Kalimasiyanika tapaxkit
YOMARA, Marcelo chu Hiver, kgalhtutu linatalan tiku nila akxilhkgo nema lamakgo kʼakgtum aktsu kachikin xalak Guatemala. Yomara tsukulh katakgalhtawakga xtatayananin Jehová, chu alistalh chatiy xnatalan lakgkgawasan na tsukukgolh kgalhtawakgakgo. Pero xʼanan akgtum taʼakglhuwit: ni xkatsinikgo xkgalhtawakgakgo kxabraille. Wa xlakata tiku xkalimakgalhtawakgema Biblia, xkalikgalhtawakgani párrafos chu textos xalak Biblia.
Na lu tuwa xwanit naʼankgo ktamakxtumit. Tipuxam minuto xlichankan kPukgalhtawakga nema tlakg lakatsu xwi chu xlakan nila xʼakstukan xʼankgolh asta anta. Wa xlakata, natalan xalak congregación xlakkaxwilikgo xlakata nakalinkgo ktamakxtumit. Chu akxni xkgalhtutukan tsukukgolh matitaxtikgo liʼakxilhtit ktamakxtumit xʼitat semana, natalan xkamakgtayakgo xlakata kalakaniya o de memoria xkatsinikgolh tuku nawankgo.
Mayo kkata 2019, xtatayananin Jehová tsukukgolh tlawakgo tamakxtumit kxkachikinkan umakgolh linatalan, chu akgtum tamakgaxtokgat tiku precursores regulares xlitaxtukgo, ankgolh makgtayanankgo kʼuma kachikin. Uma tamakgaxtokgat lu liskujli xlakata nakamasiyani umakgolh linatalan nakatsinikgo nakgalhtawakgakgo chu natsokgnankgo kxabraille, maski xlakan na ni xkatsinikgo. Wa xlakata ankgolh kʼakgtum biblioteca xlakata nakatsinikgo la likgalhtawakgakan chu tsokgnankan kxabraille chu la xkamasiyanikgolh amakgapitsin.
Marcelo mastama xtakgalhtin kʼakgtum tamakxtumit.
Titaxtulh makgapitsi papaʼ umakgolh kgalhtutu linatalan tlantiya xlikgalhtawakganankgo kxabraille, chu uma kamakgtayalh tlakg nastaka xtakanajlakan. a La uku, Yomara, Marcelo chu Hiver precursores regulares litaxtukgo, chu Marcelo siervo ministerial litaxtu. Lu lhuwa kilhtamaku limaxtukgo xlakata nalichuwinankgo Dios akgatunu semana. Xlakan lu paxuwakgo chu asta tlawakgo pi amakgapitsin na napaxuwakgo.
Umakgolh kgalhtutu linatalan, lu paxtikatsinikgo putum tuku congregación tlawanit xpalakatakan chu tapaxkit nema kalimasiyanikgonit. Yomara wan: «Lata akxni kkalakgapaswi, natalan kinkalimasiyanikgonitan xaxlikana tapaxkit». Chu Marcelo wan: «Kkgalhiyaw xatlan amigos kkincongregacionkan chu kmakgtapakgsiyaw kʼakgtum familia kxlikalanka katiyatni nema makxtum wilakgo xlakata lapaxkikgo». Yomara chu xnatalan lu kgalhkgalhimakgo kilhtamaku akxni tlan nalakawanankgo chu naʼakxilhkgo pi Katiyatni akgtum paraíso nawan (Sal. 37:10, 11; Is. 35:5).
a Folleto nema wanikan Aprenda a leer braille katlawanikanit latamanin tiku ni lakawanankgo o ni liwana akxilhkgo xlakata tlan nalikgalhtawakgakgo chu natsokgnankgo kxabraille.
Max na nalakgatiya uma
KTLAWAYAW LIKGALHTAWAKGA
Videoclip: «Komo ni xtlawaka ni xakkatsilh tuku xaktlawalh»
Kakatsi tuku wan tiku ni lakawanan xlakata la makgtayanit pi kgalhi Biblia kbraille.
