Akxni max lakkaxwilipat nakgalhtawakgaya max nalakpuwana: «¿Tuku tlan nakkatsini?». Pero maski max wi tuku wix katsiniputuna, xlakaskinka nalakapastaka pi Jehová max wi atanu tuku xasasti masiyaniputunan. ¿Tuku militlawat xlakata nakatsiya tuku masiyaniputunan Jehová?

Kaskini Jehová liskgalala. Ni kalakpuwanti pi lhuwata tuku katsiya (Prov. 3:​5, 6). Kaskini Jehová pi kamakgtayan naʼakxilha tuku lakaskin pi nakatsiniya uma kilhtamaku (Sant. 1:5).

Kamasta talakaskin pi xTachuwin Dios nalakgpali milatamat. «Xtachuwin Dios xastakna» (Heb. 4:12). Makgatunu akxni likgalhtawakgayaw Biblia, tlan wi tuku xasasti nakatsiniyaw chu tipalhuwa la tlan nakinkamakgtayayan komo nalakapastakaw pi maklakaskinaw tuku Jehová kinkamasiyaniputunan.

Kapaxtikatsini Jehová putum tuku xla maklakaskin xlakata namasiyaniyan. Tuku Jehová kinkamaxkiyan xlakata namatliwakglha kintakanajlakan xtachuna la lu lakgkgama liwat (Is. 25:6). Na kalikgalhtawakga asta tuku lakpuwana pi ni katilakgati. Komo chuna natlawaya, ni kajwatiya katilitamakgtaya, wata na lu nalakgatiya akxni nalikgalhtawakgaya.