILHKGO TUKU TLAWAYAW

14. ¿Tuku tlawakgo amakgapitsin akxni wi tuku tlawayaw xpalakatakan?

¹⁴ Makglhuwa, akxni wi tuku tlawayaw xpalakatakan amakgapitsin, liwaka tiku kinatalankan, limasiyakgo pi lanka xtapalh liʼakxilhkgo akxni kinkapaxtikatsinikgoyan. Max kinkamalakgachanikgoyan maktum tatsokgni niku kinkawanikgoyan pi kinkapaxtikatsinikgoyan tuku tlawaw xpalakatakan (Col. 3:15). Uma tuku tlawakgo tlakg kinkamakgapaxuwayan.

15. ¿Tuku kililakapastakatkan akxni amakgapitsin ni kinkapaxtikatsinikgoyan tuku tlawayaw xpalakatakan?

¹⁵ Pero na liwana kilikatsitkan pi ni putum kintikapaxtikatsinikgon tuku natlawayaw xpalakatakan. Max nalimaxtuyaw kinkilhtamakujkan, kilitliwakgakan o asta kintuminkan xlakata wi tiku namakgtayayaw chu max alistalh akxilhaw pi uma lataman nipara tsinu xtapalh akxilha tuku tlawaw. Komo chuna nala, ¿tuku nakinkamakgtayayan ni nasitsiyaw? Kalakapastakwi texto niku takilhtinit uma artículo, Hechos 20:35. Tuku kinkamakgapaxuwayan akxni wi tuku mastayaw ni wa komo kinkapaxtikatsinikanan o ni. Tlan chuntiya napaxuwayaw maski amakgapitsin ni xtapalh naliʼakxilhkgo tuku natlawayaw. Kaʼakxilhwi makgapitsi tuku tlan nakinkamakgtayayan.

16. ¿Tuku kililakapastakatkan akxni wi tuku mastayaw?

¹⁶ Kalilakpuwanti pi akxni wi tuku mastaya, likatsipat chuna la Jehová. Xla kamaxki latamanin tuku tlan maski lanka xtapalh liʼakxilhkgo o ni (Mat. 5:​43-48). Jehová kamalaknuni xlakskujnin pi komo namastakgo chu “ni nakgalhkgalhikgo nakamaspitnikan”, “lhuwa tasikulunalin nakgalhikgo” (Luc. 6:35). Wa xlakata, ni kasitsi komo amakgapitsin ni napaxtikatsinikgoyan tuku tlawaya xpalakatakan. Kalakapastakti pi Jehová putum kilhtamaku nasikulunatlawayan xlakata tlawapat tuku tlan xpalakata amakgapitsin chu xlakata “xatapaxuwan mastaya” (2 Cor. 9:7; Prov. 19:17).

17. ¿Tuku nakinkamakgtayayan nastalaniyaw xliʼakxilhtit Jehová? (Lucas 14:​12-14).

¹⁷ Atanu tuku na nakinkamakgtayayan nastalaniyaw xliʼakxilhtit Jehová, wa pi natlawayaw tastakyaw nema min kLucas 14:​12-14 (kalikgalhtawakga). Ni talakgalhin pi tlan nakalikatsiniyaw o wi tuku nakamaskiwiyaw tiku na tlan chuna nakinkalikatsinikgoyan. Pero ¿tuku natlawayaw komo naʼakxilhaw pi wi tuku mastamaw kaj xlakata lakaskinaw pi nachuna kakinkalikatsinikan? Komo chuna,  kastalaniw xtastakyaw Jesús: tlan kakalikatsiniw tiku nila kintikaxokgonikgon tuku tlawayaw xpalakatakan. Komo chuna natlawayaw, stalanimaw xliʼakxilhtit Jehová. Nachuna, komo ni kgalhkgalhiyaw pi wi tuku nakinkamaxkikanan, ankgalhin napaxuwayaw akxni wi tuku namastayaw maski ni nakinkapaxtikatsinikanan.

18. ¿Tuku nakinkamakgtayayan ni nakalakpuwaniyaw tuku nitlan amakgapitsin?

¹⁸ Ni kalakpuwanti pi natalan nitlan likatsikgo (1 Cor. 13:7). Komo wi tuku tlawayaw xpalakata achatum chu nitu kinkawaniyan, tlan xlilakpuwaw umakgolh takgalhskinin: «¿Xlikana ni lhuwa xtapalh liʼakxilha, o kaj patsankgalh nakimpaxtikatsini?». Max wi tuku xlakata lataman ni tlawalh tuku xlakaskinaw. Max wi tiku paxtikatsininankgo tuku tlawaw xpalakatakan pero tuwa makgkatsikgo nawankgo tuku makgkatsikgo. Max amakgapitsi xapulana xkamakgtayakgo amakgapitsin, pero la uku nialhla chuna tlawakgo, wa xlakata maxanankgo pi wi tiku nakamakgtaya. Kaxatukawa tuku xlakata ni kinkapaxtikatsinikgoyan tuku tlawayaw xpalakatakan, tapaxkit nakinkamakgpuwantiniyan ni nalakpuwanaw pi nitlan likatsikgo kinatalankan chu chuntiya xatapaxuwan wi tuku nakamaxkiyaw (Efes. 4:2).

19, 20. ¿Tuku xlakata tlan kitaxtu akxni kgalhkgalhinanaw? (Na kaʼakxilhti dibujos).

¹⁹ Kakgalhkgalhinanti. Mapakgsina Salomón lichuwinalh pulaktum tuku la akxni wi tuku mastayaw: «Kamuju minkaxtalanchu kchuchut, akxni titaxtunita nawan lhuwa kilhtamaku natekgsparaya» (Ecl. 11:1). Umakgolh tachuwin kinkamasiyaniyan pi makgapitsi latamanin max nakinkapaxtikatsinikgoyan akxni titaxtunita «lhuwa kilhtamaku». Kalichuwinaw akgtum liʼakxilhtit nema chuna limasiya.

²⁰ Makgasata, xpuskat chatum superintendente de circuito tsokgnanilh maktum carta chatum tala puskat tiku aku xtamununita chu makgpuwantinilh pi nikxni xmakgxtakgli Jehová. Akgtsayan kata alistalh, tala na tsokgnanilh maktum carta niku xwani: «Ktsokgnaniman uma carta xlakata kwaniputunan pi  lu kimakgtayanita putum umakgolh kata, maski wix ni xkatsiya». Na xwan: «Putum tuku kintsokgnani lu lilakgatit xwanit, pero tuku tlakg lakgchalh kinaku wa texto xalak Biblia nema tsokgwili. Chu uma texto nikxni kpatsankganit». a Akxni xlitachuwinanita makgapitsi tuku nitlan xtitaxtunit, na wanipa: «Xmin kilhtamaku nialh xakskujniputun Jehová, pero xaklakapastaka texto nema kintsokgnani chu uma kimakgtayalh chuntiya xaktayanilh. Umakgolh akgtsayan kata, ni anan atanu tuku tlakg kimakgtayalh». Xpuskat superintendente de circuito max ¡lu paxuwalh akxni makglhtinalh uma carta! Komo wi tuku tlawanitaw xpalakata achatum, max na nakinkapaxtikatsiniyan akxni titaxtunita «lhuwa kilhtamaku».

21. ¿Tuku xlakata lakpuwana pi tlan nakitaxtu komo naliskuja namastaya chuna la tlawa Jehová?

²¹ Chuna la katsininitaw, Jehová lu tlan la kinkamalakatsukinitan: tlakg paxuwayaw akxni mastayaw nixawa akxni makglhtinanaw. Tlan makgkatsiyaw akxni kamakgtayayaw kinatalankan chu lakgatiyaw pi kakinkapaxtikatsinikgon. Pero maski ni nakinkapaxtikatsinikgoyan, napaxuwayaw xlakata katsiyaw pi tlawanitaw tuku tlan. Kalakapastakti pi maski lhuwa tuku namastaya, «Jehová tlan tlakg lhuwa tuku namaxkiyan» (2 Crónicas 25:9). Wa xlakata, Jehová tlakg lhuwa tuku namaxkiyan nixawa tuku wix nakamaxkiya amakgapitsin. Chu lu kinkamakgapaxuwayan akxni katsiyaw pi xla nakinkasikulunatlawayan. Chuna, lu tlan nakitaxtu komo naliskujaw namastayaw chuna la tlawa kinTlatkan xalak akgapun.