Nila nawanaw pi xlakata 70 xtamakgalhtawakgen Jesús ni lakxtum xtawilakgo akxni lakkaxwililh xTaway kiMalanakan xmakgxtakgkgonit o pi Jesús nialh xkamakgamakglhtinan. Jesús kajwatiya xkatatawilaputun xʼapóstoles uma kilhtamaku.

Kgalhkutiy xʼapóstoles chu 70 xtamakgalhtawakgen chuntiya xmakgapaxuwakgo. Xla xkgalhi chalhuwa xtamakgalhtawakgen, pero anta kalaksakxtulh kgalhkutiy lakchixkuwin tiku xʼapóstoles kalimaxtulh (Luc. 6:​12-16). Jesús xwi kʼGalilea akxni «kamamakxtumilh kgalhkutiy apóstoles» chu «kamalakgachalh xlakata nalichuwinankgo xTamapakgsin Dios chu tlan namapaksanankgo» (Luc. 9:​1-6). Alistalh, kJudea, nema xwi ksur, «kalaksakli atanu tutupuxamakaw xtamakgalhtawakgen chu lichatiyun kamalakgachalh» (Luc. 9:51; 10:1). Wa xlakata, kaxanikawa niku xlichuwinankan xtamakatsinin Jesús, xʼanankgo kstalaninanin.

Judíos tiku kstalaninanin Jesús xlitaxtukgo, chuntiya xkatatlawakgo Pascua xfamiliajkan akgatunu kata (Éx. 12:​6-11, 17-20). Akxni nialh makgas xtsankga namakgnikan, Jesús kataʼalh kJerusalén xʼapóstoles. Pero xla ni kaskinilh putum xtamakgalhtawakgen xalak Judea, kʼGalilea chu kPerea pi akxtum xtatlawakgolh Pascua. Uma limasiya pi Jesús kajwatiya xkatatawilaputun xʼapóstoles uma kilhtamaku. Wa xlakata kawanilh: «Lu klipaxuwa xlakata kkatawaman uma taway xla Pascua akxni nina kpatinan» (Luc. 22:15).

¿Chu tuku xlakata Jesús kajwatiya xkatatawilaputun kgalhkutiy xʼapóstoles? Xlakata Jesús nialh makgas xʼamaka makgnikan chuna la «xBorrego Dios, tiku xapa xtalakgalhinkan latamanin» (Juan 1:29). Xʼama niy kJerusalén, niku xtlawanikan tamakamastan Dios lata makgasa. Borrego nema israelitas wakgolh akxni Jehová kalakgmaxtulh kʼEgipto, xkamalakapastaka tuku Jehová xtlawanit xpalakatakan. Pero xtamakamastan Jesús, tlakg xʼamaw litamakgtayayaw, xʼama kinkalakgmaxtuyan ktalakgalhin chu klinin (1 Cor. 5:​7, 8). Xtamakamastan Jesús xʼama kamaxki talakaskin kgalhkutiy xʼapóstoles pi xmakgtayanankgolh xlakata xlakatsukulh congregación xla kstalaninanin Cristo (Efes. 2:​20-22). Biblia lichuwinan pi xasanto kachikin Jerusalén, kilhtsukunit «kxkgalhni akgkutiy chiwix, chu kʼumakgolh chiwix katsokgwilikanit akgkutiy xtukuwanikan kgalhkutiy xʼapóstoles Borrego» (Apoc. 21:​10-14). Xʼapóstoles Jesús wi tuku lu xlakaskinka xʼamakgo tlawakgo xlakata xmakgtayanankgolh xkgantaxtulh xtalakaskin Dios. Putum uma limasiya tuku xlakata Jesús akxtum xkatatawilaputun xʼapóstoles xlakata xkatatlawalh xaʼawatiya Pascua chu xlakkaxwililh xTaway kiMalanakan.

Maski 70 xtamakgalhtawakgen chu putum amakgapitsi kstalaninanin ni akxtum xtawilakgo uma kilhtamaku, putum tiku nikxni xmakgxtakgkgolh, xʼamakgo litamakgtayakgo xTaway kiMalanakan. ¿Tuku xlakata? Xlakata putum kstalaninanin Cristo tiku xatalaksakni, xʼamakgo makgtapakgsikgo kTamapakgsin nema Jesús kalitachuwinalh xʼapóstoles uma katsisni (Luc. 22:​29, 30).