1. ¿Tuku xlakata wix paxtikatsiniya Jehová xlakata kinkamaskiwin Biblia?

 ¡LU PAXTIKATSINIYAW Jehová xlakata kinkamaskiwinitan Biblia! Anta, xla kinkamaxkiyan xalaktlan tastakyaw nema kinkamakgtayayan nakatsiyaw tuku natlawayaw akxni kgalhiyaw taʼakglhuwit. Na kinkamaxkiyan akgtum lu xatlan takgalhkgalhin xlakata kilhtamaku nema aku mima. Chu tuku tlakg xlakaskinka, kinkamasiyaniyan la likatsi Jehová. Akxni lilakpuwanaw xtayat Jehová lu tlan kinkamamakgkatsiniyan. Chu uma kinkamakgtayayan tlakg natalakatsuwiniputunaw chu xʼamigos nalitaxtuputunaw (Sal. 25:14).

2. ¿Tuku tlawanit Jehová xlakata nakatsiniyaw xpalakata?

² Jehová lakaskin pi latamanin kalakgapaskgolh. Makgasa, xla maklakaskilh tamanixnat, talakawan chu asta ángeles xlakata nakatsiyaw xpalakata (Núm. 12:6; Hech. 10:3, 4). Pero komo putum uma ni xtsokgwilika, nila xkatsiw la uku. Wa xlakata, Jehová kalimapakgsilh makgapitsi lakchixkuwin pi xtsokgwilikgolh «kmaktum libro» tuku xla xlakaskin pi xkatsiw (Jer. 30:2). Tlan nalipawanaw pi xla lu liwana makatsininalh putum uma, xlakata «xtiji xaxlikana Dios lu xaʼakgstitum» (Sal. 18:30).

3. ¿Tuku tlawalh Jehová xlakata xkgalhiw Biblia asta la uku? (Isaías 40:8).

³ (Kalikgalhtawakga Isaías 40:8). Chuna la titaxtunit akglhuwa mil kata, xTachuwin Dios lu kamakgtayanit xlakskujnin xlakata nakatsikgo tuku natlawakgo. Pero xlakata Biblia tsokgwilika niku lakapala lakxla, ¿la tlan makgapalanit akglhuwa mil kata? Ni anan akgtum xaʼoriginal tatsokgni. Pero Jehová tlawalh pi xtlawaka xacopias xla uma xaSanto Tatsokgni. Tiku lhkaxtukgolh makglakgalhinanin xwankgonit, pero lu liwana tlawakgolh xtaskujutkan. Akxni xlichuwinama Tatsokgni xaHebreo, chatum tiku lu katsini xlakata uma, wa:  «Tlan nawanaw pi ni anan atanu xamakgan tatsokgni nema lu liwana lhkaxtukanit nixawa umakgolh». Maski lakchixkuwin tiku tsokgwilikgolh makglakgalhinanin xwankgonit chu tsokgwilikgolh niku lakapala lakxla, liwana tasiya pi tuku likgalhtawakgayaw kBiblia la uku, liwana masiya xtalakapastakni tiku matsokgninalh, Jehová.

4. ¿Tuku nalichuwinanaw kʼuma artículo?

⁴ Wa Jehová masta «putum xatlan chu nema xalaktlan tamaskiwin», chu Biblia akgtum tlakg xatlan tamaskiwin nema xla kinkamaxkinitan (Sant. 1:17). Akxni kinkamaxkikanan akgtum tamaskiwin lhuwa tuku kinkamasiyaniyan xpalakata tiku kinkamaxkin. Kinkamasiyaniyan komo xlikana kinkalakgapasan chu katsi tuku maklakaskinaw. Xtachuna la uma, akxni likgalhtawakgayaw Biblia, lhuwa tuku kinkamasiyaniyan xlakata Jehová. Akxilhaw pi xla liwana kinkalakgapasan chu katsi tuku maklakaskinaw. Kʼuma artículo nalichuwinanaw pulaktutu xtayat Jehová nema liwana litasiya anta kBiblia: xliskgalala, la xliʼakgstitum chu xtapaxkit. Pulana kalichuwinaw tuku wan Biblia xlakata xliskgalala Dios.

5. ¿Tuku limasiya pi Biblia litsama xliskgalala Dios?

⁵ Jehová katsi pi maklakaskinaw xalaktlan xtastakyaw. Wa xlakata kinkamaskiwinitan Biblia, nema litsama xliskgalala. Xtastakyaw lu makgtayanan. Biblia tlan kalakgpalini xlatamatkan latamanin. Akxni Moisés tsokgwililh xapulana libros xalak Biblia, kawanilh israelitas, xkachikin Dios: «Umakgolh tachuwin wi tuku kilhchanima mimpalakatakan, kilhchanima milatamatkan» (Deut. 32:47). Tiku xkgalhakgaxmatkgolh tuku wan Tatsokgni xkgalhikgolh tapaxuwan chu tlan xkakitaxtunilh kxlatamatkan (Sal. 1:2, 3). Maski Biblia makgasata kilhtamaku tsokgwilikanit, chuntiya tlan kalakgpalini xlatamatkan latamanin. Akgtum liʼakxilhtit, anta kserie de artículos «Biblia kalakgpalinilh xlatamatkan», nema wi kjw.org, natekgsa xbiografíaskan tiku lakgpalikgolh xlatamatkan akxni stalanikgolh xtastakyaw Biblia (1 Tes. 2:13).

6. ¿Tuku xlakata wanaw pi ni anan atanu libro nema xtachuna Biblia?

⁶ Biblia maktum libro nema nitu xtachuna. ¿Tuku xlakata? Xlakata wa Jehová matlawinalh, Tiku kgalhi putum litliwakga, tiku nikxni niy chu xliskgalala nitu tuku xtachuna. Anan lhuwa libros nema chuntiya kalikgalhtawakgakan maski nialhti lama tiku tsokgli. Pero min kilhtamaku, xtastakyaw umakgolh libros nialh makgtayanan. Pero xalaktlan tastakyaw nema limin Biblia chuntiya makgtayanan, kamakgtayanit latamanin tiku latamakgonit ktanu tanu kilhtamaku. Akxni likgalhtawakgayaw uma xasanto libro chu lilakpuwanaw xtastakyaw, tiku matsokgninalh kinkamaxkiyan xʼespíritu santo xlakata tlan nalilatamayaw tuku likgalhtawakgayaw (Sal. 119:27; Mal. 3:16; Heb. 4:12). Kalilakpuwanti, tiku matsokgninalh Biblia lu makgtayaputunan. ¿Ni xlikana pi uma kinkamakgpuwantiniyan ankgalhin nalikgalhtawakgayaw Biblia?

7. ¿La makgtayanalh Biblia xlakata xkachikin Dios makxtum xtawilakgolh makgasa?

⁷ Atanu tuku limasiya pi Biblia litsama xliskgalala Dios wa pi kamakgtaya xkachikin makxtum natawilakgo. Akxni israelitas tanukgolh kTiyat nema xKawanikanit pi Nakamaxkikan, lakatanu lakatanu niku ankgolh latamakgo. Makgapitsi skitinanin litaxtukgolh, amakgapitsi xkuentajtlawakgo wakax chu borregos chu amakgapitsi xchananankgo. Wa xlakata israelitas tiku xlamakgo klakatum kachikin max tlan xtikapatsankgakgolh tiku xlamakgo kʼalakatanu kachikin. Pero Jehová tlawalh pi ankgalhin xtamakxtumikgolh xlakata xkgaxmatkgolh  xTachuwin chu xlakata tlakg xkatsinikgolh (Deut. 31:10-13; Neh. 8:2, 8, 18). Kalilakpuwanti la xmakgkatsi chatum israelita akxni xchan kJerusalén chu xkatatanokglha lhuwa israelitas tiku xminkgonitancha ktanu tanu kachikinin xlakata nakakninanikgo Jehová. Wa uma tuku Jehová tlawalh xlakata makxtum xtawilakgolh. Alistalh, kxapulana siglo, lakkaxwilika congregación xla kstalaninanin Cristo. Anta xmakgtanumakgo lakchixkuwin chu lakpuskatin tiku xkgalhikgo tumin chu tiku ni xkgalhikgo tumin, chu tanu tanu tachuwin xchuwinankgo. Pero xlakata xputumkan xpaxkikgo tuku xlichuwinan Tatsokgni, makxtum kskujnanikgo Jehová. Asta xalaksasti tiku xmakgtapakgsikgo kcongregación tlan xʼakgatekgskgo tuku xkilhchanima Biblia xlakata amakgapitsin kstalaninanin Cristo xkawanikgo chu xlakata xtamakxtumikgo (Hech. 2:42; 8:30, 31).

8. ¿La maklakaskin Jehová xTachuwin, Biblia, xlakata makxtum nakawili xkachikin la uku?

⁸ La uku, Jehová chuntiya maklakaskima Biblia xlakata nakamasiyani xkachikin chu makxtum nakawili. Anta takilhtiya putum tuku matliwakglha kintakanajlakan. Kstalaninanin Cristo ankgalhin anaw ktamakxtumit chu kʼasambleas, niku likgalhtawakgayaw Biblia, lakputsananiyaw chu tlakg katsiniyaw xpalakata. Uma liwana limasiya pi Jehová limaklakaskima Biblia xlakata natlawa pi kskujnin «akxtum naskujnanikgo» (Sof. 3:9).

9. ¿Tuku tayat tamaklakaskin xlakata tlan naʼakgatekgsaw tuku lichuwinan Biblia? (Lucas 10:21).

 ⁹ Kalichuwinaw atanu tuku limasiya xliskgalala Jehová. Xla matsokgninalh Biblia xlakata kajwatiya latamanin tiku taktujukgo tlan xʼakgatekgskgolh (kalikgalhtawakga Lucas 10:21). Biblia maktum libro nema tlan likgalhtawakgakgo latamanin kxlikalanka katiyatni. Chatum tiku lu katsini lichuwinalh «pi ni kajwatiya maktum libro nema tlakg likgalhtawakgakanit, wata nachuna lu lakputsananikanit». Pero kajwatiya latamanin tiku taktujukgo tlan akgatekgskgo chu tlan lilatamakgo tuku lichuwinan (2 Cor. 3:15, 16).

10. ¿Tuku atanu limasiya pi Biblia litsama xliskgalala Jehová?

¹⁰ Kaʼakxilhwi atanu tuku limasiya pi Biblia litsama xliskgalala Jehová. Xla ni kajwatiya limaklakaskin Tatsokgni xlakata nakamasiyani xkachikin, wata na maklakaskin xlakata tlan nakinkamamakgkatsiniyan kinchatunukan. Akxni likgalhtawakgayaw xTachuwin, akxilhaw pi xla lu kinkalilakgaputsayan (Is. 30:21). Akxni xkgalhiyaw akgtum taʼakglhuwit, ¿likgalhtawakgaw akgtum texto nema makgkatsiw pi wa tuku xmaklakaskimaw? Pero komo Biblia katsokgnanika lhuwa millones latamanin, ¿tuku xlakata tlan kamakgtaya chatunu chatunu latamanin chu limin tastakyaw nema maklakaskinkgo? Uma chuna la xlakata tiku matsokgninalh Biblia wa tiku tlakg xaskgalala nema anan (2 Tim. 3:16, 17).

11. ¿La limasiyalh Dios pi ni laksakpaxkinan akxni matsokgninalh Biblia?

¹¹ Atanu tayat nema Jehová kgalhi wa pi lu xaʼakgstitum (Deut. 32:4). Uma tayat tlawa pi ni nalaksakpaxkinan (Hech. 10:34, 35; Rom. 2:11). Tachuwin nema laksakli xlakata xtsokgwilika Biblia chuna limasiya. Xapulana 39 libros atsinu ni putum tsokgwilika ktachuwin hebreo, akgtum tachuwin nema xkachikin Dios tlan xʼakgatekgskgo. Pero kxkilhtamakujkan xapulana kstalaninanin Cristo lhuwa latamanin xchuwinankgo griego. Wa xlakata xaʼawatiya 27 libros xalak Biblia tsokgwilika kʼuma tachuwin. Jehová ni kajwatiya pulaktum tachuwin laksakli xlakata xtsokgwilika xTachuwin. La uku, atsinu max ni chan 8,000 millones tiku lamaw kKatiyatni tanu tanu tachuwin chuwinanaw. Wa xlakata, ¿tuku tlawa pi tlan nalakgapasaw Jehová?

12. ¿La kgantaxtunit Daniel 12:4 kʼuma xaʼawatiya kilhtamaku?

¹² Jehová maklakaskilh palakachuwina Daniel xlakata xmalaknulh pi kxaʼawatiya kilhtamaku «xaxlikana takatsin» xʼama talhuwi, uma wamputun, pi lhuwa latamanin xʼamakgo akgatekgskgo tuku wan Biblia (kalikgalhtawakga Daniel 12:4). Pulaktum tuku makgtayananit nakgantaxtu uma wa pi matitaxtikanit, tlawakanit chu malakgatumikanit lhuwa Biblia chu likgalhtawakga nema anta takilhtiyakgonit. Tlan nawanaw pi Biblia wa libro nema tlakg matitaxtikanit kʼatanu tachuwin chu malakgatumikanit chuna la titaxtunit kilhtamaku. Lhuwa Biblia nema kamatitaxtikanit kʼatanu tachuwin, la uku lu tapalaxla. Pero xkachikin Jehová matitaxtinit Biblia xamaktuminika o ni xamaktuminika, kliwaka 240 tanu tanu tachuwin, chu putum latamanin tlan nakgalhikgo uma Biblia chu ni taxokgo. ¿Chu tuku kitaxtunit? Millones latamanin xalak tanu tanu kachikinin makgamakglhtinamakgo «xatlan tamakatsinin xla Tamapakgsin» uma kilhtamaku akxni nina min lisputni (Mat. 24:14). Jehová chatum Dios tiku xaʼakgstitum chu lakaskin pi lhuwa latamanin kalakgapaskgolh akxni nalikgalhtawakgakgo xTachuwin. ¿Tuku makgpuwantini Jehová chuna natlawa? Wa tapaxkit nema kinkakgalhiniyan.

13. ¿Tuku xlakata wanaw pi Biblia limasiya xtapaxkit Dios? (Juan 21:25).

¹³ Biblia na limasiya xtayat Jehová nema tlakg xlakaskinka: tapaxkit (1 Juan 4:8). Akgtum liʼakxilhtit, kalilakpuwaw tuku Dios matsokgninalh kBiblia chu tuku ni. Xla kinkamaxkiyan tuku maklakaskinaw xlakata tlan xʼamigos nawanaw, xlakata nakgalhiyaw xatapaxuwan latamat chu tlan nalatamayaw putum kilhtamaku. Pero xlakata Jehová lu kinkapaxkiyan, ni kinkamakatsinin tuku ni maklakaskinaw chu tuku nila xʼakgatekgswi (kalikgalhtawakga Juan 21:25).

14. ¿Tuku atanu tekgsaw kBiblia nema limasiya xtapaxkit Dios?

¹⁴ Jehová na kinkalimasiyaniyan xtapaxkit akxni kinkatachuwinanan. Xla ni wilinit kBiblia akgtum lista niku kinkawaniyan pulakatunu tuku kilitlawatkan. Wata limaklakaskin tuku titaxtukgolh latamanin xalamakgasa, kinkalitachuwinanan tuku aku nala chu kinkamaxkiyan tastakyaw nema kinkamakgtayayan nalaksakaw tuku tlan. Putum uma tuku lichuwinan Biblia kinkamakgpuwantiniyan napaxkiyaw Dios chu nakgalhakgaxmataw xliputum kinakujkan.

15. 1) ¿La limasiya Biblia pi Jehová lu kinkalilakgaputsayan? 2) Chuna la tasiya kdibujo, ¿tiku lilakpuwama aktsu tsumat, tala kgawasa chu tala tiku lina kata? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia limasiya pi Jehová lu kinkapaxkiyan. Katsiyaw uma xlakata Biblia lichuwinan tuku makgkatsikgolh kskujnin xalamakgasa. Akxni likgalhtawakgayaw tuku titaxtukgolh akxilhaw pi “nachuna xmakgkatsikgo chuna la akinin” (Sant. 5:17). Chu tuku tlakg xlakaskinka, akxni akxilhaw la Jehová kalikatsinilh latamanin  tiku xtachuna la akinin, tlakg liwana akgatekgsaw pi «Jehová lu xapaxkina chu xalakgalhamana» (Sant. 5:11).

16. Akxni likgalhtawakgayaw kBiblia xpalakatakan tiku tlawakgolh talakgalhin, ¿tuku kinkamasiyaniyan xpalakata Jehová? (Isaías 55:7).

¹⁶ Anta kBiblia tekgsaw atanu tuku limasiya pi Jehová kinkapaxkiyan. Biblia liwana kinkawaniyan pi Dios ni kamakgxtakga kskujnin akxni tlawakgo tuku nitlan. Israelitas makglhuwa lakgalhinankgolh kxlakatin Jehová, pero akxni xlikana nitlan xlimakgkatsikgo xtalakgalhinkan xla xkatapati (kalikgalhtawakga Isaías 55:7). Kstalaninanin Cristo kxapulana siglo na liwana xkatsikgo la xlilhuwa xkapaxki Jehová. Akgtum liʼakxilhtit, Dios malakpuwanilh apóstol Pablo pi xkamakgpuwantinilh kstalaninanin Cristo pi xtapatikgolh chu tlan xmamakgkatsinikgolh chatum chixku tiku nitlan xlimakgkatsi talakgxtumit xalimaxana nema xtlawanit (2 Cor. 2:6, 7; 1 Cor. 5:1-5). Lu kaks kinkamalakawaniyan akxni katsiyaw pi Jehová ni xkamakgxtakga kskujnin akxni xtlawakgo tuku nitlan. Wata xkalimasiyani tapaxkit, xkamakgtaya, xkastakyawa chu xkawani pi xlakgtaspitparakgolh. Chu xla kinkamalaknuniyan pi nachuna natlawa xpalakata kaxatikawa tiku la uku tlawa tuku nitlan pero xlikana nitlan limakgkatsi tuku tlawanit (Sant. 4:8-10).

17. ¿Tuku xlakata Biblia akgtum tamaskiwin nema lu lanka xtapalh?

¹⁷ Jehová kinkamaxkinitan akgtum lu tlan tamaskiwin. ¿Tuku xlakata xTachuwin lu lanka xtapalh? Xlakata kinkamasiyaniyan pi Dios xaʼakgstitum, lu xaskgalala chu lu kinkapaxkiyan. Nachuna, uma libro limasiya pi Jehová lakaskin kalakgapaswi chu xʼamigos kalitaxtuw.

18. ¿La limasiyayaw pi paxtikatsiniyaw Dios pi kinkamaxkin Biblia?

¹⁸ Putum kilhtamaku kililakapastakatkan pi xTachuwin Dios akgtum “xatlan tamaskiwin” nema xla kinkamaxkinitan (Sant. 1:17). Wa xlakata ankgalhin kalimasiyaniw Jehová la xlilhuwa paxtikatsiniyaw xlakata uma tamaskiwin. Akxni pulana tlawayaw oración chu alistalh likgalhtawakgayaw Biblia chu lilakpuwanaw, limasiyayaw pi paxtikatsiniyaw. Komo chuna natlawayaw, tiku matsokgninalh Biblia lu nakinkasikulunatlawayan chu “natekgsaw xtakatsin Dios” (Prov. 2:5).